Skip to content
BibleKenya

Waghri Booli Bible

ವಿಮೋ 35

ಸಬ್ಬತ್‌ ದನ್ನಿ ನಿಯಮ್‌

ಮೋಶೆ ಇಸ್ರಾಯೇಲ್‌ವಾಳಾನ ಟೋಳ್‌ಕರಿನ್‌ ಇವ್ಣುನ, “ತುಮೆ ಅಮ್‌ಕರ‍್ನುಕರಿ ಯೆಹೋವದೇವ್ನೆ ತುಮೂನ ಹುಕುಮ್‌ ಕರಿರಾಖ್ಯೊಸ್. ಛೋ಼ ದನ್‌ಅಖ್ಖು ಕಾಮ್‌ಕರ‍್ನು; ಖ್ಹಾತ್‌ನೊ ದನ್ ಪರಿಶುದ್ದ ದನ್: ಯೊ ದನ್ ಯೆಹೋವನ ತನೀಯಛಾ಼ತೆ ಸಬ್ಬತ್‌ ದನ್‌ಹುಯಿರುತೆ ಇನಖ್ಹಾಜೆ ತುಮೆ ಕಾಮ್‌ ನಾಸ್‌ಕರ‍್ನು; ಯೊ ದನ್ನೆ ಕಾಮ್‌ಕರವಾಳನ ಮರಣ್ಣು ನಿಶತ್‌ಹೋಣು; ತುಮೆ ಜಿವ್ಣುಕರಾತೆ ಖೆವಿ ಝ಼ಗೋಬಿ ರ‍್ಹವೊ ಸಬ್ಬತ್‌ ದನ್ಮ ಆಗ್‌ನಾಬಿ ನಾ ಲಗಾಡ್‌ಣು ಕರಿ" ಬೊಲ್ಯೊ.

ದೇವ್ನು ದರ್ಶನ್ನ ಡೇರಾನ ಹೋಣುತೆ ರಾಛು಼ಅಖ್ಖು

(ವಿಮೋ 25:1-9)

ಮೋಶೆನೆ ಇಸ್ರಾಯೇಲ್‌ನ ಹಿಡಿ ಟೋಳ್‌ವಾಳಾನ ಅಮ್‌ಬೋಲ್ಯೊಕಿ, “ಯೆಹೋವದೇವ್ನೆ ಹುಕುಮ್‌ಕರ‍್ಯೊತೆ ಶಾತ್‌ಕತೊ, ತುಮೆ ತುಮಾರ ತುಮಾರಮಸ್‌ ಯೆಹೋವನಖ್ಹಾಜೆ ಕಾಣ್ಕೆನ ಲೀಲೆವ್ಣು; ಅಛ್ಛಾ಼ ದಿಲ್‌ರ‍್ಹವಾಳು ಅಖ್ಖು ಕಾಣ್ಕೆನ ಲಯಿನ್ ದೇವ್ಣು. ಯೆಹೋವನ ದ್ಯವಾನು ಯೊ ಕಾಣ್ಕೆ ಕಿಮ್‌ರ‍್ಹೇವ್ಣುಕತೊ; ಖ್ಹೊನ್ನು, ರೂಪು, ತಾಂಬು; ನೀಲಿ, ರಾಯ್‌ಜಾ಼ಮಣ್ಣೊ ರಂಗ್‌, ಲಲೇಲಾಲ್ ರಂಗ್‌ನು ಧಾಗೊಖ್ಹಾರುಬಿ, ಕೋರುಲುಂಗ್ಡು, ರುಯ್‌ನು ಲುಂಗ್ಡು, ಹದಕರಿಹುಯು ಲಾಲ್‌ರಂಗ್ನು ಮೇಂಢಾನು ಚಾ಼ಮ್ಡುಅಖ್ಖು, 1ದರ‍್ಯಾವ್ನ ಡೂಕರ್‌ನು ಚಾ಼ಂಬ್ಡು, ಬಾವಳ್ಯನು ಝಾ಼ಡ್‌, ದೀವಾನ ಹೋಣುತೆ ತೇಲ್‌, ಅಭಿಷೇಕನ ಅಜು಼ ಅಛ್ಛಿ ವಾನುತೇಲ್‌ ಅಖ್ಖು, ಏಫೋದ್ ಪೇರ್‌ವಾಖ್ಹ್‌ನ ಹೋಣುತೆ ಗೋಮೇಧಕಅಖ್ಖು ಅಜು಼ ಮಹಾಯಾಜಕ್ನ ಛಾ಼ತಿನ ಪದಕ್ಮ ಲಗಾಡ್ನುತೆ ಹರೇಕ್‌ಥರಾನು ಹೀರೊಅಖ್ಖು.

ಯೆಹೋವನ ಡೇರಾನು ಲಿಖ್ಯುಅಖ್ಖು

(ವಿಮೋ 39:32-43)

ತುಮಾರಮ ಛಾ಼ತೆ ಕಾಮ್‌ಕರಾವಳು ಅಕ್ಲಿಖ್ಹಾರು ಆಯಿನ್‌ ಯೆಹೋವನೆ ಹುಕುಮ್‌ಕರ‍್ಯೊತೆ ಅಖ್ಖಾನ ಕರ‍್ನು. ಇವ್ಣೆ ಕರ‍್ನುತೆ ಶಾತ್‌ಕತೊ; ದೇವ್ನು ದರ್ಶನ್ನು ಡೇರೊ, ಇನು ಢಾಪಾನು ಪಡ್ದೊಅಖ್ಖು, ಕೊಂಡಿಅಖ್ಖು, ಚೌಕಟ್ಅಖ್ಖು, ಗಡಅಖ್ಖು, ಖಮ್‌ಅಖ್ಖು, ಹುದಿನು ಬಂಡೊಅಖ್ಖು, ಹುಕುಮ್ನ ನಿಯಮ್ನು ಪಿಟಾರೊ, ಇನ ಢೊವಾನು ಲಠ್ಠಅಖ್ಖು, ಕೃಪಾಸನ , ಇನ ಓಠೊಕರಾನು ಪಡ್ದೊ, ಮೇಜ್‌, ಇನು ರಾಛು಼ಖ್ಹಾರು, ಇನ ಉಪ್ಪರ್ ಮ್ಹೇಲಾನು ಪರಿಶುದ್ ರೋಟೊ ಅಖ್ಖು, ದೀವಾನುಖಂಬು, ಇನು ಜಿನಖ್ಹ್‌ಖ್ಹಾರು, ದಿವಳ್ಗಿಅಖ್ಖು, ದೀವಾನ ಹೋಣುತೆ ತೇಲ್‌, ಢಾಕ್ಣಿ, ಇನು ಖಮ್‌ಅಖ್ಖು, ಅಭಿಷೇಕನು ತೇಲ್‌, ವಾಖ್ಹ್‌ನು ಢಪ್ಕಾರನುತೇಲ್‌, ಡೇರಾನು ದರ್ವಾಜ಼ನು ಪಡ್ದೊ, ಚಾ಼ಚ಼ರ್‌, ತಾಂಬಾನು ಖಾಂಜ್ರಿ, ಲಠ್ಠಅಖ್ಖು, ಜಿನಖ್ಹ್‌ಖ್ಹಾರು, ಹಾತ್‌ಧೊವಾನು ಕುಂಡು, ಇನಿ ಖುಡ್‌ಷಿ, ಯೊ ಝ಼ಗೋನು ಪಡ್ದೊಅಖ್ಖು, ಖಮ್‌ಅಖ್ಖು, ಮ್ಹೇಲಾನೊ ಬಂಡೊಅಖ್ಖು, ಬಲ್ಡಾನು ದರ್ವಾಜ಼ನು ಪಡ್ದೊ, ಡೇರಾನೊ ಖಿಲ್ಲೊಅಖ್ಖು, ಬಲ್ಡಾನು ಖಿಲ್ಲೊಅಖ್ಖು, ಇನು ಶಿಂದ್ರುಅಖ್ಖು, ಪವಿತ್ರ ಝ಼ಗೋನಿ ಸೇವೆನ ಹೋಣುತೆ ಶನ್‌ಗಾರ‍್ನು ಪೇರ್ವಾಖ್ಹ್‌ಅಖ್ಖು ಕತೊ ಮಹಾ ಯಾಜಕಹುಯಿರೊತೆ ಆರೋನನಾಬಿ ಇನ ಲಡ್ಕಾವ್‍ನಾಬಿ ಹೋಣುತೆ ಪವಿತ್ರ ಯಾಜಕ ಪೇರ್ವಾಖ್ಹ್‌ಅಖ್ಖು ಆಸ್" ಕರಿ ಬೊಲ್ಯೊ.

