Muⱪeddes Kalam (yǝngi yeziⱪ)
Zǝbur 141
141-küy •••• Rǝzillik bilǝn murǝssǝ ⱪilƣili bolmaydu
Dawut yazƣan küy: —
Pǝrwǝrdigar, mǝn Sanga nida ⱪildim;
Yenimƣa tezdin kǝlgǝysǝn;
Sanga nida ⱪilƣinimda awazimni angliƣaysǝn.
Duayimni angliƣiningda, Sanga sunulƣan huxbuydǝk yeⱪimliⱪ bolsun,
Ⱪolumning kɵtürülüxi sunulƣan kǝqlik ⱪurbanliⱪtǝk ⱪobul bolsun. 1 2
Aƣzim aldida kɵzǝtqi turƣuzƣaysǝn, i Pǝrwǝrdigar;
Lǝwlirim dǝrwazisini saⱪliƣaysǝn;
Kɵnglümni ⱨeqⱪandaⱪ yaman ixⱪa,
Ⱪǝbiⱨlik ⱪilƣuqilarƣa xerik bolup, rǝzillik ⱪilixⱪa mayil ⱪilmiƣaysǝn.
Meni ularning nemǝtliridin ⱨeq yegüzmigǝysǝn!
Ⱨǝⱪⱪaniy adǝm meni ursun —
Bu manga meⱨribanliⱪtur;
Manga tǝnbiⱨ bǝrsun —
Bu bolsa, bexim rǝt ⱪilmaydiƣan, ⱪuyulƣan esil maydǝk bolidu.
Qünki mening duayim yǝnila xularning rǝzilliklirigǝ ⱪarxi bolidu. 3
Ularning ⱨakimliri tik yarlardin taxliwetilgǝndǝ,
Hǝlⱪ mening sɵzlirimni anglaydu;
Qünki bu sɵzlǝr xerindur. 4
Birsi otun yarƣanda yǝrgǝ qeqilƣan yerindilardǝk,
Mana, ustihanlirimiz tǝⱨtisara ixiki aldida qeqiwetildi; 5 6
Bǝrⱨǝⱪ, kɵzlirim Sangila tikilip ⱪaraydu, Pǝrwǝrdigar Rǝbbim;
Sanga tayinimǝn;
Jenimni harab ⱪilip taxliwǝtmigǝysǝn.
Ularning manga salƣan ⱪiltiⱪidin,
Ⱪǝbiⱨlik ⱪilƣuqilarning tuzaⱪliridin meni saⱪliƣaysǝn;
Rǝzillǝr ɵzining torliriƣa yiⱪilsun,
Mǝn bolsam — ɵtüp ketimǝn.
Source notes (6)
- Footnote ◼ «Ⱪolumning kɵtürülüxi sunulƣan kǝqlik ⱪurbanliⱪtǝk ⱪobul bolsun» — yaki «Ⱪolumning kɵtürülüxi sunulƣan kǝqlik axliⱪ ⱨǝdiyǝsidǝk ⱪobul bolsun» — ibadǝthanida kaⱨinlar kǝqlik ⱪurbanliⱪ yaki ⱨǝdiyǝ sunuxtin awwal, ⱪoli bilǝn xu ⱪurbanliⱪ-ⱨǝdiyǝlǝrni Huda aldida kɵtürǝtti.
- Cross-reference ◘ Mis. 29:30; Wǝⱨ. 5:8; 8:3
- Footnote ◼ «Qünki mening duayim yǝnila xularning rǝzilliklirigǝ ⱪarxi bolidu» — baxⱪa birhil tǝrjimisi: «Qünki mening duayim ularƣa (rǝzillǝrgǝ) külpǝt qüxkǝndǝ ular üqün dawamlixiweridu» (ibraniy tilida «yamanliⱪ» ⱨǝm «külpǝt» bir sɵz bilǝn ipadilinidu).
- Footnote ◼ «Hǝlⱪ mening sɵzlirimni anglaydu; qünki bu sɵzlǝr xerindur» — «xerin» bǝlkim muxu yǝrdǝ «jayida, orunluⱪ» degǝn mǝnidǝ.
- Footnote ◼ «Birsi otun yarƣanda yǝrgǝ qeqilƣan yerindilardǝk, mana, ustihanlirimiz tǝⱨtisara ixiki aldida qeqiwetildi» — ayǝtning birnǝqqǝ tǝrjimiliri bar. Ibraniy tilidiki nushisida, muxu sɵz intayin ihqam bolup, qüxinix tǝs.
- Cross-reference ◘ Əz. 37:1,11,12
Muⱪeddes Kalam (yǝngi yeziⱪ). Copyright © 2010 Mukeddes Kalam - Uyghur Bible Translation Committee. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.