ದೇವ್ನಿ ಖ್ಹಾಚಿ ವಚನ್
ಲೂಕ 8
ಯೇಸುನಿ ಸೇವೆ ಕರೀತೆ ತಯೇಡಾವ್‍ನಿ ಬಾರೇಮ
ಅನ ಬಾದ್‌ಮ ಯೇಸು ಖ್ಹಾರ ಖ್ಹಯೇರ್‌ಮ ಅಜು಼ ಗಾಮ್ಮಾಕರಿ ಫರ್ತೊಹುಯಿನ್, ದೇವ್ನಿ ರಾಜ್ಯನಿ ಅಛ್ಛಿ ಖಬರ್‌ನ ಬೋಲ್ತೊನಿಕ್‌ಳ್ಯೊ. ಭಾರ ಜ಼ಣ ಶಿಷ್ಯರ್‌ಬಿ ಇನಜೋ಼ಡೆ ಥಾ. ಥೋಡಿ ತಯೇಡಾಬಿ ಇನಜೋ಼ಡೆ ಥಿ. ಆ ತಯೇಡಾವ್‍ನ ಯೇಸುಥಿ ರೋಗ್‌-ರಾಯೊ ಅಛ್ಛು಼ ಹುಯೂಥು ಅಜು಼ ಭೂತ್ ಖ್ಹಾರು ನಿಕ್ಳಿಗಯೂಥು. ಅವ್ಣಾಮ, ಖ್ಹಾತ್ ಭೂತ್ ನಿಕ್ಳಿಗಯುಥೂತೆ (ಮಗ್ದಲ ಗಾಮ್‌ನಿ) ಮರಿಯ, ಹೆರೋದನು ಘರ್‌ಭಾರ್‌ನು ಇಶಾಬ್ ದೆವಾಳೊ ಹುಯಿರ‍್ಹೊಥೋತೆ ಕೂಜನಿ ಬಾಯ್ಕೊ ಯೋಹಾನ್ನ, ಸುಸನ್ನ ಅಜು಼ ಕೈಯೆಕ್ಕಿ ಬಿಜಿ ತಯೇಡಾಬಿ ಥಿ. ಅವ್ಣೆ ಇವ್ಣು ಶೊಂತ್ ಪೈಶಾಥಿ ಯೇಸುನಿ ಅಜು಼ ಇನ ಶಿಷ್ಯರ್‌ನಿ ಚಾ಼ಕ್ರಿ1 ಕರ್ತಿಥಿಯೆ.
ಪಂಡಾ ಛಿಡ್ಕಾವಾಳನಿ ಮತ್ಲಬ್‌ನಿ ಖೇಣಿ
(ಮತ್ತಾಯ 13:1-9; ಮಾರ್ಕ 4:1-9)
ಖ್ಹಯೇರೆ-ಖ್ಹಯೇರೇಥು ಕೈಯೆಕ್ಕಿ ಅದ್ಮಿಯೆ ಅವ್‌ಕರ್ತೂಥು; ಅಜು಼ ಅದ್ಮಿನಿ ಮೋಟಿ ಭೀಡ್ ಭರಾವಾದೀನ್‌, ಯೇಸುನೆ ಇವ್ಣುನ ಮತ್ಲಬ್‌ನಿ ಖೇಣಿಯೇಥಿ ಬೋಲ್ಯೊ.
ಏಕ್‌ ಜ಼ಣೊ ಪಂಡಾ ಛಿಡ್ಕಾನಖ್ಹಾಜೆ ಖೇತ್ರೆ ಗಯೊ, ಯೋ ಪಂಡಾ ಛಿಡ್ಕಾನಿ ವಖ್ಹತ್‌ಮ, ಥೋಡ ಪಂಡಾ ವಾಟ್ನ ಶೇಡೆ ಪಡೀನ್, ಖುಂದ್‌ಲೈಗು. ಆಬ್‍ಥು ಉಡಂತು ಜಿನಾವರ್ ಖ್ಹಾರು ಆಯಿನ್ ಇನ ಚ಼ರಿಲಿದು. ಅಜು಼ ಥೋಡ ಪಂಡಾ ಬಂಡಾಪರ್‌ನಿ ಮಾಟಿಪರ್‌ ಪಡ್ಯು, ಯೋ ಫುಟಿನ್ ಮಾಟಿ ಭಿಗ್ಗಿಕೊಂತೆ ದೇಖಿನ್, ಖ್ಹುಕೈಗು. ಅಜು಼ ಥೋಡ ಪಂಡಾ, ಕಾಟಾನ ಡಾಗ್‌ಮ ಪಡ್ಯು, ಆ ಕಾಟಾನು ಝಾ಼ಡಾ ಯೋ ಪಂಡಾವ್‍ನ ಜೋ಼ಡೆ ಫುಟಿನ್, ಶೋಶಿಯೇನ ದಾಬಿನಾಖ್ಯು. ಬಿಜು಼ ಥೋಡ ಪಂಡಾ ಅಛ್ಛಿ ಜ಼ಮೀನ್‌ಪರ್‌ ಪಡೀನ್, ಫುಟಿನ್, ಏಕ್‌ ಪಂಡಾಪಿಟ್ ಖ್ಹೊ ಎತ್ರೆ ಪಂಡಾ ಮ್ಹೇಲ್ಯು”.
