ದೇವ್ನಿ ಖ್ಹಾಚಿ ವಚನ್
ಲೂಕ 4
ಶೈತಾನ್ನೆ ಯೇಸುನ ಪಾಪ್‌ಮ ಪಖ್ಹಾವಾನ ದೇಖ್ಯೋತೆ
(ಮತ್ತಾಯ 4:1-11; ಮಾರ್ಕ 1:12-13)
ಯೇಸು ಪವಿತ್ರಾತ್ಮಾಥಿ ಭರೈನ್, ಯೊರ್ದನ್‌ ನದ್ದಿಥು ಪಾಛೊ಼ಫರಿನ್ ಆಯೊ. ತದೆ ದೇವ್‌ನು ಆತ್ಮಾನೆ ಇನ ಉಜ್ಜಾ಼ಡಿ ಝ಼ಗೋಮ ಚ಼ಲಾಯೊ. ಹಿಜ್ಜಾ಼ ಶೈತಾನ್‌ಥಿ ಯೇಸು ಚಾ಼ಳಿಖ್ಹ್ ರೋಜ಼್‌ ಶೋದನೆಮ ಪಡ್ಯೊ. ಇನ ಪಾಪ್‌ಮ ಪಖ್ಹಾವಾನ ಕರ‍್ಯೊ; ಯೋ ದನೂಮ ಯೇಸುನೆ ಶಾತ್ಬಿ ಕೋ ಖಾದೋನಿ, ಇನಖ್ಹಾಜೆ ಯೋ ಖ್ಹಾರ ದನ್ ಖತಮ್ ಹುವಾನ ಬಾದ್‌ಮ ಇನ ಭುಕ್‌ಲಾಗ್ಯು.
ತದೆ ಶೈತಾನ್ನೆ ಯೇಸುನ, “ತೂ ದೇವ್‌ನೊ ಛಿಯ್ಯೊ ಉಶೇತೊ, ಆ ಬಂಡಾನ ರೋಟೊ ಹುವಾನಿಘೊಣಿ ಹುಕುಮ್‌ ದೇ” ಕರಿ ಬೋಲ್ಯೊ.
ಕತೋಬಿ ಯೇಸುನೆ, “ಅದ್ಮಿ ಖಲಿ ರೋಟೊ ಖಾವಾಥೀಸ್‌ ಕೋ ಬಚಾ಼ನಿ, ಕರಿ ಲೀಖೈರ‍್ಹುಸ್”1 ಕರಿ ಜವಾಬ್‌ ದಿದೊ.
ಅಜು಼ ಶೈತಾನ್ನೆ ಯೇಸುನ ಉಪ್ಪರ್ ಬುಲೈಲಿಜೈ಼ನ್, ಎಕ್ಕಸ್ ಘಡೀಮ ಜಗತ್‌ನು ಖ್ಹಾರಸ್ ರಾಜ್ಯನ ವತಾಳಿನ್, “ಮೇ ತುನ ಅನಿ ಖ್ಹಾರಿಸ್ ಅದಿಕಾರ್‌ನಾಬಿ, ಶನ್‌ಗಾರ್‌ನಾಬಿ ತುನ ದೆವುಸ್” ಕರಿ ಶೈತಾನ್ನೆ ಇನ ಬೋಲ್ಯೊ, “ಆ ಖ್ಹಾರು ಮಾರ ಹಾತ್‌ಮ ಛಾ಼, ಮೇ ಕಿನ ಹೋಣುಕತೋಬಿ ಆ ದಿಯ್ಯೆಜಾ಼ಯ್”. ತೂ ಮನ ಆಡ್‍ಪಡಿನ್ ಆರಾದನೆ2 ಕರ‍್ಯೋತೊ, ಆಖ್ಹಾರು ತಾರು ಉಶೆ” ಕರಿ ಬೋಲ್ಯೊ.
