Muⱪeddes Kalam (yǝngi yeziⱪ)
Zǝbur 60
60-küy •••• Mǝƣlubiyǝttin keyinki dua
Nǝƣmiqilǝrning bexiƣa tapxurulup, «Guwaⱨliⱪ nilupǝri» degǝn aⱨangda oⱪulsun dǝp, Dawut yazƣan «Mihtam» küyi: —
(Dawut Aram-Naⱨaraim wǝ Aram-Zobaⱨdiki Suriyǝliklǝr bilǝn jǝng ⱪilƣanda, uning sǝrdari bolƣan Yoab jǝnggǝ ⱪayta berip, «Xor wadisi»da Edomdikilǝrdin on ikki ming ǝskǝrni ⱪiliqliƣan qaƣda yezilƣan)
I Huda, Sǝn bizni qǝtkǝ ⱪaⱪting;
Bizni parǝ-parǝ ⱪiliwǝtting,
Sǝn bizdin rǝnjiding;
Əmdi bizni yeningƣa ⱪayturƣin! 1 2
Sǝn zeminni tǝwritip yeriwǝtkǝniding;
Əmdi uning bɵsüklirini saⱪaytⱪaysǝn;
Qünki u dǝldǝngxip kǝtti!
Sǝn Ɵz hǝlⱪinggǝ külpǝt-harliⱪlarni kɵrgüzdüng;
Sǝn bizgǝ alaⱪzadilikning xarabini iqküzdüng.
Sǝn Ɵzüngdin ǝyminidiƣanlarƣa tuƣ tiklǝp bǝrgǝnsǝn;
U ⱨǝⱪiⱪǝtni ayan ⱪilixⱪa kɵtürülidu.
(Selaⱨ). 3
Ɵz sɵygǝnliring nijatliⱪ tepixi üqün,
Ong ⱪolung bilǝn ⱪutⱪuzƣaysǝn,
Duayimni ijabǝt ⱪilƣaysǝn. 4
Huda Ɵz pak-muⱪǝddǝslikidǝ xundaⱪ degǝn: —
«Mǝn tǝntǝnǝ ⱪilimǝn,
Mǝn Xǝkǝm diyarini bɵlüp berimǝn,
Sukkot wadisini tǝⱪsim ⱪilixⱪa ɵlqǝymǝn. 5
Gilead Manga mǝnsuptur,
Manassǝⱨmu Manga mǝnsuptur;
Əfraim bolsa beximdiki dubulƣamdur,
Yǝⱨuda Mening ǝmr-pǝrman qiⱪarƣuqimdur; 6
Moab Mening kir yuyux jawurumdur;
Edomƣa qoruⱪumni taxlaymǝn;
Filistiyǝ, Mening sǝwǝbimdin tǝntǝnǝ ⱪilinglar!» 7
Kim Meni bu mustǝⱨkǝm xǝⱨǝrgǝ baxlap kirǝlisun? Kim Meni Edomƣa elip baralisun?
I Huda, Sǝn bizni rasttinla qǝtkǝ ⱪaⱪtingmu?
Ⱪoxunlirimiz bilǝn billǝ jǝnggǝ qiⱪmamsǝn?
Bizni zulumlardin ⱪutuluxⱪa yardǝmlǝxkǝysǝn,
Qünki insanning yardimi bikardur!
Huda arⱪiliⱪ biz qoⱪum baturluⱪ kɵrsitimiz;
Bizgǝ zulum ⱪilƣuqilarni qǝyligüqi dǝl U Ɵzidur!
Source notes (7)
- Footnote ◼ «Dawut Aram-Naⱨaraim wǝ Aram-Zobaⱨdiki Suriyǝliklǝr bilǝn jǝng ⱪilƣanda, uning sǝrdari bolƣan Yoab jǝnggǝ ⱪayta berip, «Xor wadisi»da Edomdikilǝrdin on ikki ming ǝskǝrni ⱪiliqliƣan qaƣda yezilƣan» — bu wǝⱪǝ Tǝwrat, «2Sam.» 8-babta bayan ⱪilinidu.
- Cross-reference ◘ 2Sam. 8:3, 13; 1Tar. 18:3, 12; Zǝb. 44:9-10; 74:1; 108:11; 144:10
- Footnote ◼ «Sǝn Ɵzüngdin ǝyminidiƣanlarƣa tuƣ tiklǝp bǝrgǝnsǝn; u ⱨǝⱪiⱪǝtni ayan ⱪilixⱪa kɵtürülidu» — toluⱪ ayǝtning birnǝqqǝ hil tǝrjimiliri bar. Ayǝttiki ibraniy tilini qüxinix tǝs.
- Cross-reference ◘ Zǝb. 108:6-13
- Footnote ◼ «Huda Ɵz pak-muⱪǝddǝslikidǝ xundaⱪ degǝn...» — yaki «Huda Ɵz muⱪǝddǝs jayida xundaⱪ degǝn...» «Mǝn Xǝkǝm diyarini bɵlüp berimǝn, Sukkot wadisini (tǝⱪsim ⱪilixⱪa) ɵlqǝymǝn» — Hudaning muxu sɵzliri bǝlkim Yǝxua pǝyƣǝmbǝr arⱪiliⱪ, Ⱪanaan (Pǝlǝstin) zeminini Israillarƣa bɵlüp-bɵlüp tǝⱪsim ⱪilƣanliⱪini kɵrsitidu.
- Footnote ◼ «Əfraim bolsa beximdiki dubulƣamdur» — ibraniy tilida «Əfraim bolsa beximdiki ⱪoƣdiƣuqidur». «Yǝⱨuda Mening ǝmr-pǝrman qiⱪarƣuqimdur» — baxⱪa birhil tǝrjimisi «Yǝⱨuda Mening xaⱨanǝ ⱨasamdur».
- Footnote ◼ «Moab Mening kir yuyux jawurum» — bǝlkim Moabning Huda wǝ Uning hǝlⱪi üqün mǝynǝt hizmǝt ⱪilidiƣanliⱪini bildüridu. «Edomƣa qoruⱪumni taxlaymǝn» — ayaƣ kiyimni mǝlum yǝr üstigǝ taxlax axu yǝrgǝ igǝ bolƣanliⱪni bildürüxi mumkin; yaki bolmisa, Edomning ɵz igisining ayaƣlirini elip yiƣixturidiƣan ⱪuldǝk ikǝnlikini kɵrsitiximu mumkin. «Filistiyǝ, Mening sǝwǝbimdin tǝntǝnǝ ⱪilinglar!» — Dawut padixaⱨning dǝwridǝ Filistiyǝ Dawutⱪa, xundaⱪla Hudaning Ɵzigǝ boysunup, bǝhtlik ⱨayatⱪa igǝ bolƣan («2Sam.» 1:8ni, xundaⱪa «Yar.» 12:1-3nimy kɵrüng).
Muⱪeddes Kalam (yǝngi yeziⱪ). Copyright © 2010 Mukeddes Kalam - Uyghur Bible Translation Committee. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.