ದೇವ್ನಿ ಖ್ಹಾಚಿ ವಚನ್
2 ಕೊರಿಂಥ 11
ಪೌಲ ಅಜು಼ ಝೂ಼ಟ ಅಪೊಸ್ತಲರ್
ಮೇ ಪಗ್‍ಲ್ಯೊ ಹುಯಿರ‍್ಹವಾನಿ ವಖ್ಹತ್‍ಮಾಬಿ ತುಮೆ ದಯಕರಿನ್ ಜ಼ರ ಖ್ಹಮಾಳಿಲೆವ್ಣು ಕರಿ ಆಖ್ಹ್‌ಕರುಸ್. ಕತೋಬಿ ಇಂಥಿ ಅಗಾಡಿ ತುಮೆ ಇಮ್‌ ಕರಿರಾಕ್‍ಶು. ಶನಕತೊ ದೇವ್‌ಮ ಛಾ಼ತೆ ಬಳಾಪಥೀಸ್ ಮೇ ತುಮಾರಿ ಬಾರೇಮ ವೆಚ಼್‌ಣೆಕರೂಸ್. ತುಮುನ ಕ್ರಿಸ್ತ ಕರಿ ಬೋಲೈರ‍್ಹೋತೆ ಎಕ್ಕಸ್ ಪರ್ಖ್ಹಾನ ಶುದ್ಧಕವಾರಿ ಬಣೈನ್ ತುಮುನ ಇನ ಹಾತ್ಮ ದೇವ್ಣುಕರಿ ತೀರ್ಮಾನ್ ಕರಿರಾಖ್ಯೊಸ್ನಿ. ಕತೋಬಿ ಹವ್ವ ಖ್ಹಾಪ್‍ನ ಲಬುಜ಼್‌ನಿ ವಾತ್ಮ ಮೈಕಮ್‍ಹುಯಿನ್ ಧೋಕಹುಯಿತೆ ತಿಮ್ ತುಮಾರು ದಿಲ್‌ ಕ್ರಿಸ್ತನಿ ಬಾರೇಮ ರ‍್ಹೇವ್ಣುಥೂತೆ ಶುದ್ಧಮನ್‌ಥೀಬಿ ಪರಿಶುದ್ ಭಕ್ತಿನಾಬಿ ಮ್ಹೇಲಿನ್ ಖರಾಬ್ ಹುಯಿಜಾ಼ಶೆಕರಿ ಡರ್‌ ಮಾರಾಮ ಛಾ಼. ಶನಕತೊ ಹಮೆ ಬೋಲು ಕರ್ತಥಾತೆ ಬಿಜೇಕ್‍ಜ಼ಣೊ ಯೇಸು ತುಮಾರಕನ ಆಯಿನ್ ತುಮುನ ಬೋಧನೆ ಕರಾನಿ ವಖ್ಹ್‌ತೆಬಿ. ತುಮೆ ಲೀರಾಖ್ಯಕೊಂತೆ ಬಿಜೇಕ್ ಆತ್ಮಾನ ಲಿಲ್ಯಾವನಿ ವಖ್ಹ್‌ತೆಬಿ ಸ್ವೀಕಾರ್ ಕರಕೊಂತೆ ಬಿಜೇಕ್ ಸುವಾರ್ತೆನ ಸ್ವಿಕಾರ್‌ಕರಿಲ್ಯಾವನಿ ವಖ್ಹ್‌ತೆ ತುಮೆ ಅಛ್ಛಿನಿತರ ಖ್ಹಮಾಳಿಲೆವೊಸ್. ಮೋಟ ಅಪೊಸ್ತಲರ್‌ಕರಿ ಬೋಲೈಲ್ಯಾವಾಳ ಏಕ್‍ಥೀಬಿ, ಮೇ ಕಮ್ ಕಾಹೆ ಕರಿ ಲಾಝು಼ಸ್. ಮೇ ವಾತ್ಮ ಚಾ಼ತುರ್‌ನಾರ‍್ಹಯೊ ತೋಬಿ ಗ್ಯಾನ್‌ಮ ಕಮ್ ಕಾಹೆ. ಅನ ಮೇ ಹರೇಕ್ ಹಾಲತ್ಮಾಬಿ ಛೋ಼ಡಿವತಾಳಿ ರಾಖುಸ್. ತುಮುನ ಊಚ಼ ಪಡಾವ್ಣು ಕರಿ ಮಾರು ಮೇ ಹೇಟುಕರಿಲೀನ್ ದೇವ್ನಿ ಸುವಾರ್ತೆನ ಮೇ ಫುಗಟ್ ಬೋಲ್ಯೋತೆ ಮಾರಿ ಪಾಪ್‍ಕಿಶು? ತುಮಾರಿ ಸೇವೆಕರಾನ ಖ್ಹಾಜೆ ಮೇ ಅಲಕ್ ಸಬೆಥೊ ಮದತ್‍ಲೀನ್ ಇವ್ಣುನ ಗುರ್‌ಕಾವ್‌ತೊ ಹುಯಿನ್ ಇವ್ಣ ಪೈಶಾನ ವಶೂಲ್ ಕರ್ತೊಥೊ. ಮೇ ತುಮಾರಕನ ರ‍್ಹಾವಾನಿ ವಖ್ಹತ್‌ಮ ಮಾರಿ ಖೆವಿ ಜ಼ರೂರತ್‍ನಾಬಿ,ಮೇ ಖಿವಿ ಪರಕ್ಮ ತುಮಾರಾಪರ್ ವಜ಼ನ್ ಹುಯಿರ‍್ಹೊ ಕೊಯ್ನಿಕಿ ಖ್ಹಾಮ್ಣೆ ಮೆ ಭೋಜ಼್‌ ಕೊಹುಯಿಶ್ನಿ. ಶನಕತೊ ಮೆಕೆದೋನ್ಯಥಿ ಆಯಾತೆ ಭೇನೆ ಭೈಯೇನೆ ಮಾರಿ ಜ಼ರೂರತ್ ಪೂರಕರ‍್ಯಾ. ಆ ಮಾರಿ ಖ್ಹರಾವ್ಣಿನ ಅಖಾಯ ತಬರ್‌ಖಾನು ಕೋಣ್‌ಬಿ ಆ ಮಾರಿ ಖ್ಹರಾವ್ಣಿನ ಕಮ್‌ಠೋಕಖ್ಹರ್ಕು ಕೊಯ್ನಿ ಕರಿ ಕ್ರಿಸ್ತ ಯೇಸುನ ಖ್ಹಾಮ್ಣೆ ಖ್ಹಾಚಾಮ ಬೋಲುಸ್. ಮೆ ಬೋಲ್ನುಕತೊ ತುಮುನ ಪ್ಯಾರ್‌ಕರುಕೊಯ್ನಿ? ಶನಖ್ಹಾಜೆಕತೊ ಯೋ ದೇವ್ನಾಸ್ ಮಾಲುಮ್ ಛಾ಼. ಥೋಡುಜ಼ಣು ಇವ್ಣೆ ಕರುಕರಾತೆ ಕಾಮ್, ಹಮೇ ಅಪೊಸ್ತಲರ್ ಹುಯಿನ್ ಕರುಕರೆತೆ ಕಾಮ್ನ ಬರೋಬರ್ ಕರಿ ಅಡ್‍ಫೇಡ್‍ಬೋಲಾನ ವಖ್ಹತ್ ಢೂಂಡುಕರಾಸ್. ಇವ್ಣುನ ಖಿವು ಭಾಣು ನಾಮಳ್‍ನುತೆ ಮೇ ಹಮ್ಕೆ ಕರುಕರುಸ್ತೆ ಇನಾಸ್ ಕರ್ತೊಜ಼ಯಿಶ್‍. ಎಥ್ರಾನು ಅದ್ಮಿಖ್ಹಾರು ಝೂ಼ಟುಅಪೊಸ್ತಲರ್, ಧೋಕಕರವವಾಳು, ಕ್ರಿಸ್ತನು ಅಪೊಸ್ತಲರ್‌ಕರಿ ವೇಷಬದ್ಲವವಾಳು ಹುಯಿರ‍್ಹೂಸ್. ಅನಾಮ ಆಶ್ಚರ್ಯ ಶಾತ್‌ಕೊಯ್ನಿ, ಶೈತಾನ್‍ಬಿ ಉಜಾ಼ಳನೊ ದೂತನಿತರ ದೆಖೈಲೇಸ್. ಇನಾಖ್ಹಾಜೆ ಇನ ಸೇವಕರ್‌ಬಿ ನೀತಿನ ಸೇವಕರ‍್ನಿತರ ದೆಖೈಲ್ಯಾವಾನ ಇವ್ಣುನ ಬದ್‍ಲೈಲ್ಯಾವಾನು ಆಶ್ಚರ್ಯ ಶಾತ್‍ಬಿಕೊಯ್ನಿ. ಇವ್ಣ ಕಾಮ್ನ ತಕ್ಕಾದ್‍ನ ಇವ್ಣು ಖ್ಹರ್ತಿಬಿ ರ‍್ಹಿಶೆ.