ತದೆ ಯೇಸುನೆ, “ತಾರೊ ದೇವ್ ಹುಯಿರ‍್ಹೋತೆ ಪ್ರಭುನ ಎಕ್ಕಸ್ ಜ಼ಣಾನ ಆರಾದನೆ ಕರ‍್ನು ಅಜು಼ ಸೇವೆ ಕರ‍್ನು ಕರಿ ಲೀಖೈರ‍್ಹೂಸ್‌ನಿ”3 ಕರಿ ಜವಾಬ್‌ ದಿದೊ.
ಅನ ಬಾದ್‌ಮ ಶೈತಾನ್ನೆ ಯೇಸುನ ಯೆರೂಸಲೇಮ್‌ನ ಬುಲೈಲಿಜೈ಼ನ್ ಮಂದಿರ್‌ನ ಉಪ್ಪರ್‌ಲಿ ಟೇಕ್‌ಡಿನಿ ಝ಼ಗೋಪರ್ ಭೀರಾಖಿನ್, “ತೂ ದೇವ್‌ನೊ ಛಿಯ್ಯೊ ಉಶೇತೊ ಹಜ್ಜಾ಼ಥೊ ಹೇಟ್ ಕೂದ್, ‘ದೇವ್ ತುನ ಬಚಾ಼ಡಾನಟೇಕೆ ಇನ ದೂತರ್‌ನ ಹುಕುಮ್‌ ದಿಶೆ, ತಾರ ಗೋಡೊ ಬಂಡಾನ ಠೋಕರ್ ನಾಲಗ್ನುತೆ ತಿಮ್‌ ಯೋ ತುನ ಹಾತ್‌ಮ ಪಾಡಿಲಿಶೆ. ಕರೀಬಿ ಪವಿತ್ರ ದಪ್ತರ್‌ಮ ಲೀಖೈರ‍್ಹೂಸ್‌ನಿ”4 ಕರಿ ಬೋಲ್ಯೊ.
ಕತೋಬಿ ಯೇಸುನೆ, “ತಾರೊ ದೇವ್ ಹುಯಿರ‍್ಹೋತೆ ಪ್ರಭುನ ತರೀಪ್‌ಶ ನಾ ಕರ‍್ನು ಕರೀಬಿ ಲೀಖೈರ‍್ಹೂಸ್‌ನಿ”5 ಕರಿ ಜವಾಬ್‌ ದಿದೊ.
ಶೈತಾನ್ ಯೇಸುನ ಖ್ಹಾರಿ ತರ‍್ಹಾನು ಶೋದನೆ ಕರಾನ ಬಾದ್‌ಮ, ಥೋಡಿ ವಖ್ಹತ್‌ನಖ್ಹಾಜೆ ಇನ ಮ್ಹೆಂದಿನ್ ಚ಼ಲೆಗಯೊ.
ಯೇಸು ಗಲಿಲಾಯಮ ಇನಿ ಸೇವೆ ಶುರುಕರ‍್ಯೋತೆ
(ಮತ್ತಾಯ 4:12-17; ಮಾರ್ಕ 1:14-15)
ಅನ ಬಾದ್‌ಮ ಯೇಸು ಪವಿತ್ರಾತ್ಮನಿ ಶಕತ್‍ಥಿ ಭರೈನ್, ಪಾಛೊ಼ಫರಿ ಗಲಿಲಾಯ ತಬರ್‌ಖಾನ ಗಯೊ. ಯೋ ತಬರ್‌ಖಾನು ಖ್ಹಾರಿ ಬಾಜು಼ಮ ಯೇಸುನಿ ಬಾರೇಮಾನು ಖಬರ್ ಫೈಲಿಗಯು. ಯೇಸು ಸಬೆ ಭರಾವಾನು ಮಂದಿರ್‌ಮ6 ಖ್ಹಾರು ಅಛ್ಛಿ ಖಬರ್‌ನ ಬೋಲಿದೆವಾಲಗ್ಯೊ, ಖ್ಹಾರುಸ್ ಅದ್ಮಿ ಇನ ಖ್ಹರಾಯು.
