Waghri Booli Bible
ವಿಮೋ 23
ನ್ಯಾವ್ ಅಜು಼ ಅಛ್ಛು಼ರ‍್ಹವಾನು
ಝೂ಼ಟಿ ಖಬರ್‌ನ ನಾ ಫೈಲಾವ್‌ಣು. ಖರಾಬಿ ದುಷ್ಟ ಅದ್ಮಿನ ಜೋ಼ಡೆ ಮಳಿನ್ ಝೂ಼ಟಿ ಸಾಕ್ಷಿನ ನಾಬೋಲ್ನು. ಖರಾಬ್ ಕಾಮ್‌ಕರಾವಳು ಕೈಯೇಕ್‌ಜ಼ಣು ಛಾ಼, ರ‍್ಹೀನ್‌ಬಿ ತುಮೆ ಇವ್ಣ ಜೋ಼ಡ್ಮ ನಾ ಮಳ್‌ಣು. ಘಣಜ಼ಣಾನಿ ವಾತೆನ ಮಾನಿನ್ ನ್ಯಾವ್ನ ಬಿಗ್ಡಾವನಿ ಸಾಕ್ಷಿನ ನಾಬೋಲ್ನು. ಆನಾಹುಯಿನ್ ಗರೀಬ್‌ನ ಉಪ್ಪರ್‌ಲಿ ಗೋರ್‌ಥಿ ಪಕ್ಷಪಾತ್‌ನಿ ತೀರ್ಮಾನ್ ನಾಕರ‍್ನು.
“ತಾರೊ ವಹೇರ‍್ಯಾನು ಢಾಂಡು ರ‍್ಹವೊ, ಗಧೇಡೊ ರ‍್ಹವೊ ತಪ್‌ಶೈನ್ ಜೈ಼ರ‍್ಹವಾನಿ ವಖ್ಹ್‌ತೆ ಯೊ ತುನ ಮಳ್ಯುತೊ ಪಾಛು಼ ಇನಾಕನ ಹಕೇಳಿ ಜೈ಼ನ್ ದೇವ್ಣು. ತುನ ಬಳಾಪೊ ಕರವಾಳನು ಗಧೇಡೊ ವಜ಼ನ್ ನಾಖ್ಹಮಾಳಿನ್ ಹೇಟ್ ಪಡ್ಯುರ‍್ಹವಾನು ದೇಖ್ಯೊತೊ ಇನ ಉಠಾಡನ ತುನ ಮನ್ ನಾರ‍್ಹಯುತೋಬಿ ಇನ ಮದತ್ ಕರಿನ್ ಉಠಾಡ್‌ನುಸಸ್ ಉಠಾಡ್‌ಣು. ತುಮಾರಮ ರ‍್ಹವಾಳು ಗರೀಬ್ ನ್ಯಾವ್‌ಬೋಲಿನ್ ತುಮಾರಕನ ಆಯೂತೊ ತುಮೆ ನ್ಯಾವ್ನ ನಾ ಛು಼ಕಾವ್‌ಣು. ಗಲತ್‌ ಕಾಮ್‍ಥಿ ದೂರ್ ರ‍್ಹೇವ್ಣು. ನಿರ್ದೋಷಿಬಿ, ನೀತಿಥಿ ರ‍್ಹವಾಳ ಅದ್ಮಿನ ಮರಣ್ಣಿ ನಿಶತ್‌ನ ನಾಸ್‌ದೇವ್ಣು. ಎಥ್ರಾನ ಖರಾಬ್ ಕಾಮ್ ಕರವಾಳನ ಮೇ ನಿಶತ್ ದಿಶ್‌ಕೊಂತೆ ಮ್ಹೇಲಿಶ್ ಕೊಯ್ನಿ. ಲಂಚ ನಾಲೇವ್ಣು. ಲಂಚ ಡೋಳ ರ‍್ಹವಾಳನಬಿ ಅಂಧುಕರಿನಾಖಸ್, ನಿಯತ್‍ವಳನ ಮಳ್‌ಣುತೆ ನ್ಯಾವ್ನ ಛು಼ಕಾವಸ್. ಪರ್‌ದೇಖ್ಹ್‌ವಾಳನ ಖ್ಹತಾವ್ಣುನಾ. ತುಮೆ ಈಜಿಪ್ಟ್ ದೇಖ್ಹ್‌ಮ ಪರ್‌ದೇಖ್ಹ್‌ವಾಳಸ್ ಹುಯಿರ‍್ಹಾಥ. ಎಥ್ರಾನವಾಳನು ದಿಲ್ನು ತಖ್ಹ್‌ಲಿಬ್ ತುಮುನ ಮಾಲುಮಸ್ ಛಾ಼.
