Muⱪeddes Kalam (yǝngi yeziⱪ)
Zǝbur 95
95-küy •••• Ⱨǝⱪiⱪiy ibadǝt ⱪilix üqün anglax kerǝk
Kelinglar, Pǝrwǝrdigarni yangritip küylǝyli,
Nijatliⱪimiz bolƣan Ⱪoram Teximizƣa tǝntǝnǝ ⱪilayli!
Tǝxǝkkürlǝr bilǝn uning aldiƣa kelǝyli,
Uningƣa küylǝr bilǝn tǝntǝnǝ ⱪilixayli!
Qünki Pǝrwǝrdigar — büyük bir ilaⱨtur,
Pütkül ilaⱨlar üstidiki büyük bir Padixaⱨtur. 1
Yǝrning tǝgliri Uning ⱪolididur,
Taƣlarning qoⱪⱪilirimu Uningkidur.
Dengiz Uningki, U uni yaratⱪan;
Ⱪuruⱪluⱪni Uning ⱪolliri xǝkillǝndürdi.
Kelinglar, Uningƣa bax urup sǝjdǝ ⱪilayli,
Pǝrwǝrdigar Yaratⱪuqimiz aldida tiz pükǝyli!
Qünki U bizning Hudayimizdur,
Biz bolsaⱪ Uning yayliⱪidiki hǝlⱪtur,
Uning ⱪoli baⱪidiƣan ⱪoylarmiz.
Bügün, ǝgǝr Uning awazini anglisanglar, 2
Əyni qaƣlarda Mǝribaⱨda bolƣandǝk, qɵl-bayawandiki Massaⱨda bolƣan kündǝk,
Yürikinglarni jaⱨil ⱪilmanglar! 3 4
Mana xu yǝrdǝ ata-bowiliringlar Meni sinidi, ispatlidi ⱨǝm ⱪilƣinimni kɵrdi. 5
Mǝn ⱪiriⱪ yil xu dǝwrdin bizar bolup: —
«Bular kɵnglidǝ adaxⱪan bir hǝlⱪtur,
Mening yollirimni ⱨeq bilip yǝtmigǝn» — dedim. 6
Xunga Mǝn ƣǝzǝplinip ⱪǝsǝm iqip: —
«Ular ⱨǝrgiz Mening aramgaⱨimƣa kirǝlmǝydu» — dedim. 7
Source notes (7)
- Footnote ◼ «... Pǝrwǝrdigar — büyük bir ilaⱨtur, pütkül ilaⱨlar üstidiki büyük bir padixaⱨtur» — bu ayǝttiki «ilaⱨlar»: (1) taipilar qoⱪunidiƣan butlarni (ǝmǝliyǝttǝ ularning kǝynidǝ turƣan jin-xǝytanlarni — «Zǝb.» 96:4-5, «1Kor.» 8:4-6 wǝ 10:19-21ni kɵrüng) yaki (2) Hudaning sɵzigǝ mǝs’ul bolƣan Israil ⱨakimlirini kɵrsitixi mumkin.
- Cross-reference ◘ Zǝb. 100:3; Ibr. 3:7
- Footnote ◼ «Əyni qaƣlarda Mǝribaⱨda bolƣandǝk, qɵl-bayawandiki Massaⱨda bolƣan kündǝk, yürikinglarni jaⱨil ⱪilmanglar!» — «Mǝribaⱨ» wǝ «Massaⱨ» degǝn jaylarda Israillar Hudadin yüz ɵrüp, Musa pǝyƣǝmbǝrgǝ ⱪarxi isyan-asiyliⱪ kɵtürgǝn. Bu wǝⱪǝlǝr «Mis.» 17-bab, «Qɵl.» 20-babta hatirilǝngǝn.
- Cross-reference ◘ Mis. 17:7; Qɵl. 20:1,3,13; Ⱪan. 6:16
- Cross-reference ◘ Ibr. 3:9
- Cross-reference ◘ Ibr. 3:17
- Footnote ◼ «Ular ⱨǝrgiz Mening aramgaⱨimƣa kirǝlmǝydu» — «Mening aramgaⱨim» (1) Huda Israillarƣa wǝdǝ bǝrgǝn Ⱪanaan (Pǝlǝstin) zeminini kɵrsitidu. Misirdin qiⱪip qɵl-bayawanda ⱪiriⱪ yil sǝrsan bolup yürgǝn xu dǝwrdǝ Israillar itaǝtsizlik ⱪilip u zeminƣa kirmigǝn. (2) «Aramgaⱨ» pǝⱪǝt zeminnila ǝmǝs, bǝlki yǝnǝ Hudaning panaⱨi, yetǝkqiliki ⱨǝm xǝpⱪiti astida yaxaxni ɵz iqigǝ alidu (Injil, «Ibraniylarƣa», 4-babnimu kɵrüng).
Muⱪeddes Kalam (yǝngi yeziⱪ). Copyright © 2010 Mukeddes Kalam - Uyghur Bible Translation Committee. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.