Muⱪeddes Kalam (yǝngi yeziⱪ)
Zǝbur 20
20-küy •••• Israil hǝlⱪi Huda Mǝsiⱨ ⱪilƣan padixaⱨning ƣǝlibisi üqün dua ⱪilidu
Nǝƣmiqilǝrning bexiƣa tapxurulup oⱪulsun dǝp, Dawut yazƣan küy: —
Külpǝtlik kündǝ Pǝrwǝrdigar sanga ijabǝt ⱪilƣay!
Yaⱪupning Hudasining nami seni egizdǝ aman saⱪliƣay! 1
U Ɵz muⱪǝddǝs jayidin sanga mǝdǝt ǝwǝtkǝy,
Ziondin sanga küq-ⱪuwwǝt bǝrgǝy;
Barliⱪ axliⱪ ⱨǝdiyǝliringni yad ⱪilƣay,
Kɵydürmǝ ⱪurbanliⱪingni ⱪobul ⱪilƣay!
Selaⱨ!
Kɵnglüngdiki tǝxnaliⱪlarni sanga ata ⱪilƣay,
Kɵnglünggǝ pükkǝn barliⱪ arzuliringni ǝmǝlgǝ axurƣay.
Bizlǝr ƣǝlibǝngni tǝbriklǝp tǝntǝnǝ ⱪilimiz,
Hudayimizning namida tuƣlirimizni tiklǝymiz;
Pǝrwǝrdigar barliⱪ tǝlǝpliringni ǝmǝlgǝ axurƣay!
Ⱨazir bildimki, Pǝrwǝrdigar Ɵzi mǝsiⱨ ⱪilƣinini ⱪutⱪuzidu;
Muⱪǝddǝs ǝrxliridin uningƣa ⱪudrǝtlik ⱪutⱪuzƣuqi ⱪolini uzartip jawab beridu. 2
Bǝzilǝr jǝng ⱨarwiliriƣa,
Bǝzilǝr atlarƣa tayinidu;
Biraⱪ biz bolsaⱪ Pǝrwǝrdigar Hudayimizning namini yad etimiz;
Ular tizi püklinip yiⱪildi;
Biraⱪ biz bolsaⱪ, ⱪǝddimizni ruslap tik turimiz.
I Pǝrwǝrdigar, padixaⱨⱪa ƣǝlibǝ bǝrgǝysǝn;
Nida ⱪilƣinimizda bizgǝ ijabǝt ⱪilƣaysǝn! 3
Source notes (3)
- Footnote ◼ «Yaⱪupning Hudasining nami seni egizdǝ aman saⱪliƣay!» — «Yaⱪupning Hudasi» degǝn muxu ibaridǝ «Yaⱪup» ⱨǝm ⱨǝzriti Yaⱪupning ɵzini ⱨǝmdǝ uningdin qiⱪⱪan Israil hǝlⱪinimu kɵrsitidu.
- Footnote ◼ «Pǝrwǝrdigar Ɵzi mǝsiⱨ ⱪilƣini» — yǝni Israilning padixaⱨi; muxu yǝrdǝ Dawutni kɵrsitidu. Biraⱪ xübⱨisizki, bu küy bir bexarǝt bolup, kǝlgüsidiki Ⱪutⱪuzƣuqi-Mǝsiⱨnimu kɵrsitidu. 2-küydiki izaⱨatlarni wǝ «Tǝbirlǝr»nimu kɵrüng.
- Footnote ◼ «I Pǝrwǝrdigar, padixaⱨⱪa ƣǝlibǝ bǝrgǝysǝn; nida ⱪilƣinimizda bizgǝ ijabǝt ⱪilƣaysǝn!» — baxⱪa birhil tǝrjimisi: — «I Pǝrwǝrdigar, ƣǝlbigǝ erixtürgǝysǝn! Biz nida ⱪilƣan kündǝ Padixaⱨ bizgǝ jawab bǝrgǝy!»
Muⱪeddes Kalam (yǝngi yeziⱪ). Copyright © 2010 Mukeddes Kalam - Uyghur Bible Translation Committee. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.