ನಜ಼ರೇತ್‌ವಾಳು ಯೇಸುನ ಝಿಟ್ಕಾರ‍್ಯುತೆ
(ಮತ್ತಾಯ 13:53-58; ಮಾರ್ಕ 6:1-6)
ಯೇಸು ಯೋ ಪಳ್ಯೋತೆ ಗಾಮ್‍ ಹುಯಿರ‍್ಹೂತೆ ನಜ಼ರೇತ್‌ನ ಆಯೊ. ಯೋ ಕರ್ತೊಥೋತೆ ಇಮ್ಮಸ್, ಸಬ್ಬತ್‌ ದನ್ಮ ಸಬೆ ಭರಾವಾನು ಮಂದಿರ್‌ಮ ಜೈ಼ನ್, ಪಢಾನಖ್ಹಾಜೆ ಉಠಿ ಭಿಯೊ. ತದೆ ಯೆಶಾಯ ಕರಿ ಪ್ರವಾದಿನು ದಪ್ತರ್‌ನಿ ಪುಂಗ್‍ಳೀನ ಯೇಸುನ ಹಾತ್‌ಮ ದಿದು. ಇನೆ ಯೋ ಪುಂಗ್‍ಳೀನ ಛೋ಼ಡಿನ್, ಲೀಖೈರ‍್ಹೂತೆ ಝ಼ಗೋನ ದೇಖಿನ್ ಪಢ್ಯೊ, ಯೋ ವಾತೆ ಶಾತ್‌ಕತೊ,
ಪ್ರಭುನು ಆತ್ಮ ಮಾರಪರ್ ಛಾ಼,
ಗರೀಬ್‌ನ ಸುವಾರ್ತೆ ಬೋಲಾನಟೇಕೆ ದೇವ್ನೆ ಮನ ಅಬಿಷೇಕ್ ಕರಿರಾಖ್ಯೋಸ್,
ಧರೈಗೂತೆ ಅದ್ಮಿನ, “ತುಮೆ ಛು಼ಟಿಗಯ ಕರಿ
ಅಜು಼ ಕಾಣಾವ್ನ, ತುಮುನ ಡೋಳ ದೆಖಾವ್‌ಶೆ’ ಕರಿ ಬೋಲಾನಟೇಕೆ,
ಅಜು಼ ಖ್ಹತಾವ್ಣಿಮ ಛಾ಼ತೆ ಇವ್ಣುನ ಛೋ಼ಡಾವನಟೇಕೆ,
ಪ್ರಭುನೆ ಇನ ಅದ್ಮಿನ ಬಚಾ಼ಡಾನಖ್ಹಾಜೆ ನೇಮ್‌ಶಾಯೋತೆ,
ವಖ್ಹತ್ ಐಗೈ ಕರಿ ಪ್ರಚಾರ್ ಕರಾನಟೇಕೆ ದೇವ್ನೆ ಮನ ಬೋಲಿ ಮೋಕ್ಲಿರಾಖ್ಯೊಸ್” ಕರಿ
ಪಢಾನ ಬಾದ್‌ಮ, ಯೋ ಪುಂಗ್‌ಳಿನ ಲಪೇಟಿನ್ ಸಬೆ ಭರಾವಾನು ಮಂದಿರ್‌ನ ಸೇವಕ್‌ನ ಹಾತ್‌ಮ ದೀನ್ ಬೇಶಿಗಯೊ. ಹಿಜ್ಜಾ಼ ಥೂತೆ ತಮಾಮ್‌ ಅದ್ಮಿನಿ ನಜ಼ರ್ ಯೇಸುಪರ್ ಥೂ. ತದೆ ಯೇಸುನೆ ಇವ್ಣುನ, “ಮೇ ಹಮ್ಕೆ ಪಢ್ಯೋತೆ ವಚನ್ನ ತುಮೆ ಖ್ಹಮ್‌ಜೂ಼ಕರ್ತಥಾತೆ ತದ್ದೇಸ್ ಯೋ ಪೂರಹುಯು” ಕರಿ ಬೋಲ್ಯೊ.
