Waghri Booli Bible
ವಿಮೋ 40
ಯೆಹೋವನಿ ಸನ್ನಿದಿಮ ಡೇರಾನ ಭೀರಾಖ್ಯೊತೆ
ಯೆಹೋವ ದೇವ್ನೆ ಮೋಶೆನ ಪಹಿಲ ಮಹಿನಾನ ಪಹಿಲ ದನ್ನೆ ತೂ ದೇವ್ನ ದರ್ಶನ್ನ ಡೇರಾನ ಪಾಡಿನ್ ಭೀರಾಕ್‌. ದಖ್ಹ್‌ ಹುಕುಮ್ನ ಪಲ್ಗಾನ ಪಿಟಾರನ ಇನಾಮ ಮ್ಹೇಲಿನ್ ಯೊ ಪಿಟಾರನ ಪಡ್ದೇಥಿ ಓಠೊಕರ್‌. ಇನಕೇಡೆಥು ಮೇಜ್‌ನ ಮಂಗೈನ್ ಇನ ಉಪ್ಪರ್ ಮ್ಹೇಲ್ನುತೆ ಇನ ಬರೊಬರ್‌ಥಿ ಮ್ಹೇಲ್‌. ದೀವನ ಖಂಬುನ ಮಂಗೈನ್ ಇನಿ ದಿವಳ್ಗಿಯೇನ ಬರೊಬರ್‌ಥಿ ಮ್ಹೇಲ್‌. ಹುಕುಮ್ನ ಪಲ್ಗಾವ್ನ ಪಿಟಾರನ ಖ್ಹಾಮ್ಣೆಕರಿ ಖ್ಹೊನ್ನಾನ ಢಾಕ್ಣಿನಿ ಝ಼ಗೊ ಮ್ಹೇಲಿನ್, ಡೇರಾನ ದರ್ವಾಜಕನ ಪಡ್ದಾನ ಭಾಂದ್‌. ದೇವ್ನ ದರ್ಶನ್ನ ಡೇರಾನ ದರ್ವಾಜಕನ ಖ್ಹಾಮ್ಣೆ ಚಾ಼ಚ಼ರ್‌ನ ಮ್ಹೇಲ್‌. ದೇವ್ನ ದರ್ಶನ್ನ ಡೇರನಾಬಿ ಚಾ಼ಚ಼ರ್‌ನ ಬೀಚ್ಮ ಬಾನೆನ ಮ್ಹೇಲಿನ್ ಇನಾಮ ಪಾಣಿನ ಭರಾವ್ಣು. ಬಲ್ಡಾನ ಅಶ್‌ಪಿಶ್‌ ಪಡ್ದಾನ ಭೀರಾಖಿನ್‌ ಬಲ್ಡಾನ ದರ್ವಾಜ಼ನ ಪಡ್ದಾನ ಠಂಗಾವ್ಣು. ಇನಕೇಡೆಥು ಅಬಿಷೇಕ ತೇಲ್ನಲೀನ್‌ ಡೇರನಾಬಿ ಇನಾಮಛಾ಼ತೆ ಅಖ್ಖಾನ ಇನ ಅಖ್ಖಾ ರಾಛಾ಼ವ್ನ ಅಬಿಷೇಕಕರೀನ್‌ ಅರ್ಪಣ್‌ಕರ್‌. ತಪ್‌ಥು ಯೊ ಪರಿಶುದ್ದ ಹುಯಿರ‍್ಹಿಶೆ. ಬಲಿನ ಚಾ಼ಚ಼ರ‍್ನಾಬಿ ಇನ ರಾಛಾ಼ವ್ನಾಬಿ ಅಬಿಷೇಕ್ ಕರಿನ್‌ ಬಲಿನ ಚಾ಼ಚ಼ರ್‌ನ ಅರ್ಪಣ್‌ಕರ್‌ ಯೊ ಘಣು ಪರಿಶುದ್ದ ಹುಯಿರ‍್ಹೇವ್ಣು. ಪಾಣಿನಿ ಬಾನೆನ ಇನ ಝ಼ಗ್ಲಿನ ಅಬಿಷೇಕ್‌ಕರಿನ್ ಅರ್ಪಣ್‌ಕರಿನ್ ನೇಮಕ್‌ ಕರ‍್ನು.
