ಪ್ರಕಾಶಿತ್ 12

ಅರ್ಝ಼ ಅಜು಼ ತಯೇಡ

1ಸೊರ್ಗಾಮ ಏಕ್‌ ಮೋಟು ಅದ್ಭುತ್ ದೆಖಾಯು. ತಯೇಡ ಏಕ್ಜ಼ಣಿ ಚಾ಼ಂದ್ ಫೇರಿರಾಖಿಥಿ. ಹೈರೀತೆನ ಗೋಡಾನ ಚ಼ಂದರ್‌ಮೊ ಥೊ.ಇನ ಮುಡ್‌ಕ್ಯಪರ್ ಭಾರ ತಾರವ್ನಿ ಕಿರೀಟ್ ಥು. 2ಯೊ ಬೇಜೂನಿ ಹುಯಿರ‍್ಹಿನ್ ಯೋ ಜ಼ಣತ್ನ ದರದ್‌ಥಿ ಖ್ಹತೀನ್ ರೊವ್‍ಕರ್ತೀಥಿ. 3ತದೆ ಆಕಾಶ್‌ಮ ಬಿಜೇಕ್ ಅದ್ಭುತ್ ದೆಖಾಯು; ಹಿಜ್ಜಾ಼ ಏಕ್‌ ಅರ್ಝ಼ ಥು. ಇನ ಖ್ಹಾತ್ ಮುಡ್‌ಕ್ಯಾಬಿ ದಖ್ಹ್‌ ಶಿಂಗ್ಡಾ ಥು. ಇನ ಮುಡ್‌ಕ್ಯಾವ್‌ಪರ್ ಖ್ಹಾತ್ ಕಿರೀಟ್‌ಖ್ಹಾರು ಥು. 4ಇನ ಡೋಂಡೇಥಿ ಆಬ್‌ನ ತಾರವ್‌ಮಾನು ತೀನ್‌ಮಾನು ಏಕ್‌ಭಾಗ್‌ನ ಖೇಚಿನ್ ಜ಼ಮೀನ್‌ಪರ್ ಫೇಖ್ಯು. ಜ಼ಣುಕರಾತೆ ಯೊ ತಯೇಡ ಜ಼ಣ್‌ತಾಸ್ನ ಇನ ಲಡ್ಕಾನ ಗಳಿಲೇವ್ಣುಕರಿ ಯೊ ಅರ್ಝ಼ ಇನ ಖ್ಹಾಮ್ಣೆಸ್ ಟಿವೈರ‍್ಹೂಥು. 5ಇನೆ ಜ಼ಗ್‌ಜಾ಼ತ್ನ ಲ್ಹೋಡಾನ ಲಠ್ಠೇಥಿ ಚ಼ಲಾವ್‌ಣೂತೆ ಏಕ್‌ ಪರ್ಖ್ಹಾ ಲಡ್ಕಾನ ಜ಼ಣಿ. ಯೋ ಲಡ್ಕು ತದೇಸ್‌ ದೇವ್‌ಕನಾಬಿ ಇನ ಸಿಂಹಾಸನ್‌ಕನಬಿ ಪಡೈಗಯು. 6ಅಜು಼ ಯೊ ತಯೇಡ ಜ಼ಂಗಳ್‌ಮ ನಾಶಿಚ಼ಲಿಗೈ. ಹಿಜ್ಜಾ಼ ಇನ ಏಕ್‌ ಹಜಾ಼ರ್ ಬೇಖ್ಹೊ ತೀನಿಖ್ಹ್‌ ದನ್‌ಲಗು ಪಳಾನಖ್ಹಾಜೆ ದೇವ್ನೆ ತಯಾರ್ ಕರಿರಾಖ್ಯೋಥೊತೆ ಝ಼ಗೋನ ಇನೆ ದೇಖಿ. 7ಸೊರ್ಗಾಮ ಜಂಗ್ ಹುಯು. ಮೀಕಾಯೇಲಾಬಿ ಇನು ದೂತರ್‌ಬಿ ಅರ್ಝ಼ನ ವಿರೋದ್ ಜಂಗ್‌ಭೀಡ್ಯು. ಇಮ್ಮಸ್ ಅರ್ಝ಼ಬಿ ದೂತರ್‌ಬಿ ಜಂಗ್ ಭೀಡಾಲಗ್ಯು. 8ಕತೋಬಿ ಯೊ ಅರ್ಝ಼ನ ತಾಖತ್‌ಕೊಂತೆ ಹರಿಗಯು. ಅಮ್ ಸೊರ್ಗಾಮ ಇವ್ಣುನಾಬಿ ಝ಼ಗೊ ಮಳ್ಯುಕೊಯ್ನಿ. 9ಯೋ ಅರ್ಝ಼ ಕತೊ ಪಿಶಾಚಿಕರಿಬಿ ಶೈತಾನ್ ಕರೀಬಿ ನಾಮ್‌ರ‍್ಹವಾಳ ಯೊ ಜೂ಼ನೊ ಖ್ಹಾಪ್ ಧರ್ತಿಪರ್ ಧಕೆಲಾಯೊ ಇನೊ ದೂತಬಿ ಇನ ಜೋ಼ಡ್ಮ ಜ಼ಮೀನ್‌ಪರ್ ಫೇಕೈಗಯು. 