ಲೂಕ

ಲೂಕನು ಬರೆದ ಯೇಸುವಿನ ಸುವಾರ್ತೆ

ಲೂಕನೆ ಲೀಖ್ಯೋತೆ ಯೇಸುನಿ ಅಛ್ಛಿ ಸಮಾಚಾರ್‌

ಮಾಲುಮ್ ಕರಾನು

ಲೂಕನೆ ಲೀಖ್ಯೋತೆ ಸುವಾರ್ತೆ ನವಿ ಒಪ್ಪಂದಾಮ ಛಾ಼ತೆ ಯೇಸುಕ್ರಿಸ್ತನು ಜಿವ್ಣನಿಬಾರೇಮ ಲೀಖೈರುತೆ ಚಾರ್ ಪುಸ್ತಕ್‌ಮ ಆ ಪುಸ್ತಕಾಬಿ ಏಕ್‍ ಹುಯಿರ‍್ಹುಸ್. ಆ ಹರೇಕ್ ಪುಸ್ತಕಾನಾಬಿ ಸುವಾರ್ತೆಕರಿ ಬೋಲಸ್. ಆನಿಮತ್ಲಬ್ ‘ಅಛ್ಛಿ ಸಮಾಚಾರ್’.

ಆ ಅಖ್ಖು ಯೇಸುನಿ ಮರಣ್ಣಿ ಬಾದ್‌ಮ ಮತ್ತಾಯ, ಮಾರ್ಕ, ಲೂಕ ಅಜು಼ ಯೋಹಾನ ಇವ್ಣೇಥಿ ಲೀಖೈರ‍್ಹುಸ್. ಲೂಕನೆ ಖಲಿ ಯೇಸುನಿ ಜಿವ್ಣಾನಿ ಖೇಣಿನ ಎತ್ರೇಸ್ ಲೀಖಿರಾಖ್ಯೊಕೊಯ್ನಿ, ಕತೋಬಿ ಇನೆ ಯೇಸುನಿ ಮರಣ್ಣ ಅಜು಼ ಮರೀನ್ ಜಿವ್‍ಯೊತೆ ಇನ ಬಾದ್‌ಮ ಇನ ಶಿಷ್ಯರ್‌ಖ್ಹಾರು ಕರ‍್ಯುತೆ ಥೋಡಿ ಸಮಾಚಾರ‍್ನ ಬಾರೇಮ ಲೀಖಿರಾಖ್ಯುಸ್. ಯೋ ಪುಸ್ತಕಾನು ನಾಮ್ ಅಪೊಸ್ತಲರ‍್ನು ಕಾಮ್‍ಅಖ್ಖು.

ಲೂಕನೆ ಲೀಖ್ಯೋತೆ ಸುವಾರ್ತೆ ಯೋಸ್‍ ವೇಳ್ಮ ಲೀಖೈರುಸ್ಕರಿ ಬೋಲಾನು ಖ್ಹಾಚು಼ಕೊಯ್ನಿ. ಕತೋಬಿ ಘಣೇಥಿ ಘಣು ಲೀಖಾಪಟ್‌ವಾಳು ಕ್ರಿಸ್ತಪೈದ ಹುಯಿನ್ 70 ವರಖ್ಹ್‌ನ ಬಾದ್‌ಮ ಲೀಖೈರು ಉಷೆಕರಿ ಮಾನಿಲೇಸ್.

ಲೀಖಾಪಟ್‍ವಾಳೊ ಲೂಕ ಏಕ್‍ ಪಂಡಿತ್ ಹುಯಿರ‍್ಹೋಥೊ. ಇನೆ ಲೀಖ್ಯೋತೆ ಪರಕ್ಮ ಅಜು಼ ಲಿಖಾಪಟ್‍ನಿ ವಾತೆ ಯೋ ಏಕ್‌ ಲೀಖಾಪಟ್‍ವಾಳೊ ಹುಯಿರ‍್ಹೊಥೊಕರಿ ವತಾಳಿಲೇಸ್. ಲೂಕನೆ ಅಜೂ಼ಬಿ ಯೇಸುನಿ ಜಿವ್ಣನಿಬಾರೇಮ ಬರೋಬರ್‌ಥಿ ಲೀಖಾನ ಕೋಶಿಶ್ ಕರಿರಾಖ್ಯೋಸ್ ತದೆ ಚಾ಼ಲಿತೆಅಖ್ಖು ಚಾಲ್ಯುಕಿಮ್ಕಿ ತಿಮ್ಮಸ್ ಬೋಲಿರಾಖ್ಯೊಸ್ ಇನಖ್ಹಾಜೆ ಫಡವಾಳನ ಅನೇಥಿ ಫಾಯಿದೊ ಹುವಾನಿಘೊಣಿ ಕರ‍್ಯೊ.