ತಮಾಮ್‌ ಅದ್ಮಿ ಇನ ಖ್ಹರಾವಲಗ್ಯು ಅಜು಼ ಇನ ಮ್ಹೋಡಾವಾಟೆ ನಿಕ್ಳಾತೆ ವಾರ್ಖ್ಹಾನಿ ವಾತೆನ ಖ್ಹಮ್‌ಜಿನ್‌ ಆಶ್ಚರ್ಯಖೈನ್, “ಆ ಯೋಸೇಫ್‌ನೊ ಛಿಯ್ಯೊ ಕಾಹೆಕಿ ಶು? ಕರಿ ವಾತೆ ಬೋಲಿಲಿದು.
ತದೆ ಇನೆ ಇವ್ಣುನ, “ತುಮೇತೊ, ವೈದ್ಯ7 ತಾರು ತೂ ಅಛ್ಛು಼ ಕರಿಲೆ’ ಕರಿ ಛಾ಼ತೆ ಮತ್ಲಬ್‌ನ ಬೋಲ್‌ಶು ಕರಿ ಮನ ಅಛ್ಛಿನಿತರ ಮಾಲುಮ್, ಅಜು಼ ಕಪೆರ್ನೌಮ್ಮ ತುಮೆ ಖ್ಹಮ್‍ಜ್ಯಾತೆ ಯೋಸ್, ಕಾಮ್ ಆ ತಾರ ಶೊಂತ್‌ ಗಾಮ್ಮಾಬಿ ಕರ್‌ ಕರಿ ಮನ ಬೋಲ್‌ಶು, ಕತೋಬಿ ಮೇ ತುಮೂನ ಖ್ಹಾಚ ಬೋಲುಸ್ಕಿ, ಖೆವ ಪ್ರವಾದಿನಾಬಿ ಶೊಂತ್‌ ಗಾಮ್‌ವಾಳು ಮಾನಕೊಯ್ನಿ.
ಮಾರಿ ವಾತೇನ ಖ್ಹಮ್‌ಜೊ಼: ಎಲೀಯನ ಹಗಾಮ್ಮ ತೀನ್ ವರಖ್ಹ್‌ ಛೊ಼ ಮಹಿನ ಆಬ್‍ಥು ಪಾಣಿ ಕೋ ವರ್‌ಶ್ಯೋನಿ, ತದೆ ದೇಖ್ಹ್‌ನಿ ಖ್ಹಾರಿಸ್ ಬಾಜು಼ಮ ಕಾಳ್ದುಕಾಳ್ ಹುಯು, ಅಜು಼ ಯೋ ವಖ್ಹತ್‌ಮ ಇಸ್ರಾಯೇಲ್ ದೇಖ್ಹ್‌ಮ ಕೆತ್ರಿಸ್ಕಿ ಮುಂಡಚ್ಚಿ ತಯೇಡ ಥೀತೆ ಖ್ಹಾಚಸ್. ಕತೋಬಿ ದೇವ್ನೆ ಇವ್ಣಾಮ ಏಕ್‌ಜ಼ಣಾನಬಿ, ಎಲೀಯನ ಬೋಲಿ ಮೋಕ್‌ಲ್ಯೊಕೊಂತೆ, ಸೀದೋನ್ ದೇಖ್ಹ್‌ನು ಸರೆಪ್ತ ಕರಿ ಗಾಮ್ಮ ಥೀತೆ ಏಕ್‌ ಮುಂಡಚ್ಚಿನ ಘರೆ ಮೋಕ್‌ಲ್ಯೊ. ಅಜು಼ ಎಲೀಷ ಕರಿ ಪ್ರವಾದಿನ ಹಗಾಮ್ಮ ಇಸ್ರಾಯೇಲ್ ಅದ್ಮಿಮ ಕೆತ್ರುಕ್ಕಿ ಜ಼ಣಾನ ಖೋಡ್‍ ಲಾಗಿರ‍್ಹೂತು. ಕತೋಬಿ ಇವ್ಣಾಮ ಏಕ್‌ ಜ಼ಣಾನಾಬಿ ಅಛ್ಛು಼ ಕೋ ಹುಯೂನಿತೆ ಸಿರಿಯ ದೇಖ್ಹ್‌ನೊ ನಾಮಾನ್‌ ಕರಿ ಎಕ್ಕಸ್ ಜ಼ಣಾನ ಅಛ್ಛು಼ ಹುಯು” ಕರಿ ಬೋಲ್ಯೊ.
ಆ ವಾತೇನ ಖ್ಹಮ್‌ಜಿನ್‌ ಸಬೆ ಭರಾವಾನು ಮಂದಿರ್‌ಮ ಥೂತೆ ತಮಾಮ್‌ ಅದ್ಮಿ ಘಣು ಇರಾದೊ ಖೈನ್, ಉಠಿ ಭೀರಿನ್, ಯೇಸುನ ಗಾಮ್‌ಥು ಭಾರ್ ಧಕೇಲಿದಿದು. ಅಜು಼ ಇವ್ಣೆ ಯೇಸುನ ಇವ್ಣು ಗಾಮ್‍ ಭಂದೈರ‍್ಹೂಥೂತೆ ಪಹಾಡ್‌ನು ಕಥಾರ್‌ಪರ್ ಲೀ ಜೈ಼ನ್ ಹಿಜ್ಜಾ಼ಥು ಹೇಟ್ ಧಕೇಲಿದೇವ್ಣು ಕರಿ ಥೂ. ಕತೋಬಿ ಯೇಸು ಇವ್ಣ ಇಚ಼್‌ಮಾಕರಿ ನಿಕ್ಳಿನ್ ಚ಼ಲೆಗಯೊ.
ಭೂತ್ ಧರಿರಾಖ್ಯುಥೂತೆ ಏಕ್‌ ಅದ್ಮಿನಿ ಬಾರೇಮ
(ಮಾರ್ಕ 1:21-28)
ಬಾದ್‌ಮ ಯೇಸು ಗಲಿಲಾಯ ತಬರ್‌ಖಾನು ಕಪೆರ್ನೌಮ್ ಕರಿ ಗಾಮ್‌ನ ಗಯೊ. ಹಿಜ್ಜಾ಼ ಸಬ್ಬತ್‌ ದನ್ನೆ ಇವ್ಣುನ ವಚನ್ ಬೋಲಿದಿದೊ. ಇನೆ ಅದಿಕಾರ್‌ಥಿ ವಚನ್ ಬೋಲ್ಯೋತೆ ದೇಖಿನ್, ಇವ್ಣೆ ಘಣು ಆಶ್ಚರ್ಯಖಾದು. ಯೋ ಸಬೆ ಭರಾವಾನು ಮಂದಿರ್‌ಮ ಭೂತ್ ಧರಿರಾಖ್ಯುಥೂತೆ ಏಕ್‌ ಅದ್ಮಿ ಥೂ. ಯೋ ಜೋ಼ರ್ ಆವಾಜ಼್‌ಥಿ ಚಿಕ್ರಿನ್, “ನಜ಼ರೇತ್‌ನೊ ಯೇಸು ಹಮಾರೇಥಿ ತುನ ಶಾತ್‌ ಛಾ಼? ಹಮೂನ ಬರ್ಬಾತ್ ಕರಾನ ಹಜ್ಜಾ಼ ಐರ‍್ಹೋಸ್ಕಿ ಶು? ತೂ ಕೋಣ್ ಕರಿ ಮನ ಮಾಲುಮ್. ತೂ ದೇವ್‍ಥಿ ಬೋಲಿಮೊಕ್‌ಲ್ಯೊ ಹುಯೊ ಪರಿಶುದ್ದ ಹುಯಿರ‍್ಹೋಸ್! ಕರಿ ಬೋಲ್ಯು.
