ದೇವ್ನಿ ಖ್ಹಾಚಿ ವಚನ್
1 ಯೋಹಾನ 3
ದೇವ್ನ ಲಡ್ಕಾ
ಅಪ್ಣೆ ದೇವ್ನ ಲಡ್ಕಾ ಕರಿ ಬೋಲೈಲೇವ್ಣುಕತೊ ಬಾ ಅಪ್ಣುನ ಕೆಥ್ರಾನಿ ಪ್ಯಾರ್ ಕರಿರಾಖ್ಯೊಸ್ ದೇಖೊ; ಖ್ಹಚಂಬಿ ಅಪ್ಣೆ ದೇವ್ನ ಲಡ್ಕಾ ಹುಯಿರಾಸ್. ಆ ಜಗತ್‌ ಇನ ಮಾಲುಮ್‌ಕರ‍್ಲಿದುಕೊಂತೆ ಇನಾಖ್ಹಾಜೆ ಅಪ್ಣುನಾಬಿ ಮಾಲುಮ್ ಕರ‍್ಲೆಯ್‍ಕೊಯ್ನಿ. ಪ್ಯಾರ್‌ನ ದೋಸ್ತಿವೊ ಅಪ್ಣೆ ಹಮ್ಕೆ ದೇವ್ನ ಲಡ್ಕಾ. ಅಜು಼ ಆಗಾಡಿ ಅಪ್ಣೆ ಶಾತ್‌ ಲಿಶುಕರಿ ಕೆಥ್ರಾನವಾಳ ಹುಯಿರ‍್ಹಿಯೆಸ್ ಕರಿ ಬಿಜೂ಼ಬಿ ಖ್ಹಮ್‍ಜ್ಯಕೊಯ್ನಿ. ಕತೋಬಿ ಕ್ರಿಸ್ತಯೇಸು ಆವನಿ ವಖ್ಹ್‌ತೆ ಅಪ್ಣೇಬಿ ಇನಿನಿತರಾಸ್ ರಿಶು ಕರಿ ಮಾಲುಮ್ ಕರಿರಾಖ್ಯಸ್. ಶನಕತೊ ಯೋ ರ‍್ಹಿಶೇತೆ ರೂಪ್‍ಮಸ್ ದೇಕ್‌ಶು. ಕ್ರಿಸ್ತಯೇಸುಪರ್ ರಾಖಿಮ್ಹೆಲ್ಯಾತೆ ಆ ಭರೋಖ್ಹಾನ ಹರೇಕ್ ಜ಼ಣುಬಿ ಯೋ ಪವಿತ್ರ ಹುಯಿರಾವಾನಿ ಘೋಣಿಸ್ ಇನು ಯೋಸ್‍ ಪರಿಶುದ್ ಕರಿಲೇಸ್. ಪಾಪ್ ಕರಾವಾಳೊ ಹರೇಕ್ ಜ಼ಣೋಬಿ ದೇವ್ನಿ ಹುಕುಮ್ಮ ಕೋರ‍್ಹೆಯ್ನಿ. ದೇವ್ನಿ ಹುಕುಮ್‌ನ ಮ್ಹೇಲ್‍ವಾನುಸ್‍ ಪಾಪ್. ಪಾಪ್ ಖ್ಹಾರುಸ್ ಕಾಡ್ಣುಕರಿ ಕ್ರಿಸ್ತ ಆಯೊಕರಿ ಬೋಲಾನುಬಿ, ಅಜು಼ ಇನಾಮ ಪಾಪಸ್ ಕೊಯ್ನಿಕರಿಬಿ ತುಮೂನ ಮಾಲುಮ್ ಛಾ಼. ಇನಾಮ ತಳ್‍ಗಾಠಿನ್ ರ‍್ಹೇವವಾಳೊ ಪಾಪ್ನಕರಕೊಯ್ನಿ; ಪಾಪ್‍ಕರವಾಳೊ ಇನ ದೇಖಿರಾಖ್ಯುಬಿ ಕೊಯ್ನಿ. ಮಾಲುಮ್ ಕರ‍್ಯುಬಿ ಕೊಯ್ನಿ; ಪ್ಯಾರ್‌ನ ಲಡ್ಕಾವೊ, ಕೋಣ್‌ಬಿ ತುಮುನ ಠಗಾವ್ಣುನಾತೆ ತಿಮ್ ರ‍್ಹವೊ. ಕ್ರಿಸ್ತ ಕಿಮ್ ನೀತಿವಾಳೊ ಹುಯಿರೋಸ್ಕಿ ತಿಮ್ ನೀತಿಥಿ ಚಲಾವಾಳೊ ಹರೇಕ್‍ಜ಼ಣೋಬಿ ನೀತಿವಾಳೊ ಹುಯಿರ‍್ಹೋಸ್. ಪಾಪ್ ಕರಾವಾಳೊ ಶೈತಾನ್‍ನಿ ಪಿಳ್ಗಿವಾಳೊ. ಶೈತಾನ್‍ ಜ಼ಮಾನೇಥುಬಿ ಪಾಪ್ ಕರವಾಳೋಸ್. ಇನಖ್ಹಾಜೆ ಇನು ಖರಾಬ್ ಕಾಮ್‍ಖ್ಹಾರಾನ ನಾಶ್ ಕರ್ನುಸ್ ಕರಿ, ದೇವ್‌ನೊ ಛಿಯ್ಯೊ ಆಯೋತೆ. ದೇವ್‍ಥಿ ಪೈದ ಹುಯಿರ‍್ಹವವಾಳೊ ಕೋಣ್‌ಬಿ ಪಾಪ್ ಕರ್ಶೆ ಕೊಯ್ನಿ. ಶನಕತೊ ದೇವ್ನಿ ಸ್ವಭಾವ್ ಇನಾಮ ಛಾ಼. ಯೋ ದೇವ್‍ಥಿ ಪೈದ ಹುಯಿರ‍್ಹೊಸ್ತೆ ಇನಖ್ಹಾಜೆ ಪಾಪ್ ಕರಾನ ಕೋ ಉಶೇನಿ. ಅಜು಼ ನೀತಿನ ವಾಟ್‌ಮ ನಾಚಾ಼ಲವಾಳೊ, ಇವ್ಣ ಭೈಯೇ ಅಜು಼ ಭೇನೇನ ಲಾಡ್‌ ನಾಕರವಾಳೊ ದೇವ್‍ಥಿ ಪೈದಹುಯೊ ಕೊಯ್ನಿ. ಅಮ್ ದೇವ್ನ ಲಡ್ಕಾ ಕೋಣ್ ಅಜು಼ ಶೈತಾನ್ನ ಲಡ್ಕಾ ಕೋಣ್‌ಕರಿ ಮಾಲುಮ್ ಕರಿಲೆಯೆಜಾ಼ಯ್‍.