ಖ್ಹಾತ್‌ನೆ ವರಖ್ಹ್‌ನು ಖ್ಹಾತ್‌ನೆ ದನ್ನಿ ಪದತ್ತಿ
ಛೋ಼ ವರಖ್ಹ್ ತುಮಾರ ಖೇತರ್‌ನ ಬಿತ್ತಿನ್ ಪಿಕಾವ್ಣಿನ ಕಾಡಿಲೆವೊ. ಕತೋಬಿ ಖ್ಹಾತ್‌ನೊ ವರಖ್ಹ್‌ಮ ಯೊ ಜ಼ಮೀನ್ನ ನಾಗರ್‌ನುನಾತೆ ಕೂಳೆ ಮ್ಹೇಲ್ನು. ತುಮಾರ ದೇಖ್ಹ್‌ನು ಗರೀಬ್ ಇನಾಮ ಫುಟಾಸ್ತೆ ಇನ ಖಾವದೆ. ಉಭ್‌ರ‍್ಹಾಸ್ತೆಯಿನ ಝಾ಼ಡಿನು ಜಾನ್ವರ್‌ ಚ಼ರಾದೆ. ತುಮಾರ ದ್ರಾಕ್ಷಿನ ಬಾಗ್‌ನು ಅಜು಼ ತೇಲ್ನ ಝಾ಼ಡ್‌ಣ ಬಗೀಚಾ಼ನಿ ಬಾರೇಮಾಬಿ ಅಮ್ನಿಸ್ ಪರಕ್ಮ ಕರ‍್ನು.
ಛೋ಼ ದನ್‌ಮ ತುಮಾರ ಕಾಮ್ನ ಕರಿನ್, ಖ್ಹಾತ್‌ನ ದನ್‌ಮ ಖಿವುಬಿ ಗೇಮೆ ನಾಕರ‍್ನುತೆ ರ‍್ಹೇವ್ಣು. ಯೊ ದನ್ ತುಮಾರು ಢಾಂಡುಖ್ಹಾರು, ಗಧೇಡುಖ್ಹಾರು, ದಾಸ, ದಾಸಿ, ಪರ್‌ದೇಖ್ಹ್‌ವಾಳು ಅರಾಮ್ ಕರಾದೆ. ಮೇ ತುಮುನ ಬೋಲ್ಯೊತೆಖ್ಹಾರುಸ್ ಹೊಷಾರ್‌ಥಿ ಚ಼ಲಾವ್ಣು. ಅಲಕ್ ದೇವ್ನ ನಾಮ್ನ ನಾ ಬೋಲ್‌ತುಬಿ ರ‍್ಹೇವ್ಣು; ಇನುಅಖ್ಖು ನಾಮ್ನಾಸ್ ನಾಕಾಡ್ನು.