ತದೆ ಯೇಸುನೆ ಯೋ ಭೂತ್‌ನ ಗುರ್‌ಕೈನ್, “ಖ್ಹೊಪ್‌ರ‍್ಹೆ! ಅನ ಮ್ಹೆಂದಿನ್ ಭಾರ್‌ನಿಕಳ್‌” ಕರಿ ಬೋಲ್ಯೊ. ಯೋ ಭೂತ್‍ನೆ ಯೋ ಅದ್ಮಿನ ಇವ್ಣ ಖ್ಹಾಮ್ಣೆ ಹೇಟ್ ರಡ್‌ಕೈನ್‌, ಇನ ಶನೂಸ್ ಟಚ಼್‌ಕೊ ದಿದುಕೊಂತೆ ಮ್ಹೆಂದಿನ್ ಚ಼ಲಿಗಯು.
ಅನ ದೇಖಿನ್ ಅದ್ಮಿಖ್ಹಾರು ಆಶ್ಚರ್ಯಖೈನ್, “ಆ ಕಿಮ್ನಿ ವಾತೆ? ಆ ಅದಿಕಾರ್‌ಥಿ ಅಜು಼ ಶಕತ್‍ಥಿ ಭೂತ್‌ಅಖ್ಖಾನಬಿ ಹುಕುಮ್‌ ದೇಸ್‌ನಿ, ಇವ್ಣೇಬಿ ಭಾರ್ ನಿಕ್ಳಿಜಾ಼ಸ್‌ನಿ! ಕರಿ ಏಕ್‌ಥಿ ಏಕ್‌ ವಾತೆ ಬೋಲಿಲಿದು. ಅಜು಼ ಯೇಸುನಿ ಬಾರೇಮನಿ ಖಬರ್ ಯೋ ತಬರ್‌ಖಾನು ಖ್ಹಾರಿ ಬಾಜು಼ಮ ಫೈಲಿಗಯು.
ಯೇಸುನೆ ಘಣ ಅದ್ಮಿನೊ ರೋಗ್ ಅಛ್ಛು಼ ಕರ‍್ಯೊತೆ
(ಮತ್ತಾಯ 8:14-17; ಮಾರ್ಕ 1:29-34)
ಯೇಸು ಸಬಾಮಂದಿರ್‌ಥ ನಿಕ್ಳಿನ್ ಸೀಮೋನ್ನ ಘರ್‌ಕನ ಗಯೊ. ಹಿಜ್ಜಾ಼ ಸೀಮೋನನಿ ಖ್ಹಾಖ್ಹು ಜಾ಼ಖ್ಹತ್ ತಾವ್ ಚ಼ಢೀನ್ ತಲ್‌ಖುಕರ್ತಿಥಿ, ಇನಿ ಬಾರೇಮ ಇವ್ಣೆ ಯೇಸುನ ಬೋಲ್ಯು. ತದೆ ಯೇಸುನೆ ಇನಾಕನ ಜೈ಼ನ್ ಭೀರಿನ್, ಇನ ಮ್ಹೆಂದಿನ್ ಜಾ಼ವಾನಿ ಘೋಣಿ ಯೋ ತಾವ್‌ನ ಹುಕುಮ್‌ ದೇತಾಖ್ಹತರ್‌, ತಾವ್ ಉತ್ರಿಗಯೊ. ತದ್‌ನು ತದ್ದೇಸ್ ಯೋ ಉಠೀನ್ ಇವ್ಣಿ ಸೇವಾ-ಚಾ಼ಕ್ರಿ ಕರಿ.
ದನ್ ಡುಬಾನ ಬಾದ್‌ಮ ಥರಥರಾನು ರೋಗ್‌ವಾಳು ಥೂತೆ ತಮಾಮ್‌ ಘರ್‌ವಾಳು, ಜಾನ್ನ ಅಛ್ಛು಼ಕೊಂತೆ ಅದ್ಮಿನಖ್ಹಾರು ಯೇಸುಕನ ಬುಲೈಲಾಯು. ಹರೇಕ್ ರೋಗ್‌ವಾಳಪರ್ ಯೇಸುನೆ ಹಾತ್‌ ಮ್ಹೇಲಿನ್ ಇವ್ಣುನ ಅಛ್ಛು಼ ಕರ‍್ಯೊ. ಭೂತ್‌ಖ್ಹಾರು ಜಿನುಕು, “ತೂ ದೇವ್‌ನೊ ಛಿಯ್ಯೊ” ಕರಿ ಬಳೆಳ್ಹಾಟ್ ಮ್ಹೇಲ್ತುಹುಯಿನ್, ಕೈಯೆಕ್ಕಿ ಅದ್ಮಿನ ಮಹಿತು ನಿಕ್ಳಿಗಯು.
