Waghri Booli Bible
ಆದಿಕಾಂಡ 1:27
Verse 27 is marked below, with the whole chapter around it. Read from the start
ಉಬ್‌ಜಾ಼ವ್ಣಿನು ಖೇಣಿ
ಶುರುವಾತ್‌ಮ ದೇವ್‌ ಆಬ್‌ ಧರ್ತಿನ ಉಬ್‌ಜಾ಼ಯೊ ತದೆ, ಧರ್ತಿ ಅಗ್ಗಡ್‌ದುಗ್ಗಡ್‌ಬಿ ಖಾಲಿಹುಯಿನ್‌ಬಿ ಯೊ ಅಂಧಾರೆಥಿ ಭರೈರ‍್ಹುಥು. ದೇವ್‌ನು ಆತ್ಮ ದಲ್‌ದರ‍್ಯಾವ್‌ನ ಉಪ್ಪರ್ ಉಡ್ತುಫಂಡ್‌ತುಥು. ತದೆ ದೇವ್‌ “ಉಜಾ಼ಳುಹುವಾದೆ” ಕರಿ ಬೋಲಾಮ ಉಜಾ಼ಳು ಹುಯು. ದೇವ್‌ ಯೊ ಉಜಾ಼ಳನ ಅಛ್ಛು಼ಕರಿ ದೇಖ್ಯೊ. ಇನೆ ಉಜಾ಼ಳನಾಬಿ ಅಂಧಾರನಾಬಿ ಅಲಕ್ ಬಣಾಯೊ. ಅಜು಼ ದೇವ್ನೆ ಉಜಾ಼ಳನ “ದನ್” ಕರೀಬಿ ಅಂಧಾರನ “ರಾತ್‌” ಕರೀಬಿ ನಾಮ್‌ ಮ್ಹೇಲ್ಯೊ. ಅಮ್ ಖ್ಹಾಂಜ಼್‌ಬಿ ವ್ಹಾಣುಬಿ ಹುಯಿನ್ ಪೈಲ್ಹೊದನ್‌ ಹುಯು.
ಇನಕೇಡೆಥು ದೇವ್ನೆ ಹೇಟ್‌ನ ಪಾಣಿನಾಬಿ ಉಪ್ಪರ್‌ಲ್ಯ ಪಾಣಿನಾಬಿ ಅಲಕ್ ಅಲಕ್ ಕರಾನ ಪಾಣಿನ ಇಚ಼್‌ಮ ಗೋಳೊ ಬಣಾದೆ ಕರಿ ಬೊಲ್ಯೊ. ಅಮ್ ದೇವ್‌ ಗೋಳಾನ ಕರೀನ್ ಇನಹೇಟ್‌ ಥೂತೆ ಪಾಣಿನ ಇನ ಉಪ್ಪರ್‌ಥೂತೆ ಪಾಣಿಥಿ ಭಾಗ್‌ ಬಣಾಯೊ. ಯೊ ಇಮ್ಮಸ್ ಹುಯು. ಅಜು ದೇವ್‌ ಯೊ ಗೋಳಾನ “ಆಬ್‌” ಕರಿ ನಾಮ್‌ಮ್ಹೇಲ್ಯೊ. ಅಮ್ ಖ್ಹಾಂಜ಼್‌ಬಿ ವ್ಹಾಣುಹುಯಿನ್ ಬೇನು ದನ್‌ಹುಯು.