ಆ ಖ್ಹಾರಿ ವಾತೆ ಬೋಲಾನ ಬಾದ್‌ಮ, ಯೇಸುನೆ, “ಕಿನ-ಕಿನ ಖ್ಹಮ್‌ಜಾ಼ನ ಕಾನ್‌ ಛಾ಼ಕಿ ಇವ್ಣೆ ಖ್ಹಮ್‌ಜಾ಼ದೆ!” ಕರಿ ಬೋಲ್ಯೊ.
ಮತ್ಲಬ್‌ನಿ ಖೇಣಿಯೇನಿ ಉದ್ದೇಶ್
(ಮತ್ತಾಯ 13:10-17; ಮಾರ್ಕ 4:10-12)
ಯೇಸುನು ಶಿಷ್ಯರ್‌ ಇನ, “ಆ ಮತ್ಲಬ್‌ನಿ ಖೇಣಿನು ಮತ್‌ಲಬ್ ಶಾತ್” ಕರಿ ಪುಛಾ಼ಯು, ಯೇಸುನೆ, “ದೇವ್ನಿ ರಾಜ್ಯನಿ ಖ್ಹಾಚ಼ನ ಮಾಲುಮ್ ಕರಿಲ್ಯವಾನಿ ಗ್ಯಾನ್ ತುಮೂನ ದೆವೈರ‍್ಹೂಸ್. ಕತೋಬಿ ಬಿಜಾ಼ಖ್ಹಾರ ಅದ್ಮಿನ ಡೋಳ ರ‍್ಹಯುತೋಬಿ ದೆಖಾವ್ಣುನಾತೆ, ಅಜು಼ ಕಾನ್‌ ರ‍್ಹಯುತೋಬಿ ಖ್ಹಮ್‌ಜಾ಼ವ್ಣುನಾತೆ ಇಮ್‌ ಮತ್ಲಬ್‌ನಿ ಖೇಣಿಯೇಥಿ ಬೋಲುಸ್” ಕರಿ ಜವಾಬ್‌ ದಿದೊ.
ಯೇಸುನೆ ಪಂಡಾ ಛಿಡ್ಕಾವಾಳನಿ ಮತ್ಲಬ್‌ನಿ ಖೇಣಿನ ಬೋಲಿವತಾಳ್ಯೋತೆ
(ಮತ್ತಾಯ 13:18-23; ಮಾರ್ಕ 4:13-20)
“ಆ ಮತ್ಲಬ್‌ನಿ ಖೇಣಿನು ಮತ್‌ಲಬ್ ಶಾತ್‌ಕತೊ, ಯೋ ಪಂಡು ಕತೊ ದೇವ್ನಿ ವಚನ್. ಥೋಡು ಅದ್ಮಿ ವಚನ್ನ ಖ್ಹಮಜ಼್‌ತಾಸ್‌ನ ಶೈತಾನ್ ಆಯಿನ್, ಇವ್ಣೆ ನಂಬಿನ್, ಇವ್ಣ ರಕ್ಷಣೆ ನಾ ಮಳ್‌ಣು ಕರಿ, ಯೋ ವಚನ್ನ ಇವ್ಣ ಮನ್‌ಮಾಥು ಕಾಡಿನಾಖಿದೇಸ್. ಅವ್ಣೇಸ್ ವಾಟ್ನಶೇಡೆ ಪಡ್ಯಾತೆ ಪಂಡಾ ಹುಯಿರ‍್ಹೂಸ್. ಥೋಡು ಅದ್ಮಿ ವಚನ್ನ ಖ್ಹಮಜ಼್‌ತಾಸ್‌ನ, ಖ್ಹುಶಿಥಿ ಇನ ಮಾನಿಲೇಸ್. ಅವ್ಣುನ ಜ಼ಡ್‌ಕೊಂತೆ ಇನಖ್ಹಾಜೆ ಜ಼ರಘಡಿಸ್ ಖಲಿ ನಂಬಸ್‍ ಶೋದನೆನ ಹಗಾಮ್ಮ ಪಡಿಜಾ಼ಸ್‌. ಅವ್ಣೇಸ್ ಬಂಡಾಪರ್ ಪಡ್ಯಾತೆ ಪಂಡಾ ಹುಯಿರ‍್ಹಾಸ್‌. ಕಾಟಾನ ಝಿಕ್ರಾನು ಝ಼ಗೋಪರ್ ಪಡ್ಯಾತೆ ಪಂಡಾ ಕೆಹುಕತೊ, ಥೋಡು ಅದ್ಮಿ ದೇವ್ನಿ ವಚನ್ನ ಖ್ಹಮ್‌ಜಾ಼ಸ್‌, ಕತೋಬಿ ಆ ಜಿವ್ಣಾನಿ ಪಶ್ತಾವ್ಣಿ, ಧನ್‌-ದೌಲತ್‌ನಿ ಭೋಗ್‌ಮ ಡುಬಿಜೈನ್, ಇವ್ಣು ಫಲ್ ಕೋದೇಯ್ನಿ. ಪಲ್‍ವಾಯಿಹುಯಿ ಜ಼ಮೀನ್‌ಪರ್‌ ಪಡ್ಯುಹುಯು ದಾಣೊ ಕತೊ ದೇವ್ನಿವಚನ್ನ ಖ್ಹಮ್‌ಜಿನ್‌, ಖ್ಹಾಚು಼ ಅಜು಼ ಅಛ಼್ಛ ಮನ್‌ಮ ಇನ ರಾಖಿನ್, ಇವ್ಣೆ ಖ್ಹಮಾಳಿನ್ ಫಲ್ ದೇಸ್.