ಯೋ ಯೆಹೂದ್ಯ ಹುಯಿರ‍್ಹೊಥೊಕೊಯ್ನಿ

ಲೂಕನೆ ಲೀಖ್ಯೋತೆ ಸುವಾರ್ತೆ ಮತ್ತಾಯ ಅಜು಼ ಮಾರ್ಕನೆ ಲೀಖ್ಯೋತೆ ಸುವಾರ್ತೆನಿಘೊಣಿಸ್ ಛಾ಼, ಶನಕತೊ ಯೋ ಅಖ್ಖು ಎಕ್ಕಸ್‍ಪರಕ್ಮ ಛೋ಼ಡಿ ಬೋಲೈರ‍್ಹುಸ್. ಆ ತೀನ್ ಪುಸ್ತಕಮಾಬಿ ಲೂಕನೆ ಬ್ಯಾಪ್ತಿಸ್ಮ ದ್ಯವಾಳನಿ ಯೋಹಾನನಿ ಪೈದಾಖ್ಹ್‌ನಿ ಬಾರೇಮ ಬೋಲಿರಾಖ್ಯುಸ್.

ಕಾಡಿದೇಖೊ

1. ಅದ್ಯಾಯ 1-4 ಲೂಕನೆ ಇನಿ ಸುವಾರ್ತೆನಿ ಪರಿಚಯ್ ಕರಿರಾಖ್ಯೊಸ್. ಅಜು಼ ಯೋ ಶನಖ್ಹಾಜೆ ಲೀಖಿರಾಖ್ಯೊಸ್‌ಕರಿ ಬೋಲಾನು ಛೋ಼ಡಿ ವತಾಳಿರಾಖ್ಯೊಸ್.

2. ಇನಕೇಡೆಥು ಇನೆ ಯೇಸು ಪೈದಹುಯೊತೆ ಅಜು಼ ಯೋ ಸೇವೆನಖ್ಹಾಜೆ ಕಿಮ್ ತಯಾರ್ ಹುಯೊಕರಿ ಬೋಲಾನು ಲೀಖಿರಾಖ್ಯೊಸ್.

3. ಉಬ್‍ರ‍್ಯುತೆ ಸುವಾರ್ತೆಮ ಹೈರೂತೆ ಘಣು ಮೋಟು ಭಾಗ್‌ ಹುಯಿರ‍್ಹುಸ್. ಲೂಕನೆ ಯೇಸು ಕರ‍್ಯೊತೆ ಕಾಮ್ನಿಬಾರೇಮ ಬೋಲಿರಾಖ್ಯೊಸ್. ವಿಶೇಷ್‌ಥಿ ಕರ‍್ಯೊತೆ ಕಾಮ್‍ಅಖ್ಖು ಅಜು಼ ಇನಿ ಬೋಧನೆನಿ ಬಾರೇಮ ಬೋಲಸ್.

4. ಖ್ಹರ್ತಿಮ ಕಡೇಶೆನಿ ಬೇನಿ ಅಧ್ಯಾಯಮ. ಇನೆ ಯೇಸು ಕಿಮ್ ಮರ‍್ಯೊತೆ, ಮಖ್ಹಾಣ್ಯುಹುಯ್ಯೊತೆ ಅಜು಼ ಮರಣ್‍ಥಿ ಕಿಮ್ ಆಯೊಕರಿ ಬೋಲಾನು ಇನೆ ಬೋಲಿರಾಖ್ಯೊಸ್.