Waghri Booli Bible
ಆದಿಕಾಂಡ 22
ಇಸಾಕ್‌ನ ಅರ್ಪಣ್ ಕರ್‌ಕರಿ ಅಬ್ರಹಾಮ್ನ ದೇವ್ ಹುಕುಮ್ ಕರ‍್ಯೋತೆ
ಆ ಖ್ಹಾರಿ ವಾತೆ ಹುವಾನ ಪಾರ್ ದೇವ್ನೆ ಅಬ್ರಹಾಮ್ನ ತರೀಪ್ಷ ಕರ‍್ಯೊ. ಕಿಮ್‌ಕತೊ ದೇವ್ನೆ ಇನ, “ಅಬ್ರಹಾಮ್” ಕರಿ ಬುಲಾಯೊ ಇನೆ, “ಹಂದೇಕ್‌, ಮೇ ಹಜ಼್ಜ ಛೂ಼” ಕರಿ ಬೊಲ್ಯೊ. ತದೆ ಇನೆ, “ತುನ ಪ್ಯಾರ‍್ನೊ ಎಕ್ಕಸ್ ಛಿಯ್ಯೊ ಇಸಾಕನ ಬುಲೈಲೀನ್ ಮೋರಿಯ ತಬರ್‌ಖಾಮ ಜೈ಼ನ್ ಹಿಜ಼್ಜ ಇನ ಮೇ ವತಾಳುತೆ ಎಕ್ ಪಹಾಡ್‌ಪರ್ ಮನ ಬಲಿದೇವ್ಣು” ಕರಿ ಬೊಲ್ಯೊ. ಇಮ್ಮಸ್ ವ್ಹಾಣವೇಳಿ ಉಠೀನ್ ಅಬ್ರಹಾಮ್‌ನೆ ಗಧೇಡಪರ್ ಬಲಿನ ಹೋಣುತೆ ಲಾಕ್ಡಾನ ಢೊವಾಡಿನ್ ಇನ ಸೇವಕ್‌ಮಾಥು ಬೇಜ಼ಣನಬಿ, ಇನೊ ಛಿಯ್ಯೊ ಇಸಾಕ್‍ನಾಬಿ ಬುಲೈಲೀನ್ ದೇವ್ನೆ ಬೋಲ್ಯೋತೆ ಝ಼ಗೋಕನ ನಿಕ್‍ಳ್ಯೊ. ತೀನ್ನದನ್ನೆ ಅಬ್ರಹಾಮ್‌ನೆ ಡೋಳಪಾಡಿ ದೇಖಾನಿವಖ್ಹ್‌ತೆ ಯೊ ಝ಼ಗೊ ದೂರ್‌ಮ ದೆಖಾಯು. ತದೆ ಇನ ಸೇವಕ್‌ನ, “ತುಮೆ ಹಜ್ಜಾ಼ಸ್ ಗಧೇಡಕನ ರ‍್ಹವೊ; ಮೇಬಿ ಮಾರೊ ಛಿಯ್ಯೊಬಿ ಹಿಜ಼್ಜ ಜೈ಼ನ್ ದೇವ್ನಿ ಆರಾದನೆ ಕರ‍್ಲಿನ್ ಪಾಛ಼ ಹಜ್ಜಾ಼ಸ್ ತುಮಾರಕನ ಐಯೇಸ್” ಕರಿ ಅಬ್ರಹಾಮ್‌ನೆ ಬೊಲ್ಯೊ. ಅಬ್ರಹಾಮ್‌ನೆ ಬಲಿನ ಹೋಣುತೆ ಲಾಕ್ಡಾನ ಇನೊ ಛಿಯ್ಯೊ ಇಸಾಕನ ಉಪ್ಪರ್ ಢೊವಾಡಿನ್, ಇನ ಹಾತ್ಮಸ್ ಇಂಗಾಠೊಬಿ ಛ಼ರಿನಾಬಿ ಪಾಡಿಲೀನ್ ಇವ್ಣೆ ಭೇಜ಼ಣಾಬಿ ನಿಕ್‍ಳ್ಯ. ಜಾ಼ವಾನಿ ವಖ್ಹ್‌ತೆ ಇಸಾಕ್‍ನೆ ಇನೊ ಬಾ ಅಬ್ರಹಾಮ್ನ, “ಬಾ" ಕರಿ ಫುಕಾರಖ್ಹತರ್ ಅಬ್ರಹಾಮ್‌ನೆ, “ಶಾತ್‌ಲ ಜಾ಼ಯ” ಕರಿಬೋಲ್ಯೊ. ಇಸಾಕ್‍ನೆ, ಹಂದೇಕ್‌ ಇಂಗಾಠೊಬಿ ಲಾಕ್ಡಬಿ ಛಾ಼; ಕತೋಬಿ ಹೋಮ ಬಲಿನ ಹೋಣುತೆ ಮೇಂಢು ಕ್ಯಾ?” ಕರಿ ಪುಛಾ಼ಯೊ. ಅಬ್ರಹಾಮ್‌ನೆ, “ಜಾ಼ಯ, ಬಲಿನ ಹೋಣುತೆ ಮೇಂಢಾನ ದೇವಸ್‌ ದಿಶೆ” ಕರಿ ಬೊಲ್ಯೊ. ದೇವ್ನೆ ಬೋಲ್ಯೊತೆ ಝ಼ಗೋಕನ ಇವ್ಣೆ ಐನ್‌ ಅಬ್ರಹಾಮ್‌ನೆ ಚಾ಼ಚ಼ರ್‌ ಭಾಂದ್ಯೊ. ಲಾಕ್ಡಾನಿ ಢೇರಿಕರಿನ್ ಇನೊ ಛಿಯ್ಯೊ ಇಸಾಕನ ಹಾತ್ ಗೋಡ ಭಾಂದಿನ್‌ ಇನ ಚಾ಼ಚ಼ರ್‌ಪರ್ ಥೂತೆ ಲಾಕ್ಡಪರ್ ಪಾಡಿನಾಖ್ಯೊ. ಅಬ್ರಹಾಮ್‌ನೆ ಇನ ಛಿಯ್ಯಾನ ಬಲಿ ದ್ಯಾವಾನಖ್ಹಾಜೆ, ಹಾತ್ ಪೂರೈನ್ ಛ಼ರಿಪಾಡಿಲಿದೊ. ತದೆ ಯೆಹೋವನ ದೂತಾನೆ ಆಬ್‍ನ ಮಹಿಥೊ, “ಅಬ್ರಹಾಮ್, ಹೇ ಅಬ್ರಹಾಮ್” ಕರಿ ಇನ ಫುಕಾರ‍್ಯೊ. ಇನಖ್ಹಾಜೆ ಅಬ್ರಹಾಮ್‌ನೆ, “ಹಂದೇಕ್‌ ಹಜ್ಜಾ಼ಸ್‌ಛು಼” ಕರಿ ಬೊಲ್ಯೊ. ಯೊ ದೂತಾನೆ ಇನ, “ಛೋ಼ಕ್ರಾನ ಶಾತ್‌ಬಿ ನಕೋಕರ್. ತೂ ತಾರೊ ಎಕ್ಕಸ್ ಛಿಯ್ಯಾನ ಮನ ಬಲಿದ್ಯವಾನ ಪೀಛೆ ಹಟ್ಯೊಕೊಯ್ನಿ. ಹಮ್ಕೆ ತೂ ದೇವ್‍ಮ ಡರ್‌ಭಕ್ತಿಮ ರ‍್ಹವಾಳೊಕರಿ ಮನ ಮಾಲುಮ್ ಪಡ್ಯು” ಕರಿ ಬೊಲ್ಯೊ. ಅಬ್ರಹಾಮ್ ಡೋಳಪಾಡಿ ದೇಖಾನಿವಖ್ಹ್‌ತೆ ಇನ ಪೀಠೆ, ಎಕ್ ಮೇಂಢೊ ಡಾಗ್ಮ ಶಿಂಗ್ಡಾ ಖ್ಹಪ್‍ಡೈಪಡಿರ‍್ಹುತೆ ದೇಖ್ಯೊ. ಇನೆ ಜೈ಼ನ್ ಯೊ ಮೇಂಢಾನ ಧರಿಲೈನ್ ಛಿಯ್ಯಾನ ಬದಲ್ ಇನ ಭುಂಜಿನ್‌ ಢಪ್ಕಾರದಿದೊ. ಯೊ ಝ಼ಗೋನ ಅಬ್ರಹಾಮ್‌ನೆ “ಯೆಹೋವ ದ್ಯವವಾಳೊ” ಕರಿ ನಾಮ್ ಮ್ಹೇಲ್ಯೊ. “ಯೆಹೋವ ಪರ್ಭತ್‌ಮ ದ್ಯಾವಳೊ” ಕರಿ ಹಮ್ಕೆಲಗೂಬಿ ಇಮ್ಮಸ್ ಬೋಲಾನಿ ಪದತ್ತಿಛಾ಼. ಯೆಹೋವನ ದೂತಾನೆ ಸೊರ್ಗಾ ಮಾಥೊ ಬೇನಿ ವಖ್ಹತ್ ಅಬ್ರಹಾಮ್ನ ಪುಕಾರಿನ್ ಇನ, “ತೂ ತಾರೊ ಎಕ್ಕಸ್ ಛಿಯ್ಯಾನ ಸಮರ್ಪಣ್‌ ಕರಾನ ಪೀಛೆ ಹಟ್ಯೊಕೊಂತೆ ಇನಖ್ಹಾಜೆ, ಯೆಹೋವ ಮೇ ತುನ ಆಣ್ ಕರೀನ್ ಬೋಲುಸ್‍ ಶಾತ್‍ಕತೊ ಮೇ ತುನ ಆಶೀರ್ವಾದ್ ಕರಿಶಸ್ ಕರೀಶ್; ಮೇ ತುನ ಆಣ್‌ಕರುಸ್ ತಾರಿ ಪಿಳ್ಗಿನ ಘಣು ಆಶೀರ್ವಾದ್ ಕರಿಶ್, ಯೊ ಆಬ್‍ನು ಶುಕ್ಕರ್‌ನಿತ್ರಾಬಿ, ದರ‍್ಯಾವ್‍ನ ಕನ್‍ಖಾಡೆ ರ‍್ಹೇಯ್ತೆ ರೇತ್‌ನಿತರಾಬಿ ಗಣ್ತಿಕೊಂತೆ ತಿಮ್‍ ಭಡೈಶ್; ಇವ್ಣೆ ವಹೇರ‍್ಯಾವ್ನು ಖ್ಹಯೇರ್‌ನ ಕಬ್‍ಜ ಕರಿಲಿಶೆ. ತೂ ಮಾರಿ ವಾತ್ನ ವಿದೇಯತೆ ಹುಯೋತೆ ಇನಖ್ಹಾಜೆ ಧರ್ತಿನು ಖ್ಹಾರಸ್ ಜ಼ಗ್‌ಜಾ಼ತ್‌ನ ತಾರಿ ಪಿಳ್ಗಿಥಿ ಆಶೀರ್ವಾದ್ ಉಶೆಕರಿ ಯೆಹೋವನೆ ವಾಗ್ದಾನ್ ಕರಿರಾಖ್ಯೋಸ್” ಕರಿ ಬೊಲ್ಯೊ. ಇನಪಾರ್ ಅಬ್ರಹಾಮ್ ಪಾಛೊ಼ಫರಿ ಇನ ಸೇವಕ್‌ಕನ ಆಯೊ. ಇವ್ಣೆಖ್ಹಾರು ಇನ ಜೋ಼ಡ್ಮ ಬೇರ್ಷೆಬನ ಗಯಾ. ಅಬ್ರಹಾಮ್‌ನೆ ಬೇರ್ಷೆಬಮ ಜಿವ್ಣುಕರುಕರ್ತೊಥೊ.
ನಾಹೋರನಿ ಪಿಳ್ಗಿವಾಳು.
ಥೋಡ ದನ್ನಪಾರ್ ಮಿಲ್ಕಮ ಇನೊ ನ್ಹಾನೊಭೈ ನಾಹೋರನ ಲಡ್ಕ ಹುಯ ಕರಿ ಅಬ್ರಹಾಮ್‌ನೆ ಸಮಾಚಾರ್ ಖ್ಹಮ್‍ಜ್ಯೊ. ಇವ್ಣೆ ಕೋಣ್‍ಕತೊ; ಇನೊ ಪೈಲ್ಹೋಟೊ ಛಿಯ್ಯೊ ಊಜ಼್, ಇನೊ ನ್ಹಾನೊ ಭೈ ಬೂಜ್, ಅರಾಮ್‍ನೊ ಬಾ ಕೆಮೂವೇಲ. ಕೆಸೆದ್, ಹಜೋ಼, ಪಿಲ್ದಾಷ್, ಇದ್ಲಾಫ್, ಬೆತೂವೇಲ್ ಕರಿ ಅವ್ಣೇಸ್. ಬೆತೂವೇಲ್ ರೆಬೆಕ್ಕನೊ ಬಾ. ಆ ಆಟ್‍ ಜ಼ಣಾನ ಮಿಲ್ಕನೆ ಅಬ್ರಹಾಮ್‌ನೊ ನ್ಹಾನೊಭೈ ನಾಹೋರಥಿ ಪೈದಕರಿ. ಆ ನಾಹುಯಿನ್ ಇನಿ ಬಿಜೇಕ್‌ ಬಾವಣ್‍ ರೂಮನೆ ಟೆಬಹ, ಗಹಮ್, ತಹಷ್, ಮಾಕಾ ಕರಿ ಅವ್ಣುನ ಜ಼ಣಿ.
Waghri Booli Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.