ದೇವ್ನಿ ಖ್ಹಾಚಿ ವಚನ್
ಫಿಲಿಪ್ಪಿ 4:13
Verse 13 is marked below, with the whole chapter around it. Read from the start
ಮಾಲುಮ್ ಕರಾನು
ಅಮ್‌ರ‍್ಹವಾಪರ್, ಮಾರ ಪ್ಯಾರ್‌ನ ಭೇನೆ ಭೈಯೇವೊ ಅಜು಼ ಸಾಥಿವೊ, ಮನ ಶಂತೋಖ್ಹ್‌ಬಿ ಕಿರೀಟ್‌ಬಿ ಹುಯಿರ‍್ಹವವಾಳವೊ, ಮೇ ಬೋಲಾನಿತರ ಪ್ರಭುಮ ಘಟ್‍ಥಿ ಭೀರ‍್ಹೆವೊ. ಪ್ರಭುಮ ಏಕ್‌ ದಿಲ್‌ವಾಳ ಹುಯಿರ‍್ಹೇವೊಕರಿ ಯುವೊದ್ಯನಾಬಿ ಸಂತುಕೆನ ಗಿಂಗೈಲೆವುಸ್. ಮಾರೊ ಖ್ಹಾಚೊ಼ ಸಾಥಿನೊ ಸೇವಕ್, ಯೊ ತಯೇಡಾವ್ನ ಮದತ್ ಹುಯಿರ‍್ಹೇವ್ಣುಕರಿ ತುನ ಬೋಲಿಲೆವುಸ್. ಇವ್ಣೆ ಜಿನು ಕ್ಲೇಮೆನ್ಸ್ ಅಜು಼ ಥೋಡ ಜೋ಼ಡ್ಮಕಾಮ್‍ ಕರವಾಳನ ಖ್ಹಮೇದ್ ಮಾರ ಜೋ಼ಡೆ ಸುವಾರ್ತೆನಖ್ಹಾಜೆ ಖ್ಹತ್ಯು. ಅವ್ಣು ನಾಮ್‌ಅಖ್ಖು ಜಾನ್ನ ಹಕ್‌ವಾಳಾನಿ ಪಟ್ಟಿಮ ಛಾ಼. ಕೆದೇಬಿ ಪ್ರಭುಮ ಖುಷಿಕರೊ, ಖುಷಿಲೀಲೆವೊಕರಿ ಪಾಛೊ಼ ಬೋಲುಸ್. ತುಮಾರು ಖ್ಹಮಾಳಿರ‍್ಹವಾನುಬಿ, ಗೋರ್‌ಬಿ ಹರೇಕ್ ಅದ್ಮಿನಾಬಿ ಮಾಲುಮ್‌ಪಡಾದೆ, ಪ್ರಭು ಪಾಛು಼ ಆವಾನು ಲಗಾಬಗು ಹುಯಿಗು. ಖಿವಿ ಬಾರೇಮಾಬಿ ವೇಚ಼್‌ಣೆ ನಾಕರ‍್ನುತೆ ಅಖ್ಖೀಸ್ ವಿಚಾರ್‌ಮ ದೇವ್ನ ಖ್ಹಾಮ್ಣೆ ಧನ್ಯವಾದ್ನು ಪ್ರಾರ್ಥನೆಬಿ ಬಿಂತಿ ಕರ್ತಹುಯಿನ್ ತುಮುನ ಹೋಣುತೆಯಿನ ಪ್ರಭುನ ಖ್ಹಮ್‍ಜಾ಼ಡೊ. ಅಜು಼ ತದೆ ಅದ್ಮಿನ ಖ್ಹಯಾಲ್‌ಥೀಬಿ ಭಡಿರ‍್ಹವಾನು ದೇವ್ನಿ ಶಾಂತಿ ತುಮಾರ ದಿಲ್‌ನಾಬಿ ಸೋಚ್‌ನಾಬಿ ಕ್ರಿಸ್ತ ಯೇಸುಮ ಬಚಾ಼ಡ್‌ಶೆ. ಕಡೇಶಿಮ ಮಾರ ಭೇನೆ ಭೈಯೇವೊ, ಖಿವು ಖ್ಹಾಚು಼ಕಿ, ನ್ಯಾವ್‌ನೂಕಿ, ಗಣ್ತಿನುಕಿ, ಪಾಕ್‌ನೂಕಿ, ಲಾಡ್ನೂಬಿ, ಖ್ಹಾಜ಼್‌ನುಬಿ ಹುಯಿರ‍್ಹುಸ್ಕಿ, ಖಿವು ಅಛ್ಛಿ ಚಾ಼ಲ್‌ಚ಼ಲಣ್‌ಬಿ, ಕೀರತ್ನ ಲ್ಹಾಯೇಕ್ಕಿ, ಯೊ ಅಖ್ಖಾನಿ ಬಾರೇಮ ಸೋಚಾವಳ ಹುಯಿ‍ರ‍್ಹೆವೊ. ತುಮೆ ಖಿವು ಮಾರೇಥಿ ಶಿಕಿ ಲೀರಾಖ್ಯಾಸ್ಕಿ, ಅಜು಼ ಖಿವು ಮಾರಾಮ ಖ್ಹಮ್‌ಜಿ ದೇಖಿರಾಖ್ಯಸ್ಕಿ ಇನಾಸ್ ಕರ್ತಆವೊ. ಅಮ್ ಕರ‍್ಯಾತೊ ಸಮಾಧಾನ್ನೊ ದೇವ್ ತುಮಾರ ಜೋ಼ಡೆರ‍್ಹಿಷೆ.