ಇನವಾರ್ ದೇವ್‌, “ಆಬ್‌ನ ಹೇಟ್‌ಛಾ಼ತೆ ಪಾಣಿ ಅಖ್ಖುಬಿ ಎಕ್ಕಸ್ ಝ಼ಗೊ ಅಖ್ಖು ಎಕ್ಟುಹುವಾದೆ ಅಜು಼ ಖ್ಹುಕ್ಕಿ ಜ಼ಮೀನ್ ದೇಖಾವದೆ” ಕರಿ ಬೊಲ್ಯೊ. ಇಮ್ಮಸ್ ಹುಯು. ದೇವ್‌ ಖ್ಹುಕ್ಕಿ ಜಮೀನ್ನ “ಧರ್ತಿ” ಕರೀಬಿ ಎಕ್ಟು ಹುಯಾಹುಯ ಪಾಣಿನ “ದರ‍್ಯಾವ್‌” ಕರೀಬಿ ನಾಮ್‌ ಮ್ಹೇಲ್ಯೊ. ದೇವ್ನ ಡೋಳಾಮ ಯೊ ಅಛ್ಛು಼ ದೆಖಾಯು. ಇನವಾರ್ ದೇವ್ನೆ, “ಧರ್ತಿಪರ್ ಘಾಖ್ಹ್‌ನ, ಅನಾಜ಼್‌ನಿ ಶೋಶಿಯೇವ್ನ, ಪಂಡುಪಲಾರ ಮ್ಹೇಲಾತೆ ಅಖ್ಖಿಥರಾನು ಝಾ಼ಡು ಫುಟ್‌ವಾದೆ” ಕರಿಬೋಲ್ಯೊ. ಇಮ್ಮಸ್ ಹುಯು. ಧರ್ತಿಪರ್ ಅಖ್ಖಿಥರಾನು ಶೋಶಿಖ್ಹಾರು ಫುಟ್ಯು. ಪಂಡು ಮ್ಹೇಲಾನು ಝಾ಼ಡಅಖ್ಖುಬಿ ದೆಖಾಯು. ಇವ್ಣಿ ಇವ್ಣಿ ಜಾತ್ನಿ ಪರಕ್ಮ ಪಂಡರ‍್ಹವಾನು ಫಲ್‌ನು ಝಾ಼ಡು ಫುಟ್ಯು. ಯೋಅಖ್ಖು ದೇವ್ನ ಡೋಳಾಮ ಅಛ್ಛು಼ ದೆಖಾಯು. ಅಮ್ ಖ್ಹಾಂಜ಼್‌ಬಿ ವ್ಹಾಣುಹುಯಿನ್ ತೀನ್ನೊ ದನ್‌ಹುಯು.
ಇನಕೇಡೆಥು ದೇವ್ನೆ ಆಬ್‌ಮ ದನ್‌ಥು ರಾತ್ನ ಅಲಕ್ ಕರಾನಖ್ಹಾಜೆ ಆಬ್‌ಮ ಉಜಾ಼ಳು ದೆಖಾವದೆ ಅಜು ಯೋಅಖ್ಖು ದನ್ ವರಖ್ಹ್ ಹಗಾಮ್‌ನಾಬಿ ವತಾಳನು ಖ್ಹಣೇದ್ ಹುಯಿರ‍್ಹವಾದೆ. ಅಜು಼ ಧರ್ತಿನ ಉಪ್ಪರ್ ಉಜಾ಼ಳು ದ್ಯವಾನ ಯೋಖ್ಹಾರು ಆಬ್ಪರ್ ಉಜಾ಼ಖ್ಹ್‌ ದ್ಯವಾದೆ, ಕರಿಬೋಲ್ಯೊ. ಇಮ್ಮಸ್‌ಹುಯು. ದನ್ನ ಚ಼ಲಾವನ ಚಾಂದ್‌ನಾಬಿ ರಾತ್ನ ಚ಼ಲಾವನ ಚಂದರ್‌ಮನಾಬಿ ಉಬ್‌ಜಾ಼ಯೊ. ಅಜು ಶುಕ್ಕರ್‌ಜಿನು ದೇವ್ನೆ ಉಬ್‌ಜಾ಼ಯೊ. ದೇವ್ನೆ ಯೊ ಉಜಾ಼ಳನ ಆಬ್‌ಮ ಧರ್ತಿಪರ್ ಉಜಾ಼ಳು ದ್ಯವಾನ, ದನ್‌ರಾತ್‌ನ ಚ಼ಲಾವನಾಬಿ, ಅಜು ಉಜಾ಼ಳನಾಬಿ ಅಂಧಾರನ ಅಲಕ್ ಅಲಕ್ ಕರಾನ ದೇವ್ನೆ ಮ್ಹೇಲ್ಯೊ. ತದೆ ಇನೆ ಯೊ ಅಖ್ಖಾನ ಅಛ್ಛು಼ಕರಿ ದೇಖ್ಯೊ. ಅಮ್ ಖ್ಹಾಂಜ಼್ ವ್ಹಾಣುಹುಯಿನ್ ಚಾರ್‌ನೊ ದನ್‌ಹುಯು.
ಇನಕೇಡೆಥು ದೇವ್ನೆ, ಕೈಯೇಕ್‌ಥರಾನು ಪಾಣಿನು ಜ಼ಂತ್ ಪಾಣಿಮ ಭರೈಜಾ಼ವಾದೆ; ಜಿನಾವರ್‌ಖ್ಹಾರು ಆಬ್‌ಮ ಉಡಾದೆ” ಕರಿ ಬೊಲ್ಯೊ. ಅಮ್ ದೇವ್ನೆ ಜಾ಼ಖ್ಹತ್ ಪಾಣಿನ ಜಿವಾನು ನ್ಹಾನ ಮೋಟ ಖ್ಹಾರಿಸ್ ಥರಾನ ಜ಼ಂತ್‌ನಾಬಿ ಉಬ್‌ಜಾ಼ಯೊ. ಅಜು಼ ಹರೇಕ್‌ಥರಾನು ಜಿನಾವರ್‌ನಾಬಿ ಇವ್ಣಿ ಜಾ಼ತ್ನಿ ಪರಕ್ಮ ಉಬ್‌ಜಾ಼ಯೊ. ತದೆ ಇನೆ ಯೊ ಅಖ್ಖಾನ ದೇಖಖ್ಹತರ್ ದೇವ್ನ ಘಣು ಖ್ಹುಷಿಹುಯು. ಆ ನಾಹುಯಿನ್ ದೇವ್ನೆ, “ಪಾಣಿಮ ಛಾತೆ ಜೀವಿಅಖ್ಖು ಭಡಿನ್ ಜಾ಼ಖ್ಹತ್‌ಹುಯಿನ್ ದರ್ಯಾವ್ನ ಪಾಣಿಮ ಭರಾವದೆ, ಅಜು ಜಿನಾವರ್‌ಬಿ ಜಾ಼ಖ್ಹತ್ ಹುವಾದೆ” ಕರಿ ಬೋಲಿನ್‌ ಆಶೀರ್ವಾದ್‌ ದಿದೊ. ಅಮ್ ಖ್ಹಾಂಜ಼್ ವ್ಹಾಣುಹುಯಿನ್ ಪಾಚ಼್‌ನೊ ದನ್ ಹುಯು. ಇನಕೇಡೆಥು ದೇವ್ನೆ, “ಧರ್ತೀಮಾಥು ಉಬ್‌ಜ್ಯುತೆ ಖ್ಹಾರು ಉಬ್‌ಜಾ಼ದೆ; ಪಾಳನು ಜಾನ್ವರ್‌, ಕೀಡ್‌ಕಮ್‌ಟು, ಝಾಡಿನು ಜಾನ್ವರ್‌ಖ್ಹಾರು, ಇನಿ ಇನಿ ಜಾ಼ತ್ನಿ ಪರಕ್‌ ಪೈದಹುವಾದೆ” ಕರಿ ಬೊಲ್ಯೊ. ಇಮ್ಮಸ್ ಹುಯು. ದೇವ್ನೆ, ಅಖ್ಖಿತರಾನು ಜಾನ್ವರ್‌ನಾಬಿ ಜ಼ಮೀನ್ಪರ್ ವ್ಹವಾವಾಳು ಕೀಡ್‌ಕಮ್‌ಟವ್‌ನಾಬಿ ತಿನಿತಿನಿ ಜಾ಼ತ್ನಿ ಪರಕ್‌ ಉಬ್‌ಜಾ಼ಯೊ. ತದೆ ಇನೆ ಯೊ ಅಖ್ಖಾನ ಅಛ್ಛು಼ಕರಿ ದೇಖ್ಯೊ. ಇನಪಾರ್‌ ದೇವ್ನೆ, “ಅಪ್ಣ ಶೊಂತ್‌ ರೂಪ್‌ಮ ಅಪ್ಣಿನಿ ಘೋಣಿನು ಅದ್ಮಿನ ಉಬ್‌ಜೈ಼ಯೆ. ಇವ್ಣೆ ದರ‍್ಯಾವ್‌ಮಾನು ಮಾಚ್ಲಪರ್ಬಿ, ಅಭಾಳ್‌ಮ ಉಡಾತೆ ಜಿನಾವರ್‌ ಪರ್‌ಬಿ ಪಾಳಾತೆ ಜಾನ್ವರ್‌ ಪರ್‌ಬಿ ಜ಼ಮೀನ್ಪರ್ ವ್ಹವವಾಳು ಖ್ಹಾರುಸ್‌ ಕೀಡ್‌ಕಮ್‌ಟ ಪರ್‌ಬಿ, ಖ್ಹಾರಿಸ್ ಧರ್ತಿಪರ್‌ಬಿ ರಾಜ಼್ ಚ಼ಲಾವಾದೆ” ಕರಿ ಬೊಲ್ಯೊ.
ಅಮ್ ದೇವ್ನೆ; ಅದ್ಮಿನ ಇನಿ ಶೊಂತ್‌ರೂಪ್‌ಮ ಉಬ್‌ಜಾ಼ಯೊ.
ಇನಿ ಶೊಂತ್‌ರೂಪ್‌ಮ ಉಬ್‌ಜಾ಼ಯೊ.
ಇವ್ಣುನ ಪರ್‌ಖ್ಹೊ ತಯೇಡ ಕರಿ ಉಬ್‌ಜಾ಼ಯೊ.
ಆ ನಾಹುಯಿನ್ ದೇವ್ನೆ ಇವ್ಣುನ ಆಶೀರ್ವದ್, “ತುಮೆ ಘಣು ಪಿಳ್ಗಿವಾಳು ಹುಯಿನ್ ಧರ್ತಿಮ ಫೈಲೈನ್ ಇನ ಕಬ್‌ಜ಼ ಕರಿಲೆವೊ. ದರ್ಯಾವ್ನ ಮಾಚ್ಲಪರ್ಬಿ ಖ್ಹಾರೂಸ್ ಜಿನಾವರ್‌ಪರ್‌ಬಿ ಜಾನ್ವರ್‌ಪರ್‌ಬಿ ರಾಜ಼್‌ಚ಼ಲಾವೊ” ಕರಿ ಬೊಲ್ಯೊ. ಆ ನಾಹುಯಿನ್ ದೇವ್ನೆ, “ಹಂದೇಖೊ, ಧರ್ತಿಪರ್‌ಛಾ಼ತೆ ಖ್ಹಾರಿಸ್ ಥರಾನು ಪಂಡುದ್ಯವಾನು ಅನಾಜ಼್‌ನಾಬಿ ಪಂಡುದ್ಯವಾನು ಫಲ್ನ ಝಾ಼ಡ್‌ನಾಬಿ ತುಮೂನ ಖಾವನಖ್ಹಾಜೆ ದೀರಾಖ್ಯೋಸ್. ಅತ್ರೇಸ್ ಕಾಹೆತೆ ಧರ್ತಿಪರ್ ಫರ್ತುಫಂಡಾತೆ ಜಾನ್ವರ್‌, ಆಬ್ಪರ್ ಉಡಾವಾಳು ಜಿನಾವರ್‌ಖ್ಹಾರು ಜ಼ಮೀನ್ಪರ್ ವ್ಹವವಾಳು ಕೀಡ್‌ಕಮ್‌ಟುಖ್ಹಾರು ಅಜು಼ ಕೈಏಕ್ ಜ಼ಂಗ್‌ಳಿ ಜಾನ್ವವರ್‌ನ ಖಾಣಾನಖ್ಹಾಜೆ ಭಾಜಿಪಾಲೊಖ್ಹಾರು ದೀರಾಖ್ಯೋಸ್” ಕರಿ ಬೊಲ್ಯೊ. ಯೊ ಇಮ್ಮಸ್ ಹುಯು. ದೇವ್‌ ಇನೆ ಉಬ್‌ಜಾ಼ಯೋತೆ ಅಖ್ಖಾಸ್ನ ದೇಖಾಖ್ಹತರ್ ಯೊ ಅಖ್ಖೂಸ್ ಘಣು ಅಛ್ಛು಼ ದೆಖಾಯು. ತದೆ ಖ್ಹಾಂಜ಼್ ವ್ಹಾಣುಹುಯಿನ್ ಛೋ಼ನೆ ದನ್‌ಹುಯು.
Waghri Booli Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.