Waghri Booli Bible
ಆದಿಕಾಂಡ 2
ಅಮ್ ಆಬ್‌ ಧರ್ತಿಖ್ಹಾರು ಯೊ ಅಖ್ಖಾಮ ಛಾ಼ತೆ ತಮಾಮಸ್ ಬಣಾವಟ್‌ಹುಯು. ದೇವ್‌ನೆ ಇನು ಉಬ್‌ಜಾ಼ವ್ಣಿನು ಕಾಮ್ನ ಖ್ಹತಮ್‌ಕರೀನ್ ಖ್ಹಾತ್‌ನ ದನ್‌ಮ ಅರಾಮ್‌ಕರ‍್ಯೊ. ದೇವ್‌ನೆ ಇನು ಉಬ್‍ಜಾ಼ವ್ಣಿನ ಕಾಮ್ನ ಖ್ಹತಮ್‌ಕರಾನ ಬಾದ್‌ಮ ಖ್ಹಾತ್‌ನ ದನ್‌ಮ ಅರಾಮ್‌ಕರ‍್ಯೋತೆ ಇನಖ್ಹಾಜೆ ಯೊ ದನ್ನ ಪರಿಶುದ್ ದನ್ ಹುಯಿರ‍್ಹವಾದೆಕರಿ ಆಶೀರ್ವಾದ್‌ ಕರ‍್ಯೊ. ಯೆಹೋವ ದೇವ್‌ ಆಬ್‌ಧರ್ತಿನ ಬಣಾವಟ್ ಕರ‍್ಯೊತೆ ಖೇಣಿ ಆಸ್.
ಏದೆನ್ ಬಗಿಚೋ಼
ಯೆಹೋವ ದೇವ್‌ ಆಬ್‌ಧರ್ತಿನ ಉಬ್‌ಜಾ಼ವಾನಿ ವಖ್ಹ್‌ತೆ, ತದೆ ಶನಿ ಥರಾನು ಝಾ಼ಡುಬಿ ಧರ್‌ತಿಮ ಕೋಥೂನಿ. ಶನಿ ಶೋಶಿಬಿ ಮೋಡ್‌ಕೊ ಪಾಡ್ಯುಥು ಕೊಯ್ನಿ. ಶನಕತೊ ಯೆಹೋವ ದೇವ್‌ ಧರ್ತಿಪರ್ ಪಾಣಿ ವರ್‌ಖ್ಹಾಯೋಥೊ ಕೊಯ್ನಿ. ಜಮೀನ್ನ ನಾಗ್ರಾನ ಅದ್ಮಿಬಿ ಕೋಥೂನಿ. ಕತೋಬಿ ಧರ್ತಿಮಾಥು ಪಾಣಿನು ಚೇಜ಼್‌ಭಾರೊ ಉಕ್ಳಿನ್ ಉಪ್ಪರ್ ಅಯಿನ್ ಜ಼ಮೀನ್ ಅಖ್ಖು ಭಿಗಾವ್‌ತುಥು. ಅಮ್‌ರ‍್ಹಾವಪರ್‌ ಯೆಹೋವ ದೇವ್‌ ಜ಼ಮಿನ್ನಿ ಮಾಟಿಥಿ ಅದ್ಮಿನ ಉಬ್‌ಜೈ಼ನ್ ಇನ ನಾಕ್‌ಮ ಜಾನ್ನ ವಹಿರಾನ ಫುಕ್ಯೊ. ತದೆ ಯೊ ಜಿವವಾಳೊ ಅದ್ಮಿಹುಯೊ. ಆ ನಾಹುಯಿನ್ ಯೆಹೋವ ದೇವ್‌ ಪೂರಬ್‌ ದಿಕ್ಮ ಛಾ಼ತೆ ಏದೆನ್ ತಬರ್‌ಖಾಮ ಏಕ್‌ ಬಗೀಚಾ಼ನ ಉಬ್‌ಜೈ಼ನ್ ಇನೆ ಬಣಾವಟ್ ಕರ‍್ಯೊತೆ ಅದ್ಮಿನ ಇನಾಮ ರ‍್ಹಾವನಿತರ ಕರ‍್ಯೊ. ಇನವಾರ್‌ ಯೆಹೋವ ದೇವ್‌ನೆ ದೇಖಾನ ಶನ್‌ಗಾರ್‌ನುಬಿ, ಖಾವಾನ ರುಚ್‌ ರ‍್ಹಾವಾನು ಖ್ಹಾರೀಸ್‍ ಥರಾನು