ಇನಾಮ್ನಖ್ಹಾಜೆ ಧನ್ಯವಾದ್
ಮಾರಿ ಬಾರೇಮ ತುಮುನ ಛಾ಼ತೆ ಖ್ಹದ್ದರ್‌ ಅತ್ರದನ್ನ ಪಾರ್ ಚಿಗುರ್‌ ಮ್ಹೇಲ್ಯುತೆ ಇನಖ್ಹಾಜೆ ಮೇ ಪ್ರಭುಮ ಖುಷಿಕರುಸ್. ಅಥ್ರಾನಿ ಸೋಚ್ ತುಮಾರಮ ಆ ಪಹಿಲೆ ರ‍್ಹಿಯುಹೊತ್ತೊಬಿ, ಮದತ್ ಕರಾನ ಬರೊಬರ‍್ನಿ ವೇಳ್ ಕೊಆಯಿರ‍್ಹಿಥೀನಿ. ಮನ ಹೋಣುತೆ ಇನಿ ಬಾರೇಥಿ ಮೇ ಅನ ಕೋ ಬೋಲುಕರುನಿ, ಮೆ ಬೋಲ್ನುಕತೊ ಛಾ಼ತೆ ಪರಕ್ಮ ಹಕ್ಲಾಲ್‌ಥಿ ರ‍್ಹವಾನು ಶಿಕಿರಾಖ್ಯೊಸ್. ಗರೀಬ್ ಹುಯಿರ‍್ಹವಾನಬಿ ಮಾಲುಮ್ ಚೆಹಳ್‌ಥಿರ‍್ಹವಾನು ಮಾಲುಮ್. ಮೆ ಹಕ್ಲಾಲ್‌ಥಿ ರ‍್ಹಯೊತೋಬಿ, ಭುಕ್ಯೊ ರ‍್ಹಯೊತೋಬಿ, ಬರ್ಗತ್‌ವಾಳೊ ಹುಯುತೋಬಿ, ಕಾಯಸ್‌ಕೊಂತೆ ಹುಯೋತೊಬಿ, ಖಿವಿ ರ‍್ಹಾಮರ‍್ಹವಾಳೊ ರ‍್ಹಿಯೊತೋಬಿ ಇನು ಗಪ್ಲತ್ ಮನ ಮಾಲುಮ್. ಮನ ತಾಖತ್ ದ್ಯವಾಳೊ ಕ್ರಿಸ್ತಥಿ ಮೆ ಅಖ್ಖಾಸ್ನ ಕರಾನ ಶಕತ್‌ವಾಳೊ ಹುಯಿರೋಸ್. ಅಮ್ ರ‍್ಹಯುತೋಬಿ ತುಮೆ ಮಾರಿ ಖ್ಹತಾಪ್ಣಿ ಖ್ಹಂಗ್‌ಮಥಾತೆ ಅಛ಼್ಛುಹುಯು. ಅಜು಼ ಫಿಲಿಪ್ಪಿವಾಳೊ, ಮೇ ಶುರುವಾತ್ನ ತುಮಾರಮ ಸುವಾರ್ತೆನ ಪ್ರಚಾರ್ ಕರೀನ್, ಮೆಕೆದೋನ್ಯನ ಗಯೋತೆ ತದೆ ದ್ಯವಾನು, ಲ್ಯಾವಾನಿ ಬಾರೇಮ ತುಮುನ ಮ್ಹೇಲ್ಯೂತೊ ಬಿಜು಼ ಖಿವು ಸಬೇಬಿ ಮನ ಮದತ್ ಕೊದಿದೂನಿಕರಿ ತುಮುನಾಬಿ ಮಾಲುಮ್ ಛಾ಼. ಮೇ ಥೆಸಲೋನಿಕಮ ಥೋತೆ ತದೇಬಿ ತುಮೆ ಏಕ್‌ ಬೇಹಲ್ಲ ಮಾರಿ ಜ಼ರೂರತ್ನಖ್ಹಾಜೆ ಮದತ್ ದಿಮೋಕ್‌ಲ್ಯಥಾನಿ. ಖ್ಹಾಚಮಾಬಿ ಮೆ ತುಮಾರೇಥಿ ಇನಾಮ್ ಲೇವ್ಣು ಕರಿಕಾಹೆ, ಕತೋಬಿ ಅನೇಥಿ ತುಮೆ ಚೆಹೆಳ್ ಅಜು಼ ಬರ್ಗತ್ ಹುವಾದೇಸ್ ಕರಿ ಮಾರಿ ಆಖ್ಹ್. ಹೋಣುತೆ ಅಖ್ಖೂಸ್ ಮನ ಛಾ಼, ಚೆಹೆಳ್ ಹುಯಿರ‍್ಹೋಸ್. ಎಪಫ್ರೊದೀತ್‌ನ ತುಮೆ ದೀನ್ ಮೋಕ್‌ಲ್ಯಾತೆ ಇನಾಮ್ ಮನ ಪೋಚಾ಼ನಿ ವಖ್ಹ್‌ತೆ ಮೆ ಭರೈನ್ ಚೆಹಳ್‌ವಾಳೊ ಹುಯಿರ‍್ಹೋಸ್. ಯೊ ತುಮಾರು ಕಾಣ್‌ಕೆ ದೇವ್ನ ಢಪ್ಕಾರ‍್ನು ವಾ ಹುಯಿರ‍್ಹುಸ್, ಯೊ ದೇವ್ನ ಲ್ಹಾಯಕ್‌ನು ಬಲಿ ಹುಯಿರ‍್ಹುಸ್. ಮಾರೊ ದೇವ್ ಕ್ರಿಸ್ತ ಯೇಸುಥಿ ಇನಿ ಮೋಟಿ ಮಹಿಮೆನ ಧನ್‌ದೌಲಥ್ಥಿ ತುಮುನ ಛಾ಼ತೆ ಹರೇಕ್ ಜ಼ರೂರತ್‌ನ ಪೂರ ಕರ್ಶೆ. ಅಪ್ಣ ಬಾ ಹುಯಿರ‍್ಹೋತೆ ದೇವ್ನ ಜ಼ಗ್‌ಜ಼ಮಾನಮಾಬಿ ಮಹಿಮೆ ಹುವಾದೆ! ಆಮೆನ್.
ಖ್ಹರ್ತಿನಿ ಖ್ಹಲಾಮ್
ಕ್ರಿಸ್ತ ಯೇಸುಮ ಛಾ಼ತೆ ಹರೇಕ್ ವಿಶ್ವಾಸಿನಬಿ ಮಾರಿ ಖ್ಹಲಾಮ್ ಬೋಲೊ. ಮಾರ ಜೋ಼ಡ್ಮ ಛಾ಼ತೆ ಭೈಯೇ ಭೇನೆಬಿ ತುಮುನ ಖ್ಹಲಾಮ್ ಕರುಕರಸ್. ಹಜ್ಜಾ಼ ಛಾ಼ತೆ ದೇವ್ನು ವಿಶ್ವಾಸಿ ಖ್ಹಾರು ತುಮುನ ಖ್ಹಲಾಮ್ ಕರುಕರಸ್. ವಿಶೇಷ್‌ಥಿ ಕೈಸರ್‌ನು ಮಹೇಲ್‌ಮ ರ‍್ಹವಾಳುಬಿ ತುಮುನ ಖ್ಹಲಾಮ್ ಬೋಲಿರಾಖ್ಯುಸ್. ಪ್ರಭು ಯೇಸು ಕ್ರಿಸ್ತನು ವಾರ್‌ಖ್ಹೊ ತುಮಾರ ಆತ್ಮನಿ ಜೋ಼ಡೆ ರ‍್ಹವಾದೆ.
ದೇವ್ನಿ ಖ್ಹಾಚಿ ವಚನ್. Copyright © 2023 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.