ಅದ್ಮಿಖ್ಹಾರು ಲಾಯುತೆ ಇವ್ಣು ಕಾಣ್ಕೆ

ಇಸ್ರಾಯೇಲ್‌ವಾಳು ಅಜು಼ ಟಾಂಡವಾಳು ಖ್ಹಾರು ಮೋಶೆನ ಖ್ಹಾಮ್ಣೆಥು ನಿಕ್ಳಿನ್‌, ಕಿನ ದಿಲ್‌ಮ ಬೋಲಾವಸ್ಕಿ, ಕಿನು ಮನ್‌ ತಯ್ಯಾರ್‌ಛಾ಼ಕಿ ಇವ್ಣೆಅಖ್ಖು ಆಯಿನ್‌ ದೇವ್ನ ದರ್ಶನ್ನು ಡೇರಾನ ಕಾಮ್ನಖ್ಹಾಜೇಬಿ ಇನು ಹರೇಕ್ ಸೇವೆನಾಬಿ, ಪವಿತ್ರ ಪೇರ್ವಾಖ್ಹ್‌ನಖ್ಹಾಜೇಬಿ ಯೆಹೋವನ ಕಾಣ್ಕೆನ ಲಾಯು. ಶುದ್ದ ದಿಲ್‌ನು ಪರ್‌ಖ್ಹೊ, ತಯೇಡಾಬಿ ಆಯಿನ್‌ ಯೆಹೋವನ ಖ್ಹೊನ್ನಾನು ಕಾಣ್ಕೆನಾಬಿ ಕತೊ ಕಾಕ್ಣು, ಕಾಪ್‌ಟೋಕ್ರಿ, ಅಂಗುಠಿ, ಗಳಾನಿಹಾರ್‌, ಖ್ಹೊನ್ನು ಖ್ಹರಪ್‌ನ ಸಮರ್ಪಣ್‌ ಕರ‍್ಯು. ಕಿನಾಮ ನೀಲಿ, ರಾಯ್‌ಜಾ಼ಮಣ್ಣೊ ರಂಗ್ನು ಅಜು಼ ಲಲೇಲಾಲ್‌ ರಂಗ್ನು ಧಾಗೊಅಖ್ಖು, ಕೋರುಲುಂಗ್ಡು, ಬೋಕ್ಡಾನು ರುಯ್‌ನು ಲುಂಗ್ಡು, ಹದಕರಿಹುಯು ಲಾಲ್‌ರಂಗ್ನು ಮೇಂಢಾನು ಚಾ಼ಮ್ಡುಅಖ್ಖು ಅಜು಼ ದರ‍್ಯಾವ್ನ ಜಾನ್ವರ್‌ನು ಚಾ಼ಮ್ಡುಅಖ್ಖು ಥೂಕಿ ಇನಾಬಿ ಲಯಿನ್ ದಿದು. ಕಿನಾಕನ ರೂಪು ತಾಂಬುಥೂಕಿ ಇವ್ಣೆ ಇನಅಖ್ಖು ಲಯಿನ್ ಯೆಹೋವನ ದಿದು. ಕಿನಾಕನ ಡೇರಾನ ಕಾಮ್ನ ಹೋಣುತೆ ಬಾವಳ್ಯನು ಝಾ಼ಡುಥೂಕಿ ಇವ್ಣೆ ಇನ ಲಯಿನ್ ದಿದು. ಪುರ್ಗುಲ್‌ನಿ ತಯೇಡಖ್ಹಾರಿ ಇವ್ಣ ಹಾಥ್ಥಿ ನೀಲಿ ರಾಯ್‌ಜಾ಼ಮಣ್ಣೊ ರಂಗ್, ಲಲೇಲಾಲ್‌ ರಂಗ್ನು ಧಾಗೊಅಖ್ಖು, ಖ್ಹುತ್ತರ್‌ನ ಧಾಗನಾಬಿ ವಣಿನ್‌ ಯೊ ಧಾಗಾನ ಲಯಿನ್ ದಿದು. ಅಕ್ಲಿ ತಯೇಡಾಖ್ಹಾರಿ ಅಲಗ್‌ ತಯೇಡಖ್ಹಾರಿ ಬೋಕ್ಡಾನ ಕೇಖ್ಹ್‌ಥಿ ವಣಿನ್‌ ಲಯಿನ್ ದಿದಿಯೆ. ಅಧಿಪತಿಖ್ಹಾರು ಯಾಜಕನು ಏಫೋದ್‌ನ ಹೋಣುತೆ ಗೋಮೇಧಕ, ಹೀರೊಖ್ಹಾರು, ಛಾ಼ತಿನಿ ಪದಕ್ಮ ಘಾಲ್ನುತೆ ಹೀರೊಖ್ಹಾರನಾಬಿ, ದೀವನ ಹೋಣುತೆ ತೇಲ್ನಬಿ ಅಜು಼ ಅಬಿಷೇಕನ ತೇಲ್ನ ಅಜು಼ ವಾನತೇಲ್ನ ಅಖ್ಖುಲಾಯಿನ್‌ ದಿದು. ಮೋಶೆಥಿ ಯೆಹೋವನೆ ಹುಕುಮ್‌ಕರ‍್ಯೊತೆ ಅಖ್ಖು ಕಾಮ್ನಖ್ಹಾಜೇಬಿ ಇನ ಕಾಣ್ಕೆನ ಲಾಯಿನ್‌ದ್ಯವಾನ ದಿಲ್‌ಥಿ ಮಾನಿನ್ ಇಸ್ರಾಯೇಲ್‌ವಾಳನು ಪರ್ಖ್ಹೊ ತಯೇಡಖ್ಹಾರುಬಿ ದಿಲ್‌ಥಿ ಲಯಿನ್ ದಿದು.