ಪೌಲ ಅಪೊಸ್ತಲ ಹುಯೋತೆ ತದೆ ಇನ ಹುಯುತೆ ಖ್ಹತಾಪ್ಣಿ
ಮೇ ಪಗ್‍ಲ್ಯೊ ಕರಿ ಕೋಣ್‌ಬಿ ಮನ ನಾಲಾಝ಼್‌ಣುಕರಿ ಪಾಛೊ಼ಬೋಲುಸ್, ಇಮ್‌ ಲಾಝ್ಯಾತೋಬಿ ಮನ ಪಗ್‍ಲ್ಯೊಕರಿ ತೋಬಿ ಮಳೈಲೆವೊ; ಶನಕತೊ ಮೇಬಿ ಥೋಡುಭೋತ್ ಖ್ಹರೈಲೇವ್ಣು ಕರಿ ಛು಼. ಮೇ ಆಖ್ಹಾರಿವಾತೆನ ಪ್ರಭುನಿ ವಾತೆನಿತರ ಬೋಲುಕೊಂತೆ ಶೊಂತ್ ಭರೋಖ್ಹಾಥಿ ಬಡೈ ಮಾರಿಲ್ಯಾವಾಳ ಪಗ್‍ಲ್ಯಾನಿತರ ಬೋಲುಸ್. ಕತೋಬಿ ಕೈಏಕ್ ಜ಼ಣು ಜಗತ್ನಿ ಸಂಬಂದ್‌ನಿ ಬಾರೇಮ ಇವ್ಣೆ ಖ್ಹರೈಲೇಯಿತೆತಿಮ್ ಮೇಬಿ ಖ್ಹರೈಲೆವುಸ್. ಅಕ್ಲಿ ಹುಯಿರಾತೆ ತುಮೆ ಪಗ್‍ಲ್ಯಾವ್‍ನ ಖುಷಿಥಿ ಖ್ಹಮಾಳಿಲೆವೊ. ಖ್ಹಾಚ಼ಮ ಬೋಲ್ನುಕತೊ ಕೋಣ್‌ತೋಬಿ ತುಮುನ ಕಬ್‌ಜಾ಼ಮ ಕರ‍್ಯುತೋಬಿ, ತುಮುನ ಕಡ್‌ತೆಲ್ ದೇಖಸ್ ಇವ್ಣು ಫಾಯಿದೊ ಕರಿಲೇಸ್ ತೋಬಿ ತುಮಾರ ಕಲ್ಲಪರ್ ಮಾರ‍್ಯುತೋಬಿ ತುಮೆ ಖ್ಹಮಾಳಿ ಲೆವೋಸ್‍ನಿ. ಅಮ್ ಅಖ್ಖುಕರಾನ ಮಾರೇಥಿ ಕಮ್‌ಜೋ಼ರಿಕರಿ ಮಾನಿಲ್ಯಾವಾನ ಮನ ಖ್ಹರಮ್‌ಲಾಗಸ್. ಖಿವು ಬಿಜು಼ ಜ಼ಣು ಖ್ಹರೈಲ್ಯಾವಾನ ಧಿಲ್‌ಪತ್‌ ಕರಸ್ಕಿ ಇನ ಮೇ ಪಗ್‍ಲ್ಯಾನಿತರ ಖ್ಹರೈಲ್ಯಾವಾನ ಹುಮ್ಮಖ್ಹ್‌ ಕರುಸ್. ಇವ್ಣೆ ಹಿಬ್ರುವಾಳಕಿ ಶು? ಮೇಬಿ ಇವ್ಣಿನಿತರ ಹುಯಿರೋಸ್, ಇವ್ಣೆ ಇಸ್ರಾಯೇಲ್‌ವಾಳ? ಮೇಬಿ ಇವ್ಣಿನಿತರಸ್ ಹುಯಿರ‍್ಹೆವುಸ್‌; ಇವ್ಣೆ ಅಬ್ರಹಾಮ್‌ನಿ ಖೂಮ್‍ವಾಳ? ಮೇಬಿ ಇನಿ ಖೂಮ್‌ವಾಳೊ. ಇವ್ಣೆ ಕ್ರಿಸ್ತನ ಸೇವಕರ್‌ಕಿಶು? ಇವ್ಣೇಥಿ ಜಾ಼ಖ್ಹತ್ ಮೇ ಸೇವೆ ಕರಾವಾಳೊ ಹುಯಿರೋಸ್. ಮೇ ಪಗ್‍ಲ್ಯಾನಿತರ ವಾತೆಬೋಲುಕರುಸ್, ಮೇ ಘಣು ಖ್ಹತಿರ‍್ಹೋಸ್ ಘಡಿಕೇಡೆ ಜೇಲ್‌ಮ ಘಲೈಲಿಧೋಥೊ. ಕಠಣ್ಣಿ ಪರಕ್ಮ ಮಾರ್‌ಖೈರಾಖ್ಯೋಸ್. ಕೈಯೇಕ್ ವಖ್ಹತ್ ಮರಣ್‍ಮ ಖ್ಹಪ್‍ಡಿಗಯೋಥೊ. ಯೆಹೂದ್ಯರ್ ಹಾತೇಥಿ ಪಾಚ಼್ ವಖ್ಹತ್ ನೌ ಉಪ್ಪರ್ ಡೋಡಿಖ್ಹ್‌ ಕೊಲ್ಡಾನ ಮಾರ್ ಖೈರಾಖ್ಯೋಸ್. ತೀನ್‍ಹಲ್ಲ ಕೊಲ್ಡಾನಿ ಮೂಟ್‍ಥಿ ಕೂಟೈಲಿಧೊ. ಏಕ್‌ ವಖ್ಹತ್ ಮನ ಮಾರಿನಾಖಾನ ಬಂಡೊಫೇಕ್ಯು. ತೀನ್‍ವಖ್ಹತ್ ಮೇ ವಳ್ಯೊಜಾ಼ತೊಥೋತೆ ಜ಼ಹಾಜ಼್ ಫುಟೀಗಿ. ಏಕ್‌ ರಾತ್ ಏಕ್‍ದನ್ ಮೇ ದರ‍್ಯಾವ್‌ಪರ್ ತೇಲ್‍ತೊಫಂಡ್ಯೊ. ಗಾಮ್‌ಥಿ ಗಾಮ್‍ ಚಾ಼ಲ್ತೋಸ್ ರ‍್ಹಯೊ. ನದ್ದಿಯೇಥಿ ಖತ್ರ, ವಾಟ್‌ಪರ್ ಚೋ಼ರ್‌ಥಿ ಖತ್ರ, ಯೆಹೂದ್ಯರ್ ಅಜು಼ ಯೆಹೂದ್ಯರ್‌ಕಾಹೆತೆ ಅದ್ಮಿಥಿ ಖತ್ರ, ಖ್ಹಯೇರ್‌ಮ ಖತ್ರ, ಭಾರ್‌ಲ್ಯ ತಬರ್‌ಖಾವ್‍ಮ ಖತ್ರ, ದರ‍್ಯಾವ್‌ಮ ಖತ್ರ, ಅಜು಼ ಝೂ಼ಟ ಭಯೇಥಿ ಖತ್ರ ಅಖ್ಖಾಸ್‍ಮ ಮೇ ಖ್ಹಾಮೆ ಹುಯೊ. ಮೇ ಖ್ಹತೀನ್ ರಾಬ್ಯೊ. ಕೆತ್ರಿಕ್ಕಿ ವಖ್ಹತ್ ನಿಂದರ್‌ಕೋಲಿದೋನಿ. ಭುಕ್ ಠೋಖ್ಹ್‌ ಶಾತ್‌ಕರಿ ಮಾಲುಮ್ ಕರಿಲಿದೊ. ಖಾಣುಕೊಂತೆ ಕೆತ್ರಿಕ್ಕಿ ವಖ್ಹತ್ ಪಟ್ನಿ ಪಡ್ಯೊರ‍್ಹಯೊ. ಬರೋಬರ್‌ನು ಲುಂಗ್ಡುಕೊಂತೆ ಠಣ್‍ಮ ಕಾಪ್ತೊ ರ‍್ಹಿಯೊ. ಎತ್ರೇಸ್ ಕಾಹೆ, ಖ್ಹಾರೀಸ್‍ ಸಬೆಪರ್‌ನು ವೇಚ಼್‌ಣೆ ಮನ ದನ್‌ಪರ್‌ರೋಜ಼್ ಖ್ಹತವ್‍ಕರಸ್. ಏಕ್‌ ಜ಼ಣೊ ಕಮ್‍ಜೋ಼ರಿ ಹುಯಿರೊತೊ, ಇನ ಜೋ಼ಡ್ಮ ಮೇಬಿ ಕಮ್‍ಜೋ಼ರಿನೋಸ್. ಏಕ್‌ ಜ಼ಣೊ ಪಾಪ್ನ ಬಲಿಹುಯೊತೊ ಮೇ ಪಶ್‍ತೈಶ್ ಕೊಯಿನ್ತೆ ರ‍್ಹಿಶ್‍ಕೊಯ್ನಿ. ಮನ ಖ್ಹರೈಲ್ಯಾವಾನು ರ‍್ಹಯುತೊ ಮಾರಿ ಕಮ್‍ಜೋ಼ರಿನಿ ಬಾರೇಮಸ್ ಖ್ಹರೈಲೆವ್‍ಸ್. ಕದೆ ಕದೇಬಿ ಸ್ತುತಿಹುವಾಳೊ ಪ್ರಭು ಯೇಸುನೊ ಬಾಬಿ, ದೇವ್‌ಬಿ ಹುಯಿರಾವಳೊ ಮೇ ಝೂ಼ಟಿ ಕೋಬೋಲುನಿ ಕರಿ ಮಾಲುಮ್ ಕರಿರಾಖ್ಯೋಸ್.
ದಮಸ್ಕಮ ರಾಜ಼ ಹುಯಿರೋತೆ ಅರೇತನಿ ಹುಕುಮ್‌ನಿತರ ಹಿಜ಼್ಜಾನೊ ರಾಜ್ಯಪಾಲ್ ಮನ ಧರೀನ್ ಕೊಂಡಿನಾಕ್ಣು ಕರಿ ದಮಸ್ಕ ಖ್ಹಯೇರ‍್ನ ಶಿಪಾಯಿಥಿ ಕಾವ್ಲಿ ಕರಾಯೊ. ಕತೋಬಿ ಖ್ಹಯೇರ‍್ನ ಭೀತ್‌ನ ಕಿಟಕಿನ ಮಹಿಥು ಮನ ಏಕ್‌ ಟೋಕ್ರಾಮ ಬೆಖ್ಹಾಡಿನ್‌ ಹೇಟ್ ಉತ್ರಾಯು ಅಜು಼ ಇವ್ಣ ಹಾತ್ಮಥೊ ಮೇ ಛು಼ಕಿನ್ ನಾಶಿಗಯೊ.
ದೇವ್ನಿ ಖ್ಹಾಚಿ ವಚನ್. Copyright © 2023 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.