Waghri Booli Bible
ಅಪೊ 5
ಅನನೀಯಬಿ ಸಫೈರ
ಅನನೀಯಕರಿ ಏಕ್‍ಜ಼ಣೊ ಥೊ. ಇನಿ ಬಾವಣ್ಣು ನಾಮ್ ಸಫೈರ.ಅವ್ಣುನ ಥೂತೆ ಥೋಡಿ ಜ಼ಮೀನ್ನ ವೇಚಿನ್, ಇಂಥಿ ಮಳಾತೆ ಪೈಶಾಮ, ಇನಿ ಬಾವಣ್ಣಿ ವಾತ್ ಖ್ಹಮ್‌ಜಿನ್‌ ಏಕ್‌ ಭಾಗ್‌ ಲಪಾಡಿನ್, ಬಿಜೇಕ್ ಭಾಗ್ನ ಅಪೊಸ್ತಲರ‍್ನ ಗೋಡಾಕನ ಲಯಿನ್ ಮ್ಹೇಲ್ಯೊ. ತದೆ ಪೇತ್ರನೆ; ಅನನೀಯನ, ತೂ ಯೊ ಜ಼ಮೀನ್ ವೇಚ್ಯೊತೆ, ಇನಾಮಾಥು ಥೋಡು ಲಪಾಡಿನ್ ಪವಿತ್ರಾತ್ಮನ ಠಗಾವ್ಣು಼ ಕರಿ ಛಾ಼.ಶೈತಾನ್ನೆ ತಾರ ದಿಲ್ಮ ಭರ್‌ದಿದೊತೆ ಶಾತ್? ವೇಚಾ಼ನ ಅಗಾಡಿ ಯೊ ಜ಼ಮೀನ್ ತಾರೀಸ್ ಹುಯಿರ‍್ಹಯಿಥೀನಿ. ತೂ ವೇಚ್ಯೊತೊಬಿ ಆಯೂತೆ ಪೈಶಾ ತಾರಾಸ್ ಹಕ್‌ಮ ಥು. ಆ ಖರಾಬ್ ಕಾಮ್ನ ತಾರ ದಿಲ್ಮ ಶನ ಸೋಚಿಲಿದೊ? ತೂ ಝೂ಼ಟಿ ಬೋಲ್ಯೊತೆ ದೇವ್ನ ಪಣ್ಕಿ,ಅದ್ಮಿನ ಕಾಹೆ ಕರಿ ಪೇತ್ರನೆ ಬೊಲ್ಯೊ. ಆವಾತೆಖ್ಹಾರಿ ಖ್ಹಮಜ಼್‌ತಾಸ್‌ ಅನನೀಯ ಹೇಟ್ ರಡ್ಕಿನ್ ಮರಿಗಯೊ; ಅನ ಖ್ಹಮ್‍ಜಾ಼ವಾಳ ಅಖ್ಖಾಸ್ನ ಘಣೊ ಡರ್‌ಲಾಗ್ಯು. ತದೆ ಜಾ಼ನ್‍ಜ಼ಮಾನ್‍ಖ್ಹಾರು ಉಠೀನ್ ಇನ ಶರೀರ್‌ನ ಲುಂಗ್ಡಾಮ ಲಪೇಟಿನ್ ಢೋಯಿಲಿಜೈನ್ ಮಖ್ಹಾಣ್ಯು ಕರ‍್ಯು. ಅನವಾರ್‌ ಖ್ಹುಮಾರ್ ತೀನ್ ಘಂಟಾನಿ ವೇಳ್ಮ ಅನನೀಯನಿ ಬಾವಣ್‍ ಇನ ಮಾಲುಮ್‌ಕೊಂತೆ ಹಿಜ್ಜಾ಼ ಆಯಿ. ತದೆ ಪೇತ್ರನೆ ಸಫೈರನ ದೇಖಿನ್-ತುಮೆ ಯೊ ಜ಼ಮೀನ್ ವೇಚ್ಯಾತೆ ಖ್ಹಾಚಮಾಬಿ ಅತ್ರಾಸ್‍ ಪೈಶಾನಕಿಶೂ? ತೂ ಮನ ಬೋಲ್‌ಕರಿ ಬೋಲಾನಿ ವೇಳ್ಮ “ಒಹೊ ಅತ್ರಾಸ್‍ ಪೈಶಾನ” ಕರಿ ಬೋಲಿ. ತದೆ ಪೇತ್ರ ಇನ-ತುಮೆ ಭೇಜ಼ಣ ಮಳಿನ್ ಪ್ರಭುನ ಆತ್ಮಾನ ಶನ ತರೀಪ್ಷಕರ‍್ಯಾ”? ಹಂದೇಕ್, ತಾರ ಬಾವ್ರಿನ ಗಾಡ್ಯಹುಯ, ಬಾಕಲ್‍ಕನ ಆಯಿನ್ ಭೀಯ. ತುನಾಬಿ ಇವ್ಣೆಸ್ ಢೊಯಿಲೀನ್ ಜಾ಼ಶೆ ಕರಿ ಬೊಲ್ಯೊ. ತದೇಸ್‌ ಯೋಬಿ ಪೇತ್ರನ ಗೋಡಾನ ಖ್ಹಾಮ್ಣೆ ಪಡೀನ್ ಮರಿಗೈ. ಯೊ ಜಾ಼ನ್ಜ಼ಮಾನ್ ಖ್ಹಾರಾನೆ ಮಹಿ ಆಯಿನ್ ಯೊ ಮರಿಗೈತೆ ದೇಖಿನ್ ಇನ ಢೊಯಿಲೀಜೈನ್ ಇನ ಬಾವ್ರಿನ ಮಖ್ಹಾಣ್ಯನ ಭೀಡೆ ಗಾಡಿದಿದು. ಆ ವಾತೆನ ಖ್ಹಮ್‍ಜ್ಯುತೆ ಅಖ್ಖಿ ಸಬೆನ ಅಜು಼ ಖ್ಹರಾಸ್ ಅದ್ಮಿವೊನ ಡರ್‌ಲಾಗ್ಯು.
ಖ್ಹಣೇದ್‍ನು ಕಾಮ್‍ಅಖ್ಖು ಅಜು಼ ಅದ್ಭುತ್ ಕಾಮ್‍ಅಖ್ಖು
ಅಪೊಸ್ತಲರ್ ಖ್ಹಾರು ಕೈಏಕ್ ಖ್ಹಣೇದ್‍ನು ಕಾಮ್‍ಬಿ ಅದ್ಬುತ್‌ಕಾಮ್‌ಬಿ ಕರ‍್ಯು. ಅದ್ಮಿಖ್ಹಾರು ಯೊ ಕಾಮ್ನ ದೇಖ್ಯು. ಅಜು಼ ಅಖ್ಖುಜ಼ಣು ಎಕ್ಟು ಹುಯಿನ್ ಸೊಲೊಮೋನ್ನ ಛ಼ತ್‌ಕನ ಮಳಿನ್ ಆವ್ತುಥು. ಇವ್ಣ ಜೋ಼ಡ್ಮ ರ‍್ಹವಾನ ಬಿಜ಼ ಖೆವ ಏಕ್‌ ಜ಼ಣಾನ ಹಿಮ್ಮತ್ ಕೋಥಿನಿ. ಶನಕತೊ ಅದ್ಮಿಖ್ಹಾರು ಇವ್ಣುನ ಜಾ಼ಖ್ಹತ್ ಖ್ಹರಾವ್‌ತು ಥು. ರ‍್ಹಯುತೋಬಿ ಕೇತ್ರುಕಿಜ಼ಣು; ತಯೇಡ ಪರ್ಖೊಖ್ಹಾರು ಪ್ರಭುನ ನಂಬಾವಾಳು ಹುಯಿನ್ ಇವ್ಣ ಟೋಳ್ಮ ಮಳಿಜಾ಼ತುಥು. ಅಮ್ ರ‍್ಹವಾನಿ ವೇಳ್ಮ ಅದ್ಮಿಖ್ಹಾರು ರೋಗ್‌ವಾಳನ ಡೋಲಿಪರ್‌ ಪಾಡಿಲೀನ್ ಪೇತ್ರ ಆವಾನಿ ವಾಟ್‌ಪರ್ ಲಯಿನ್, ರೋಗ್‌ವಾಳನ ಉಪ್ಪರ್ ಇನಿ ಛಾ಼ಳಿಪಡಾದೆ ಕರಿ ವಾಟ್‌ಪರ್ ಮ್ಹೆಲ್ತುಥು. ಪೇತ್ರನಿ ಛಾ಼ಳಿ ಪಡಿತೋಬಷ್ ಕರಿ ಅದ್ಮಿಖ್ಹಾರಾನೆ ಸೋಚಿಲಿದು. ಯೆರೂಸಲೇಮ್ನ ಅಶ್‌ಪಿಶ್‍ ಖ್ಹಾರಗಾಮ್‍ನು ಅದ್ಮಿ ಆವ್ತುಥು. ಇವ್ಣೆ ರೋಗ್‍ವಾಳನಾಬಿ ಭೂತ್‌ ಧರಿರಾಖವಾಳನಾಬಿ ಢೊಯಿಲೀನ್ ಆವ್ತುಥು.ಆ ಅಖ್ಖೂಸ್‌ಜ಼ಣು ಗುಣ್‌ಹೋತುಥು.
