Waghri Booli Bible
ಆದಿಕಾಂಡ 23
ಸಾರನಿ ಮರಣ್ ಅಜು಼ ಮಖ್ಹಾಣ್ಯು ದಿದೂತೆ.
ಸಾರ ಏಕ್‌ಖ್ಹೊ ಖ್ಹಾತ್ ಉಪ್ರಿಖ್ಹ್‌ ವರಖ್ಹ್ ಬಚೀರ‍್ಹಿ. ಸಾರ ಕಾನಾನ್ ದೇಖ್ಹ್‌ಮಾನು ಹೆಬ್ರೋನ್‍ಕರಿ ಕಿರ್ಯತರ್ಬ ಗಾಮ್ಮ ಮರಿಗಿ. ಅಬ್ರಹಾಮ್‌ನೆ ಅಯಿನ್ ಇನಖ್ಹಾಜೆ ರದನ್‍ಕರಿನ್ ಆಂಝು಼ನಾಖ್ಯೊ. ಇನಪಾರ್ ಯೊ ಮುರ್ದಕಂಥೊ ಅಬ್ರಹಾಮ್ ಉಠಿನ್ ಹಿತ್ತಿಯವಾಳಕನ ಜೈ಼ನ್ ಇವ್ಣುನ, “ಮೇ ತುಮಾರಮ ಪರ್‌ದೇಖ್ಹ್‌ವಾಳೊಬಿ, ವಶೇರೊನಾಖವಾಳೊಬಿ ಹುಯಿರೋಸ್. ಹಮ್ಕೆ ಮರಿಗೈತೆ ಮಾರಿ ಬಾವಣ್ಣ ಮಖ್ಹಾಣ್ಯನಖ್ಹಾಜೆ ಥೋಡಿ ಝ಼ಗೊ ಮನ ಮೋಲ್ನ ದೆವೊ” ಕರಿ ಬೋಲಿಲಿದೊ. ಹಿತ್ತಿಯವಾಳನೆ ಅಬ್ರಹಾಮ್‍ನ, “ಗುರುಜಿ, ಹಮಾರಿ ವಾತ್ ಖ್ಹಮಜ಼್, ತೂ ಹಮುನ ಏಕ್‌ ಮೋಟೊ ರಾಜನಿತರ ಛಾ, ಮರಿಗೈತೆ ತಾರಿ ಬಾವಣ್ಣ ಶರೀರ್‌ನ ಹಮಾರಮ ಛಾ಼ತೆ ಮಖ್ಹಾಣ್ಯನಿ ಝ಼ಗೋಮ ಮಖ್ಹಾಣ್ಯು ಕರೆಜಾ಼ಯ್. ತಾರಿ ಬಾವಣ್ಣ ಮಖ್ಹಾಣ್ಯನ ದ್ಯವಾನಖ್ಹಾಜೆ ಹಮಾರಮ ಕೋಣ್ಬಿ ಮಖ್ಹಾಣ್ಯನು ಝ಼ಗೊ ದ್ಯವಾನ ಹಮೆ ಖುಶಿಕರೆಸ್” ಕರಿ ಜ಼ವಾಬ್ ದಿದು. ತದೆ ಅಬ್ರಹಾಮ್ ಉಠಿನ್, ಹಿತ್ತಿಯವಾಳನು ಮುಲಕ್‌ವಾಳನ ಮುಡ್‌ಕ್ಯು ಝು಼ಕೈನ್ ಖ್ಹಲಾಮ್‍ಕರ‍್ಯೊ. ಇನೆ ಪಾಛೊ಼ ಇವ್ಣಿ ಜೋ಼ಡ್ಮ ವಾತೆ ಬೋಲಿನ್, “ಮೇ ತುಮಾರಮ ಮಾರಿ ಬಾವಣ್ಣ ಮುರ್ದಾನ ಮಖ್ಹಾಣ್ಯುಕರಾನ ತುಮೆ ಮಾನಾನು ಉಷೇತೊ ಮನ ತುಮಾರಮ ಎಕ್ ಬಿಂತಿ ಛಾ಼. ತುಮೆ ಚೋಹರನೊ ಛಿಯ್ಯೊ ಎಫ್ರೋನ್ನಿ ಜೋ಼ಡ್ಮ ಮಾರಖ್ಹಾಜೆ ವಾತ್ ಬೋಲಿನ್, ಇನ ಖೇತರ್‌ನ ಶೇಡಾಮ ಛಾ಼ತೆ ಮಕ್ಪೇಲ ಘವಿನ ಮನ ದೆವಾಡೊಕರಿ ಬೋಲಿಲೇವುಸ್. ಯೊ ಇನಿ ಝ಼ಗೋನು ಪೂರ ಮೋಲ್ಲಿನ್‌ ಮನ ದ್ಯವಾದೆ” ಕರಿ ಬೊಲ್ಯೊ. ಎಫ್ರೋನ್ ಹಿಜ಼್ಜ ಹಿತ್ತಿಯವಾಳನ ಇಚ಼್‌ಮ ಬೇಠೋಥೊ. ಅಮ್‍ರ್ಹಾವಪರ್ ಹಿತ್ತಿಯವಾಳೊ ಎಫ್ರೋನ್ ಹಿತ್ತಿಯವಾಳು ಹುಯಿರ‍್ಹುತೆ ಯೊ ಗಾಮ್‌ವಾಳಾನ ಖ್ಹಾಮ್ಣೆ ಅಬ್ರಹಾಮ್‍ನ, ಇಮ್‌ ಕಾಹೆ ಮಾಲಿಕ್, ಮಾರಿ ವಾತ್ ಖ್ಹಮಜ಼್. ಯೊ ಜ಼ಮಿನ್ನಾಬಿ ಇನಾಮ ಛಾ಼ತೆ ಘವಿನಾಬಿ ತುನ ದೆವುಸ್‌; ಮರಿಗೈತೆ ತಾರಿ ಬಾವಣ್ಣ ಇನಾಮ ಮಖ್ಹಾಣ್ಯು ಕರೆಜಾ಼ಯ್” ಕರಿ ಬೊಲ್ಯೊ. ಅಬ್ರಹಾಮ್‌ನೆ ಯೊ ದೇಖ್ಹ್‌ನ ಅದ್ಮಿನ ಮುಡ್‌ಕ್ಯು ಝು಼ಕೈನ್ ಖ್ಹಲಾಮ್‍ ಕರೀನ್ ಇವ್ಣ ಖ್ಹಾರನ ಖ್ಹಾಮ್ಣೆ, ಅಜು಼ ಎಫ್ರೋನನ, “ದಿಲ್‍ ಉಶೇತೊ ದಯಾಕರೀನ್ ಮೇ ಬೋಲುಕರುತೆ ಖ್ಹಮಜ಼್ ; ಯೊ ಖೆತರ್‌ನು ಮೋಲ್‍ದೆವುಸ್. ಮಾರೇಥಿ ಇನು ದಾಮ್‌ ಲೀಲ್ದೊತೊ ಇನಾಮ ಮಾರಿ ಬಾವಣ್ಣು ಮಖ್ಹಾಣ್ಯು ಕರುಸ್” ಕರಿ ಬೊಲ್ಯೊ. ತದೆ ಎಫ್ರೋನನೆ ಅಬ್ರಹಾಮ್‍ನ, “ಮಾಲಿಕ್, ಮಾರಿ ವಾತ್ ಖ್ಹಮಜ಼್; ಚಾರ್‌ಖ್ಹೊ ರೂಪಾನ ಪಾವ್ಲನಿ ಮೋಲ್ನಿ ಜ಼ಮೀನ್ನಿ ಬಾರೇಮ ತಾರ ಮಾರಮ ವಾತೆ ಶನಾ? ಮಖ್ಹಾಣ್ಯು ಕರೆಜಾ಼ಯ್” ಕರಿ ಬೊಲ್ಯೊ. ಅಬ್ರಹಾಮ್‌ನೆ ಎಫ್ರೋನ್ನಿ ವಾತ್ನ ಮಾನಿಲಿದೊ. ಎಫ್ರೋನನೆ ಹಿತ್ತಿಯವಾಳನ ಖ್ಹಾಮ್ಣೆ ಬೋಲ್ಯೊತೆ ಚಾರ್‌ಖ್ಹೊ ರೂಪಾನ ಪಾವ್ಲವ್ನ ಅಬ್ರಹಾಮ್‌ನೆ ಬೇಪಾರಿಕನ ತದ್ನಿ ತೋಲ್‌ನಿ ಪರಕ್ಮ ತೂಕಿನ್ ದಿದೊ. ಅಮ್ ಮಮ್ರೆ ಗಾಮ್ನ ಮ್ಹೋರೆನು ಮಕ್ಪೇಲಗಾಮ್ನ ಮಳ್ಯುಹುಯು ಎಫ್ರೋನನಿ ಜ಼ಮೀನ್‍ಬಿ, ಇನ ಮಳ್ಯುಹುಯು ಘವಿಬಿ, ಇನಾಮ ಅಜು಼ ಇನ ಅಶ್‌ಪೀಶ್‍ನು ಶೇಡಾಮ ಥೂತೆ ಝಾ಼ಡಾವ್‌ನ ಖ್ಹಮೇದ್, ಯೊ ಅಖ್ಖು ಅಬ್ರಹಾಮ್‌ನು ಶೊಂತ್‌ ಜ಼ಮೀನ್‍ಕರಿ ಯೊ ಗಾಮ್‌ನು ಹಿತ್ತಿಯವಾಳನ ಖ್ಹಾಮ್ಣೆ ತೀರ್ಮಾನ್‌ಹುಯು. ಆ ಹುವಾದಿನ್ ಅಬ್ರಹಾಮ್‌ನೆ ಇನಿ ಬಾವಣ್ ಸಾರನು ಮುರ್ದಾನ ಕಾನಾನ್ ದೇಖ್ಹ್‌ನು ಹೆಬ್ರೋನ್‍ಕರಿ ಮಮ್ರೆ ತಬರ್‌ಖಾನ ಮ್ಹೋರೆನು ಮಕ್ಪೇಲ ತಬರ್‌ಖಾನಿ ಜ಼ಮೀನ್‍ಮ ಛಾ಼ತೆ ಘವಿಮ ಗಾಡ್ಯೊ. ಅಮ್ ಹಿತ್ತಿಯವಾಳನೆ ಯೊ ಜ಼ಮಿನ್ನಾಬಿ ಇನಾಮನು ಘವಿನಾಬಿ ಅಬ್ರಹಾಮನ ಶೊಂತ್‌ ಮಖ್ಹಾಣ್ಯನಿ ಜ಼ಮೀನ್‍ಕರಿ ದಿನಾಖಿದಿದು.
Waghri Booli Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.