10ತದೆ ಮೆ ಸೊರ್ಗಾಮ ಏಕ್‌ ಮೋಟೊ ಅವಾಜ಼್ ಖ್ಹಮ್‌ಜ್ಯೊ; ಯೊ “ಜೀತ್‌ಬಿ, ಶಕತ್‌ಬಿ, ರಾಜ್ಯಬಿ ಹಮಾರ ದೇವ್ನು ಹುಯು, ಯೊ ಅಬಿಷೇಕ್ ಕರ‍್ಯೊತೆ ಕ್ರಿಸ್ತನು ಅದಿಕಾರ್ ಹಮ್ಕೆ ಶುರುಹುಯಿರ‍್ಹೂಸ್. ರಾತ್‌ದನ್ ಹಮಾರ ಭೇನೆ ಭೈಯೇವ್ನಿ ಬಾರೇಮ ದೇವ್ನ ಖ್ಹಾಮ್ಣೆ ಕೆದೇಬಿ ಛಾ಼ಡಿ ಬೋಲುಕರ್ತೊಥೋತೆ ಛಾ಼ಡಿಖೋರ್ ಸೊರ್ಗಥು ಧಕೆಲೈಗಯೊ. 11ಇವ್ಣೆ ಮರಣ್‌ಲಗೂಬಿ ಭೈಯೇ ಭೇನೆನ ಇವ್ಣ ಜಾನ್ನ ಪ್ಯಾರ್ ಕರ‍್ಯಕೊಂತೆ, ಮೇಂಢಾನ ಚೆಲ್ಕುಹುಯಿರ‍್ಹವಾಳನ ಲ್ಹೋಯಿಥಿಬಿ ಇನು ಸಾಕ್ಷಿನು ಅಜು಼ ಬೋಲಾಯುತೆ ವಚನ್‌ಥಿಬಿ ಇನ ಜೂತಿಲಿದು. 12ಇನಖ್ಹಾಜೆ ಸೊರ್ಗ, ಇನಾಮ ಜಿವ್ಣುಕರವಾಳಾವೊ಼, ಖುಷಿಕರೊ. ಕತೋಬಿ ಜ಼ಮೀನ್ ದರ‍್ಯಾವ್ ತುಮಾರಿ ಖರಾಬ್ ಹಾಲ್ನ ಶಾತ್‌ಕರಿ ಬೋಲು ಶನಕತೊ ಶೈತಾನ್ ಇನಛಾ಼ತೆ ವಖ್ಹತ್ ಕಮ್‌ಕರಿ ಮಾಲುಮ್‌ ಕರಿಲಿನ್ ಘಣು ಚ಼ಂಢಾಳ್‌ವಾಳೊ ಹುಯಿನ್ ತುಮಾರಭಣಿ ಉತ್ರಿನ್ ಐರ‍್ಹೋಸ್” ಕರಿ ಬೋಲ್ಯು. 13ಅರ್ಝ಼ ಇನುಯೋ ಜ಼ಮೀನ್‌ಪರ್ ಧಕೈಲೈನ್‌ ಪಡಿರ‍್ಹಾವನು ಪರ್ಖಿಲಿನ್, ಪರ್ಖ್ಹೊ ಲಡ್ಕು ಜ಼ಣೀತೆ ತಯೇಡನ ಖ್ಹತಾವನಖ್ಹಾಜೆ ರಪೇಟಿನ್‌ ಗಯು. 14ಕತೋಬಿ ಯೊ ತಯೇಡ ಜ಼ಂಗಳ್‌ಮ ಥೂತೆ ಇನಿ ಝ಼ಗೋನ ಉಡಿಜಾ಼ವನಖ್ಹಾಜೆ ಇನ ಮೋಟಿಖ್ಹಿ ಗರದ್ನಿ ಬೇ ಫಾಕ್ಡಿಖ್ಹಾರು ದೆವಾಯು. ಹಿಜ್ಜಾ಼ ಯೊ ಖ್ಹಡ್‌ತೀನ್ ವರಖ್ಹ್ ದನ್ ಅರ್ಝ಼ನ ಖ್ಹಪಡ್ನುನಾತೆ ತಿಮ್ ಪಳಿ. 15ಅರ್ಝ಼ ಯೊ ತಯೇಡಾನ ವ್ಹವಾಡಿಲಿನ್ ಜಾ಼ವ್ಣುಕರಿ ಇನ ಪೀಠೆ ನದ್ದಿನಿತರ ಬಾಕಾಮಾಥು ಪಾಣಿನ ಉಡಾಯು. 16ಕತೋಬಿ ಜ಼ಮೀನ್ನೆ ಯೊ ತಯೇಡಾನ ಮದತ್ ಕರ‍್ಯು. ಯೋ ಇನ ಬಾಕಾನ ಪಖ್ಹಾರಿನ್ ಅರ್ಝ಼ನ ಇನ ಬಾಕೇಥಿ ಮ್ಹೇಲ್ಯೋತೆ ನದ್ದೀನ ಗಳಿಲಿದು. 17ತದೆ ಅರ್ಝ಼ನ ಯೊ ತಯೇಡಾಪರ್ ಘಣು ಖಿಜೈ಼ನ್, ಇನಿ ಪಿಳ್ಗಿಮ ಥೂತೆ ಇವ್ಣಾಪರ್ ಕತೊ, ದೇವ್ನಿ ಹುಕುಮ್‌ನ ಪಾಡಿ ಚಾ಼ಲಿನ್ ಯೇಸುನಿ ಬಾರೇನಿ ಸಾಕ್ಷಿ ಹುಯಿರ‍್ಹವಾಳನಪರ್ ಜಂಗ್ ಭೀಡಿನ್, 18ದರ‍್ಯಾವ್ನ ಕನಾರಿನ ರೇತ್‌ಪರ್ ಭೀರಿಗಯೊ.