ತೀನ್ ಮೋಟಿ ಪೂಜ಼
(ವಿಮೋ 34:18-26; ಧರ್ಮೊ 16:1-17)
ತುಮೆ ವರಖ್ಹ್‌ನ ತೀನ್ ಹಲ್ಲ ಮನ ಜ಼ತ್ರಾಕರ‍್ನು. ಖಾಟುಕೊಂತೆ ರೋಟಾವ್ನ ಖಾವ್ಣುತೆ ಪೂಜ಼. ಮೇ ಹುಕುಮ್ ದ್ಯವಾನಿತರ ತುಮೆ ಚೇತ್ರಿನ ಮಹಿನಾಮ ನೇಮಕ್‌ಹುಯುತೆ ವಖ್ಹತ್‌ಮ ಖ್ಹಾತ್ ದನ್‌ಬಿ ಖಾಟುಕೊಂತೆ ರೋಟಾವ್ನ ಖಾವ್ಣು. ಯೊ ಮಹಿನಾಮಸ್ ಈಜಿಪ್ಟ್ ದೇಖ್ಹ್‌ಥು ನಿಕ್‌ಳಿ ಆಯಾತೆ ಯಾದ್‌ನಖ್ಹಾಜೆ ಇನ ಚ಼ಲಾವ್ಣು. ಹಾತ್‌ಮ ಕಾಣ್ಕೆಕೊಂತೆ ಖಾಲಿ ಹಾತೇಥಿ ಮಾರಿ ಝ಼ಗೋಮ ಕೋಣ್‌ಬಿ ನಾ ಆವ್ಣು. ಯೋಸ್ ಕಾಹೆತೆ ತುಮೆ ಬಿತ್ಯಾತೆ ಖೇತರ್‌ಮ ಪಹಿಲು ಫಲ್ ಮಳ್ಯುತೊ ಖ್ಹುಗ್ಗೀನು ಪೂಜಾ಼ನ ಚ಼ಲಾವ್ಣು. ಖೆತರ್‌ ಬಾಗ್‌ನು ಪಿಕಾವ್ಣಿನ ಎಕ್ಟುಕರಾನಿ ವಖ್ಹ್‌ತೆ ಕತೊ ವರಖ್ಹ್‌ನು ಕಡ್‌ಷೀನು ಖ್ಹುಗ್ಗೀನು ಪೂಜಾ಼ನ ಚ಼ಲಾವ್ಣು. ವರಖ್ಹ್‌ನ ತೀನ್ ಹಲ್ಲ ತುಮಾರಮ ಛಾ಼ತೆ ಪರ್ಖ್ಹೊಖ್ಹಾರು ಪ್ರಭುಹುಯಿರ‍್ಹೋತೆ ಯೆಹೋವನಿ ಝ಼ಗೋಮ ಎಕ್ಟು ಮಳಿನ್ ಆವ್ಣು. ಮನ ಬಲಿ ಅರ್ಪಣ್‌ಕರಾನಿ ವಖ್ಹ್‌ತೆ ಯೊ ಬಲಿನು ಜಾನ್ವರ್‌ನು ಲ್ಹೋಯಿನ ಜೋ಼ಡ್ಮ ಖಾಟ ಆಟಾನ ಸಮರ್ಪಣ್‌ ನಾಕರ‍್ನು. ಮಾರಿ ಪೂಜಾ಼ಮ ತುಮೆ ಮನ ಸಮರ್ಪಣ್‌ ಕರ‍್ನುತೆ ಜಾನ್ವರ್‌ನು ಬಿಶ್ಶಾನ ಬಿಜೇಕ್ ದನ್‌ಲಗು ನಾಸ್‌ಮ್ಹೇಲ್‌ನು. ತುಮಾರು ಪಿಕಾವ್ಣಿನು ಪಹಿಲು ಫಲ್‌ಮ ಜಾ಼ಖ್ಹತ್ ಶ್ರೇಷ್ಟ್ ಹುಯಿರ‍್ಹೇಸ್ತೆ ಇನ ತುಮೆ ದೇವ್‌ಹುಯಿರ‍್ಹೊತೆ ಯೆಹೋವನಿ ಮಂದಿರ್‌ಮ ಲ್ಯಾವ್ಣು. ಬೋಕ್ಡಾನು ಚೆಲ್ಕಾನ ಇನಿ ಆಯಾನ ದೂದ್ಮ ನಾ ರ‍್ಹಾಂದ್‌ಣು.
