ದೇವ್ನಿ ಖ್ಹಾಚಿ ವಚನ್
ಲೂಕ 15
ಗುಮೈಗಯೂತೆ ಮೇಂಢಾನಿ ಬಾರೇಮ
(ಮತ್ತಾಯ 18:12-14)
ಏಕ್‌ ದನ್ನೆ ಯೇಸು ಬೋಲಾತೆ ವಾತೇನ ಖ್ಹಮ್‌ಜಾ಼ನಖ್ಹಾಜೆ, ಘಣು ಅದ್ಮಿ ಶುಂಕ ವಶೂಲ್ ಕರಾವಾಳು ಅಜು಼ ಪಾಪಿಖ್ಹಾರು ಇನಾಕನ ಆಯು. ಅನ ದೇಖಿನ್ ಫರಿಸಾಯರ್ ಅಜು಼ ಮೋಶೇನು ಧರ್ಮಶಾಸ್ತ್ರ ಶಿಕಾಡವಾಳು ಶಾಸ್ತ್ರಿಯೇನೆ, “ಆ ಪಾಪಿ ಖ್ಹಾರಾನ ಜೋ಼ಡೆ ಮಳಿನ್, ಇವ್ಣ ಜೋ಼ಡೆ ಖಾಣು ಖಾಸ್ನಿ” ಕರಿ ಯೇಸುಪರ್ ಮಶ್ಲಾ ಮಾರ‍್ಯು. ತದೆ ಯೇಸುನೆ ಇವ್ಣುನ ಏಕ್‌ ಮತ್ಲಬ್‌ನಿ ಖೇಣಿನ ಬೋಲ್ಯೊ.
ಯೋ ಶಾತ್‌ಕತೊ, “ತುಮಾರಾಮ ಕೋಣ್‌ತೋಬಿ ಏಕ್‌ ಜ಼ಣು, ಇನಾಕನ ಖ್ಹೋ ಮೇಂಢುರ‍್ಹೀನ್, ಇನಾಮಾನು ಏಕ್‌ ಗುಮೈಗಯೂತೆ, ಯೋ ನೌ ಉಪ್ಪರ್ ಖ್ಹಡ್‌ಚಾರೀಖ್ಹ್‌ನ ಝೂ಼ಂಡ್‌‍ಮಾಸ್ ಮ್ಹೆಂದಿನ್, ಗುಮೈಗಯೂತೆ ಯೋ ಮೇಂಢು ಮಳಾತೋಡಿ, ಇನ ಢೂಂಡಿನ್ ಜಾ಼ಯಿಕೊಯ್ನಿಕಿ ಶು? ಯೋ ಮಳಾನ ಬಾದ್‌ಮ, ಯೋ ಅದ್ಮಿ ಖ್ಹುಶಿ ಕರ್ತುಹುಯಿನ್, ಮೇಂಢಾನ ಇನ ಖಾಂದಪರ್ ಮ್ಹೇಲಿಲೀನ್, ಘರೆಆಯಿನ್, ಇನಖ್ಹಾರ ದೋಸ್ತ್‌ನ ಅಜು಼ ಖನ್ನೆವಾಳಾನ ಎಕ್ಟುಕರಿನ್, ‘ಗುಮೈಗಯುಥೂತೆ ಯೋ ಮೇಂಢು ಮಳ್ಯು, ಮಾರ ಜೋ಼ಡೆ ಖ್ಹುಶಿಕರೊ’ ಕರಿ ಇವ್ಣುನ ಬೋಲಾಕೊಯ್ನಿಕಿ ಶು? ಇಮ್ಮಸ್, ದೇವ್‌ಭಣಿ ಫರಾನ ಮನ್‌ಕೊಂತೆ, ನೌ ಉಪ್ಪರ್ ಖ್ಹಡ್‌ಚಾರೀಖ್ಹ್ ನೀತಿವಾಳ ಅದ್ಮಿಥೀಬಿ, ದೇವ್‌ಭಣಿ ಫರಾಸ್ತೆ ಏಕ್‌ ಪಾಪಿನಿ ಬಾರೇಮ, ಪರ್‌ಲೋಕ್‌ಮ ಘಣು ಖ್ಹುಶಿಹುವ್ವಾಸ್ ಕರಿ ಮೇ ತುಮೂನ ಬೋಲುಸ್”.