ಅಪೊಸ್ತಲರ‍್ನ ಹುಯೂತೆ ಖ್ಹತಾಪ್ಣಿ
ಮಹಾಯಾಜಕ್‍ಬಿ ಇನ ಜೋ಼ಡ್‍ವಾಳು ಖ್ಹಾರು, ಸದ್ದುಕಾಯ ಭಣಿವಾಳು ಖ್ಹಾರು ಘಣು ಬಳಾಪೊ ಕರ‍್ಯು. ಇವ್ಣೆ ಅಪೊಸ್ತಲರ‍್ನ ಅಖ್ಖಾನ ಮಾಲುಮ್‌ರ‍್ಹೇಸ್ತೆ ಖ್ಹಾರ್ಕೊಟ್‌ಮ ಕೊಂಡಿನ್‌ ಘಾಲಿದಿದು. ಕತೋಬಿ ರಾತ್ಮ ಪ್ರಭುನೊ ಏಕ್‌ ಧೂತ ಜೇಲ್‌ನು ಬಾಕಲ್‍ಖ್ಹಾರು ಕಾಡಿನಾಖ್ಯೊ. ಯೊ ದೂತನೆ ಅಪೊಸ್ತಲರ‍್ನ ಭಾರ್‌ ಬುಲೈಲಾಯಿನ್‌, “ತುಮೆ ಜೈ಼ನ್ ದೇವ್ನಿಮಂದಿರ್‌ನ ಮಹಿ ಭೀರಿನ್ ಆ ಜಿ಼ಂದ್‌ಗೀನಿ ಬಾರೇಮಾನಿ ಹರೇಕ್ ವಾತೇಬಿ ಅದ್ಮಿಖ್ಹಾರಾನ ಬೋಲೊಕರಿ ಬೊಲ್ಯೊ. ಇನಖ್ಹಾಜೆ ಇವ್ಣೆ ಅಗಲ್ಯದನ್ನೆ ವ್ಹಾಣವೇಳಿಸ್ ದೇವ್ನಿಮಂದಿರ್‌ಮ ಜೈ಼ನ್ ಬೋಧನೆಕರಲಗ್ಯಾ. ಮಹಾಯಾಜಕ್‍ಬಿ ಇನ ಜೋ಼ಡ್‍ವಾಳು ದೇವ್ನಿಮಂದಿರ್‌ನ ಆಯ. ಇವ್ಣೆ ಯೆಹೂದ್ಯರ್‌ನ ಮೋಟಖ್ಹಾರಾನ ಅಜು಼ ಇಸ್ರಾಯೇಲ್‌ವಾಳನ ಘಲ್ಡಾವ್‍ನಿ ನ್ಯಾವ್ನಿ ಸಭೆ ಬೇಖ್ಹಾಡಿನ್‌. ಅಪೊಸ್ತಲರ‍್ನ ಇವ್ಣಕನ ಬುಲೈಲಿನ್ ಆವಾನಖ್ಹಾಜೆ ಥೋಡಜ಼ಣಾನ ಜೇಲ್‌ಕನ ಮೋಕ್‌ಲ್ಯೊ. ದೇವ್ನಿಮಂದಿರ್‌ನು ಸೇವೆ ಕರವಾಳು ಜೇಲ್‌ಮ ಜೈ಼ನ್ ದೇಖಾತೊ ಹಿಜ್ಜಾ಼ ಅಪೊಸ್ತಲರ್ ಕೊ ದೆಖಾಯುನಿ. ಇನಖ್ಹಾಜೆ ಪಾಛು಼ಫರಿ ಇವ್ಣೆ ಆಯಿನ್, ನ್ಯಾವ್ನಿ ಸಬೆವಾಳನ ಅಮ್ ಬೋಲ್ತೊಹುಯಿನ್; “ಜೇಲ್ ಮೂಚೈ಼ನ್ ಕೀಲಿಲಗ್ಯುಥು. ಕಾವ್ಲಿ ಕರವಾಳು ಬಾಕಲ್‍ಕನ ಭಿಯೂಥು, ಕತೋಬಿ ಹಮೆ ಬಾಕಲ್ ಕಾಡ್ಯತೊ ಮಹಿ ಏಕ್‍ಜ಼ಣೂಬಿ ಕೋ ಥೂನಿ!” ಕರಿ ಬೋಲ್ಯು. ದೇವ್ನಿಮಂದಿರ್‌ನು ದಳಪತಿಬಿ ಬಿಜು಼ ಮಹಾಯಾಜಕ್ ಖ್ಹಾರು ಆ ವಾತೇನ ಖ್ಹಮ್‌ಜಿನ್‌ ಅನೇಥಿ ಶಾತ್‍ಉಷೇಕಿ ಕರಿ ಇವ್ಣುನ ಆಶ್ಚರ್ಯ ಹುಯು. ಅಮ್‌ರ‍್ಹವಾನಿ ವಖ್ಹ್‌ತೆ ಏಕ್‍ಜ಼ಣೊ ಅಯಿನ್ ಇವ್ಣುನ, “ಖ್ಹಮ್‍ಜೊ! ತುಮೆ ಜೇಲ್‌ಮ ಘಾಲ್ಯಥಾತೆ ಅದ್ಮಿಖ್ಹಾರು ಆಯಿನ್ ದೇವ್ನಿಮಂದಿರ್‌ಮ ಭಿರೀನ್ ಶಿಕಾಡುಕರಸ್” ಕರಿ ಬೊಲ್ಯೊ. ತದೆ ಅದಿಕಾರಿ ಟಪಾಲ್‌ನ ಅದ್ಮಿನ ಜೋ಼ಡೆ ಜೈ಼ನ್ ಅಪೊಸ್ತಲರ‍್ನ ಪಾಛು಼ ಬುಲೈಲಾಯೊ. ಕತೋಬಿ ಶಿಪಾಯಿಖ್ಹಾರು ಇವ್ಣುನ ಜು಼ಲಮ್‌ ಕರ‍್ಯುಕೊಯ್ನಿ. ಶನಕತೊ ಅದ್ಮಿಖ್ಹಾರು ಹಮೂನ ಇರಾದೇಥಿ ಬಂಡೊ ಫೇಕಿನ್ ಮಾರಿನಾಕ್‌ಶೆ ಕರಿ ಡರಿಗಯು. ಇವ್ಣೆ ಅಪೊಸ್ತಲರ‍್ನ ಬುಲೈಲಿನ್ ನ್ಯಾವ್‌ನ ಸಭೆನಖ್ಹಾಮ್ಣೆ ಭೀರಾಖ್ಯು. ತದೆ ಮಹಾಯಾಜಕನೆ ಅಪೊಸ್ತಲರ‍್ನ ಸವಾಲ್‌ ಬೊಲ್ಯೊ; “ತುಮೆ ಆ ನಾಮ್‌ಪರ್‌ ಬೋಧನೆ ನಾಸ್‍ಕರ‍್ನು ಕರಿ ತುಮೂನ ಹುಕುಮ್‌ ಕರ‍್ಯಥಾನಿ; ರ‍್ಹಯುತೋಬಿ ತುಮೆ ಕರ‍್ಯಾತೆಶಾತ್? ಯೆರೂಸಲೇಮ್ನ ತುಮಾರಿ ಬೋಧನೆಥಿ ಫೈಲೈದಿದ, ಆ ಮರೈರ‍್ಹುಥೆ ಅದ್ಮಿನ ಹಮೇಸ್ ಜಿಮ್ಮೇದಾರಿ ಕರಿ ಕರಾನ ತುಮೆ ಕೋಶಿಶ್ ಕರುಕರಸ್” ಕರಿ ಬೋಲ್ಯು. ತದೆ ಪೇತ್ರ ಅಜು಼ ಥೂತೆ ಅಪೊಸ್ತಲರ್ ಅಮ್ ಬೋಲ್ಯೊಕಿ, “ಹಮೆ ದೇವ್ನ ವಿಧೇಯ ಉಷು ಪಣ್ಕಿ ಅದ್ಮಿನ ಕಾಹೆ.” ತುಮೆ ಶಿಲ್‌ಬೆಪರ್ ಠಂಗೈನ್ ಮಾರ‍್ಯಾತೆ ಯೇಸುನ ಹಮಾರ ಗುರುಗುರಬ್‍ಲ್ಯನ ದೇವ್ನೆ ಮರಣ್‌ಥು ಉಠಾಡ್ಯೊ! ದೇವ್ ಇನಾಸ್ ಇಸ್ರಾಯೇಲ್ ಅದ್ಮಿನ ಮನ್ ಫರಾವನಾಬಿ, ಪಾಪ್ನ ಕ್ಷಮಾ ಕರಾನಖ್ಹಾಜೆಬಿ, ದೇವ್ನೆ ಇನ ಪ್ರಭು ಕರೀಬಿ ರಕ್ಷಕ್ ಕರೀಬಿ ಇನಿ ಖಾವಿ ಬಾಜು಼ಮ ಬೆಖ್ಹಾಡ್ಯೊ. ಆ ಕಾಮ್ನ ಹಮೇಸ್ ಸಾಕ್ಷಿ; ಹಮೇಸ್ ಕಾಹೆತೆ ವಿಧೇಯ ಹುವಾತೆ ಅಖ್ಖಾಸ್ ಅದ್ಮಿನ ದೇವ್ನೆ ದೀರಾಖ್ಯೋತೆ ಪವಿತ್ರಾತ್ಮಸ್ ಸಾಕ್ಷಿ ಹುಯಿರೋಸ್” ಕರಿ ಬೊಲ್ಯೊ.
ಯೆಹೂದ್ಯರ್‌ನ ಗಲ್‌ಢೊಖ್ಹಾರು ಆ ವಾತ್ನ ಖ್ಹಮ್‌ಜಿನ್‌ ಘಣು ಚ಼ಂಢಾಳ್ ಛ಼ಡಿನ್ ಅಪೊಸ್ತಲರ‍್ನ ಮಾರಿನಾಕ್ಣು ಕರಿ ಥೂ. ತದೆ ಅಖ್ಖಾ ಅದ್ಮಿನಿ ಮರ್ಯಾದಿಥಿ ನ್ಯಾವ್ನಿಸಬೆನೊ ಘಲ್ಡೊ ಗಮಲಿಯೇಲಕರಿ ಏಕ್‍ಜ಼ಣೊ ಫರಿಸಾಯರ್‌ವಾಳೊ ಘಲ್ಡಿ ಸಭೆಮ ಉಠಿಭೀರಿನ್ ಆ ಅದ್ಮಿಖ್ಹಾರನ ಜ಼ರಘಡಿ ಭಾರ್‌ ಮೋಕ್ಲೊಕರಿ ಹುಕುಮ್‌ ದಿದೊ. ತದೆ ಇನೆ ಸಬೆವಾಳನ; ಇಸ್ರಾಯೇಲ್ ಅದ್ಮಿವೊ, ತುಮೆ ಶಾತ್ ಕರ್ನುಕರಿ ಛಾ಼ಕಿ ಇನಿ ಬಾರೇಮ ಹೊಷಾರ್‌ಥಿ ರ‍್ಹವೊ. ಅನೇಥಿ ಅಗಾಡಿ ಥೈದಕರಿ ಏಕ್‌ಜ಼ಣಾನೆ ಮೇ ಮೋಟೊ ಅದ್ಮಿಕರಿ ಬೋಲಿಲೀದೊ. ಇನಿ ಜೋ಼ಡ್ಮ ಖ್ಹುಮಾರ್ ಚಾರ್ ಖ್ಹೋ ಅದ್ಮಿ ಮಳಿರ‍್ಹುಥು. ತ್ಯೋಬಿ ಯೊ ಮರೈಗಯೊ. ಅಜು಼ ಇನ ನಂಬಿಹುಯು ಅಖ್ಖೂಸ್ ಎಕ್ಕೋಸ್ಏಕ್‌ ಮಿಲೈಗು. ಇನಕೇಡೆಥು ಯೂದಕರಿ ಏಕ್‍ಜ಼ಣೊ ಗಲಿಲಾಯಮ ಥೊ, ತದೆ ಅದ್ಮಿನಿ ಗಣ್ತಿನ ಹಗಾಮ್ ಹುಯಿರಾಥ. ಯೂದಬಿ ಇನ ನಂಬಾವಳಾನು ಏಕ್‌ ಝೂ಼ಂಡ್‌ ಭಾಂದ್ಯೊ. ಯೋಬಿ ಮರೈಗಯೊ. ಇನ ನಂಬಿಹುಯು ಖ್ಹಾರೂಬಿ ಎಕ್ಕೋಸ್ಏಕ್‌ ಮಿಲೈಗು. ಇನಖ್ಹಾಜೆ ಮೇ ಹಮ್ಕೆ ತುಮೂನ ಶಾತ್ ಬೋಲಸ್‍ಕತೊ ಆ ಅದ್ಮಿವ್‌ಥಿ ದೂರ್ ರ‍್ಹವೊ ಇವ್ಣುನ ಮ್ಹೇಲಿದೆವೊ; ಶನಕತೊ ಆ ಖ್ಹೂಜ಼್ ನತರ್ ಕಾಮ್ ಅದ್ಮಿಥಿ ಹುಯಿರ‍್ಹು ಉಷೇತೊ ಇನು ಯೋಸ್ ಪಡಿಜಾ಼ಶೆ. ಕತೋಬಿ ಯೊ ದೇವ್‍ಥಿ ಹುಯಿರ‍್ಹವಾನು ಉಷೇತೊ ಇನ ಹರಾವನ ತುಮಾರೇಥಿ ಕೋಉಷೇನಿ; ತುಮೆ ದೇವ್ನವಿರುದ್ ಜಂಗ್‍ಭೀಡಾನಿಮತ್ ದೆಖೈಲಿಶು ಕರಿ ಬೊಲ್ಯೊ.ಇವ್ಣೆ ಗಮಲಿಯೇಲನಿ ಆ ವಾತೆನ ಮಾನಿಲಿದು. ಅಪೊಸ್ತಲರ‍್ನ ಬುಲೈಮಂಗೈನ್‌, ಮಾರ್‌ಖಡೈನ್‌, ಯೇಸುನು ನಾಮ್‍ಲೀನ್ ವಾತೆ ನಕೊಬೋಲ್‍ಶು ಕರಿ ಹುಕುಮ್‌ ದೀನ್ ಇವ್ಣುನ ಮ್ಹೇಲಿದಿದು. ಅಪೊಸ್ತಲರ್ ನ್ಯಾವ್ನಿ ಘಲ್ಡಾನಿ ಸಭೆಮಾಥು ನಿಕ್ಳಿನ್ ಚ಼ಲೇಗಯ. ಯೇಸುನ ನಾಮ್ನಖ್ಹಾಜೆ ಖ್ಹರಮ್‌ ಕಡೈಲ್ಯಾವಾನ ಹಮೆಯೋಗ್ಯರ್ ಹುಯಾಕರಿ ಖುಷಿಕರ‍್ಯು. ಇವ್ಣೆ, ಅದ್ಮಿಮ ಬೋಧನೆ ಕರಾನು ಭೀರಾಖ್ಯಕೊಯ್ನಿ. ಯೇಸುಸ್ ಕ್ರಿಸ್ತಕರಿ ಅದ್ಮಿನ ಸುವಾರ್ತೆ ಶಿಕಾಡನ ಶುರುಕರ‍್ಯ. ಇವ್ಣೆ ಹರ್‌ರೋಜ಼್ ದೇವ್ನ ಮಂದಿರ್‌ಮಾಬಿ, ಘರೂಮಾಬಿ ಬೋಧನೆ ಫೈಲಾಯು.
Waghri Booli Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.