ಯೋ ಕ್ರಿಸ್ತ ಕರಿ ಭೂತ್ ಖ್ಹಾರಾನ ಮಾಲುಮ್‍ಥೂತೆ ಇನಟೇಕೆ, ಯೇಸುನೆ ಇವ್ಣುನ ವಾತೆ ನಾ ಬೋಲ್‌ನು ಕರಿ ಹುಕುಮ್‌ ದಿದೊ.
ಸಬೆ ಭರಾವನು ಮಂದಿರ್‌ಮ ಯೇಸು ವಚನ್ ಬೋಲಿವತಾಳ್ಯೋತೆ
(ಮಾರ್ಕ 1:35-39)
ವ್ಹಾಣ್‌ಖ್ಹತ್ರೆ ಯೇಸು ಘರ್‌ನ ಮ್ಹೇಲಿನ್ ಉಜ್ಜಾ಼ಡಿ ಝ಼ಗೋನ ಗಯೊ. ಅದ್ಮಿಖ್ಹಾರು ಯೇಸುನ ಢೂಂಡ್‌ತುಹುಯಿನ್, ಯೊ ಥೋತೆ ಝ಼ಗೋಕನ ಆಯಿನ್, ಇವ್ಣುನ ಮ್ಹೆಂದಿನ್ ನಾ ಜಾ಼ವ್ಣುತೆ ಇಮ್‌ ಇನ ಭೀರಾಖಾನ ದೇಖ್ಯು. ಕತೋಬಿ ಯೇಸುನೆ ಇವ್ಣುನ, “ಮೇ ಬಿಜ಼ಖ್ಹಾರ ಗಾಮ್ಮಾಬಿ ದೇವ್ನಿ ರಾಜ್ಯನಿ ದೇವ್ನಿ ಅಛ್ಛಿ ಖಬರ್‌ನ ಬೋಲ್‌ನು, ಅನಖ್ಹಾಜೆಸ್ ದೇವ್ನೆ ಮನ ಮೋಕ್ಲಿರಾಖ್ಯೋಸ್ತೆ” ಕರಿ ಬೋಲ್ಯೊ.
ಅನ ಬಾದ್‌ಮ ಯೇಸುನೆ ಯೂದಾಯ ದೇಖ್ಹ್‌ನು ಸಬೆ ಭರಾವಾನು ಮಂದಿರ್‌ಮ ಖ್ಹಾರು ಅಛ್ಛಿ ಖಬರ್‌ನ ಬೋಲ್ತೊಹುಯಿನ್ ನಿಕ್‌ಳ್ಯೊ.
Source notes (7)
- Footnote ಧರ್ಮೊಪದೇಶ ಕಾಂಡ 8.3
- Footnote ತೂ ಮಾರ ಗೋಡಾಪರ್ ಪಡ್ಯೋತೊ ಕರೀಬಿ ಹುವಾಸ್.
- Footnote ಧರ್ಮೊಪದೇಶ ಕಾಂಡ 6.13
- Footnote ಕೀರ್ತನೆ 91.12
- Footnote ಧರ್ಮೊಪದೇಶ ಕಾಂಡ 6.16
- Footnote ಯೆಹೂದ್ಯರ್‌ನು ಅದ್ಮಿಖ್ಹಾರು ಆರಾದನೆ ಕರಾನ ಎಕ್ಟು ಹೋತುಥೂತೆ ಝ಼ಗೊ.
- Footnote ಡಾಕ್ಟರ್
ದೇವ್ನಿ ಖ್ಹಾಚಿ ವಚನ್. Copyright © 2023 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.