ದಿವಾನಿ ಬಾರೇಮ
(ಮಾರ್ಕ 4:21-25)
ಕೆಹು ಅದ್ಮಿಬಿ ದೀವೊ ಲಗಾಡಿನ್2, ಹಂಡ್ಕಾನ ಹೇಟ್ ರ‍್ಹವೊ ನತರ್‌ಕಿ ಪಲಂಗ್‌ನ ಹೇಟ್ ರ‍್ಹವೊ ಲಪಾಡಿನ್ ಮ್ಹೇಲಾಕೊಯ್ನಿ. ಘರ್‌ಮ ಆವಾಳಾನ ಉಜಾ಼ಳು ದೆಖಾವಾನಿಘೋಣಿ, ದೀವೊ ಮ್ಹೇಲಾನಿ ಖಂಬಾಪರ್‌ ಮ್ಹೇಲಾಸ್.
ಖ್ಹಾರಿಸ್ ಖ್ಹಾಚಿ ಭಾರ್ ನಿಕಳ್‌ಶೆ, ಅಜು಼ ಲಪೈರ‍್ಹೂತೆ ಖ್ಹಾರಸ್ನ ಢೂಂಡಿನ್ ಭಾರ್ ಲ್ಯಾವ್‌ಶೆ.
ಇನಖ್ಹಾಜೇಸ್, ತುಮೆ ಖ್ಹಮ್‍ಜಾ಼ನಿ ವಖ್ಹತ್‌ಮ, ಹೊಷಾರ್‌ಥಿ ಖ್ಹಮ್‌ಜೊ಼; ಶನಕತೊ ಕಿನಾಕನ ಛಾ಼ಕಿ ಇವ್ಣುನ ಬಿಜೂ಼ಬಿ ದೆವಾವ್‌ಶೆ, ಕತೋಬಿ ಕಿನಾಕನ ಕೊಯ್ನಿಕಿ ಇವ್ಣಾಕಂಥು, ಯೋ ಇನುಕರಿ ಸೋಚಾಸ್ತೆ ಇನಾಬಿ ಛಿನೈಲಿಶೆ.
ಯೇಸುನಿ ಆಯ ಅಜು಼ ಇನ ಭೈಯೆ
(ಮತ್ತಾಯ 12:46-50; ಮಾರ್ಕ 3:31-35)
ತದೆ ಯೇಸುನಿ ಆಯಾಬಿ ಇನ ಭೈಯೇ ಯೋ ಥೋತೆ ಹಿಜ್ಜಾ಼ ಆಯಿನ್, ಅದ್ಮಿನಿ ಝೂ಼ಂಡ್‌ಥೀತೆ ಇನಖ್ಹಾಜೆ ಯೇಸುನ ಖನ್ನೆ ಆವಾನ ಕೋ ಹುಯೂನಿ. ಹಿಜ್ಜಾ಼ ಥೂತೆ ಇವ್ಣಾಮ ಏಕ್‌ ಜ಼ಣಾನೆ ಯೇಸುನ, “ತಾರಿ ಆಯಾಬಿ ತಾರ ಭೈಯೇ ಅಯಿನ್ ತುನ ದೇಕ್ಣು ಕರಿ, ಭಾರ್ ಭಿಯ್ಯುಸ್” ಕರಿ ಬೋಲ್ಯು.
ತದೆ ಯೇಸುನೆ ಇವ್ಣ ಖ್ಹಾರಾನ, “ಕೋಣ್ ದೇವ್ನಿ ವಚನ್ನ ಖ್ಹಮ್‌ಜಿನ್‌, ಇನೀನಿಘೋಣಿ ಚಾ಼ಲಸ್ಕಿ ಇವ್ಣೆಸ್ ಮನ ಆಯಾಬಿ, ಭೈಯೇಬಿ ಹುಯಿರುಸ್‌” ಕರಿ ಜವಾಬ್‌ ದಿದೊ.
