Waghri Booli Bible
ವಿಮೋ 10
ಚಿಡ್ಡೊ
ಅನಕೇಡೆಥು ಯೆಹೋವನೆ ಮೋಶೆನ ಅಮ್‌ಬೋಲ್ಯೊ ಫರೋಹಕನ ಪಾಛೊ಼ ಜಾ಼ .ಮೇ ಫರೋಹನ ಅಜು಼ ಇನ ಅದಿಕಾರಿವ್ನ ಖ್ಹಾಮ್ಣೆ ಆ ಅದ್ಭುತ್‌ಕಾಮ್ನ ಚ಼ಲಾವನಖ್ಹಾಜೆ ಕಾರಣ್ ಉಷೆ. ಇಸ್ರಾಯೇಲ್‌ವಾಳು ಇನ ಲಡ್ಕಾವ್‌ನಾಬಿ ನಾತಿಪೋತಿನಾಬಿ ಈಜಿಪ್ಟ್‌ವಾಳನಿ ಬೀಚ್ಮ ಚ಼ಲೈರಾಖ್ಯೊತೆ ಆ ಅದ್ಭುತ್‌ಕಾಮ್ನ ಬೋಲಿವತಾಳನಖ್ಹಾಜೆ ಯೆಹೋವ ಹುಯಿರೋತೆ ಮೇ ಈಜಿಪ್ಟ್‌ವಾಳನ ಮನ್ಮ ಹುವಾಸ್ತೆ ತಿಮ್‌ ನಿಶತ್ ದಿದೊ. ಅನೇಥಿ ಮೇಸ್ ಯೆಹೋವಕರಿ ಮಾಲುಮ್ ಕರಿಲಿಶು” ಕರಿ ಬೊಲ್ಯೊ. ಮೋಶೆ ಅಜು಼ ಆರೋನ ಫರೋಹಕನ ಜೈ಼ನ್ ಇನ, “ಇಬ್ರಿಯವಾಳನ ದೇವ್‌ಹುಯಿರ‍್ಹೊತೆ ಯೆಹೋವ ಅಮ್‌ ಬೋಲಸ್, ‘ತುಮಾರ ಖ್ಹಾಮ್ಣೆ ಮುಡ್‌ಕ್ಯು ಝು಼ಕಾವನುಕೊಂತೆ ರ‍್ಹವಾನು ಕಬ್ಲಗು? ಮನ ಆರಾದನೆ ಕರಾನಿತರ ಮಾರ ಅದ್ಮಿನ ಜಾ಼ವಾನ ಮ್ಹೇಲ್‌. ಹುಕುಮ್ ನಾ ದಿದೋತೊ ಕಾಲೆ ತಾರ ರಾಜ್ಯಮ ಚಿಡ್ಡೊ ಆವನಿತರ ಕರಿಶ್. ಯೊ ಜ಼ಮೀನ್ ಅಖ್ಖೂಸ್ ಫಲೈಜಾಶೆ ಜ಼ಮಿನಸ್ ದೆಖಾವ್‌ಶೆ ಕೊಂತೆ ಹುಯಿಜಾಷೆ. ಗಾರಾನೊ ಪಾಣಿಥಿ ನಾಶ್‌ಕೊಹುಯುಂತೆ ಉಭ್‌ರ‍್ಹಿನ್ ಛಾ಼ತೆಯಿನ ಚಿಡ್ಡೊಖ್ಹಾರು ಖೈನಾಕ್ಷೆ ಖೇತರ್‌ಮ ಛಾ಼ತೆ ತುಮಾರು ಹಿಡಿ ಝಾ಼ಡವ್ನು ಪಾಂದ್ಡು ಚಿಗುರ್ ಖ್ಹಾರುಸ್ ಖೈನಾಕ್ಷೆ. ಯೊ ತಾರ ಮಹೇಲ್‌ಮಾಬಿ, ತಾರ ಅದಿಕಾರಿಯೇವ್‌ಮಾಬಿ ಈಜಿಪ್ಟ್‌ವಾಳನ ಘರುಮಾಬಿ ಭರೈರಿಷೆ. ಅಪ್ಣ ಬಾಪ್‌ದಾದವ್ನ ಹಗಾಮ್‌ಥು ಹಮ್ಕೆಲಗೂಬಿ ಎಥ್ರಾನು ಚಿಡ್ಡಾವ್ನು ಝೂಂಡ್‌ನ ಕೆದೇಬಿ ಇವ್ಣೆ ದೇಖಿರಾಕ್‌ಷೆ ಕೊಯ್ನಿ” ಕರಿ ಬೊಲ್ಯೊ ಅನ ಬೋಲಿನ್ ಮೋಶೆ ಫರಿನ್ ಫರೋಹಕಂಥು ನಿಕ್ಳಿಗಯೊ. ತದೆ ಫರೋಹನು ಅದಿಕಾರಿಖ್ಹಾರು, “ಆ ಅದ್ಮಿ ಬಿಜು಼ ಕೆತ್ರ ಹಗಾಮ್ ಅಪ್ಣುನ ಫಾಖ್ಹೊ ಹುಯಿರ‍್ಹೇಣು! ಯೊ ಅದ್ಮಿ ಜೈ಼ನ್ ಇವ್ಣು ದೇವ್‌ಹುಯಿರ‍್ಹುತೆ ಯೆಹೋವನ ಆರಾದನೆ ಕರಾನಿತರ ಹುಕುಮ್ ದೆ ಈಜಿಪ್ಟ್ ದೇಖ್ಹ್‌ ನಾಶ್‌ಹುಯಿಗುಕರಿ ಅಜ಼ೂಬಿ ತಾರ ಮನ್ಮ ಕೊ ಆಯುನಿಕಿಷು?” ಕರಿ ಬೋಲ್ಯು. ಇನ ಖ್ಹಮ್‍ಜ್ಯೊತೆ ಫರೋಹಾನೆ, ಮೋಶೆ ಅಜು಼ ಆರೋನನ ಪಾಛು಼ ಬುಲೈನ್ ಇವ್ಣುನ, “ತುಮೆ ಜೈ಼ನ್ ತುಮಾರೊ ದೇವ್‌ಹುಯಿರ‍್ಹೊತೆ ಯೆಹೋವನ ಆರಾದನೆ ಕರೆಜಾ಼ಯ್, ಕತೋಬಿ ಕೋಣ್ ಕೋಣ್ ಜಾ಼ವ್ಣುಕರಿ ಛಾ಼”? ಕರಿ ಬೊಲ್ಯೊ. ಮೋಶೆನೆ ಇನ, “ಹಮೆ ಯೆಹೋವನಿ ಜ಼ತ್ರಾನ ಕರ್ನುಕರಿ ಛಾ. ಯೊ ಕಾರಣ್‍ಥಿ ಅಡ್ಡಾಣಿಥು ಶುರುಹುಯಿನ್ ಬುಢಾಲಗೂಬಿ ಅಖ್ಖುಸ್ ಜ಼ಣು ಜ಼ಯ್ಯೆಸ್; ಛಿಯ್ಯಾ ಛೋ಼ರಿವ್ನಾಬಿ, ಢಾಂಡು, ಮೇಂಢಾವ್ನ ಮಂಧಾವ್ನ ಲೀನ್ ಜ಼ಯ್ಯೆಸ್” ಕರಿ ಜ಼ವಾಬ್‌ದಿದೊ. ಇನ ಫರೋಹನೆ, “ಮೇ ತುಮುನ ಅಜು಼ ತುಮಾರ ಲಡ್ಕಾವ್ನ ಜಾ಼ವಾನ ಕೊಮ್ಹೇಲಿಶ್‌ನಿ, ಮೋಕ್ಲಿದಿದೋತೊ ಯೆಹೋವ ತುಮಾರ ಕೇಡೆ ರ‍್ಹಿಶೆ. ದೇಖೊ, ತುಮೆ ಖರಾಬ್ ಸೋಚವಾಳ. ತುಮಾರಮ ಪರ್ಖ್ಹಾ ಖಲಿಜೈ಼ನ್ ಯೆಹೋವನ ಆರಾದನೆ ಕರಿನ್ ಆಯೆಜಾ಼ಯ್. ತುಮೆ ಬೋಲಿಲಿದಾತೆ ಎತ್ರೇಸ್ ಕಾಹೆಕಿಶು?” ಕರಿ ಬೋಲಿನ್ ಇವ್ಣುನ ಫರೋಹನೆ ಇನಕಂಥು ಮೋಕ್ಲಿದಿದೊ. ತದೆ ಯೆಹೋವನೆ ಮೋಶೆನ, “ಈಜಿಪ್ಟ್ ದೇಖ್ಹ್‌ನ ಉಪ್ಪರ್ ತಾರ ಹಾತ್ನ ಫಖ್ಹಾರಿನ್ ಚಿಡ್ಡಾವ್ನ ಬುಲಾವ್ ಗಾರಾನ ಪಾಣಿಥಿ ನಾಶ್‌ಹುಯಿನ್ ಬಚಿರ‍್ಹೂತೆ ಹಗೇವ್ನ ಚಿಡ್ಡೊ ಅಖ್ಖು ಖೈಲಾವದೆ” ಕರಿಬೋಲ್ಯೊ. ಮೋಶೆ ಇನ ಲಠ್ಠಾನ ಈಜಿಪ್ಟ್ ದೇಖ್ಹ್‌ಪರ್ ಪಾಡಖ್ಹತರ್ ಯೆಹೋವ ದನ್‌ರಾತ್ ದನ್ ನಿಕ್‌ಳ ಭಣೀಥು ವಹಿರೊ ವಾಗನಿತರ ಕರ‍್ಯೊ ಯೊ ವಹಿರಾನಖ್ಹಾಜೆ ವ್ಹಾಣೆವೇಳಿಸ್ ಚಿಡ್ಡೊಅಖ್ಖು ಐರ‍್ಹುಥು. ಚಿಡ್ಡೊಖ್ಹಾರು ಈಜಿಪ್ಟ್ ದೇಖ್ಹ್‌ನಿ ಅಖ್ಖಿ ಬಾಜೂ಼ಬಿ ಘಣೇಥಿಘಣು ಉಲ್‌ಟೈಗಯು. ಎಥ್ರಾನು ಚಿಡ್ಡಾವ್ನು ಝೂ಼ಂಡ್ ಪೀಠೆ ಕೆದೇಬಿ ಕೊಆಯುಥುನಿ ಖ್ಹಾಮ್ಣೇಬಿ ಆವಾನ ಕೊಉಷೇನಿ. ಯೊ ಧರ್ತಿಪರ್ ಮೂಚೈ಼ಗೂತೆ ಖ್ಹಾಜೆ ಜ಼ಮೀನ್ ಜಿನು ಕೋದೆಖಾಯುನಿ. ಗಾರಾನ ಬಂಡಾನ ಪಾಣಿಥಿ ನಾಶ್‌ಕೊಹುಯುಂತೆ ಥೂತೆ ಪಂಡಾವ್ನಬಿ ಯೊ ಅಖ್ಖು ಖೈಲಿದು. ಈಜಿಪ್ಟ್ ದೇಖ್ಹ್‌ಮ ಝಾ಼ಡಾಮ ರ‍್ಹವೊ ಖೆತರ್‌ ಶೋಶಿಮ ರ‍್ಹವೊ ಹರ‍್ಯುಕರಿ ಬೋಲಾನು ಬಚ್ಯುಸ್ ಕೊಯ್ನಿ. ತದೆ ಫರೋಹನೆ, ಮೋಶೆ ಆರೋನ್ನ ಒಗ್ಗಿಸ್‌ಮ ಬುಲೈ ಮಂಗೈನ್, ಮೇ ತುಮಾರ ದೇವ್ ಯೆಹೋವನಬಿ ತುಮಾರಿ ವಿರೋದ್‌ಬಿ ಪಾಪ್ ಕರಿರಾಖ್ಯೊಸ್. ಕತೋಬಿ ಆ ಎಕ್ಕಸ್ ಹಲ್ಲ ಮಾರ ಪಾಪ್ನ ಕ್ಷಮಾಪಣ್ ಕರ‍್ನು. ತುಮಾರು ದೇವ್ ಯೆಹೋವ ಆ ಮರಣ್ಣಿ ಖತ್ರ ಮಾರಕಂಥು ಕಾಡದೆ ಇನಖ್ಹಾಜೆ ಪ್ರಾರ್ಥನೆ ಕರ‍್ನು” ಕರಿಬೋಲ್ಯೊ. ಮೋಶೆ ಫರೋಹಕಂಥು ನಿಕ್ಳಿನ್ ಯೆಹೋವನ ಪ್ರಾರ್ಥನೆ ಕರ‍್ಯೊ. ಯೆಹೋವನೆ ಪೂರಬ್‌ನ ವಹಿರಾನ ಘಣು ಶಕತ್ನು ಪಶ್ಚಿಮ್‌ನು ವಹಿರೊಕರಿ ಬಣೈನ್ ವಾಗನಿತರ ಕರ‍್ಯೊ. ವಹಿರೊ ಯೊ ಚಿಡ್ಡಾವ್ನ ಪಾಡಿಲಿಜೈ಼ನ್ ಲಾಲ್ ದರ‍್ಯಾವ್‌ಮ ನಾಖಿದಿದು. ಈಜಿಪ್ಟ್ ದೇಖ್ಹ್‌ನ ಇಟಾರಮ್ಮ ಎಕ್ ಚಿಡ್ಡೋಬಿ ಕೊರ‍್ಹಯುನಿ. ಕತೋಬಿ ಯೆಹೋವನೆ ಫರೋಹನ ದಿಲ್ನ ಹಟ ಕರಾಯೋತೆ ಇನಖ್ಹಾಜೆ ಇನೆ ಇಸ್ರಾಯೇಲ್‌ವಾಳನ ಮೋಕ್ಲಿದ್ಯವಾನ ಮಾನ್ಯೊಕೊಯ್ನಿ.
ಅಂಧಾರ್ಗಡಪ್
ಇನವಾರ್ ಯೆಹೋವನೆ ಮೋಶೆನ, “ಆಬ್‌ಭಣಿ ಹಾತ್‌ಪಾಡ್‌ ತದೆ ಈಜಿಪ್ಟ್ ದೇಖ್ಹ್‌ ಅಖ್ಖು ಅಂಧಾರ್ಗಡಪ್ ಹುಯು. ಯೊ ಅಂಧಾರೇಥಿ ಅದ್ಮಿ ಥಪಾವ್ತು ಚಾ಼ಲ್‌ಷೆ” ಕರಿಬೋಲ್ಯೊ. ಮೋಶೆ ಆಬ್‌ಭಣಿ ಹಾತ್ ಪಾಡಖ್ಹತರ್ ಈಜಿಪ್ಟ್ ದೇಖ್ಹ್‌ನು ಅಖ್ಖಿ ಬಾಜು಼ ತೀನ್ ದನ್ ಅಂಧಾರ್ಗಡಪ್ ಹುಯು. ತೀನ್ ದನ್‌ಲಗು ಇವ್ಣೆ ಏಕ್‌ಥಿಏಕ್ ದೇಖ್ಯು ಕೊಯ್ನಿ ಕೋಣ್ಬಿ ಇವ್ಣಿ ರ‍್ಹವಾನಿ ಝ಼ಗೋಥಿ ಉಠ್ಯುಕೊಯ್ನಿ. ಕತೋಬಿ ಇಸ್ರಾಯೇಲ್‌ವಾಳು ಜಿವ್ಣು