ಯೆಹೋವನಿ ಸನ್ನಿಧಿಮ ಡೇರಾನು ಕಾಮ್‌ಕರವಾಳು

(ವಿಮೋ 31:1-11)

ಮೋಶೆನೆ ಇಸ್ರಾಯೇಲ್‌ವಾಳಾನ ಅಮ್‌ ಬೊಲ್ಯೊ, “ದೇಖೊ, ಯೆಹೋವನೆ ಯೆಹೂದ ಖೂಮ್‌ವಾಳು ಹುಯಿರೋತೆ ಹೂರನೊ ನಾತ್ಯೊಬಿ, ಊರಿಯನೊ ಛಿಯ್ಯೊಬಿ ಹುಯಿರೋತೆ ಬೆಚಲೇಲಕರಿ ನಾಮ್‌ವಾಳಾನ ನಾಮ್‌ ಧರಿನ್ ಚಿಕ್ರಿರಾಖ್ಯೊಸ್. ಇನ ದೇವ್ನ ಆತ್ಮನ ದೀನ್‌ ಇನ ಹೋಣುತೆ ಗ್ಯಾನ್, ಪಢಂತ್, ಖ್ಹಯಾಲ್ನನಾಬಿ ಹರೇಕ್ ಫುತ್‌ಳಾನು ಬಣಾವಟ್ನಿ ಗ್ಯಾನ್ನಾಬಿ ದೀರಾಖ್ಯೊಸ್‌, ಖ್ಹಾಜ಼್‌ಥಿ ಕರಾನ ಖ್ಹೊನ್ನು, ರೂಪು ಅಜು಼ ತಾಂಬಾಥಿ ಕಾಮ್‌ ಕರಾನಬಿ, ಹೀರಾನ ಬಣಾವಟ್‌ಕರಾನಾಬಿ, ಝಾ಼ಡೇಥಿ ಬಣಾವಟ್ ಕರಾನಬಿ, ಯೊ ಕೊಂತೆ ಬಿಜೇಕ್‌ಜ಼ಣಾನ ಶಿಕಾಡಿದ್ಯಾವನಬಿ ಇನಾಬಿ ಅಜು಼ ದಾನ್‌ ಖೂಮ್ನು ಅಹೀಸಾಮಾಕನೊ ಛಿಯ್ಯೊ ಒಹೋಲೀಯಾಬನಾಬಿ ಶಕತ್ ದೀರಾಖ್ಯೊಸ್‌. ಕೆತ್ತವಾಳೂಬಿ, ನೀಲಿ ರಾಯ್‌ಜಾ಼ಮಣ್ಣೊ ರಂಗ್ನು ಲಲೇಲಾಲ್‌ ರಂಗ್ನು ಧಾಗೇಥಿಬಿ, ಖ್ಹುತ್ತರ್‌ಥೀಬಿ ಬಣಾವಟ್ನು ಕಾಮ್‌ ಕರವಾಳುಬಿ, ವಣಾವಾಳೂಬಿ, ಅಖ್ಖು ಕಾಮ್ನ ಕರಾವಾಳಾನಾಬಿ ಯೆಹೋವನೆ ಇವ್ಣುನ ಗ್ಯಾನ್ನ ಘಣೇಥಿ ಘಣು ದಿದೊ.

Source notes (1)
  1. Footnote ದರ‍್ಯಾವ್ನು ಡೂಕರ್‌ಕತೊ ಡಾಲ್ಫಿನ್ನಿಘೊಣಿ

Waghri Booli Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.