ಯೇಸುನೆ ದರ‍್ಯಾವ್‍ನ ಖ್ಹೊಪ್‌ ಕರ‍್ಯೊತೆ
(ಮತ್ತಾಯ 8:23-27; ಮಾರ್ಕ 4:35-41)
ಏಕ್‌ ದನ್ನೆ ಯೇಸು ಇನ ಶಿಷ್ಯರ್‌ನ ಜೋ಼ಡೆ, ಏಕ್‌ ಡೋಣ್‌ಮ ಚ಼ಢೀನ್ ಬೇಶಿಗಯೊ, ಅಜು಼ ಇವ್ಣುನ, “ಚಾ಼ಲೊ, ಅಪ್ಣೆ ದರ‍್ಯಾವ್‍ನಿ ಪಾರ್ಲಿ ಬಾಜೂ಼ನ ಜೈ಼ಯೆ” ಕರಿ ಬೋಲ್ಯೊ. ತದೆ ಇವ್ಣೆ ಡೋಣ್ಣಾ ಪಾಣಿಮ ಧಕೇಲಿನ್ ನಿಕ್‌ಳ್ಯು. ಇವ್ಣೆ ಜ಼ವ್‍ಕರ್ತುಥೂತೆ ತದೆ ಯೇಸುನ ನಿಂದರ್‌ ಆಯಿನ್ ಖ್ಹುಯಿಗಯೊ. ಏಕ್‌ದಮ್ ಮೋಟೊ ವಹಿರೊ ವಾಗಿನ್, ಡೋಣ್‌ಮ ಪಾಣಿ ಭರಾವಲಗ್ಯೂಥು. ಅನೇಥಿ ಇವ್ಣೆ ಘಣಿ ಮುಶ್ಕಿಲ್‌ಮ ಪಡಿಗಯ. ತದೆ ಶಿಷ್ಯರ್‌ ಖ್ಹಾರು ಯೇಸುಕನ ಐನ್, “ಗುರು, ಗುರು, ಹಮೆ ಮರ್‌ವಾನ ಆಯಾನಿ!” ಕರಿ ಬೋಲ್ಯ.
ತದೆ ಯೇಸುನೆ ಉಠೀನ್ ವಹಿರನಾಬಿ, ಪಾಣಿನು ಝೋ಼ಕಾಳ್ಯನಾಬಿ ಗುರ್‌ಕಾಯೊ. ಗುರ್‌ಕಾವಖ್ಹತರ್ ಯೋ ಭೀರಿಗಯು ಅಜು಼ ಖ್ಹೊಪೊ ಹುಯಿಗಯು. ಬಾದ್‌ಮ ಯೇಸುನೆ ಇನ ಶಿಷ್ಯರ್‌ನ, “ತುಮಾರಿ ವಿಶ್ವಾಸ್ ಕಿಜ಼್ಜಾ ಗೈ?” ಕರಿ ಪುಛಾ಼ಯೊ.
ಕತೋಬಿ ಇವ್ಣೆ ಆಶ್ಚರ್ಯಖಾದು ಅಜು಼ ಡರಿಗಯು, ಅಜು಼ ಬೋಲ್ಯೂಕಿ, “ಆ ಅದ್ಮಿ ಕೋಣ್ ಉಶೆ? ವಹಿರನಾಬಿ, ಝೋ಼ಕಾಳ್ಯನಾಬಿ ಹುಕುಮ್ ದೇಸ್‌ನಿ; ಯೋಅಖ್ಖುಬಿ ಆ ಬೋಲಾತೆ ಇಮ್‌ ಖ್ಹಮ್‌ಜಾ಼ಸ್‌ನಿ!” ಕರಿ ಏಕ್‌ಥಿ-ಏಕ್‌ ಬೋಲಿಲಿದು
ಯೇಸುನೆ ಭೂತ್‌ಖ್ಹಾರು ಧರಿರಾಖ್ಯುಥೂತೆ ಏಕ್‌ ಅದ್ಮಿನ ಅಛ್ಛು಼ ಕರ‍್ಯೊತೆ
(ಮತ್ತಾಯ 8:28-34; ಮಾರ್ಕ 5:1-20)