ಏಕ್‌ಥಿ ಏಕ್‌ ಪ್ಯಾರ್‌ಕರೊ
ಅಪ್ಣೆ ಏಕ್‌ಥಿಏಕ್ ಪ್ಯಾರ್‌ಕರ‍್ನು ಕರಿ ಬೋಲಾನು ಸಂದೇಶ್‌ನಾಸ್‍ ತುಮೆ ಪಹಿಲೆಥು ಖ್ಹಮ್‍ಜಿರಾಖ್ಯಸ್ತೆ. ಕೇಡ್‍ಕರವಾಳೊ ಹುಯಿರಿನ್ ಇನ ಭೈನಾಸ್‍ ಭೋಕಿ ಮಾರ‍್ಯೋತೆ ಕಾಯಿನನಿಘೋಣಿ ಅಪ್ಣೆ ನಾರ‍್ಹೇವ್ಣು. ಯೋ ಶನ ನ್ಹಾನಭೈನ ಮಾರಿನಾಖಿದಿದೊತೆ? ಇನು ಕಾಮ್‌ಖ್ಹಾರು ಖರಾಬ್ ಅಜು಼ ಇನ ಭೈನು ಕಾಮ್ ನೀತಿನು ಹುಯಿರ‍್ಹುಥೂತೆ ಇನಖ್ಹಾಜೇಸ್. ಭೈಯೇ ಭೇನೆವೊ, ಜಗತ್‌ ತುಮೂನ ವಹೇರ್‌ ಕರ‍್ಯುತೊ ಆಶ್ಚರ್ಯ ನಕೊಕರೊ. ಅಪ್ಣೆ ಅಪ್ಣ ಭೈಯೇ ಭೇನೆವೊನ ಪ್ಯಾರ್ ಕರಾಥಿ ಮರಣ್‍ಥಿ ನಿಕ್ಳಿನ್ ಕದೇಬಿ ರ‍್ಹವಾನ ಜಾನ್‌ಮ ಛಿಯೆ ಕರಿ ಅಪ್ಣುನ ಮಾಲುಮ್ ಛಾ಼. ಕೋಣ್ ಇವ್ಣ ಭೈಯೇ ಭೇನೇನ ಪ್ಯಾರ್ ಕರಾಕೊಯ್ನಿಕಿ ಇವ್ಣೆ ಮರಣ್‍ಮಾಸ್‍ ಛಾ಼. ಕೋಣ್‌ಬಿ ಇವ್ಣ ಭೈಯೇ ಭೇನೇನ ವಹೇರ್‌ ಕರಾವಾಳೊ ಖೂನಿಹುಯಿರ‍್ಹೊಸ್. ಅಜು಼ ಖೆವ ಖೂನಿಮಾಬಿ ಕೆದೇಬಿ ರ‍್ಹವಾನು ಜಾನ್‌ ಕೋರ‍್ಹಿಶೇನಿ ಕರಿ ತುಮೂನ ಮಾಲುಮ್. ಪ್ರಭು ಯೇಸು ಅಪ್ಣಖ್ಹಾಜೆ ಇನ ಜಾನ್ನಾಸ್ ಮ್ಹೇಲ್ಯೊ. ಅನೇಥಿ ಲಾಡ್‌ ಕೆಥ್ರಾನು ಕರಿ ಅಪ್ಣೆ ಖ್ಹಮ್‍ಜಿಲಿದ ಕಿಮ್‌ಕತೊ. ಅಪ್ಣೇಬಿ ಭೈಯೇ ಭೇನೇನಖ್ಹಾಜೆ ಜಾನ್‌ ದೇವವಾಳ ಹುಯಿರಾಸ್. ಅಜು಼ ಆ ಲೋಕ್‌ನು ಧನ್‌ದೌಲತ್‌ ರ‍್ಹವಾಳೊ ಕೋಣ್‌ತೋಬಿ ವದೆಖ್ಹ್‌ಮರ‍್ಹಾವಳ ಇನ ಭೈನ ದೇಖಿನ್‍ ಗೋರ್‌ನ ಕರ‍್ಯತೊ ದೇವ್ನಿ ಪ್ಯಾರ್ ಇನಾಮ ರ‍್ಹಾವನ ಉಶೇಕಿ ಶು? ಮಾರ ಲಾಡ್ನ ಲಡ್ಕಾವೊ, ತುಮೆಖಾಲಿ ವಾತೆಥೀಬಿ ರ‍್ಹವೊ, ಅಛ್ಛಿವಾತ್‍ ಬೋಲಾಥೀಬಿ ಪ್ಯಾರ್‌ಕರವಾಳ ನಾಹುಯಿರೇವ್ಣುತೆ ಕರ್ನಿಥಿಬಿ ಅಜು಼ ಖ್ಹಾಚಿ ಮೊಹೊಬಥ್ಥಿ ಪ್ಯಾರ್ ಕರಾವಾಳ ಹುಯಿರ‍್ಹೇಣು.
ದೇವ್‌ಮ ಧಿಲ್‌ಪತ್‌
ಅಮ್ ಅಪ್ಣೆ ಖ್ಹಾಚಿಮ ಮಳಿರ‍್ಹವಾಳ ಕರಿ ಅನೇಥಿಸ್‍ ಅಪ್ಣುನ ಮಾಲುಮ್ ಹುವಾಸ್, ತದೆ ಅಪ್ಣು ದಿಲ್‌ ದೇವ್ನ ಖ್ಹಾಮ್ಣೆ ಛುಟಾದಿಲ್‍ನೊ ಹುಯಿರ‍್ಹೇಸ್‍. ಖಿವಿ ಬಾರೇಮತೋಬಿ ಅಪ್ಣೊ ದಿಲ್ನಿ ಸಾಕ್ಷಿ ಅಪ್ಣುನ ಗುರ್‌ಕಾಯುತೋಬಿ, ಅಖ್ಖುಸ್ ಮಾಲುಮ್ ರ‍್ಹವಾಳೊ ದೇವ್ ಅಪ್ಣ ದಿಲ್ನಿ ಸಾಕ್ಷಿಥೀಬಿ ಮೋಟೊಕರಿ ಅಪ್ಣುನ ಮಾಲುಮ್ ಛಾ಼. ಪ್ಯಾರ್‌ನ ಭೈಯೇ ಭೇನೆವೊ ಅಪ್ಣ ದಿಲ್ನಿ ಸಾಕ್ಷಿ ಅಪ್ಣುನ ಗುರ್‌ಕಾಯುನಾತೊ, ಅಪ್ಣೆ ದೇವ್ನ ಖ್ಹಾಮ್ಣೆ ಹಿಮ್ಮಥಿರ‍್ಹವಾನ ಉಶೆ. ಅಪ್ಣೆ ದೇವ್ನಿ ಹುಕುಮ್‌ನ ಅಖ್ಖುಲೀನ್ ಚಾ಼ಲ್ಯಾತೊ ಇನು ಪಸಂದ್‌ನು ಕಾಮ್‍ಕರವಾಳ ಹುಯಿರ‍್ಹಾತೊ ಅಪ್ಣೆ ಶಾತ್ಬಿ ಮಾಂಗಿ ಲಿಯೆಜಾ಼ಯ್‍. ದೇವ್ನಿ ಹುಕುಮ್ ಶಾತ್‍ಕತೊ ಅಪ್ಣೆ ದೇವ್‌ನೊ ಛಿಯ್ಯೊ ಪ್ರಭು ಯೇಸುನ ನಾಮ್‍ಪರ್ ವಿಶ್ವಾಸ್‍ಕರೀನ್‍ ಇನೆ ಹುಕುಮ್ ಕರಿರಾಖ್ಯೊತೆ ಇಮ್ಮಸ್ ಏಕ್‌ಥಿಏಕ್ ಪ್ಯಾರ್‌ಕರ‍್ನು ಕರಿ ಬೋಲಾನುಸ್. ದೇವ್ನಿ ಹುಕುಮ್‌ನ ಪಾಡಿಚಾ಼ಲವಾಳೊ ಇನಾಮ ತಳ್‍ಗಾಠಿನ್ ರ್ಹೇಸ್. ದೇವ್ ಇವ್ಣಾಮ ತಳ್ಗಾಠಿ ರ್ಹೇಸ್. ದೇವ್ ಅಪ್ಣಾಮ ತಳ್ಗಾಠಿ ಛಾ಼ಕರಿ ಯೋ ಅಪ್ಣುನ ಕೃಪೆಥಿ ದೀರಾಖ್ಯೋತೆ ಪವಿತ್ರಾತ್ಮಥೀಸ್ ಮಾಲುಮ್ ಕರಿಲಿಯೇಸ್.
ದೇವ್ನಿ ಖ್ಹಾಚಿ ವಚನ್. Copyright © 2023 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.