ದೇವ್ನಿ ಖ್ಹಾಚಿ ವಚನ್
ಪ್ರಕಾಶಿತ್ 7
ಇಸ್ರಾಯೇಲ್‌ನು ಏಕ್‌ಲಾಕ್ ಚಾರ್‌ಉಪ್ಪರ್ ಚಾ಼ಳಿಖ್ಹ್ ಹಜಾ಼ರ್ ಅದ್ಮಿ
ಆ ಹುಯಿಜಾ಼ವದಿನ್ ಚಾರ್‌ಜ಼ಣ ದೇವ್ನು ದೂತರ್ ಜ಼ಮೀನ್ನು ಚಾರ್ ರುಕ್‍ಮ ಭೀರಿನ್ ಜ಼ಮೀನ್‌ಪರ್‌ರ‍್ಹವೊ, ದರ‍್ಯಾವ್‌ಪರ್‌ರ‍್ಹವೊ, ನತರ್ ಖೆವ ಝಾ಼ಡಪರ್‌ರ‍್ಹವೊ ವ್ಹಯಿರೊ ನಾವಾಗ್ಣುತೆ ತಿಮ್ ಜ಼ಮೀನ್ನು ಚಾರ್‌ದಿಕ್ನು ವ್ಹಾಯಿರಾನ ಭೀರಾಖಿರಾಖನು ದೇಖ್ಯೊ. ಅತ್ರೇಸ್ ಕಾಹೆತೆ ಬಿಜೇಕ್ ದೇವ್‌ದೂತನೆ ಜಿವ್ತೊ ಜಾನ್ನೊ ಯೋ ದೇವ್ನ ಮುದ್ರಾನ ಧರಿಲೀನ್ ದನ್‌ನಿಕ್‌ಳಾ ಭಣೀಥು ಆವಾನು ದೇಖ್ಯೊ. ಅನೆ ಯೋ ಜ಼ಮೀನ್ನಾಬಿ ದರ‍್ಯಾವ್‌ನಾಬಿ ಖರಾಬ್ ಕರಾನಿ ಹುಕುಮ್‌ ಲೀರಾಖ್ಯಾತೆ ಯೋ ಚಾರ್‌ಜ಼ಣ ದೂತರ‍್ನ ಬುಲಾವ್ತೊ ಹುಯಿನ್ ಅಮ್ ಬೋಲ್ಯೊಕಿ; “ಹಮೆ ಹಮಾರ ದೇವ್ನ ದಾಸರ‍್ನ ತಾಳ್ವಪರ್ ಮುದ್ರೊ ಮಾರ‍್ವಲಗೂಬಿ ಜ಼ಮೀನ್ನರ‍್ಹವೊ, ದರ‍್ಯಾವ್ನರ‍್ಹವೊ, ಝಾ಼ಡಾವ್ನರ‍್ಹವೊ, ನಾಶ್‌ ನಾಕರ‍್ನು ಕರಿಬೋಲ್ಯೊ. ಮುದ್ರೊ ಮರೈಲಿದುತೆ ಇವ್ಣಿ ಗಣ್ತಿ ಮನ ಖ್ಹಮಜ಼್‌ಮ ಆಯುಕಿ ಏಕ್‌ಲಾಕ್ ಚಾರ್‌ಉಪ್ಪರ್ ಚಾ಼ಳೀಖ್ಹ್‌ಹಜಾ಼ರ್‌ ಇಸ್ರಾಯೇಲರ‍್ನು ಹರೇಕ್ ಖೂಮ್ನ ಮಳಿಹುಯು ಹುಯಿರ‍್ಹುಥು. ಯೂದನಿ ಖೂಮ್ಮ ಮುದ್ರೊ ಮರೈರ‍್ಹವಾಳು ಭಾರಹಜಾ಼ರ್, ರೂಬೆನ್ನಾ ಖೂಮ್‌ವಾಳಮ ಭಾರಹಜಾ಼ರ್, ಗಾದ್‌ ಖೂಮ್‌ವಾಳಮ ಭಾರಹಜಾ಼ರ್, ಅಸೇರನ ಖೂಮ್‌ಥು ಭಾರಹಜಾ಼ರ್, ನಫ್ತಾಲಿನ ಖೂಮ್‌ಥು ಭಾರಹಜಾ಼ರ್, ಮನಸ್ಸೆನ ಖೂಮ್‌ಥು ಭಾರಹಜಾ಼ರ್, ಸಿಮೆಯೋನ್ನ ಖೂಮ್‌ಥು ಭಾರಹಜಾ಼ರ್,ಲೇವಿನ ಖೂಮ್‌ಥು ಭಾರಹಜಾ಼ರ್, ಇಸ್ಸಾಕಾರ‍್ನ ಖೂಮ್‌ಥು ಭಾರಹಜಾ಼ರ್, ಜೆಬುಲೋನ್ನ ಖೂಮ್‌ಥು ಭಾರಹಜಾ಼ರ್, ಯೋಸೇಫ್‌ನ ಖೂಮ್‌ಥು ಭಾರಹಜಾ಼ರ್, ಬೆನ್ಯಾಮೀನ್ನ ಖೂಮ್ಮಥು ಮುದ್ರೊ ಮರಾಯುಹುಯು ಭಾರಹಜಾ಼ರ್ ಜ಼ಣುಥು.
ಹರೇಕ್ ಜ಼ಗ್‌ಜಾ಼ತ್‌ನು ಅದ್ಮಿನು ಮೋಟಿ ಭೀಡ್
ಆ ಹುವಾನ ವಾರ್, ಹಂದೇಕ್ ಕಿನೇಥೀಬಿ ಗಣ್ತಿಕರಾನ ಕೊಹುವಾನಿತೆ ಎತ್ರೆ ಅದ್ಮಿಯೇವ್‌ನು ಭೀಡ್ ಸಿಂಹಾಸನ್ನ ಖ್ಹಾಮ್ಣೆ ಅಜು಼ ಮೇಂಢಾನ ಖ್ಹಾಮ್ಣೆಬಿ ಭಿಯುರ‍್ಹವಾನು ದೇಖ್ಯೊ. ಇವ್ಣೆಖ್ಹಾರು ಹರೇಕ್ ಜ಼ಗ್‌ಜಾ಼ತ್‌ನುಬಿ,ಖೂಮ್‌, ಬೋಲಿ ಬೋಲಾವಳು ಹುಯಿರ‍್ಹುಥು. ಇವ್ಣೆ ಧೋಳ ಝ಼ಗ್ಗೊ ಫೇರಿಲಿನ್ ಇವ್ಣ ಹಾತ್ಮ ಖಜೂ಼ರ‍್ನಿ ಡಾಳಿ ಧರಿರಾಖ್ಯೂಥು. “ಇವ್ಣೆ ರಕ್ಷಣೆ ಕರಿ ಬೋಲಾನು ಸಿಂಹಾಸನ್‌ಪರ್ ಬೆಠೊರ‍್ಹಾವಳೊ ಅಪ್ಣೊ ಪ್ರಭುನ ಅಜು಼ ಮೇಂಢಾನುಚೆಲ್ಕು ಹುಯಿರ‍್ಹವಾಳನ ಮಳಿಹುಯು ಕರಿ ಊಚಿ ಅವಾಜ಼್‌ಥಿ ಚಿಕ್‌ರ‍್ಯು. ಇವ್ಣೆಖ್ಹಾರು ಸಿಂಹಾಸನ್ನ ಅಶ್‌ಪಿಶ್ ಭಿಯೂಥು. ಶಾಣುಖ್ಹಾರು ಅಜು಼ ಚಾರ್ ಜೀವಿಬಿ ಹಿಜ್ಜಾ಼ಥು. ದೇವ್ನು ದೂತರ್ ಸಿಂಹಾಸನ್ನ ಖ್ಹಾಮ್ಣೆ ಘುಡ್‌ಗ್ಯಾಟೇಕಿನ್‌ ಆರಾದನೆ ಕರ್ತುಹುಯಿನ್, ಆಮೆನ್, ಧನ್ಯವಾದ್, ಮಹಿಮೆಬಿ, ಅಕ್ಕಲ್‌ಬಿ, ಗೌರವ್, ಮರ್ಯಾದಿ, ಶಕತ್ ಅಜು಼ ತಾಖತ್‌ಬಿ ಅಪ್ಣ ದೇವ್ನ ಜ಼ಗ್‌ಜ಼ಮಾನಮಾಬಿ ರ‍್ಹವಾದೆ, ಆಮೆನ್‌ಕರಿ ಬೋಲ್ಯು. ತದೆ ಶಾಣಾವ್‌ಮ ಏಕ್‍ಜ಼ಣೊ, “ಧೋಳು ಝ಼ಗ್ಗೊಖ್ಹಾರು ಫೇರಿರಾಖ್ಯುತೆ ಆದ್ಮಿಖ್ಹಾರು ಕೋಣ್! ಅವ್ಣೆ ಕಿಜ್ಜಾ಼ಥು ಆಯುಕರಿ ಪುಛಾ಼ಯು. ತದೆ ಗುರೂಜಿ ಇವ್ಣೆ ಕೋಣ್‌ಕರಿ ತುನಾಸ್ ಮಾಲುಮ್‌ಕರಿ ಬೋಲ್ಯೊ. ತದೆ ಏಕ್‌ ಪ್ರಭುನೆ, “ಆ ಅದ್ಮಿಖ್ಹಾರು ಘಣು ಮೋಟಿ ಖ್ಹತಾಪ್ಣಿ ಲೀನ್ ಆಯುಹುಯು.ಇವ್ಣೆ ಮೇಂಢಾನ ಚೆಲ್ಕಾನ ಲ್ಹೋಯಿಥಿ, ಇವ್ಣ ಝ಼ಗ್ಗಾನ ಧೊಯಿನ್ ಕೋರು ಹುಯಿರುಸ್. ಇನಖ್ಹಾಜೆ ಇವ್ಣೆ ಹಮ್ಕೆ ದೇವ್ನ ಸಿಂಹಾಸನ್ನ ಖ್ಹಾಮ್ಣೆರ‍್ಹೀನ್, ಇನ ಮಂದಿರ್‌ಮ ರಾತ್‌ದನ್ ಆರಾದನೆ ಕರುಕರಸ್, ಸಿಂಹಾಸನ್‌ಪರ್ ಬೆಠೊರ‍್ಹವಾಳೋಸ್ ಇವ್ಣುನ ಆಖ್ಹ್‌ರೊ ಹುಯಿರ‍್ಹೊಸ್. ಬಿಜು಼ ಕೆದೇಬಿ ಇವ್ಣುನ ಭುಕ್‌ರ‍್ಹವೊ, ಠೋಖ್ಹ್‌ರ‍್ಹವೊ ಕೋಉಷೇನಿ, ಶನಕತೊ ಸಿಂಹಾಸನ್ನ ಇಚ಼್‌ಮ ಛಾ಼ತೆ ಬಲೀನ ಮೇಂಢಾನು ಚೆಲ್ಕು ಹುಯಿರ‍್ಹವಾಳೊ ಇವ್ಣುನ ಕುರುಬನಿತರ ರ‍್ಹೀನ್ ಜಾನ್ನು ಪಾಣಿನು ಚೆಜ಼್‌ಭಾರಕನ ಚ಼ಲೈಲಿಜಾಷೆ ಅಜು಼ ದೇವ್ ಇವ್ಣ ಡೋಳಾನು ಆಂಝು಼ಖ್ಹಾರು ನೂಛಿನಾಕ್ಷೆ ಕರಿ ಬೋಲ್ಯು.
ದೇವ್ನಿ ಖ್ಹಾಚಿ ವಚನ್. Copyright © 2023 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.