Zǝbur 145

145-küy •••• Hudaning ⱪilƣan uluƣ ǝmǝllirini keyinki ǝwladⱪa bayan ⱪilix •••• «Elipbǝ tǝrtipilik» küy

1Mǝdⱨiyǝ: Dawut yazƣan küy: —

|א| Mǝn Seni mǝdⱨiyilǝp uluƣlaymǝn, Hudayim, i Padixaⱨ;

Namingƣa ǝbǝdil’ǝbǝdgiqǝ tǝxǝkkür-mǝdⱨiyǝ ⱪayturimǝn.

2|ב| Ⱨǝrküni Sanga tǝxǝkkür-mǝdⱨiyǝ ⱪayturimǝn,

Namingƣa ǝbǝdil’ǝbǝdgiqǝ mǝdⱨiyǝ oⱪuymǝn!

3|ג| Uluƣdur Pǝrwǝrdigar, zor mǝdⱨiyilǝrgǝ layiⱪtur!

Uning uluƣluⱪini sürüxtürüp bolƣili bolmas; 1

4|ד| Bir dǝwr yengi bir dǝwrgǝ Sening ⱪilƣanliringni mahtaydu;

Ular ⱪudrǝtlik ⱪilƣanliringni jakarlaydu; 2

5|ה| Mǝn ⱨǝywitingning xǝrǝplik julaliⱪini,

Wǝ karamǝt mɵjiziliringni seƣinip sɵzlǝymǝn;

6|ו|: Xuning bilǝn ular ⱪorⱪunqluⱪ ixliringning ⱪudritini bayan ⱪilidu;

Mǝnmu uluƣ ǝmǝlliringni jakarlaymǝn!

7|ז| Ular zor meⱨribanliⱪingni ǝslǝp, uni mubarǝklǝp tarⱪitidu,

Ⱨǝⱪⱪanliyliⱪing toƣruluⱪ yuⱪiri awazda küylǝydu. 3

8|ח| Pǝrwǝrdigar meⱨir-xǝpⱪǝtlik ⱨǝm rǝⱨimdildur;

Asan ƣǝzǝplǝnmǝydu, U zor meⱨir-muⱨǝbbǝtliktur; 4

9|ט| Pǝrwǝrdigar ⱨǝmmigǝ meⱨribandur;

Uning rǝⱨimdilliⱪliri barqǝ yaratⱪanlirining üstididur;

10|י| Sening barliⱪ yasiƣanliring Seni mǝdⱨiyilǝydu, i Pǝrwǝrdigar,

Sening mɵmin bǝndiliring Sanga tǝxǝkkür-mǝdⱨiyǝ ⱪayturidu.

11|כ| Ular padixaⱨliⱪingning xǝripidin hǝwǝr yǝtküzidu,

Küq-ⱪudritingni sɵzlǝydu;

12|ל| Xundaⱪ ⱪilip insan baliliriƣa ⱪudrǝtlik ixliring,

Padixaⱨliⱪingning xǝrǝplik ⱨǝywisi ayan ⱪilinidu.

13|מ| Sening padixaⱨliⱪing ǝbǝdiy padixaⱨliⱪtur,

Sǝltǝniting ǝwladtin-ǝwladⱪiqidur. 5

14|ס| Pǝrwǝrdigar yiⱪilay degǝnlǝrning ⱨǝmmisini yɵlǝydu,

Egilip ⱪalƣanlarning ⱨǝmmisini turƣuzidu.

15|ע| Ⱨǝmmǝylǝnning kɵzliri Sanga tikilip kütidu;

Ularƣa ɵz waⱪtida rizⱪini tǝⱪsim ⱪilip berisǝn; 6

16|פ| Ⱪolungni eqixing bilǝnla,

Barliⱪ jan igilirining arzusini ⱪandurisǝn.

17|צ| Pǝrwǝrdigar barliⱪ yollirida ⱨǝⱪⱪaniydur,

Yasiƣanlirining ⱨǝmmisigǝ muⱨǝbbǝtliktur.

18|ק| Pǝrwǝrdigar Ɵzigǝ nida ⱪilƣanlarning ⱨǝmmisigǝ yeⱪindur,

Ɵzigǝ ⱨǝⱪiⱪǝttǝ nida ⱪilƣanlarning ⱨǝmmisigǝ yeⱪindur;

19|ר| U Ɵzidin ǝyminidiƣanlarning arzusini ǝmǝlgǝ axuridu;

Ularning pǝryadini anglap ularni ⱪutⱪuzidu.

20|ש| Pǝrwǝrdigar Ɵzini sɵygǝnlǝrning ⱨǝmmisidin hǝwǝr alidu;

Rǝzillǝrning ⱨǝmmisini yoⱪitidu.

21|ת| Aƣzim Pǝrwǝrdigarning mǝdⱨiyisini eytidu;

Barliⱪ ǝt igiliri ǝbǝdil’ǝbǝd uning muⱪǝddǝs namiƣa tǝxǝkkür-mǝdⱨiyǝ ⱪayturƣay!