Waghri Booli Bible
ವಿಮೋ 29
ಆರೋನ ಅಜು಼ ಇನ ಛಿಯ್ಯವ್ನು ಯಾಜಕ್‌ನಿ ನೇಮಕ್.
(ಯಾಜಕ 8:1-36)
ಇವ್ಣೆ ಮನ ಯಾಜಕ ಹುವಾನಿತರ ಇವ್ಣುನ ನೇಮಕ್‌ಕರಾನ ತೂ ಕರ‍್ನುತೆ ಕಾಮ್‌ಶಾತ್‌ಕತೊ; ಎಕ್ ಕೆಲ್ಡಾನ ಅಜು಼ ಶನು ದೋಷ್‌ಕೊಂತೆ ಬೇ ಮೇಂಢಾವ್ನಬಿ ಲೇವ್ಣು. ಅಜು಼ ಖಾಟುಕೊಂತೆ ರೋಟಾವ್ನಬಿ, ತೇಲ್ ಮಿಲಾವಟ್‌ನು ಖಾಟುಕೊಂತೆ ಖ್ಹವಾಳಿನ, ತೇಲ್ ಲಗಾಡಿಹುಯು ಖಾಟುಕೊಂತೆ ಕಡುಬುಖ್ಹಾರುಬಿ, ಘವ್‌ನ ಆಟೇಖ್ಹು ಕರೈನ್ ಎಕ್ಕಸ್ ಟೋಕ್ರಿಮ ಭರಾವ್ಣು. ಇನವಾರ್ ಯೊ ಟೋಕ್ರಿನ, ಕೆಲ್ಡಾನ ಅಜು಼ ಬೇ ಮೇಂಢಾವ್ನಿ ಜೋ಼ಡ್ಮ ಲ್ಯಾವ್ಣು. ತದೆ ಆರೋನನಾಬಿ ಅಜು಼ ಇನ ಛಿಯ್ಯನಬಿ ದೇವ್ನ ದರ್ಶನ್ನ ಡೇರಾನ ಘರ್‌ನ ಬಾಕಲ್‍ಕನ ಬುಲೈಲಿನ್ ಅಯಿನ್ ನೊಹಾಡ್ಣು. ಯೊ ಪೆರ್ವಾಖ್ಹ್‌ನ ಕತೊ ಮಹಿನ ಝ಼ಗ್ಗಾನ, ಏಫೋದ್ ಕವಚ್‌ನ ಜೋ಼ಡೆ ಫೇರಾನ ಝ಼ಗ್ಗಾನಬಿ, ಏಫೋದ್ ಕವಚ್‌ಬಿ ಛಾ಼ತಿನ ಪದಕ್‌ನಾಬಿ ಆರೋನ್ನ ಫೇರೈನ್ ಏಫೋದ್ ಕವಚ್‌ನು ವಣ್‌ಖರ್ ನಾಖ್ಯಹುಯ ಕಷ್‌ಬಂದ್‌ನ ಭಂದೈನ್, ಇನ ಮಾಥಪರ್ ರುಂಬಾಲ್ನ ಘಲೈನ್, ರುಂಬಾಲ್‌ಪರ್ ದೇವ್ನಖ್ಹಾಜೆ ರ‍್ಹೇವ್ಣುತೆ ಪವಿತ್ರ ಪಟ್ಟಿನ ಭಂದೈನ್, ಅಬಿಷೇಕ್‌ನ ತೇಲ್ನ ಇನಪರ್ ರಂಚಿನ್ ಇನ ಅಬಿಷೇಕ್‌ಕರ‍್ನು. ಇನವಾರ್ ಇನ ಛಿಯ್ಯಾವ್ನ ಖನ್ನೆ ಬುಲೈನ್, ಇವ್ಣುನ ಉಪ್‌ಲ್ಯ ಝ಼ಗ್ಗಾವ್ನ ಫೇರೈನ್, ಆರೋನ್ನಬಿ ಇನ ಛಿಯ್ಯಾವ್‌ನಬಿ ಕಷ್‌ಭಂದ್‌ನ ಭಂದೈನ್ ರುಂಬಾಲೆನ ಲಪೇಟ್‌ಣು. ತಪ್‌ಥು ಯಾಜಕಸೇವೆ ಇವ್ಣುನ ಹಮೇಶಾನು ಹಕ್ ಹುಯಿರ‍್ಹಿಷೆ. ಅಮ್ ಆರೋನಬಿ ಇನ ಛಿಯ್ಯಾವ್‌ಬಿ ಯಾಜಕ್ ಸೇವೆನ ನೇಮಕ್ ಹುಯಿರ‍್ಹಿಷೆ. ಇನವಾರ್ ತೂ ಯೊ ಕೆಲ್ಡಾನ ದೇವ್ನದರ್ಶನ್ನ ಡೇರಾನ ಘರ್‌ನ ಮ್ಹೋರೆ ಲಯಿನ್, ಆರೋನಬಿ ಇನ ಛಿಯ್ಯಾವ್‌ಬಿ ಇನ ಮುಡ್‌ಕ್ಯಪರ್ ಇವ್ಣ ಹಾತ್ನ ಮ್ಹೇಲ್ನು. ಇನವಾರ್ ತೂ ಕೆಲ್ಡಾನ ಯೆಹೋವನ ಖ್ಹಾಮೆ ದೇವ್ನದರ್ಶನ್ನ ಡೇರಾನ ಘರ್‌ನ ಬಾಕಲ್‌ಕನಸ್ ಬಲಿಕರ‍್ನು. ಯೊ ಕೆಲ್ಡಾನ ಲ್ಹೋಯಿಮ ದರಾಖ್ಹು ಲೀನ್ ಅಂಗ್ಳಿಥಿ ಚಾ಼ಚ಼ರ್‌ನ ಶಿಂಗ್‌ಡಾವ್ನ ಲೋಥಿನ್ ಉಭ್‌ರ‍್ಯ ಹುಯ ಲ್ಹೋಯಿನ ಚಾ಼ಚ಼ರ್‌ನ ಬಡ್ಡೇಮ ರಂಚ಼್‌ಣು. ಇನು ಕಾಳ್‌ಜನ ಉಪ್ಲಿ ಬಿಶ್ಶಾವ್ನಬಿ ಬೇ ಬುಕ್ಕಿಯೆನಬಿ ಇನಿ ಉಪ್ಪರ್‌ಲಿ ಬಿಶ್ಶಾವ್ನಬಿ ಲೀನ್ ಚಾ಼ಚರ್‌ಪರ್ ಬಲಿ ಛ಼ಡಾವ್‌ಣು. ಕೆಲ್ಡಾನು ಬೋಟಿನಬಿ, ಚಾ಼ಂಬ್‌ಡನಬಿ ಅಜು಼ ಅತಲ್ಡಿನ ಇಟಾರಮ್ನ ಭಾರ್‌ ಆಗ್‌ಥಿ ಬಾಳಿನಾಕ್ಣು. ಶನಕತೊ ಆ ಪಾಪ್ನ ಪರಿಹಾರ‍್ನು ಬಲಿ. ಇನವಾರ್ ತೂ ಯೊ ಮೇಂಢಾವ್‌ಮಥು ಏಕ್‌ನ ಧರಿಲಿನ್ ಆರೋನಬಿ ಇನ ಛಿಯ್ಯಾವ್‌ಬಿ ಇನ ಮುಡ್‌ಕ್ಯಪರ್ ಇವ್ಣ ಹಾತ್ನ ಮ್ಹೇಲ್ನು. ತೂ ಮೇಂಢಾನ ರ‍್ಹೇಖ್ಹಿನ್ ಇನು ಲ್ಹೋಯಿನ ಚಾ಼ಚ಼ರ್‌ನು ಚಾರ್ ಬಾಜು಼ಬಿ ಛಿಡಕ್‌ಣು. ಇನಪಾರ್ ತೂ ಯೊ ಮೇಂಢಾನ ಟುಕ್‌ಡ ಟುಕ್‌ಡಕರಿ ಕತ್ರಿನ್ ಇನಿ ಅತಲ್‌ಡಿಯೆವ್‌ನಾಬಿ, ಗೋಡಾವ್‌ನಾಬಿ ಧೊಯಿನ್ ಇನ ಟುಕ್‌ಡಾವ್ನಾಬಿ, ಮುಡ್‌ಕ್ಯನಾಬಿ ಎಕ್ಟು ಮ್ಹೇಲ್ನು. ಯೋಅಖ್ಖಯೇಕ್‌ ಮೇಂಢಾನ ಚಾ಼ಚ಼ರ್‌ನಪರ್ ಯೆಹೋವನಖ್ಹಾಜೆ ಭುಂಜಿನ್ ಬಲಿಕರಿನ್ ಸಮರ್ಪಣ್‌ ಕರ‍್ನು. ಆ ಯೆಹೋವನ ಖ್ಹೊಡ್‌ಮೈವಾನು ಢಪ್ಕಾರ್ ಹುಯಿರ‍್ಹುಸ್. ಇನವಾರ್ ತೂ ಬೇನ ಮೇಂಢಾನ ಧರಿಲಿನ್ ಆರೋನಬಿ ಇನ ಛಿಯ್ಯಾವ್‌ಬಿ ಇನ ಮುಡ್‌ಕ್ಯಪರ್ ಇವ್ಣ ಹಾತ್ನ ಮ್ಹೇಲ್ನು. ಇನಕೇಡೆಥು ಮೇಂಢಾನ ಬಲಿಕರಿನ್ ಯೊ ಲ್ಹೋಯಿಮ ದರಾಖ್ಹನ ಆರೋನ್ನು ಅಜು಼ ಇನ ಛಿಯ್ಯಾವ್ನ ಖಾವಕಾನ್ನಿ ನೋಕ್‌ನಾಬಿ ಖಾವಹಾತ್ನಿ ಅಂಗುಠನಬಿ, ಖಾವಗೋಡಾನ ಅಂಗುಠನಬಿ ಲಗಾಡಿನ್, ಉಭ್‌ರಸ್ತೆ ಲ್ಹೋಯಿನ ಚಾ಼ಚ಼ರ್‌ನ ಅಶ್‌ಪಿಶ್ ಛಿಡಕ್‌ಣು. ಆನಾಹುಯಿನ್ ತೂ ಚಾ಼ಚ಼ರ್‌ನ ಉಪ್ಪರ್‌ನು ಲ್ಹೋಯ್‌ಮಬಿ, ಅಭಿಷೇಕ್‌ನ ತೇಲ್‌ಮಾಬಿ ದರಾಖ್ಹನ ಲೀಲಿನ್‌ ಆರೋನ್ನು ಅಜು಼ ಇನ ಪೆರ್ವಾಖ್ಹ್‌ಪರ್‌ಬಿ ಇನ ಛಿಯ್ಯಾ ಅಜು಼ ಇವ್ಣ ಪೆರ್ವಾಖ್ಹ್‌ನ ಉಪ್ಪರ್‌ಬಿ ಛಿಡಕ್‌ಣು. ಅಮ್ ಯೋಬಿ ಅಜು಼ ಇನ ಛಿಯ್ಯಾವ್‌ಬಿ ಇವ್ಣ ಪೆರ್ವಾಖ್ಹ್ ಖ್ಹಮೇದ್ ಪರಿಶುದ್ಧ್ ಉಷೆ. ಪಟ್ಟಾಭಿಷೇಕ್‌ನ ಖ್ಹಾಜೆ ಸಮರ್ಪಣ್‌ ಕರ‍್ಯುಹುಯೊ ಮೇಂಢೊ ಹುಯಿರ‍್ಹೊತೆಖ್ಹಾಜೆ ಇನು ಬಿಶ್ಶಅಖ್ಖು ಕತೊ ಡೋಂಡಾನಿ ಬಿಶ್ಶಾನಬಿ, ಫೇಪ್ಡಾನ ಉಪ್ಪರ್‌ಲಿ ಬಿಶ್ಶಾನಬಿ, ಬೇ ಬುಕ್ಕಿಯೆನಬಿ ಇನಪರ್‌ಲಿ ಬಿಶ್ಶನಬಿ ಅಜು಼ ಖಾವಿ ಟಾಂಗ್‌ನಬಿ, ಅಜು಼ ಯೆಹೋವನ ಮ್ಹೋರೆ ಟೋಕ್ರಿಮ ಮ್ಹೇಲಿರಾಖ್ಯುಥುತೆ ಖಾಟುಕೊಂತೆ ಚೀಜ಼್‌ಖ್ಹಾರಮ ಎಕ್ ರೋಟಾನ, ತೇಲ್ ಮಳಾಯುಹುಯು ಎಕ್ ಖ್ಹವಾಳಿನ ಅಜು಼ ಎಕ್ ಕಡಬುನಬಿ ಪಾಡಿಲಿನ್, ಯೋಅಖ್ಖಾನ ಆರೋನ್ನ ಅಜು಼ ಇನ ಛಿಯ್ಯಾವ್ನ ಹಾತ್ಮ ದೀನ್ ಯೆಹೋವನ ಖ್ಹಾಮೆ ಅರ್ಪಣ್ ಕರ‍್ನು. ಇನಪಾರ್ ಯೋಅಖ್ಖಾನ ಇವ್ಣ ಹಾತೇಖ್ಹು ಪಾಡಿಲಿನ್ ಯೆಹೋವನಖ್ಹಾಜೆ ಬಲಿಪೀಠ್‌ನಪರ್ ಭುಂಜ಼್‌ನು. ಯೊ ಯೆಹೋವನ ಖ್ಹೊಡ್‌ಮೈವಾನು ಬಲಿನು ಢಪ್ಕಾರ್ ಹುಯಿರ‍್ಹುಸ್. ಅಜು಼ ಆರೋನ್ನ ಪಟ್ಟಾಭಿಷೇಕ್‌ನಖ್ಹಾಜೆ ನೇಮಕ್ ಕರ‍್ಯಹುಯ ಮೇಂಢಾನ ಛಾ಼ತಿನ ಭಾಗ್ನ ಪಾಡಿನ್ ಇನ ಅರ್ಪಣ್ ಕರ‍್ಯಹುಯಾನ ಯೆಹೋವನ ಖ್ಹಾಮೆ ಉತಾರ್‌ನು. ಯೊ ತುನ ಮಳ್‌ಣುತೆ ವಾಟೊ ಹುಯಿರ‍್ಹಿಷೆ. ಆರೋನ್ನಬಿ ಇನ ಛಿಯ್ಯಾವ್‌ನಬಿ ನೇಮಕ್ ಕರಾನಿ ವಖ್ಹ್‌ತೆ ಅರ್ಪಣ್ ಕರ‍್ಯಹುಯ ಮೇಂಢಾನಿ ಬೋಟಿಮ ಛಾ಼ತಿನ ಭಾಗ್‌ನಬಿ ಯಾಜಕರ‍್ನಖ್ಹಾಜೆ ಮ್ಹೇಲಿರಾಖನು ಟಾಂಗ್‌ನ ದೇವ್ಣುಕರಿ ಖ್ಹಯಾಲ್ ಕರ‍್ನು. ಹಮೇಶಾನಿ ನಿಯಮ್‌ಥಿ ಇಸ್ರಾಯೇಲ್‌ವಾಳು ಯೋಅಖ್ಖಾನ ಆರೋನ್ನಬಿ ಇನ ಖಾನ್‌ದಾನ್‌ವಾಳನಬಿ ದೇವ್ಣುಪಡ್ಯು. ಯೊಅಖ್ಖು ಯಾಜಕವ್‌ನ ಭಾಗ್‌ನಖ್ಹಾಜೆ ಕಾಡಿಮ್ಹೇಲಿರಾಖನು ಹುಯಿರ‍್ಹುಸ್. ಇಸ್ರಾಯೇಲ್‌ವಾಳು ಸಮಾಧಾನ್ನಿ ಬಲಿನಖ್ಹಾಜೆ ಜಾನ್ವರ್‌ನ ರ‍್ಹೇಖ್ಹಿನ್ ಯೆಹೋವನ ಆರಾದನೆ ಖ್ಹಾರಿವಖ್ಹತ್ ಯೊ ಭಾಗ್‌ಅಖ್ಖನ ಯಾಜಕವ್‌ನ ಖ್ಹಾಜೆ ಕಾಡಿಮ್ಹೇಲಿರಾಕ್ಣು. ಆರೋನನು ಯಾಜಕ್‌ನು ಪವಿತ್ರ ಪೆರ್ವಾಖ್ಹ್‌ಅಖ್ಖು ಯೊ ಹುಯಿಜಾ಼ವದಿನ್ ಇನ ಖಾನ್‌ದಾನ್‌ವಾಳನಬಿ ಉಪಯೋಗ್ ಹೋಣು. ಇವ್ಣೆ ಅನಾಮಸ್ ಮಾರಖ್ಹಾಜೆ ಅಬಿಷೇಕ್‌ಕರಿನ್ ನೇಮಕ್ ಕರ‍್ನು. ಇನ ಛಿಯ್ಯಾವ್ಮ ಇನಬದಲ್ ಮಹಾಯಾಜಕ ಹುವವಾಳೊ ಪವಿತ್ರಝ಼ಗೋಮ ದೇವ್ನಿ ಸೇವೆನ ಚ಼ಲಾವನಖ್ಹಾಜೆ ದೇವ್ನ ದರ್ಶನ್ನ ಡೇರಾನ ಘರ್‌ಮ ಪೇಖ್ಹ್‌ಯುಥಪ್ತು ಖ್ಹಾತ್ ದನ್‌ಲಗು ಯೊ ಪೆರ್ವಾಖ್ಹ್‌ನ ಫೇರಿರಾಕ್ಣು. ಆರೋನ ಅಬಿಷೇಕ್‌ನಖ್ಹಾಜೆ ಅರ್ಪಣ್ ಕರ‍್ಯಹುಯ ಮೇಂಢಾನಿ ಬೋಟಿನ ದೇವ್ನದರ್ಶನ್ನ ಘರ್‌ನ ಮಾಳ್‌ಮ ರ‍್ಹಾಂದ್‌ಣು. ಆರೋನಬಿ ಇನ ಛಿಯ್ಯಾವ್‌ಬಿ ಯೊ ಮೇಂಢಾನಿ ಬೋಟಿನ ಅಜು಼ ಟೋಕ್ರಿಮನ ರೋಟಾನ ದೇವ್ನದರ್ಶನ್ನ ಡೇರಾನ ಘರ್‌ನ ಬಾಕಲ್‌ನ ಮಹಿ ಖಾವ್ಣು. ಇವ್ಣುನ ಯಾಜಕ್‌ನ ಸೇವೆನ ಸಮರ್ಪಣ್‌ಕರನಬಿ ಖಿವು ಚೀಜ಼್‌ಖ್ಹಾರು ಪಾಪ್ನ ಪರಿಹಾರ್‌ನಖ್ಹಾಜೆ ಅರ್ಪಣ್‌ಹುಯುಕಿ ಯೋಅಖ್ಖಾನ ಇವ್ಣೆ ಖಾವ್ಣುಪಣ್ಕಿ ಬಿಜು಼ಖ್ಹಾರು ನಾಖಾವ್ಣು; ಶನಕತೊ ಯೊಅಖ್ಖು ಪರಿಶುದ್ ಹುಯಿರ‍್ಹುಸ್. ಅಭಿಷೇಕ್‌ನ ಸಂಬಂದ್‌ಪಡಿಹುಯು ಬೋಟಿಮ ರ‍್ಹವೊ, ರೋಟಾಮ ರ‍್ಹವೊ ಬಿಜೇಕ್ ದನ್ನ ವ್ಹಾಣಲಗು ಉಭ್‌ರ‍್ಯುತೊ ಇನ ಬಾಳಿನಾಕ್ಣು. ಯೊ ಪವಿತ್ರ ಹುಯಿರ‍್ಹುತೆ ಖ್ಹಾಜೆ ಕೋಣ್‌ಬಿ ಇನ ನಾಖಾವ್ಣು. ಮೇ ತುನ ಹುಕುಮ್ ಕರ‍್ಯೊತೆ ಪರಕ್ಮ ಖ್ಹಾತ್‌ದನ್‌ಲಗು ಅಮ್ ಇವ್ಣುನ ಚ಼ಲೈನ್ ಆರೋನ್ನಬಿ ಇನ ಛಿಯ್ಯಾವ್‌ನಬಿ ನೇಮಕ್‌ಕರ‍್ನು. ಹರ್‌ದನ್‌ಬಿ ಪಾಪ್ನ ಪರಿಹಾರ್‌ನಖ್ಹಾಜೆ ಎಕ್ ಕೆಲ್ಡಾನ ಬಲಿದೇವ್ಣು. ಆ ಕಾಹೆತೆ ಬಲಿಪೀಠ್‌ನ ಶುದ್ದಿಕರಾನಖ್ಹಾಜೆ ಇನಪರ್ ಪಾಪ್‌ ಪರಿಹಾರ‍್ನು ಬಲಿನ ಅರ್ಪಣ್‌ಕರಿನ್, ಇನ ದೇವ್ನಿ ಸೇವೆನಖ್ಹಾಜೆ ನೇಮಕ್‌ಕರಾನ ಅಬಿಷೇಕ್ ಕರ‍್ನು. ಅಮ್ ಖ್ಹಾತ್ ದನ್‍ಲಗುಬಿ ಬಲಿಪೀಠ್‌ನ ಖ್ಹಾಜೇಥಿ ಪಾಪ್ನು ಪರಿಹಾರ‍್ನು ನಿಯಮ್ನ ಚ಼ಲೈನ್ ಇನ ನೇಮಕ್‌ಕರ‍್ನು. ಚಾ಼ಚ಼ರ್‌ಘ಼ಣು ಪರಿಶುದ್ಧ್ ಹುಯಿರ‍್ಹೇಣು. ಬಲಿಪೀಠ್‌ನ ಛೀಮವಾಳು ಖ್ಹಾರುಬಿ ಪರಿಶುದ್ಧ್ ಹುಯಿರ‍್ಹೇಣು.
ಹರ್‌ದನ್ನು ಬಲಿದಾನ್‌
(ಅರಣ್ಯ 28:1-8)
ಬಲಿಪೀಠ್‌ನ ಉಪ್ಪರ್ ದನ್‌ರೋಜ಼್ ಅರ್ಪಣ್‌ಕರಾನ ಹೋಣುತೆಖ್ಹಾರು ಆ: ಎಕ್ ವರಖ್ಹ್‌ನ ಬೇ ಮೇಂಢಾವ್ನ ಹರ್‌ದನ್‌ಬಿ ಬಲಿಕರ‍್ನು. ಇನಾಮ ಏಕ್‌ ಮೇಂಢಾನ ವ್ಹಾಣೆವೇಳಿಬಿ ಬಿಜೇಕ್‌ನ ಖ್ಹಾಂಜ಼್‌ನಿ ವಖ್ಹತ್‌ಮ ಅರ್ಪಣ್‌ಕರ‍್ನು. ಎಕ್ ಲೀಟರ್ ಓಲಿವ್‌ನು ತೇಲ್‌ಬಿ ಎಕ್ ಕಿಲೊಗ್ರಾಂ ಘವ್‌ನ ಆಟಾನಬಿ ಮಳೈನ್ ಅನಾಜ಼್ ಅರ್ಪಣ್ ಕರಾನಖ್ಹಾಜೆ ಯೊ ಪಹಿಲ ಮೇಂಢಾನ ಜೋ಼ಡ್ಮ ಅರ್ಪಣ್ ಕರ‍್ನು. ಎಕ್ ಲೀಟರ್ ದ್ರಾಕ್ಷಿನ ರಖ್ಹ್‌ನಬಿ ಅರ್ಪಣ್‌ಕರ‍್ನು. ಖ್ಹಾಂಜ಼್‌ನಿ ವಖ್ಹತ್‌ಮ ಬೇನ ಮೇಂಢಾನ ಬಲಿಕರಾನಿ ವಖ್ಹ್‌ತೆ ವ್ಹಾಣೆ ಕರ‍್ಯೊತೆ ಪರಕ್ಮಾಸ್ ಇನ ಜೋ಼ಡ್ಮ ಅನಾಜ಼್‌ನು ನೈವೇದ್ಯನಬಿ, ದ್ರಾಕ್ಷಿನ ರಖ್ಹ್‌ನಾಬಿ ಅರ್ಪಣ್‌ಕರ‍್ನು. ಯೊ ಯೆಹೋವನ ಖ್ಹೊಡ್‌ಮೈವಾನು ಭುಂಜಾ಼ನಿ ಬಲಿಹುಯಿರ‍್ಹಿಷೆ. ಆ ಭುಂಜಾ಼ನಿ ಬಲಿನ ತುಮೇಬಿ ತುಮಾರು ಪಿಳ್ಗಿವಾಳುಬಿ ಹರ್‌ವಖ್ಹತ್ ಯೆಹೋವನ ಖ್ಹಾಮ್ಣೆ ದೇವ್ನ ದರ್ಶನ್ನು ಘರ್‌ನ ಬಾಕಲ್‌ನ ಮ್ಹೋರೆಮ ಕರ‍್ನು. ಯೊ ಘರ್‌ಮ ಮೆ ತುಮಾರ ಜೋ಼ಡೆ ವಾತೆಬೋಲಿಷ್. ಹಿಜ್ಜಾ಼ಸ್ ಮೇ ಇಸ್ರಾಯೇಲ್‌ವಾಳನ ದರ್ಶನ್ ದಿಶ್. ಹಿಜ಼್ಜಾ ದೆಖಾವನಿ ಮಾರಿ ಉಜಾ಼ಖ್ಹ್‌ಥಿ ಯೊ ಝ಼ಗೊ ಪರಿಶುದ್ ಹುಯಿರ‍್ಹಿಷೆ. ಮೇ ದೇವ್ನ ದರ್ಶನ್ನ ಡೇರಾನ ಘರ್‌ನಾಬಿ ಬಲಿಪೀಠ್‌ನಬಿ ಪರಿಶುದ್ದ ಕರಿಶ್. ಆರೋನ್ನಬಿ ಅಜು಼ ಇನ ಛಿಯ್ಯಾವ್‌ನಬಿ ಮನ ಯಾಜಕನು ಸೇವೆ ಕರಾನಿಘೋಣಿ ಶುದ್ದಿಕರಣ್ ಕರಿಶ್. ಮೇ ಇಸ್ರಾಯೇಲ್ನ ಬೀಚ್ಮ ಜಿವಿರ‍್ಹೀನ್ ಇವ್ಣುನ ದೇವ್‌ಹುಯಿರ‍್ಹಿಷ್. ಇವ್ಣ ಬೀಚ್ಮ ಜಿವಿರ‍್ಹವಾನ ಖ್ಹಾಜೆಸ್ ಇವ್ಣುನ ಈಜಿಪ್ಟ್‌ಥು ಭಾರ್‌ ಬುಲಾಯೊತೆ ಮೇಸ್ ಇವ್ಣೊ ದೇವ್ ಯೆಹೋವ ಕರಿ ಇವ್ಣೆ ಮಾಲುಮ್‌ ಕರಿಲಿಷೆ. ಇವ್ಣೊ ದೇವ್ ಹುಯಿರ‍್ಹವವಾಳೊ ಯೆಹೋವ ಮೇಸ್.
Waghri Booli Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.