ಝಾ಼ಡಾವ್‌ನ ಯೊ ಜ಼ಮೀನ್‌ಪರ್‌ ಫುಟಾನಿತರ ಕರ‍್ಯೊ. ಯೊ ನಾಹುಯಿನ್ ಯೊ ಬಗೀಚಾ಼ನ ಇಚ಼್‌ಮ ಜಾನ್‌ದೇವಾನು ಝಾ಼ಡನಬಿ ಅಛ್ಛಾ಼ನು ಖರಾಬ್‌ನು ಅಕ್ಕಲ್ ದೆವವಾಳು, ಝಾ಼ಡನಬಿ ಫೋಡಾಯೊ. ಏದೆನ್ ತಬರ್‌ಖಾಮ ಏಕ್‌ ನದ್ದಿ ಉಬ್‌ಜಿನ್ ಯೊ ಬಗೀಚಾ಼ನ ಭಿಗಾವ್‌ತುಥು. ಯೊ ಹಿಜ್ಜಾ಼ಥು ಚಾರ್‌ ಭಾಗ್‌ಹುಯಿನ್ ಫುಟ್‌ಪಡಿರ‍್ಹೂಥು. ಪಹಿಲಿ ನದ್ದಿನು ನಾಮ್ ಪೀಶೋನ್‌, ಯೊ ಖ್ಹೊನ್ನು ಮಳಾನು ಹವೀಲ ದೇಖ್ಹ್‌ಅಖ್ಖು ಫರಿನ್ ವ್ಹವಾಸ್. ಯೊ ತಬರ್‌ಖಾನು ಖ್ಹೊನ್ನು ಘಣಾ ಮೋಲ್‌ನು ಹುಯಿರ‍್ಹೂಸ್. ಹಿಜ್ಜಾ಼ ಬದೋಲಖ ಖ್ಹಾಲರ‍್ಯೊ, ಗೋಮೇಧಿಕನು ಘಣಾಮೋಲ್‌ನು ಕಾಕ್ರೊ ಮಳಸ್. ಬೇನು ನದ್ದಿನು ನಾಮ್ ಗಿಹೋನ್‌, ಯೊ ಕೂಷ್‌ ದೇಖ್ಹ್‌ನ ಫರೀನ್ ವ್ಹವಾಸ್. ತೀನ್ನಿ ನದ್ದಿನು ನಾಮ್ ಟೈಗ್ರೀಸ್; ಯೊ ಅಶ್ಯೂರ್‌ ದೇಖ್ಹ್‌ನು ಪೂರಬ್‌ ದಿಕ್‌ಭಣಿ ವ್ಹವಾಸ್. ಚಾರ್‌ನು ಯೂಫ್ರೇಟೀಸ್‌ ನದ್ದಿ. ಯೆಹೋವ ದೇವ್‌ ಯೊ ಅದ್ಮಿನ ಬುಲೈಲೀಜೈ಼ನ್ ಏದೆನ್ ಬಗೀಚಾ಼ನ ನಾಗ್ರನಾಬಿ ಕಾವಲ್‌ಕರನಾಬಿ ಇನಾಮ ರಾಖ್ಯೊ. ಆ ನಾಹುಯಿನ್ ಯೆಹೋವ ದೇವ್‌ನೆ ಯೊ ಅದ್ಮಿನ, “ತೂ ಬಗೀಚಾ಼ಮ ಛಾ಼ತೆ ಖ್ಹಾರಸ್ ಝಾ಼ಡ್‌ಣ ಫಲ್ನ ಕೆತ್ರೂಬಿ ಖಾಯೆಜಾ಼ಯ್. ಕತೋಬಿ ಅಛ್ಛಾ಼ನು ಖರಾಬ್‌ನು ಖ್ಹಯಾಲ್‌ ದ್ಯವಾಳು ಆ ಝಾಡ್‌ನು ಫಲ್ನ ನಾಖಾವ್ಣು. ಖೈಶ್‌ತೆ ದನ್ನೆಸ್ ಮರಿಜೈಶ್” ಕರಿ ಬೊಲ್ಯೊ. ಆ ಹುವಾದಿನ್ ಯೆಹೋವ ದೇವ್‌ನೆ, “ಅದ್ಮಿ ಎಕೆಲೋ ರ‍್ಹವಾನು ಅಛ್ಛು಼ಕಾಹೆ, ಇನ ಬರೋಬರ್‌ನಿ ಜೋ಼ಡ್‌ವಾಳಿನ ಬಣಾವುಸ್‌” ಕರಿಬೋಲ್ಯೊ. ಅಮ್ ಯೆಹೋವನೆ ಖ್ಹಾರುಸ್‌ ಧರ್ತಿನು ಜ಼ಂತ್‌ನಾಬಿ ಆಬ್‌ನು ಜಿನಾವರ್‌ನಾಬಿ, ಜ಼ಮೀನ್ನಿ ಮಾಟಿಥಿ ಉಬ್‌ಜೈ಼ನ್ ಆ ಅಖ್ಖಾನ ಅದ್ಮಿ ಖಿವುಖಿವು ನಾಮ್ ಮ್ಹೇಲಸ್ಕಿ ದೇಖ್ಯೆಕರಿ ಇನಾಕನ ಆವಾಖ್ಹರ್‌ಕು ಕರ‍್ಯೊ. ಅದ್ಮಿನೆ ಏಕೇಕ್‌ ಜಾನ್ವರ್‌ನ ಖೆವುಖೆವು ನಾಮ್ ಮ್ಹೇಲ್ಯೋಕಿ ಯೋಸ್ ಯೊ ಅಖ್ಖಾನು ನಾಮ್‌ಹುಯು. ಅಮ್ ಯೊ ಅದ್ಮಿನೆ ಖ್ಹಾರೂಸ್ ಜಾನ್ವರ್‌ನಾಬಿ, ಆಬ್‌ನು ಜಿನಾವರ್‌ನಾಬಿ, ಝಾ಼ಡೀನು ಜಾನ್ವರ್‌ನಾಬಿ, ನಾಮ್ ಮ್ಹೇಲ್ಯೊ. ಕತೋಬಿ ಇನ ಬರೋಬರ್‌ನು ಜೋ಼ಡು ಮಳ್ಯುಕೊಯ್ನಿ. ಅಮ್‌ರ‍್ಹಾವಪರ್‌ ಯೆಹೋವ ದೇವ್‌ನೆ ಯೊ ಅದ್ಮಿನ ಭರ್‌ನಿಂದರ್‌ ಆವಾನಿಘೋಣಿ ಕರಿನ್ ಇನಿ ಪಾಖ್ಹ್‌ಳಿಯೆಮಾಥು ಏಕ್‌ನ ಕಾಡಿಲೀನ್ ಯೊ ಝ಼ಗೋಮ ಬೋಟಿಥಿ ಮೂಚ಼್‌ಯೊ. ಯೆಹೋವನೆ ಅದ್ಮಿಥಿ ಕಾಡ್ಯೋತೆ ಪಾಖ್ಹ್‌ಳಿನ ತಯೇಡಕರಿ ಬಣೈನ್, ಇನ ಯೊ ಅದ್ಮಿಕನ ಬುಲೈಲೀನ್ ಆಯೊ. ತದೆ ಇನೆ ಯೊ ತಯೇಡನ ದೇಖಿನ್, “ಹಮ್ಕೆ ಬರೋಬರ್‌ ಆ ಹೈರಿತೆ ಮಾರಿ ಹಡ್ಕೇಥಿ ಐತೆ ಹಡ್‌ಕ್ಯು, ಮಾರಿ ಬೋಟಿಥಿ ಐತೆ ಬೋಟಿ ಹುಯಿರ‍್ಹೀಸ್. ಆ ಹೈರಿತೆ ಅದ್ಮಿಥಿ ಉಬ್‌ಜೀತೆ ಇನಖ್ಹಾಜೆ ತಿರಿಯಕರಿ ಬೋಲೈಲಿಶೆ” ಕರಿಬೋಲ್ಯೊ. ಇನಖ್ಹಾಜೆ ಪರ್ಖ್ಹೊ ಆಯ ಬಾನ ಮ್ಹೇಲಿನ್ ಇನಿ ಬಾವಣ್ಣ ಮಳಿಜಾ಼ಸ್ ಇವ್ಣೆ ಬೇಜ಼ಣ ಎಕ್ಕಸ್ ಶರೀರ್‌ ಹುಯಿರ‍್ಹೇಸ್. ಯೊ ಅದ್ಮಿ ಅಜು಼ ಇನಿ ಬಾವಣ್‍ ಉಘಾಡ ರ‍್ಹಯತೋಬಿ ಖ್ಹರ್‌ಮಾಯಕೊಯ್ನಿ.
Waghri Booli Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.