Muⱪeddes Kalam (yǝngi yeziⱪ)
Zǝbur 24
24-küy •••• Pǝrwǝrdigarning ƣǝlibisi
Dawut yazƣan küy: —
Pǝrwǝrdigarƣa mǝnsüptur, jaⱨan wǝ uningƣa tolƣan ⱨǝmmǝ mǝwjudatlar;
Uningƣa tǝǝlluⱪtur yǝr yüzi wǝ uningda turuwatⱪanlarmu; 1
Qünki jaⱨanning ulini qongⱪur dengizlar üstigǝ orunlaxturup,
Yǝrni sular üstigǝ ornatⱪan Udur.
Pǝrwǝrdigarning teƣiƣa kim qiⱪalaydu?
Uning muⱪǝddǝs jayiƣa kim kirip turalaydu? 2
— Ⱪolliri gunaⱨtin pakiz, dili sap,
Ⱪuruⱪ nǝrsilǝrgǝ tǝlmürüp ⱪarimiƣan,
Yalƣan ⱪǝsǝm ⱪilmiƣan kixi kirǝlǝydu. 3
Bundaⱪ kixi bolsa Pǝrwǝrdigardin bǝhtni,
Ɵz nijatliⱪi bolƣuqi Hudadin ⱨǝⱪⱪaniyliⱪni tapxuruwalidu wǝ uni kɵtürüp yüridu; 4
Bu dǝwr Uni izdigüqi dǝwrdur,
Yǝni Sening didaringni izdigüqilǝr, i Yaⱪupning Hudasi!
Selaⱨ! 5
I ⱪowuⱪlar, bexinglarni kɵtürünglar!
Kǝng eqilinglar!
I mǝnggülük ixiklǝr, kɵtürülünglar!
Xuning bilǝn xan-xǝrǝp igisi Padixaⱨ kiridu! 6
Xan-xǝrǝp igisi Padixaⱨ degǝn kim?
U Pǝrwǝrdigardur, u küqlük wǝ ⱪudrǝtliktur!
Pǝrwǝrdigar, jǝng mǝydanida ⱪudrǝtliktur! 7
I ⱪowuⱪlar, bexinglarni kɵtürünglar!
Kǝng eqilinglar!
I mǝnggülük ixiklǝr, bexinglarni kɵtürünglar!
Xuning bilǝn xan-xǝrǝp igisi Padixaⱨ kiridu!
Xan-xǝrǝp igisi Padixaⱨ degǝn kim?
Samawiy ⱪoxunlarning Sǝrdari bolƣan Pǝrwǝrdigar bolsa, xan-xǝrǝp igisi Padixaⱨtur!
Selaⱨ! 8
Source notes (8)
- Cross-reference ◘ Mis. 19:5; Ⱪan. 10:14; Ayup 41:3; Zǝb. 50:12; Mat. 21:2-3; 1Kor. 10:26,28
- Cross-reference ◘ Zǝb. 15:1; Yǝx. 33:14,15
- Footnote ◼ «Ⱪuruⱪ nǝrsilǝrgǝ tǝlmürüp ⱪarimiƣan» — «ⱪuruⱪ nǝrsilǝr» butlarni kɵrsitidu.
- Footnote ◼ «... tapxuruwalidu wǝ uni kɵtüridu» — bu ikki peil ibraniy tilida birla peil bilǝn ipadilinidu.
- Footnote ◼ «...Yǝni Sening didaringni izdigüqilǝr, i Yaⱪupning Hudasi!» — sɵzmusɵz ibraniy tilida: «Yǝni Sening didaringni izdigüqilǝr, i Yaⱪup!». Bu tǝrjimisi toƣra bolsa, «Yaⱪup» muxu yǝrdǝ Mǝsiⱨni kɵrsitidu. Yǝnǝ birhil tǝrjimisi «Yǝni Sening didaringni izdigüqilǝr bolƣan Yaⱪuptin ibarǝttur».
- Footnote ◼ «I ⱪowuⱪlar, bexinglarni kɵtürünglar! Kǝng eqilinglar! I mǝnggülük ixiklǝr, kɵtürülünglar!» — ⱪǝdimki zamanlarda ⱪowuⱪlar eqilƣanda yuⱪiridin kɵtürülǝtti.
- Cross-reference ◘ Mat. 21:10
- Cross-reference ◘ Mat. 21:10
Muⱪeddes Kalam (yǝngi yeziⱪ). Copyright © 2010 Mukeddes Kalam - Uyghur Bible Translation Committee. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.