ಯೇಸು ಅಜು಼ ಇನು ಶಿಷ್ಯರ್‌ ಗಲಿಲಾಯಥು ಗೆರಸೇನವಾಳನು ತಬರ್‌ಖಾನ ಆಯಿನ್ ಪೋಚ್ಯಾ. ಯೇಸು ಕನಾರಿಪರ್ ಉತರ್‌ತಸ್ನ, ಯೋ ಗಾಮ್‌ನು ಏಕ್‌ ಜ಼ಣೊ ಇನಖ್ಹಾಮ್ಣೆ ಆಯು, ಇನ ಭೂತ್ ಖ್ಹಾರು ಧರಿರಾಖ್ಯುಥು. ಆ ಕೈಯೆಕ್ಕಿ ದನ್‌ಥು ಲುಂಗ್ಡುಸ್ ಫೇರ‍್ಯುಥು ಕೊಯ್ನಿ ಅಜು಼ ಘರ್‌ಮಾಬಿ ರ‍್ಹೇತೂಥು ಕೊಯ್ನಿ. ಮಖ್ಹಾಣ್ಯನಿ ಘವಿಯೆಮಾಸ್ ರ‍್ಹೇತೂಥು. ಇನೆ ಯೇಸುನ ದೇಖಿನ್ ಬಳೇಳಿನ್‌, ಇನಖ್ಹಾಮ್ಣೆ ಪಡೀನ್, ಚೋ಼ರ್ ಆವಾಜ಼್‌ಥಿ, “ಪರಮಂಡಲ್‌ನೊ ದೇವ್ನ ಛಿಯ್ಯಾ, ಯೇಸು! ಮಾರೇಥಿ ತುನ ಶಾತ್ ಛಾ಼? ಮನ ಖ್ಹತೈಶ್‌ ನಕೊ ಕರಿ ತುನ ಗಿಂಗಾವುಸ್” ಕರಿ ಬೋಲಿಲಿದೊ. ಶನಕತೊ, “ಆ ಅದ್ಮಿನ ಮ್ಹೆಂದಿನ್ ಜಾ಼!” ಕರಿ ಯೇಸುನೆ ಯೋ ಭೂತ್‌ನ ಹುಕುಮ್ ದಿದೋಥೊ. ಘಣಿ ಹಲ್ಲ ಯೋ ಭೂತ್ ಇನ ಧರ್ತುಥು, ಎತ್ರೇಸ್ ಕಾಹೆತೆ ಯೋ ಅದ್ಮಿನ ಕೋಂಡಿಘಾಲಿನ್, ಹಾತ್-ಗೋಡಾನ ಖ್ಹಂಕಳ್‌ಥಿ ಭಾಂದ್ಯುತೋಬಿ, ಯೋ ಖ್ಹಂಕ್‌ಳಿನ ತೋಡಿ ನಾಕ್ತೋಥೊ ಅಜು಼ ಯೋ ಭೂತ್ ಇನ ಉಜ್ಜಾ಼ಡಿ ಝ಼ಗೋಮ ನಖ್ಹಾಡ್‌ತೂಥು.
ಯೇಸುನೆ ಇನ, “ತಾರು ನಾಮ್ ಶಾತ್?” ಕರಿ ಪುಛಾ಼ವಖ್ಹತರ್,
ಇನೆ, “ಮಾರು ನಾಮ್ ಝೂ಼ಂಡ್‌” ಕರಿ ಜವಾಬ್‌ ದಿದೊ. ಶನಕತೊ ಇನ ಘಣು ಭೂತ್ ಧರಿರಾಖ್ಯುಥು. ಯೋ ಭೂತ್‌ಖ್ಹಾರು ಯೇಸುನ, “ಹಮೂನ ಅಂತಸ್‌ಕೊಂತೆ ಪಾತಾಳ್ಮ3 ನಕೊ ನಖ್ಹಾಡ್” ಕರಿ ಗಿಂಗೈಲಿದು.
ಹಿಜ್ಜಾ಼ ಖನ್ನೆಸ್‌ ಥೂತೆ ಪಹಾಡ್‌ಪರ್ ಡೂಕರ್‌ನಿ ಏಕ್‌ ಮೋಟಿ ಝೂ಼ಂಡ್‌ ಚ಼ರೂಕರ್‌ತೂಥು. ತದೆ ಯೋ ಭೂತ್ ಖ್ಹಾರು, “ಯೋ ಖ್ಹಾರ ಡೂಕರ್‌ಮ ಪೇಖ್ಹಾನ ಹಮೂನ ಹುಕುಮ್ ದೇ” ಕರಿ ಯೇಸುನ ಗಿಂಗೈಲಿದು. ಯೇಸುನೆ ಇಮ್ಮಸ್ ಹುವಾದೆ ಕರಿ ಬೋಲಾಖ್ಹತರ್, ಭೂತ್‌ಖ್ಹಾರು ಯೋ ಅದ್ಮಿನ ಮಹಿತು ಭಾರ್ ಆಯಿನ್, ಡೂಕರ್‌ಮ ಪೇಶಿಗಯು. ತದೆ ಯೋ ಡೂಕರ್‌ನಿ ಝೂ಼ಂಡ್‌ ನಾಶಿನ್, ಕಥಾರ್‌ನಿ ಝ಼ಗೋಥು, ದರ‍್ಯಾವ್‌ಮ ಪಡೀನ್, ದಮ್‌ ಘೋಟೈನ್‌ ಮರಿಗಯು.