“ಆ ಕಾಹೆತೆ ಆರೋನನಾಬಿ ಅಜು಼ ಇನ ಛಿಯ್ಯಾವ್ನ ದೇವ್ನ ದರ್ಶನ್ನ ಡೇರಾನ ದರ್ವಾಜ಼ನ ಖನ್ನೆ ಲಯಿನ್ ಇವ್ಣುನ ಪಾಣಿ ನ್ಹೊವಾಡಿನ್, ಆರೋನ ಮನ ಯಾಜಕ ಹುಯಿರ‍್ಹವಾನಿತರ ಇನ ಯೊ ಯಾಜಕ್‌ನ ಪವಿತ್ರ ಪೇರ್ವಾಖ್ಹ್‌ನ ಫೇರೈನ್‌ ಇವ್ಣುನ ಅಬಿಷೇಕ್ ಕರಿನ್‌ ಅರ್ಪಣ್‌ಕರ್‌. ಇನಕೇಡೆಥು ಇನ ಛಿಯ್ಯಾವ್ನ ಬುಲಾವ್‌. ಇವ್ಣುನ ಪೆರ್ವಾಖ್ಹ್‌ನ ಫೇರೈನ್‌ ಇವ್ಣೆ ಮಾರಖ್ಹಾಜೆ ಯಾಜಕ ಹುಯಿರ‍್ಹಾವನಖ್ಹಾಜೆ ತೂ ಇನ ಬಾನ ಅಬಿಷೇಕ್ ಕರ‍್ಯೊತೆತಿಮ್‌ ಇವ್ಣುನಾಬಿ ಅಬಿಷೇಕಕರ್‌. ಆ ಅಬಿಷೇಕ್‌ಥಿ ಯಾಜಕನು ಕಾಮ್ನ ಇವ್ಣುನಾಬಿ ಇವ್ಣ ಪಿಳ್ಗಿವಾಳನಬಿ ಕದೆಕದೇಬಿ ರ‍್ಹಿಶೆ” ಕರಿ ಬೋಲ್ಯು. ಯೆಹೋವನೆ ಹುಕುಮ್‌ಕರ‍್ಯೊತೆತಿಮ್‌ ಮೋಶೆನೆ ಅಖ್ಖಾನ ಕರ‍್ಯೊ. ಬೇನೆ ವರಖ್ಹ್‌ಮ ಪಹಿಲ ಮಹಿನಾನ ಪಹಿಲ ದನ್ಮ ಇನೆ ಡೇರಾನ ಪಾಡಿನ್ ಭೀರಾಖ್ಯೊ. ಮೋಶೆ ಡೇರಾನ ಭೀರಾಖಿನ್‌ ಇನ ಹುದಿನ ಬಂಡಾನಅಖ್ಖು ನಾಖಿನ್ ಚೌಕಟ್ಅಖ್ಖಾನ ಭೀರಾಖಿನ್‌ ಗಡಾನ ದೀನ್‌ ಖಂಬಾನ ಭೀರಾಖ್ಯೊ. ಡೇರಾನಘರ್‌ಪರ್‌ ಡೇರಾನ ಲುಂಗ್ಡಾನ ಢಪೈನ್‌ ಯೊ ಡೇರಾನ ಉಪ್ಪರ್ ಮೂಚಾ಼ಯೊ. ಯೆಹೋವನ ಹುಕುಮ್ನಿಘೋಣಿ ಮೋಶೆ ಆ ಅಖ್ಖುಕರ‍್ಯೊ. ಹುಕುಮ್ನ ಪಲ್ಗಾನ ಪಿಟಾರಮ ಮ್ಹೇಲಿನ್ ಪಿಟಾರನ ಲಠ್ಠೇಥಿ ಖ್ಹಪ್‌ಡೈನ್‌ ಕೃಪಾಸನನ ಮ್ಹೇಲಿರಾಖಿನ್, ಪಿಟಾರನ ಡೇರಾನಮಹಿ ಲಯಿನ್, ಇನ ಖ್ಹಾಮ್ಣೆ ಪಡ್ದಾನ ಠಂಗೈನ್‌, ಯೆಹೋವ ಹುಕುಮ್‌ ಕರ‍್ಯೊತೆತಿಮ್‌ ಮೋಶೆ ಹುಕುಮ್‌ನು ಪಲ್ಗಾನ ಪಿಟಾರನ ಓಠೊಕರ‍್ಯೊ. ಆ ಕಾಹೆತೆ ಯೆಹೋವನೆ ಹುಕುಮ್‌ ಕರ‍್ಯೊತೆತಿಮ್‌ ಮೋಶೆನೆ ದೇವ್ನ ದರ್ಶನ್ನ ಡೇರಾನಮಹಿ ಉತ್ತರ‍್ನಿಭಾಗ್‌ಮ ಪಡ್ದಾನ ಭಾರ್‌ ಮೇಜ್‌ನ ಮ್ಹೇಲಿನ್, ಯೆಹೋವನೆ ಮೋಶೆನ ಹುಕುಮ್‌ ಕರ‍್ಯೊತೆ ಇಮ್ ಇನ ಉಪ್ಪರ್ ಯೆಹೋವನಿ ಝ಼ಗೋಮ ರೋಟಾನ ಢೇರಿಕರ‍್ಯೊ. ಇನೆ ದೀವಾನು ಖಂಬ್‌ನ ದೇವ್ನ ದರ್ಶನ್ನ ಡೇರಾನ ಘರ್‌ಮ ಖುಡ್‌ಶಿನ ಖ್ಹಾಮ್ಣೆ ಡೇರಾನ ದಕ್ಷಿಣ್‌ ಬಾಜು಼ಮ ಮ್ಹೇಲಿನ್, ಯೆಹೋವನೆ ಮೋಶೆನ ಹುಕುಮ್‌ ಕರ‍್ಯೊತೆ ಇಮ್ಮಸ್ ಇನಿ ದಿವಳ್ಗಿನ ಯೆಹೋವನ ಸನ್ನಿದಿಮ ಬರೋಬರ್‌ಥಿ ಮ್ಹೇಲ್ಯೊ. ಅಜು಼ ಖ್ಹೊನ್ನಾನು ಢಾಕ್ಣಿನ ದೇವ್ನ ದರ್ಶನ್ನ ಡೇರಾಮ ಪಡ್ದಾನಖ್ಹಾಮ್ಣೆ ಮ್ಹೇಲಿನ್, ಯೆಹೋವನೆ ಮೋಶೆನೆ ಹುಕುಮ್‌ ಕರ‍್ಯೊತೆ ಇಮ್ಮಸ್ ಇನ ಉಪ್ಪರ್ ವಾಖ್ಹ್‌ನು ತೇಲ್ನ ಢಪ್ಕಾರ ನಾಖ್ಯೊ. ಅಜು಼ ಇನೆ ಡೇರಾನ ದರ್ವಾಜ಼ನ ಪಡ್ದಾನ ಘಲಾಯೊ. ಯೆಹೋವನೆ ಮೋಶೆನ ಹುಕುಮ್‌ಕರ‍್ಯೊತೆತಿಮ್‌ ದೇವ್ನದರ್ಶನ್ನ ಡೇರಾನ ದರ್ವಾಜ಼ನ ಖ್ಹಾಮ್ಣೆ ಚಾ಼ಚ಼ರ್‌ನ ಮ್ಹೇಲಿನ್ ಇನ ಉಪ್ಪರ್ ಬಳಾನಿ ಬಲಿನಾಬಿ ಅನಾಜ಼್‌ನಿ ಅರ್ಪಣ್‌ಕರ‍್ಯೊ. ಮೋಶೆ ದೇವ್ನ ದರ್ಶನ್ನು ಡೇರನಾಬಿ, ಬಲಿನಿ ಚಾ಼ಚ಼ರ‍್ನಾಬಿ ಬೀಚ್ಮ ಪಾಣಿನ ಬಾನೆನ ಮ್ಹೇಲಿನ್, ಇನಾಮ ಮೋಶೆಬಿ ಆರೋನಬಿ ಇನ ಛಿಯ್ಯಾವ್‌ಬಿ ಧೊವಾನಖ್ಹಾಜೆ ಇನಾಮ ಪಾಣಿನ ಭರಾಯೊ. ಮೋಶೆ ದೇವ್ನ ದರ್ಶನ್ನ ಡೇರಾನ ಮಹಿ ಜ಼ಾವಾನಿವಖ್ಹ್‌ತೆಬಿ ಚಾ಼ಚ಼ರ್‌ನ ಸೇವೆನ ಆವಾನಿವಖ್ಹ್‌ತೆಬಿ ಹಾತ್‌ಗೋಡಾವ್ನ ಧೊಯಿಲಿಶೆ. ಡೇರಾನ ಅಜು಼ ಚಾ಼ಚ಼ರ್‌ನ ಅಶ್‌ಪಿಶ್‌ ಮರೆಲಾವ್ನ ಭೀರಾಖಿನ್‌ ಬಲ್ಡಾನ ದರ್ವಾಜ಼ನ ಪಡ್ದಾನ ಘಲಾಯೊ. ಅಮ್‌ ಮೋಶೆನೆ ಯೊ ಕಾಮ್ನಅಖ್ಖು ಖ್ಹರ್ತಿಕರ‍್ಯೊ.
ದೇವ್ನದರ್ಶನಾನ ಡೇರಾಪರ್‌ ವಾದ್‌ಳು ಢಪಾಯುತೆ
(ಅರಣ್ಯ 9:15-23)
ತದೆ ವಾದ್‌ಳುಏಕ್‌ ದೇವ್ನ ದರ್ಶನ್ನ ಡೇರಾನ ಮೂಚಿನಾಖ್ಯು; ಯೆಹೋವನಿ ಉಜಾ಼ಖ್ಹ್‌ ಡೇರಾಮ ಭರೈಗು. ವಾದ್‌ಳು ದೇವ್ನ ದರ್ಶನ್ನ ಡೇರಾನ ಉಪ್ಪರ್ ಭಿಯುಥೂತೆ ಇನಖ್ಹಾಜೆ ಯೆಹೋವನಿ ಉಜಾ಼ಖ್ಹ್‌ ಡೇರಾನಮಹಿ ಭರೈಗುಥುತೆ ಇನಖ್ಹಾಜೆ ಮೋಶೆ ಡೇರಾಮ ಜಾ಼ವಾನ ಕೋಹುಯುನಿ. ಯೊ ವಾದ್‌ಳು ಡೇರಾನ ಮ್ಹೇಲಿನ್ ಉಪ್ಪರ್ ಜಾ಼ವಖ್ಹತರ್ ಇಸ್ರಾಯೇಲ್‌ವಾಳು ಖ್ಹಾಮ್ಣೆ ಚಾ಼ಲ್‌ತು ನಿಕ್‌ಳ್ಯು. ಯೊ ವಾದ್‌ಳು ಮ್ಹೇಲ್ಯುಕೊಂತೆ ರ‍್ಹವಾನಿವಖ್ಹ್‌ತೆ ಯೊ ನಿಕ್‌ಳಲಗು ಕೋಜಾ಼ತುಥುನಿ. ಇಸ್ರಾಯೇಲ್‌ವಾಳನು ಅಖ್ಖು ಚಾ಼ಲ್‌ಕುಚ಼್‌ಮಾಬಿ ಇವ್ಣ ಡೋಳಾನಖ್ಹಾಮ್ಣೆ ದನ್ನಿ ವೇಳ್ಮ ಯೆಹೋವನು ವಾದ್‌ಳು ಡೇರಾನ ಉಪ್ಪರ್ ರ‍್ಹೇತುಥು; ರಾತ್ನಿ ವೇಳ್ಮ ಯೊ ವಾದ್ಳಾನಮಹಿ ಆಗ್‍ನಿ ಉಜಾ಼ಖ್ಹ್‌ ರ‍್ಹೇತುಥು.
Waghri Booli Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.