ಕರುಕರ್ತುಥೂತೆ ಝ಼ಗೋಮ ಉಜಾ಼ಳು ಥು. ತದೆ ಫರೋಹಾನೆ ಮೋಶೆನ ಬುಲೈನ್ ಇನ, “ತುಮೆ ಜೈ಼ನ್ ಯೆಹೋವನ ಆರಾದನೆ ಕರಾನ ಜ಼ಯೇಜಾ಼ಯ್. ತೂ ತುಮಾರ ಘರ್‌ವಾಳು ಜ಼ಯೇಜಾ಼ಯ್. ತುಮಾರು ಮೇಂಢು ಢಾಂಡುಕತೊ ಹಜ್ಜಾ಼ಸ್ ಮ್ಹೇಲಿನ್ ಜಾ಼ವ್ಣು” ಕರಿಬೋಲ್ಯೊ. ಇನ ಮೋಶೆನೆ, “ಹಮಾರೊ ದೇವ್ ಹುಯಿರ‍್ಹೋತೆ ಯೆಹೋವನ ಹಮೆ ಬಲಿನ ಕರಾನ ಹೋಣುತೆ ಜಾನ್ವರ್‌ನ ದೇವ್ಣು. ಹಮಾರು ಅಖ್ಖು ಜಾನ್ವರ್‌ಜಿನು ಹಮಾರ ಜೋ಼ಡೆ ಲೀನ್ ಜ಼ಯೇಸ್. ಎಕ್ ಕೆಲ್ಡಾನಬಿ ಹಮೆ ಮ್ಹೇಲಿನ್ ಜಾ಼ಶು ಕೊಯ್ನಿ. ಯೊ ಜಾನ್ವರ್‌ಥಿಸ್ ಹಮಾರೊ ದೇವ್ ಹುಯಿರ‍್ಹೋತೆ ಯೆಹೋವನ ಆರಾದನೆನ ಕರ್ಶು. ಖಿವು ಜಾನ್ವರ್‌ನ ಅರ್ಪಣ್ ಕರ್ನುಕರಿ ಹಮೆ ಹಿಜ್ಜಾ಼ ಜೈ಼ನ್ ಮಳಾನ ಪಹಿಲೆ ಹಮುನ ಮಾಲುಮ್ ಕೊಯ್ನಿ ”ಕರಿಬೋಲ್ಯೊ. ಕತೋಬಿ ಯೆಹೋವ ಫರೋಹನ ದಿಲ್ನ ಹಟ ಕರಿಲಿದೋತೆಖ್ಹಾಜೆ ಇನೆ ಇವ್ಣುನ ಮೋಕ್‌ಲ್ಯೊ ಕೊಯ್ನಿ. ತದೆ ಫರೋಹಾನೆ ಮೋಶೆನ, “ಮನ ಮ್ಹೇಲಿನ್ ಜಾ಼ ಅನಪಾರ್ ಮಾರ ಮ್ಹೋಡಾನ ನಾದೇಕ್ಣುತೆ ಹೊಶಾರ್‌ಥಿ ರ‍್ಹೆ ಶನಕತೊ ತೂ ಮಾರ ಮ್ಹೋಡಾನ ದೇಖ್ಯೊತೆ ದನ್ಮ ತೂ ಮರಿಜೈಷ್” ಕರಿಬೋಲ್ಯೊ. ಇನ ಮೋಶೆನೆ, “ತು ಬರೋಬರ್ ಬೊಲ್ಯೊ ಅನಪಾರ್ ಮೇ ತುನ ಕೊದೇಖಿಷ್‌ನಿ” ಕರಿ ಬೊಲ್ಯೊ.
Waghri Booli Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.