ವಾಗ್ದಾನ್ ಅಜು಼ ವಾಟ್‌ವತಾಳನು
ಹಂದೇಕ್ ವಾಟ್‌ಮ ತುಮುನ ಬಚಾ಼ಡನಾಬಿ, ಮೇ ತಯಾರ್ ಕರಿರಾಖ್ಯೊತೆ ಝ಼ಗೋನ ತುಮುನ ಬುಲಾವನಖ್ಹಾಜೆಥಿ ದೂತಾನ ತುಮಾರ ಅಗ್ಗಳಸ್ ಮೋಕ್ಲಿರಾಖ್ಯೊಸ್. ತುಮೆ ಇನಾಮ ಧ್ಯಾನ್‌ದೀನ್ ಇನ ವಾತ್ನ ಖ್ಹಮಜ಼್‌ಣು. ಇನ ಝಿಟ್ಕಾರ್‌ನು ನಾ, ಶನಕತೊ ಯೊ ಆವಾನು ಮಾರ ನಾಮ್‌ಥಿ. ತುಮೆ ಝಿಟ್ಕಾರ್‌ಯತೊ ಯೊ ತುಮಾರಿ ಅಪರಾದ್‌ನ ಕ್ಷಮಾಪಣ್ ಕೊಕರ್ಷೇನಿ. ತುಮೆ ಇನಿ ವಾತ್ನ ನಿಘಾಥಿ ಖ್ಹಮ್‌ಜಿನ್ ಮಾರಿ ಹುಕುಮ್‌ನಿ ಪರಕ್‌ನಿತರ ಚಾ಼ಲಿಲಿದುತೊ ಮೇ ತುಮಾರ ವಹೇರ‍್ಯಾನ ವಹೇರ‍್ಯೊ ಹುಯಿನ್, ತುಮುನ ಖ್ಹತಾವವಾಳನ ಖ್ಹತಾವವಾಳೊ ಹುಯಿನ್‌ಬಿ ರ‍್ಹೀಶ್. 1ಮಾರೊ ದೂತ ತುಮಾರ ಖ್ಹಾಮ್ಣೆಕರಿ ನಿಕ್ಳಿನ್ ಅಮೋರಿಯವಾಳು, ಹಿತ್ತಿಯವಾಳು, ಪೆರಿಜೀವಾಳು, ಕಾನಾನ್ಯವಾಳು, ಹಿವ್ವಿವಾಳು, ಯೆಬೂಸಿವಾಳುಬಿ ಛಾ಼ತೆ ದೇಖ್ಹ್‌ಮ ತುಮುನ ಮಳಾವ್‌ಷೆ. ಇವ್ಣುನತೊ ಮೇ ಖತಮ್ ಕರಿನಾಖಿಷ್. ಇವ್ಣಿ ದೇವ್ತಿನ ತುಮೆ ಖ್ಹಲಾಮ್‌ಬಿ ನಾಕರ‍್ನು, ಇವ್ಣಿ ಪದತ್ತಿನ ನಾಸ್ ಪಾಡಿನಾಚಾ಼ಲ್ನು. ಯೊ ಅದ್ಮಿವ್‌ನ ಕಾಡಿನಾಖಿನ್ ಮೂರತ್‌ನ ಖಂಬಾವ್ನ ನಾಶ್‌ಕರ‍್ನು. ತುಮಾರೊ ದೇವ್ ಯೆಹೋವನ ಎಕ್ಕಸ್‌ಜ಼ಣಾನ ಆರಾದನೆ ಕರ‍್ನು. ತದೆ ಯೊ ತುಮಾರ ಖಾಣಪಾಣಿವ್‌ಮ ಆಶೀರ್ವದ್‍ದಿದೊ. ತುಮಾರಮ ಛಾ಼ತೆ ರೋಗ್‌ನ ಕಾಡಿನಾಕ್ಷೆ. ತುಮಾರ ದೇಖ್ಹ್‌ಮ ಪೇಟ್‌ಪಡಿಜಾ಼ವನು ರ‍್ಹವೊ, ವಾಂಝಿ ರ‍್ಹವಾನು ರ‍್ಹವೊ ರ‍್ಹಿಶೆಸ್ ಕೊಯ್ನಿ. ತುಮುನ ಪೂರ ಉಂಬರ‍್ನ ದಿಶ್.
