Waghri Booli Bible
ಆದಿಕಾಂಡ 33
ಯಾಕೋಬ ಏಸಾವನ ಮಳ್ಯೊತೆ
ಯಾಕೋಬ ಡೋಳ ಪಾಡಿನ್ ದೇಖಾನಿ ವಖ್ಹ್‌ತೆ, ಏಸಾವ ಚಾರ್‌ಖ್ಹೊ ಜ಼ಣ ಪರ್ಖ್ಹಾ ಖ್ಹಮೇದ್‌ ವಳ್ಯಾವಾತೆ ದೇಖ್ಯೊ. ತದೆ ಇನೆ ಲೇಯನಾಬಿ ರಾಹೇಲ್‌ನಬಿ ಬೇಜ಼ಣಿ ದಾಸಿಯೇನಾಬಿ ಇವ್ಣ ಇವ್ಣ ಲಡ್ಕಾವ್ನ ದಿದೊ. ಇವ್ಣುನ ಅಲಕ್‌ ಅಲಕ್‌ಕರಿನ್ ಅಗಾಡಿ ದಾಸಿಯೇನಾಬಿ ಇವ್ಣ ಲಡ್ಕಾವ್‌ನಾಬಿ ಇವ್ಣ ಪೀಠೆ ಲೇಯನಾಬಿ ಇನ ಲಡ್ಕಾವ್ನಬಿ ಪಾಛ಼ಳ್‌ಥು ರಾಹೇಲ್‍ನಾಬಿ ಯೋಸೇಫನಾಬಿ ಭೀರಾಖ್ಯೊ. ಅಜು಼ ಯೋಸ್‌ ಇವ್ಣ ಅಗಾಡಿ ಜೈ಼ನ್‌ ಇನ ಭೈನ ಖನ್ನೆ ಆವಾನಿ ವಖ್ಹ್‌ತೆ ಖ್ಹಾತ್‌ಹಲ್ಲ ಜ಼ಮೀನ್‌ಲಗು ಮುಡ್‌ಕ್ಯು ಝು಼ಕೈನ್‌ ಖ್ಹಲಾಮ್ ಕರ‍್ಯೊ. ತದೆ ಏಸಾವ ಇನ ಮಳಾನಖ್ಹಾಜೆ ನಾಶಿ ಆಯಿನ್ ಇನ ಗಳುಬಥೈನ್‌ ಬುಚ್ಚಾ಼ ಕರೀನ್ ಇವ್ಣೆ ಭೇಜ಼ಣ ರೋಯ. ಇನಾಪರ್ ಏಸಾವ ಡೋಳಪಾಡಿ ದೇಖಿನ್‌ ಯೊ ತಯೇಡವ್‌ನಾಬಿ ಲಡ್ಕಾವ್‌ನಾಬಿ ದೇಖಿನ್‌, “ತಾರಿ ಜೋ಼ಡ್ಮ ಛಾ಼ತೆ ಅದ್ಮಿಖ್ಹಾರು ಕೋಣ್‌?” ಕರಿ ಬೋಲಖ್ಹತರ್ ಯಾಕೋಬನೆ ಇನ, “ದೇವ್‌ನೆ ತಾರ ಸೇವಕ್‌ನ ಗೋರ್‌ಥಿ ದಿದೋತೆ ಲಡ್ಕಾಸ್‌ ಅವ್ಣೆ” ಕರಿ ಬೊಲ್ಯೊ. ತದೆ ಇನಿ ದಾಸಿ ಭೇ ಜ಼ಣೀಬಿ ಇವ್ಣ ಲಡ್ಕಖ್ಹಮೇದ್‌ ಐನ್‌ ಆಡ್‌ಪಡ್ಯು. ಇನಾಪರ್ ಲೇಯ ಇನ ಲಡ್ಕಾನಿ ಜೋ಼ಡ್ಮ ಆಯಿನ್ ಆಡ್‌ಪಡಿ, ಖ್ಹರ್ತಿಮ ಯೋಸೇಫಬಿ ರಾಹೇಲ್‍ಬಿ ಆಯಿನ್ ಆಡ್‌ಪಡ್ಯು. ಏಸಾವನೆ, “ಮೇ ವಾಟ್‌ಪರ್‌ ದೇಖ್ಯೊತೆ ಯೊ ಜಾನ್ವರ್‌ನು ಮಂಧು ಶನಾ?” ಕರಿ ಪುಛಾ಼ವಖ್ಹತರ್ ಯಕೋಬನೆ, “ಯಜಮಾನ್ನಿ ಗೋರ್‌ ಮನ ಮಳ್‌ಣುಕರಿ ಮೇ ಯೊ ಅಖ್ಖು ತುಮುನ ಮೋಕ್‌ಲ್ಯೋತೆ” ಕರಿ ಬೊಲ್ಯೊ. ಏಸಾವನೆ ಇನ, “ಭೈ, ಮನ ಹೋಣುತೆತ್ರು ಶೊತ್‌ಛಾ಼, ತಾರು ತುನಾಸ್‌ ರ‍್ಹವಾದೆ.” ಕರಿ ಬೊಲ್ಯೊ. ಯಾಕೋಬನೆ, “ಇಮ್‌ಕಾಹೆ, ತುನ ಮಾರಪರ್ ಗೋರ್‌ಉಶೇತೊ, ಮೇ ದೆವುತೆ ಕಾಣ್ಕೆನ ಲೀಲೆವ್ಣು ತುನ ದೇಖ್ಯೋತೆ ದೇವ್ನ ದೇಖಾನಿಘೋಣಿ ಹುಯು. ಮನ ಪ್ಯಾರ್‌ಥಿ ಬುಲೈಲಿದೋತೆಸ್ ಬಶ್‌. ದೇವ್‌ ಮನ ವಾರ್ಖ್ಹೊಥೋತೆ ಇನಾಖ್ಹಾಜೆ ಮನ ಹೋಣುತೆಎತ್ರು ಛಾ಼; ಇನಾಖ್ಹಾಜೆ ಮೇ ದೆವುತೆ ಕಾಣ್ಕೆನ ತೂ ದಯಾ ಕರೀನ್ ಲೀಲೆವ್ಣು” ಕರಿ ಏಸಾವನ ಜು಼ಲಮ್‌ ಕರಾಖ್ಹತರ್‌ ಇನೆ ಯೊ ಕಾಣ್ಕೆನ ಲೀಲಿದೊ. ಇನಕೇಡೆಥು ಏಸಾವನೆ, “ಅಪ್ಣೆ ಅಗಾಡಿ ಜಿವ್ಣಾನ ನಿಕ್‌ಳೆ ಮೇಅಗಾಡಿ ಚಾ಼ಲೂಸ್” ಕರಿ ಬೊಲ್ಯೊ. ಇನ ಯಾಕೋಬನೆ, “ಮಾರೊ ಮಾಲಿಕ್ ಹುಯಿರೋತೆ ತುನಾಸ್‌ ಮಾಲುಮ್‌ ಛಾ಼ನಿ, ಲಡ್ಕಾ ಕವ್ಳಿ ಉಂಬರ‍್ನ, ಆ ನಾಹುಯಿನ್‌ ಚೆರಾಳು ಢಾಂಡುಬೋಕ್ಡು ಮಾರಕನ ಛಾ಼, ಏಕ್‌ದನ್‌ ಜಾ಼ಖ್ಹತ್ ಚ಼ಲಾಯೋತೊ ಬೋಕ್ಡಮೇಂಢಾನು ಮಂಧು ಥಕೀನ್‌ ಮರೀಗಿರಿಜಾ಼ಶೆ. ತುಮೆ ದಯಾ ಕರೀನ್ ಸೇವಕಥೀಬಿ ಅಗಾಡಿ ಜ಼ಯೇಜಾ಼ಯ್‌ ಮೇ ಮಾರ ಖ್ಹಾಮ್ಣೆಛಾ಼ತೆ ಬೋಕ್ಡ ಮೇಂಢಾವ್ನಿ ಚಾ಼ಲ್‌ನಾಬಿ ಲಡ್ಕಾವ್ನಿ ಶಕತ್‍ನಾಬಿ ಬರೋಬರ್‌ ಹಳೆಹಳೆಥಿ ಚಾ಼ಲಿನ್‌ ಮಾರ ಯಜಮಾನ್ನ ತಬರ್‌ಖೊ ಹುಯಿರ‍್ಹುತೆ ಸೇಯಿರ್‌ನ ಆವುಸ್” ಕರಿ ಬೊಲ್ಯೊ. ಏಸಾವನೆ, “ಮಾರ ಆಳ್‌ಮ ಥೋಡ ಜ಼ಣಾನ ತಾರಿ ಜೋ಼ಡ್ಮ ಮ್ಹೇಲಿಜ಼ವುಸ್‌” ಕರಿ ಬೋಲಖ್ಹತರ್ ಯಾಕೋಬನೆ, “ಇನಿ ಜ಼ರೂರತ್‌ ಶಾತ್‌ಛಾ಼? ಯಜಮಾನ್‌, ತುಮಾರಿ ಗೋರ್‌ ಮಾರಪರ್ ರ‍್ಹಯುತೊ ಬಶ್‌” ಕರಿ ಬೊಲ್ಯೊ. ಅಮ್ ಏಸಾವನೆ ಯೋಸ್‌ ದನ್ ಸೇಯಿರ್‌ ತಬರ್ಖಾನ ನಿಕ್‌ಳ್ಯೊ. ಯಾಕೋಬನೆ ಚಾ಼ಲ್ತೊಹುಯಿನ್‌ ಸುಕ್ಕೋತ್‌ ಝ಼ಗೋನ ಗಯೊ. ಹಿಜ್ಜಾ಼ ಇನಾಖ್ಹಾಜೆ ಘರ್‌ಬಿ ಢಾಂಡವ್ನ ಕೊಟ್‌ಕೇಬಿ ಬಣಾಯೊ. ಇನಾಖ್ಹಾಜೆ ಯೊ ಝ಼ಗೋನ “ಸುಕ್ಕೋತ್‌” ಕರಿ ನಾಮ್‌ಹುಯು. ಯಾಕೋಬ ಪದ್ದನ್‌ ಅರಾಮ್‌ಥೊ ಆಯಿನ್, ಕಾನಾನ್‌ ದೇಖ್ಹ್‌ನು ಶೆಕೆಮ್‌ ಖ್ಹಯೇರ್‌ನ ಜ಼ತನ್‌ಥಿ ಪೋಚ್ಯೊ. ಯೊ ಖ್ಹಯೇರ್‌ನ ಖ್ಹಾಮ್ಣೆ ಇನು ಡೇರಾವ್ನ ನಖೈಲಿದೊ. ಇನೆ ಇನು ಡೇರೊ ನಖೈಲಿದೋತೆ ಜ಼ಮೀನ್ನ ಹಮೋರನ ಲಡ್ಕಾವ್ನ ಖ್ಹೋ ರೂಪಾನ ಬಿಲ್ಲಾ ದೀನ್‌ ಇವ್ಣೇಥಿ ಮೋಲ್‌ಲೀಲಿದೊ. ಹಮೋರ ಶೆಕೆಮ್‌ನೊ ಬಾ. ಹಿಜ಼್ಜಾ ಯಾಕೋಬನೆ ಯೆಹೋವನಖ್ಹಾಜೆ ಬಲಿ ಚ಼ಢಾವನಿ ಚಾ಼ಚ಼ರ್‌ ಭಂದೈನ್ ಇನ, 1“ಏಲ್‌ ಎಲೋಹೆ ಇಸ್ರಾಯೇಲ್‌” ಕರಿ ನಾಮ್‌ಮ್ಹೇಲ್ಯೊ.
Source notes (1)
- Footnote ಇಸ್ರಾಯೇಲ್‌ನೊ ದೇವ್‌ಕರಿ
Waghri Booli Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.