ಡೂಕರ್‌ ಚ಼ರಾವವಾಳು ಚಾ಼ಲ್ಯುತೆ ಇನ ದೇಖಿನ್, ನಾಶಿಜೈ಼ನ್, ಯೋ ಗಾಮ್ಮಾಬಿ ಅಜು಼ ಅಶ್‌ಪಿಶ್‌ನು ಖೇತರ್‌ಮಾನು ಅದ್ಮಿನ ಚಾ಼ಲ್ಯುತೆ ಇನಿ ಬಾರೇಮ ಬೋಲ್ಯು. ತದೆ ಯೋ ಅದ್ಮಿಖ್ಹಾರು ಚಾ಼ಲ್ಯುತೆ ಇನ ದೇಖಾನಖ್ಹಾಜೆ ಯೇಸು ಥೋತೆ ಹಿಜ್ಜಾ಼ ಆಯು. ತದೆ ಭೂತ್‌ಖ್ಹಾರು ನಿಕ್ಳಿಗಯುಥೂತೆ ಯೋ ಅದ್ಮಿ ಲುಂಗ್ಡಾವ್‍ನ ಪೇರ‍್ಹಿಲಿನ್‌, ಅಛ್ಛಿ ಖ್ಹಯಾಲ್‌ಥಿ, ಯೇಸುನ ಗೋಡಾಕನ ಬೆಠುಥೂತೆ ದೇಖಿನ್, ಇವ್ಣೆ ಖ್ಹಾರು ಡರಿಗಯು. ಚಾ಼ಲ್ಯುತೆ ಯೋ ಖ್ಹಾರಾನ ದೇಖ್ಯೂತೆ ಇವ್ಣೆ, ಯೋ ಭೂತ್ ಧರಿರಾಖ್ಯುಥೂತೆ ಇನ ಕಿಮ್ ಅಛ್ಛು಼ಹುಯು ಕರಿ ಯೋ ಖ್ಹಾರ ಅದ್ಮಿನ ಬೋಲಿವತಾಳ್ಯು. ಗೆರಸೇನವಾಳನು ತಬರ್‌ಖಾನು ಖ್ಹಾರಾನ ಘಣು ಡರ್‌ಲಾಗ್ಯೂತೆ ಇನಖ್ಹಾಜೆ, ಇವ್ಣೆ ಯೇಸುನ, “ತೂ ಹಮೂನ ಮ್ಹೆಂದಿನ್ ಜಾ಼” ಕರಿ ಬೋಲಿಲಿದು. ಇನಖ್ಹಾಜೆ ಯೇಸು ಡೋಣ್ಣಾ ಚ಼ಢೀನ್, ಪಾಛು಼ ಫರಿ ಚ಼ಲೆಗಯೊ. ಯೇಸು ಜಾ಼ವಾನಿ ವಖ್ಹತ್‌ಮ, ಭೂತ್‌ಖ್ಹಾರು ನಿಕ್ಳಿಗಯೂತೆ ಯೋ ಅದ್ಮಿ ಯೇಸುನ, “ಮೇಬಿ, ತಾರ ಕೇಡೆಸ್ ರ‍್ಹವುಸ್‌” ಕರಿ ಯೇಸುನ ಗಿಂಗೈಲಿದೊ.
ಕತೋಬಿ ಯೇಸುನೆ ಇನ, “ತೂ ಪಾಛೊ಼ ತಾರ ಘರೆ ಜಾ಼ ಅಜು಼ ದೇವ್ನೆ ತಾರಖ್ಹಾಜೆ ಶಶ್ಶಾತ್ ಕರ‍್ಯೊ ಕರಿ ಬೋಲ್” ಕರಿ ಬೋಲಿನ್ ಮೋಕ್ಲಿದಿದೊ.
ಯೋ ಅದ್ಮಿ ಹಿಜ್ಜಾ಼ಥು ಚ಼ಲ್ಯೂಜೈ಼ನ್, ಯೇಸುನೆ ಇನ ಶಶ್ಶಾತ್ ಕರ‍್ಯೊ ಕರಿ ಯೋ ಗಾಮ್ಮಾಕರಿ ಬೋಲ್ತುನಿಕ್‌ಳ್ಯು
ಯಾಯಿರನಿ ಛೋ಼ರಿ ಅಜು಼ ಯೇಸುನ ಝ಼ಗ್ಗಾನ ಛೀಮೀತೆ ತಯೇಡ
(ಮತ್ತಾಯ 9:18-26; ಮಾರ್ಕ 5:21-43)
ಯೇಸು ಪಾಛೊ಼ಫರಿ ಆವಾದಿನ್ ಅದ್ಮಿಖ್ಹಾರು ಇನ ಬುಲೈಲಿದು,4 ಶನಕತೊ ಇವ್ಣೆ ಖ್ಹಾರು ಯೇಸುನಖ್ಹಾಜೆ ಜ಼ಪಿರ‍್ಹೂಥು. ತದೆ ಸಬಾಮಂದಿರ್‌ನೊ ಅದಿಕಾರಿ ಹುಯಿರ‍್ಹೊಥೋತೆ ಯಾಯಿರ ಕರಿ ನಾಮ್ನೊ ಏಕ್‌ ಜ಼ಣಾನೆ ಹಿಜ್ಜಾ಼ ಆಯಿನ್, ಯೇಸುನ ಗೋಡಾಪರ್ ಪಡೀನ್, ಇನ ಘರೆ ಆವ್ಣುಕರಿ ಯೇಸುನ ಗಿಂಗೈಲಿದೊ. ಶನಕತೊ, ಭಾರ ವರಖ್ಹ್‌ನಿ ಹುಯಿರ‍್ಹಿಥೀತೆ, ಇನಿ ಏಕ್‌ನಿ-ಏಕ್‌ ಛೋ಼ರಿ, ಮರಾನಿ ಹಾಲ್‌ಮ ಥಿ.
