Muⱪeddes Kalam (yǝngi yeziⱪ)
Zǝbur 21
21-küy •••• Huda tikligǝn padixaⱨ toƣruluⱪ bir küy
Nǝƣmiqilǝrning bexiƣa tapxurulup oⱪulsun dǝp, Dawut yazƣan küy: —
Padixaⱨ ⱪudritingdin xadlinidu, i Pǝrwǝrdigar;
Ƣǝlibǝ-nijatliⱪingdin u nǝⱪǝdǝr hursǝn bolidu!
Sǝn uning kɵngül tilikini uningƣa ata ⱪilding,
Lǝwlirining tǝlipini rǝt ⱪilƣan ǝmǝssǝn.
Selaⱨ!
Qünki Sǝn esil bǝrikǝtlǝr bilǝn uni ⱪarxi alding;
Uning bexiƣa sap altun taj kiydürdüng.
U Sǝndin ɵmür tilisǝ, Sǝn uningƣa bǝrding,
Yǝni uzun künlǝrni, taki ǝbǝdil’ǝbǝdgiqǝ bǝrding.
U Sening bǝrgǝn ƣǝlibǝ-nijatliⱪingdin zor xǝrǝp ⱪuqti;
Sǝn uningƣa izzǝt-ⱨǝywǝt ⱨǝm xanu-xǝwkǝt ⱪondurdung.
Sǝn uning ɵzini mǝnggülük bǝrikǝtlǝr ⱪilding;
Didaringning xadliⱪi bilǝn uni zor hursǝn ⱪilding; 1
Qünki padixaⱨ Pǝrwǝrdigarƣa tayinidu;
Ⱨǝmmidin Aliy Bolƣuqining ɵzgǝrmǝs muⱨǝbbiti bilǝn u ⱨeq tǝwrǝnmǝydu.
Sening ⱪolung barliⱪ düxmǝnliringni tepip, axkarǝ ⱪilidu;
Ong ⱪolung Sanga ɵqmǝnlik ⱪilƣanlarni tepip axkarǝ ⱪilidu; 2
Sening didaring kɵrüngǝn kündǝ, ularni yalⱪunluⱪ humdanƣa salƣandǝk kɵydürisǝn;
Pǝrwǝrdigar dǝrƣǝzǝp bilǝn ularni yutuwetidu;
Ot ularni kɵydürüp tügitidu.
Ularning tuhumini jaⱨandin,
Nǝsillirini kixilik dunyadin ⱪurutisǝn;
Qünki ular Sanga yamanliⱪ ⱪilixⱪa urundi;
Ular rǝzil bir nǝyrǝngni oylap qiⱪⱪini bilǝn,
Əmma ƣǝlibǝ ⱪilalmidi.
Qünki Sǝn ularni kǝynigǝ buruluxⱪa mǝjbur ⱪilding;
Sǝn ularning yüzigǝ ⱪarap oⱪyayingni qǝnlǝysǝn.
I Pǝrwǝrdigar, Ɵz küqüng bilǝn uluƣluⱪungni namayan ⱪilƣaysǝn;
Xuning bilǝn biz nahxa eytip ⱪudritingni mǝdⱨiyilǝymiz.
Source notes (2)
- Footnote ◼ «Sǝn uning ɵzini mǝnggülük bǝrikǝtlǝr ⱪilding» — bu sɵz bǝlkim Dawutning ǝwladi bolƣan, kǝlgüsidiki Ⱪutⱪuzƣuqi-Mǝsiⱨning Hudaning Ibraⱨimƣa bǝrgǝn ǝng uluƣ wǝdisini ǝmǝlgǝ axuridiƣanliⱪini kɵrsitixi mumkin. Xu wǝdǝ: «Sǝn ɵzüng baxⱪilarƣa bǝht-bǝrikǝt bolisǝn ... Sǝn arⱪiliⱪ yǝr yüzidiki barliⱪ ailǝ wǝ ⱪǝbililǝrgǝ bǝht-bǝrikǝt ata ⱪilinidu» deyilidu («Yar.» 12:1-3dǝ hatirilǝngǝn). Baxⱪa birhil tǝrjimisi: «Sǝn uningƣa mǝnggülük bǝrikǝtlǝrni bekitting».
- Footnote ◼ «Sening ⱪolung barliⱪ düxmǝnliringni tepip, ... Ong ⱪolung Sanga ɵqmǝnlik ⱪilƣanlarni tepip axkarǝ ⱪilidu...» — 8-ayǝttin baxlap, bexarǝtlik sɵzlǝr biwasitǝ padixaⱨⱪa eytilƣan bolsa kerǝk. Roxǝnki, bu ayǝtlǝr padixaⱨ Dawutning ǝwladi bolƣan, kǝlgüsidiki Ⱪutⱪuzƣuqi-Mǝsiⱨni kɵrsitidu.
Muⱪeddes Kalam (yǝngi yeziⱪ). Copyright © 2010 Mukeddes Kalam - Uyghur Bible Translation Committee. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.