ತುಮೆ ಜಾ಼ವನು ಅಖ್ಖೀಸ್ ಬಾಜು಼ಮಾಬಿ ಮೇ ಅದ್ಮಿಯೇವ್ನ ದಿಲ್‌ಮ ಡರ್‌ ಲೈನ್‌ ಇವ್ಣುನ ಕಲಾವ್ಣಿ ಕರಿನ್, ತುಮಾರು ವಿರೋದಿ ಖ್ಹಾರುಬಿ ಮಿಲೈನ್ ಜಾ಼ವನಿತರ ಕರಿಶ್. ಯೊ ನಾಹುಯಿನ್ ಡಾಕ್ನ ಕೀಡಾವ್ನ ತುಮಾರ ಪಹಿಲೆಸ್ ಮೋಕ್ಲಿನ್ ಹಿವ್ವಿವಾಳು, ಕಾನಾನ್ಯವಾಳು,ಅಜು಼ ಹಿತ್ತಿಯವಾಳು ತುಮಾರ ಖ್ಹಾಮ್ಣೆ ಭೀರೆವ್ಣುನಾತೆ ಯೊ ಕೀಡೊ ಇವ್ಣುನ ನಖ್ಹಾಡಿದಿಶೆ. ಕತೋಬಿ ಮೇ ಎಕ್ ವರಖ್ಹ್‌ನ ಮಹಿ ಇವ್ಣುನ ಖ್ಹಾರಾನ ಹಿಜ್ಜಾ಼ಥು ನಿಕ್‌ಳಾದಿಶ್ ಕೊಯ್ನಿ. ಶನಕತೊ ದೇಖ್ಹ್‌ಮ ಅದ್ಮಿಖ್ಹಾರು ಕಮ್‌ಹುವಾಥಿ ಝಾ಼ಡಿನು ಜಾನ್ವರ್‌ಖ್ಹಾರು ಜಾ಼ಖ್ಹತ್‌ಹುಯಿನ್ ತುಮುನ ಲುಕ್ಷಾನ್ ಹುಯೇಜಾ಼ಯ್. ತುಮೆ ಭಡಿನ್ ದೇಖ್ಹ್‌ಖ್ಹಾರು ಭರೈಜಾ಼ವಲಗು ಇವ್ಣುನ ಥೋಡೆ ಥೋಡೆಥಿ ನಿಕ್‌ಳೈಷ್. ಲಾಲ್ ದರ‍್ಯಾವ್‌ಥು ಫಿಲಿಷ್ಟಿವಾಳನು ದೇಖ್ಹ್‌ಕನ ಛಾ಼ತೆ ದರ‍್ಯಾವ್ ಲಗೂಬಿ ಅಜು಼ ಆ ಜ಼ಂಗಳ್‌ಥು ಯೂಫ್ರೇಟೀಸ್ ಮಹಾನ್ ನದ್ದಿಲಗುಬಿ ಛಾ಼ತೆ ದೇಖ್ಹ್‌ಖ್ಹಾರಸ್‌ನ ತುಮಾರಖ್ಹಾಜೆ ನೇಮಕ್‌ಕರಿನ್ ಇನಾಮ ರ‍್ಹವಾಳನ ತುಮುನ ಅಧೀನ್ ಕರಿಶ್. ತುಮೆ ಇವ್ಣುನ ನಖ್ಹಾಡ್‌ಷು. ತುಮೆ ಇವ್ಣೇಥಿ ರ‍್ಹವೊ ಇವ್ಣು ದೇವ್ತಿನ ಜೋ಼ಡೆ ರ‍್ಹವೊ ಖೆವೀಬಿ ಪರಕ್‌ನು ಒಪ್ಪಂದಾನಬಿ ನಾಕರಿಲೇವ್ಣು. ಇವ್ಣೆ ತುಮಾರ ದೇಖ್ಹ್‌ಮಾಸ್ ಜಿವ್ಣು ನಾಕರ‍್ನು. ಜಿವ್ಣು ಕರ‍್ಯಖ್ಯವುಶೇತೊ ಮನ ವಿರೋದ್‌ಥಿ ತುಮೆ ಪಾಪ್ ಕರಾನಿತರ ಇವ್ಣೆ ಹುಮ್ಮಖ್ಹ್‌ ಕರ್‌ಶೆ. ತುಮೆ ಇವ್ಣ ದೇವ್ತಿವ್ನ ಆರಾದನೆ ಕರ‍್ಯತೊ ಯೊ ಪೂಜಾ಼ ತುಮುನ ಫಾಖ್ಹೊಉಷೆ.
Source notes (1)
- Cross-reference ಆದಿಕಾಂಡ 15:19-20,21
Waghri Booli Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.