ಯೇಸು ಯಾಯಿರನ ಘರೆ ವಳ್ಯೊಜಾ಼ತೊಥೋತೆ ತದೆ, ಅದ್ಮಿನಿ ಭೀಡ್ ಇನ ಅಶ್‌ಪಿಶ್‍ ಭರೈನ್ ಆಯು. ಯೋ ಭೀಡ್‌ಮ ಭಾರ ವರಖ್ಹ್‌ಥು, ಮುಟ್ನು ರೋಗ್‌ಥೀತೆ ಏಕ್‌ ತಯೇಡ ಥಿ. ಯೋ ಇನಾಕನ ಥೂತೆಖ್ಹಾರುಸ್ ಖರ್ಚಿ ಕರಿತೋಬಿ, ಕೋಣ್‌ಬಿ ಇನ ಅಛ್ಛು಼ ಕೊಕರ‍್ಯುನಿ. ತದೆ ಯೋ ತಯೇಡ ಝೂ಼ಂಡ್‌ಮ ಯೇಸುನ ಪೀಠೇಥು ಐನ್, ಇನ ಲುಂಗ್ಡಾನ ಕನಾರೀನ ಛೀಮಿ. ಛೀಮ್ತಾಸ್ನ ಇನ ಲ್ಹೋಯಿ ಝ಼ರಾನು ಭೀರಿಗಯು. ತದೆ ಯೇಸುನೆ, “ಮನ ಛೀಮ್ಯೂತೆ ಕೋಣ್?” ಕರಿ ಪುಛಾ಼ಯೊ.
ತಮಾಮ್‌ ಅದ್ಮಿನೆ ‘ಮೇ ಕಾಹೆ, ಮೇ ಕಾಹೆ’ ಕರಿ ಬೋಲ್ತಾನ, ಪೇತ್ರನೆ ಯೇಸುನ, “ಗುರು, ಅದ್ಮಿನಿ ಭೀಡ್ ತಾರ ಅಶ್‌ಪಿಶ್‍ ಭರೈನ್, ತಾರಪರ್ ಪಡುಕರಾಸ್‌ನಿ”5 ಕರಿ ಬೋಲ್ಯೊ
ತೋಬಿ ಯೇಸುನೆ, “ಕೋಣ್‌ಕಿ ಏಕ್‌ ಜ಼ಣು ಮನ ಛೀಮ್ಯು. ಮಾರೇಥಿ ಶಕತ್ ಗೈತೆ ಮನ ಮಾಲುಮ್‌ಪಡ್ಯು” ಕರಿ ಬೋಲಾಖ್ಹತರ್, ಯೋ ತಯೇಡ ಅಜು಼ ಮೇ ಲಪಿರ‍್ಹಾವಾನ ಉಶೆಕೊಯ್ನಿ ಕರಿ ಮಾಲುಮ್ ಕರಿಲೀನ್, ಕಾಪ್ತಿಹುಯಿನ್‌ ಐನ್ ಯೇಸುನ ಗೋಡಾಪರ್ ಪಡೀನ್, ಇನೆ ಶನಖ್ಹಾಜೆ ಛೀಮೀತೆ ಕರಿ ಅಖ್ಖಾನ ಖ್ಹಾಮೆ ಬೋಲಿ. ಎತ್ರೇಸ್ ಕಾಹೆತೆ ಛೀಮ್ತಾಸ್ನ ಇನ ಅಛ್ಛು಼ ಹುಯಿಗಯು ಕರಿ ಬೋಲಿ. ತದೆ ಯೇಸುನೆ ಇನ, “ಛೋ಼ರಿ, ತಾರಿ ವಿಶ್ವಾಸ್‌ಥೀಸ್‌ ತುನ ಅಛ್ಛು಼ಹುಯು. ಶಾಂತಿಥಿ ಜಾ಼” ಕರಿ ಬೋಲ್ಯೊ.