ಗುಮೈಗಯೂತೆ ಬಿಲ್ಲಾನಿ ಬಾರೇಮ
ಏಕ್‌ ತಯೇಡಾಕನ ದಖ್ಹ್‌ ರೂಪಾನು1 ಬಿಲ್ಲು ಛಾ಼ ಕರಿ ಸೋಚೊ. ಇನಾಮಾನು ಏಕ್‌ ಬಿಲ್ಲಾನ ಯೋ ಗುಮೈಲಿದಿತೊ ಯೋ ಶಾತ್‌ ಕರ್ಶೆ? ಯೋ ತಯೇಡ ದೀವೊ ಲಗಾಡಿನ್, ಹಿಡಿ ಘರ್‌ನಾಸ್ ಝಾ಼ಡೀನ್, ಗುಮೈಗಯೂತೆ ಯೋ ಬಿಲ್ಲು ಮಳಾತೋಡಿ, ಹೊಷಾರ್‌ಥಿ ಢೂಂಡಾ ಕೊಯ್ನಿಕಿ ಶು? ಮಳಾನ ಬಾದ್‌ಮ, ಇನಿ ದೋಸ್‌ತಿಯೆ ಖ್ಹಾರಿನ ಎಕ್ಟು ಕರಿಲೀನ್, ‘ಗುಮೈಗಯೂತೆ ಯೋ ಮಾರು ಬಿಲ್ಲು ಮಳ್ಯು, ಮಾರ ಜೋ಼ಡೆ ಖ್ಹುಶಿ ಕರೊ’ ಕರಿ ಬೋಲಾಕೊಯ್ನಿಕಿ ಶು? ಅಮ್ಮಸ್, ದೇವ್ ಭಣಿ ಫರಾಸ್ತೆ ಏಕ್‌ ಪಾಪಿನಿ ಬಾರೇಮ, ದೇವ್‌ನು ದೂತರ್ ಖ್ಹಾರು ಖ್ಹುಶಿಕರಸ್” ಕರಿ ಬೋಲ್ಯೊ.
ಗುಮೈಗಯೋತೆ ಛಿಯ್ಯಾನಿ ಬಾರೇಮ
ಅನ ಬಾದ್‌ಮ ಯೇಸುನೆ ಅಮ್ ಬೋಲ್ಯೊ, “ಏಕ್‌ ಅದ್ಮಿನ ಬೇ ಛಿಯ್ಯಾ ಥಾ. ನ್ಹಾನೊ ಛಿಯ್ಯಾನೆ ಇನ ಬಾನ, ‘ಬಾ, ಆಸ್ತಿಮ ಮನ ಆವ್ಣುತೆ ಭಾಗ್ನ ಹಮ್ಕೇಸ್ ದೇ’ ಕರಿ ಬೋಲ್ಯೊ. ತದೆ ಬಾನೆ ಇನಿ ಆಸ್ತಿನ ಭೇ ಛಿಯ್ಯಾನ ವಾಟ ಪಾಡಿದಿದೊ. ಥೋಡ ದನ್ನ ಬಾದ್‌ಮ, ಯೋ ನ್ಹಾನ ಛಿಯ್ಯಾನೆ ಇನಥೂತೆ ಖ್ಹಾರೂಸ್ ವೇಚಿನ್, ಪೈಶಾ ಕರಿಲೀನ್, ದೂರ್‌ಲ್ಯಾ ದೇಖ್ಹ್‌ನ ಜೈ಼ನ್. ಹಿಜ್ಜಾ಼ ಇನ ಮನ್ ಆವಾತೆ ಇಮ್‌ ಜಿವ್ಣುಕರಿನ್, ಇನಿ ಶೊತ್ನ ಗುಮೈಲಿದೊ. ಅಮ್ ಯೋ ಖ್ಹಾರೂಸ್ ಬರ್ಬಾತ್ ಕರಿಲ್ಯವಾನ ಬಾದ್‌ಮ, ಯೋ ದೇಖ್ಹ್‌ಮ ಕಾಳ್ದುಕಾಳ್ ಐನ್, ಶಾತಸ್‌ಕೊಂತೆ ಇಮ್ನಿ ಹಾಲ್‌ ಹುಯಿಗೈ. ತದೆ ಯೋ ಜೈ಼ನ್, ಯೋ ದೇಖ್ಹ್‌ನ ಏಕ್‌ ಅದ್ಮಿಕನ ಕಾಮ್ಮ ಪೇಶಿಗಯೊ. ಯೋ ಅದ್ಮಿ ಇನ ಡೂಕರ್‌ ಚ಼ರಾವಾನಟೆಕೆ, ಇನ ಖೇತರ್‌ಮ ಮೋಕ್‌ಲ್ಯೊ. ಅಮ್ ರ‍್ಹಾವಾನಿ ವಖ್ಹತ್‌ಮ, ಡೂಕರ್‌ ಖಾಸ್ತೆ ಫಳಿಯೆ ಖೈನ್‌ತೋಬಿ, ಪೇಟ್ ಭರಿಲೇವ್ಣು ಕರಿ ಯೋ ಆಖ್ಹ್ ಕರ‍್ಯೊತೋಬಿ, ಕೋಣ್‌ಬಿ ಇನ ಕೋ ದಿದೂನಿ. ತದೆ ಇನ ಅಕ್ಕಲ್ ಅಯಿನ್, ‘ಮಾರ ಬಾಕನ ಕೈಯೆಕ್ಕಿ ಕೂಲಿಆಳ್‍ನ ಖೈನ್, ಬಶ್‌ಹುವಾಯೆತ್ರೆ ಖಾಣು ಛಾ಼. ಕತೋಬಿ ಮೇತೊ ಹಜ಼್ಜ ಭುಕ್ಯೊ ಮರುಕರೂಸ್!’ ಮೇ ಉಠೀನ್, ಮಾರ ಬಾಕನ ಜೈ಼ನ್, ಇನ ‘ಬಾ, ಪರ್‌ಲೋಕ್‌ನಿ ವಿರೋದ್ ಅಜು಼ ತಾರಿ ವಿರೋದ್ ಪಾಪ್ ಕರಿರಾಖ್ಯೋಸ್. ಅಜು಼ ಖ್ಹಾಮ್ಣೆ ಮೇ ತಾರೊ ಛಿಯ್ಯೊ ಹುಯಿರ‍್ಹವಾನ ಲ್ಹಾಯೇಕ್ ಕೊಯ್ನಿ, ತಾರ ಕೂಲಿಆಳ್‍ಮ ಏಕ್‌ನಿಘೋಣಿ ಮನ ದೇಕ್’ ಕರಿ ಸೋಚಿಲಿದೊ. ತದೆ ಯೋ ಉಠೀನ್, ಪಾಛು಼ ಇನ ಬಾಕನ ಗಯೊ.
ಯೋ ಅಜೂ಼ಬಿ ದೂರ್ ರ‍್ಹವಾನಿಸ್ ವಖ್ಹತ್‌ಮ, ಇನೊ ಬಾ ಇನ ದೇಖಿನ್, ಗೋರ್‌ಖೈನ್, ನಾಶಿಆಯಿನ್‌, ಇನ ಬಥೈನ್ ಬುಚ್ಚಾ಼ ದಿದೊ. ಕತೋಬಿ ಛಿಯ್ಯಾನೆ ಇನ, ‘ಬಾ, ಪರ್‌ಲೋಕ್ನ ವಿರೋದ್ ಅಜು಼ ತಾರ ಖ್ಹಾಮ್ಣೆಬಿ ಪಾಪ್ ಕರಿರಾಖ್ಯೋಸ್. ಅಜು಼ ತಾರ ಖ್ಹಾಮ್ಣೆ ಮೇ ಛಿಯ್ಯೊ ಹುಯಿರ‍್ಹವಾನ ಲ್ಹಾಯೇಕ್ ಕೊಯ್ನಿ’ ಕರಿ ಬೋಲ್ಯೊ. ಕತೋಬಿ ಬಾನೆ ಇನ ಆಳ್‌ನ, ‘ಫಟ್‌ ಕರಿ ಘಣ ಅಛ಼್ಛ ಝ಼ಗ್ಗಾನ ಲಯಿನ್ ಅನ ಪೇರ‍್ಹಾವೊ. ಅನಿ ಅಂಗ್‌ಳೀಮ ಅಂಘೂಟಿ ಅಜು಼ ಗೋಡಾಮ ಖೋಖ್ಹ್‌ಡಾ ಘಾಲೊ. ಅಜು಼ ಪಲೈಹುಯೊ ಕೆಲ್ಡಾನ ಲೈನ್‌ ರ‍್ಹೇಖ್ಹೊ, ಮಿಝ಼್‌ವಾನ್ ಪಿಕೈನ್ ಖ್ಹುಶಿ ಕರಿಯೆ! ಆ ಮಾರೊ ಛಿಯ್ಯೊ ಮರಿಗಯೋಥೊ, ಪಾಛೊ಼ ಬಚಿ ಐರ‍್ಹೋಸ್; ಗುಮೈಗಯೋಥೊ ಹಮ್ಕೆ ಮಳಿರ‍್ಹೋಸ್‌’ ಕರಿ ಬೋಲ್ಯೊ. ತದೆ ಇವ್ಣೆ ಖ್ಹುಶಿ ಕರಾಲಗ್ಯು.
