Muⱪeddes Kalam (yǝngi yeziⱪ)

Zǝbur 10

10-küy •••• — 10-küy 9-küy dawami •••• 1-ayǝttiki izaⱨatni kɵrüng

Nemixⱪa, i Pǝrwǝrdigar, yiraⱪta turisǝn?

Nemixⱪa azabliⱪ künlǝrdǝ ɵzüngni yoxurisǝn? 1

Rǝzil adǝmlǝr tǝkǝbburluⱪi bilǝn ajiz mɵminlǝrni tap basturup ⱪoƣlap yüridu;

Ular ɵzliri tapⱪan ⱨiylilǝr bilǝn ilinip, bablinidu. 2 3

Qünki rǝzillǝr ɵz arzu-ⱨǝwǝsliri bilǝn mahtinidu;

Aq kɵzlǝr üqün bǝht tilǝydu;

Pǝrwǝrdigarni bolsa kɵzigǝ ilmaydu. 4

Ular qirayidin ⱨakawurluⱪ yaƣdurup,

Hudani izdimǝydu;

Ular barliⱪ hiyallirida: «Ⱨeqbir Huda yoⱪtur!» dǝydu. 5

Ularning yolliri ⱨǝmixǝ rawan bolidu;

Sening ⱨɵkümliring ularning nǝziridin yiraⱪ wǝ üstün turidu;

Ularning rǝⱪibliri bolsa, ularƣa ⱪarap «tüfi!» dǝp mazaⱪ ⱪilidu.

Rǝzil adǝm kɵnglidǝ: «Mǝn ⱨeq tǝwrǝnmǝy turuwerimǝn!

Dǝwrdin-dǝwrgǝ ⱨeq muxǝⱪⱪǝtkǝ uqrimaymǝn» — dǝydu.

Uning aƣzi ⱪarƣax, aldamqiliⱪ ⱨǝm zulumƣa tolƣan;

Tili astida ǝskilik wǝ ⱪǝbiⱨlik yatidu. 6

U mǝⱨǝllilǝrdǝ yoxurunqǝ marap olturidu;

U pinⱨan jaylarda gunaⱨsizlarni ɵltürüwetidu;

Kɵzliri yoⱪsullarni kɵzlǝydu;

U qatⱪalliⱪida yatⱪan xirdǝk yoxurunqǝ paylap yatidu;

U mɵminlǝrni tutuwelix üqün yoxurunqǝ marap yatidu;

Mɵminlǝrni tutuwelip, ularni ɵz toriƣa qüxüridu.

Yoⱪsullar ezilidu, pükülidu;

Dǝrdmǝnlǝr uning yawuzluⱪliri bilǝn yiⱪilidu. 7

U kɵnglidǝ: «Tǝngri buni untup ⱪaldi,

U yüzini yepiwelip, ⱪarimaydu;

Buni ⱨǝrgiz kɵrmǝydu» — dǝydu. 8 9

Ornungdin turƣin, i Pǝrwǝrdigar;

I Tǝngrim, ⱪolungni kɵtürgin;

Ezilgǝn mɵminlǝrni untuma!

Rǝzil adǝm nemixⱪa Sǝn Hudani kɵzigǝ ilmaydu?

U kɵnglidǝ: «Huda buni sürüxtürmǝydu!» — dǝydu.

Sǝn buni kɵrgǝnsǝn;

Sǝn Ɵz ⱪolung bilǝn yamanliⱪ ⱨǝm zulumni ɵzlirigǝ ⱪayturux üqün,

Ɵzüng bularni kɵzlǝp yürisǝn;

Dǝrdmǝnlǝr ɵzlirini Sanga amanǝt ⱪilidu;

Qünki Sǝn yetim-yesirlǝrgǝ yar-yɵlǝk bolup kǝlgǝnsǝn;

Rǝzil, yaman adǝmning bilikini sunduruwǝtkǝysǝn;

Uning rǝzillikini birmubir sürüxtürüp, üzül-kesil yoⱪatⱪaysǝn.

Pǝrwǝrdigar ǝbǝdil’ǝbǝdgiqǝ padixaⱨdur;

Imansiz ǝllǝr bolsa Pǝrwǝrdigarning zeminidin yoⱪilar. 10 11

Pǝrwǝrdigar, Sǝn ajiz mɵminlǝrning armanlirini anglaysǝn;

Ularning dilini toⱪ ⱪilisǝn;

Yetim-yesirlar wǝ ezilgüqilǝr üqün adalǝtni yaⱪlap,

Yǝr yüzidiki insanlarning ajiz-mɵminlǝrgǝ ⱪaytidin wǝⱨimǝ salƣuqi bolmasliⱪi üqün,

Ⱪuliⱪingni ding tutisǝn. 12

Source notes (12)

Footnote ◼ «Nemixⱪa, i Pǝrwǝrdigar, yiraⱪta turisǝn? Nemixⱪa azabliⱪ künlǝrdǝ ɵzüngni yoxurisǝn?» — 10-küyning 9-küy bilǝn sirliⱪ alaⱪisi bar; 9-küy ⱨǝm 10-küydiki ayǝtlǝr ibraniy tilida alaⱨidǝ xǝkilgǝ igǝ. Ibraniy yeziⱪida 22 ⱨǝrp bar. Bu ikki küydiki taⱪ ayǝtlǝrning ⱨǝrbiri ibraniy elipbǝ tǝrtipigǝ asasǝn yengi ⱨǝrp bilǝn baxlinidu (mǝsilǝn, uyƣur tili bolsa, a-, ǝ-, b- ⱪatarliⱪ ⱨǝrplǝr bilǝn baxlanƣanƣa ohxax). 9-küy ⱨǝm 10-küyni bir-birigǝ baƣliƣanda, toluⱪ «elipbǝlik nusha» pǝyda bolidu. Keyin muxundaⱪ küyni «elipbǝ tǝrtipilik» küy dǝp ataymiz.
Footnote ◼ «Ular ɵzliri tapⱪan ⱨiylilǝr bilǝn ilinip, bablinidu» — yaki «Ajizlar ularning ⱨiyliliri bilǝn ilinip ⱪalidu».
Cross-reference ◘ Zǝb. 7:16; 9:15-16; Pǝnd. 5:22
Footnote ◼ «Aq kɵzlǝr üqün bǝht tilǝydu; Pǝrwǝrdigarni bolsa kɵzigǝ ilmaydu» — yaki «Aq kɵzlǝr adǝmni tillap, Pǝrwǝrdigarni qǝtkǝ ⱪaⱪidu».
Cross-reference ◘ Zǝb. 14:1-3; 53:1-3
Cross-reference ◘ Rim. 3:14
Footnote ◼ «Dǝrdmǝnlǝr uning yawuzluⱪliri bilǝn yiⱪilidu» — «yawuzluⱪliri» bǝlkim kɵqmǝ mǝnidǝ bolup, xirning küqlük putlirini yaki qixlirini wǝ yaki owqilarning torlirini (9-ayǝt) kɵrsitixi mumkin.
Footnote ◼ «U yüzini yepiwelip, ⱪarimaydu» —yaki «U yüzini yepip ⱪarimaydu» yaki «U yüzini yoxurup ⱪarimaydu»
Cross-reference ◘ Zǝb. 64:5; 73:11; 94:7
Footnote ◼ «Imansiz ǝllǝr bolsa Pǝrwǝrdigarning zeminidin yoⱪilar» — ibraniy tilida «ǝllǝr» muxu yǝrdǝ Hudaning yolini rǝt ⱪilidiƣan yat ǝllǝrni kɵrsitidu. «Pǝrwǝrdigarning zemini» — ibraniy tilida «uning zemini». Hudaning bu zemini bolsa, Israilƣa miras ⱪilƣan Ⱪanaan zemini (Pǝlǝstin)dur.
Cross-reference ◘ Zǝb. 29:10; 93:1; 145:13; 146:10; Yǝr. 10:10; Yiƣ. 5:19; Dan. 3:33; 6:27; 1Tim. 1:17
Cross-reference ◘ Yǝx. 57:1

Muⱪeddes Kalam (yǝngi yeziⱪ). Copyright © 2010 Mukeddes Kalam - Uyghur Bible Translation Committee. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-10-25.