ಯೇಸು ಆ ವಾತೆ ಬೋಲುಕರಾನಿ ವಖ್ಹತ್‌ಮ, ಸಬೆ ಭರಾವಾನು ಮಂದಿರ್‌ನು ಅದಿಕಾರಿ ಭಣಿವಾಳು ಏಕ್‌ ಜ಼ಣು ಐನ್ ಯಾಯಿರನ, “ತಾರಿ ಛೋ಼ರಿ ಮರಿಗೈ, ಅಜು಼ ಗುರುನ ಖ್ಹತಾವ್ ನಕೊ” ಕರಿ ಬೋಲ್ಯು.
ಕತೋಬಿ ಯೇಸುನೆ ಅನ ಖ್ಹಮ್‌ಜಿನ್‌, ಯಾಯಿರನ, “ಡರ್‌ನಕೊ, ಖಲಿ ವಿಶ್ವಾಸ್ ರ‍್ಹವಾದೆ, ಇನ ಅಛ್ಛು಼ ಉಶೆ” ಕರಿ ಬೋಲ್ಯೊ.
ಯೇಸು ಯೋ ಘರ್‌ಕನ ಆವಾದಿನ್ ಪೇತ್ರ, ಯೋಹಾನ, ಯಾಕೋಬ್ ಅಜು಼ ಯೋ ಛೋ಼ಕ್ರಿನ ಆಯ-ಬಾ ಇವ್ಣುನ ಮ್ಹೆಂದಿನ್, ಕಿನಾಬಿ ಇನಾಕೇಡೆ ಮಹಿ ಕೊ ಆವಾದಿದೋನಿ. ಹಿಜ್ಜಾ಼ ಥೂತೆ ತಮಾಮ್‌ ಅದ್ಮಿ ಯೋ ಛೋ಼ಕ್ರಿನಖ್ಹಾಜೆ ರೊವ್‌ತುಹುಯಿನ್, ಛಾ಼ತಿ ಕೂಟುಕರ್ತೂಥೂ. ಅನ ದೇಖಿನ್ ಯೇಸುನೆ, “ನಕೊ ರೋವೊ, ಛೋ಼ಕ್ರಿ ಮರಿಕೊಯ್ನಿ, ಖ್ಹುತೀಸ್!” ಕರಿ ಬೋಲ್ಯೊ.
ಛೋ಼ಕ್ರಿ ಮರಿಗೈ ಕರಿ ಇವ್ಣುನ ಮಾಲುಮ್‍ಥೂತೆ ಇನಖ್ಹಾಜೆ, ಇವ್ಣೆ ಖ್ಹಾರೂಸ್ ಯೇಸುನ ದೇಖಿನ್ ಹಾಶ್ಯು. ಕತೋಬಿ ಯೇಸುನೆ ಯೋ ಛೋ಼ಕ್ರಿನೊ ಹಾತ್ ಧರೀನ್, “ಪಪ್ಪಾ, ಉಪ್ಪರ್ ಉಟ್!” ಕರಿ ಬೋಲ್ಯೊ. ತದ್‌ನು-ತದ್ದೇಸ್ ಇನ ಜಾನ್‌ಆಯು. ಯೋ ಉಠೀನ್ ಭೀರಿಗೈ. ತದೆ ಯೇಸುನೆ ಇವ್ಣುನ, “ಅನ ಖಾವಾನ ಶಾತ್‌ತೋಬಿ ದೆವೊ” ಕರಿ ಬೋಲ್ಯೊ. ಯೋ ಛೋ಼ಕ್ರಿನ ಆಯ-ಬಾನೆ ಆಶ್ಚರ್ಯಖಾದು, ಕತೋಬಿ ಯೇಸುನೆ ಅನಿ ಬಾರೇಮ ಕಿನಾಬಿ ನಾ ಬೋಲ್‌ನು ಕರಿ ಇವ್ಣುನ ಹುಕುಮ್ ದಿದೊ
Source notes (5)
- Footnote ಸೇವೆ ಕರ್ತಿಥಿಯೆ ಕರಿ ಮತ್‌ಲಬ್.
- Footnote ಖ್ಹಲ್‌ಗೈನ್ ಕರೀಬಿ ಬೋಲಾಸ್.
- Footnote ತಪಾಳ್‌ ಕರೀಬಿ ಬೋಲಾಸ್
- Footnote ಸ್ವಾಗತ್ ಕರ‍್ಯು ಕರಿ ಮತ್‌ಲಬ್
- Footnote ಕತೊ, ತುನ ಛೀಮುಕರಾಸ್‌ನಿ ನತರ್‌ಕಿ ತುನ ಧಕ್ಕೊ ದೆವ್‍ಕರಾಸ್‌ನಿ ಕರೀಬಿ ಹುವಾಸ್
ದೇವ್ನಿ ಖ್ಹಾಚಿ ವಚನ್. Copyright © 2023 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.