ಯೋಸ್ ವಖ್ಹತ್‌ಮ, ಇನೊ ಮೋಟೊ ಛಿಯ್ಯೊ ಖೇತರ್‌ಮ ಥೊ. ಯೋ ಘರ್‌ನ ಖನ್ನೆ-ಖನ್ನೆ ಆವಾನಿ ವಖ್ಹತ್‌ಮ, ವಾಜು಼ ವಜಾ಼ಡಿನ್, ಖೇಲ್‌ಕೂದ್ ಕರುಕರಾತೆ ಅವಾಜ಼್‌ನ ಖ್ಹಮ್‌ಜ್ಯೊ. ತದೆ ಇನೆ ಆಳ್‌ಮ ಏಕ್‌ ಜ಼ಣಾನ ಇನಾಕನ ಬುಲೈನ್, ‘ಆ ಶಾತ್‌ ಚಾ಼ಲುಕರಾಸ್ತೆ’? ಕರಿ ಪುಛಾ಼ಯೊ. ತದೆ ಆಳ್‌ನೆ ಇನ, ‘ತಾರೊ ನ್ಹಾನೊ ಭೈ ಪಾಛು಼ಫರಿ ಐರ‍್ಹೋಸ್. ಯೋ ಜ಼ತನ್‌ಥಿ ಆಯೋತೆ ಇನಖ್ಹಾಜೆ, ತಾರ ಬಾನೆ, ಯೋ ಪಲ್ಯುಹುಯು ಕೆಲ್ಡಾನ ರ‍್ಹೇಖ್ಹಾಯೊ’ ಕರಿ ಬೋಲ್ಯೊ.
ಅನ ಖ್ಹಮ್‌ಜಿನ್‌, ಇನ ಮೋಟ ಭೈನೆ ಇರಾದೊ ಖೈನ್, ಘರ್‌ನ ಮಹಿ ಗಯೊಕೊಯ್ನಿ; ತದೆ ಇನೊ ಬಾ ಭಾರ್‌ಆಯಿನ್, ‘ಮಹಿ ಆವ್’ ಕರಿ ಇನ ಗಿಂಗೈಲಿದೊ. ಕತೋಬಿ ಇನೆ ಇನ ಬಾನ, ‘ದೇಕ್, ಅತ್ರಾವರಖ್ಹ್ ಮೇ ಆಳ್‌ನಿಮತ್‌, ತಾರಿ ಚಾ಼ಕ್ರಿ ಕರ‍್ಯೊ, ಅಜು಼ ತಾರಿ ಏಕ್‌ ವಾತೆನಾಬಿ ಝಿಟ್ಕಾರ‍್ಯೊ ಕೊಯ್ನಿ. ಇಮ್‌ ರ‍್ಹಯೊತೋಬಿ, ಮೇ ಮಾರ ದೋಸ್ತ್‌ಖ್ಹಾರಾನ ಜೋ಼ಡೆ ಖ್ಹುಶಿ ಕರಾನ ಏಕ್‌ ಬೋಕ್‍ಡೋಬಿ ತುನೆ ದಿದೊಕೊಯ್ನಿ. ಕತೋಬಿ ಶೂಳೆಖ್ಹಾರಿನ ಭಾಂದಿಲೀನ್, ತಾರಿ ಆಸ್ತಿನ ಝ಼ಡ್‌ಪಿನ್ ಖಾದೋತೆ, ಆ ತಾರೊ ಛಿಯ್ಯೊ, ಆವ್ತಾನ, ಪಲ್ಯಹುಯ ಕೆಲ್ಡಾನ ಇನಖ್ಹಾಜೆ ರ‍್ಹೇಖ್ಹಾಯೋನಿ’ ಕರಿ ಜವಾಬ್‌ ದಿದೊ. ತದೆ ಇನ ಬಾನೆ, ‘ಛಿಯ್ಯಾ, ತೂ ಕದೇಬಿ ಮಾರ ಜೋ಼ಡೆ ಥೊ, ಅಜು಼ ಮಾರಕನ ಛಾ಼ತೆ ಖ್ಹಾರು ತಾರುಸ್‌. ತೋಬಿ ಖ್ಹುಶಿ ಕರಾನು, ಶಂತೋಖ್ಹ್‌ ಕರಾನು ಬರಾಬರಸ್‌. ಶನಕತೊ ಆ ತಾರೊ ಭೈ ಮರಿಗಯೋಥೊ ಪಾಛೊ಼ ಜಿವ್ತೊಹುಯಿನ್ ಐರ‍್ಹೋಸ್, ಗುಮೈ ಗಯೋಥೊ ಮಳಿರ‍್ಹೋಸ್‌” ಕರಿ ಬೋಲ್ಯೊ.
Source notes (1)
- Footnote ಆ ರೂಪಾಥಿ ಬಣೈಹುಯು ಬಿಲ್ಲು.
ದೇವ್ನಿ ಖ್ಹಾಚಿ ವಚನ್. Copyright © 2023 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.