Muⱪeddes Kalam (yǝngi yeziⱪ)

Misirdin qiⱪix 15

Musaning Hudaƣa mǝdⱨiyǝ oⱪuxi

Xu qaƣda Musa bilǝn Israillar Pǝrwǝrdigarƣa mǝdⱨiyǝ oⱪup munu küyni eytti: —

«Mǝn Pǝrwǝrdigarni mǝdⱨiyilǝp küy eytay,

Qünki U karamǝt uluƣluⱪini kɵrsǝtti;

U at wǝ mingüqini dengizƣa taxliwǝtti. 1 2

Mening küqüm ⱨǝm mening küyüm Yaⱨ Ɵzidur;

U manga nijat boldi;

U mening Tǝngrimdur, mǝn Uni uluƣlaymǝn;

U mening atamning Hudasidur, mǝn Uni aliy dǝp mǝdⱨiyilǝymǝn. 3 4

Pǝrwǝrdigar jǝngqidur,

Yaⱨwǝⱨ Uning namidur. 5

Pirǝwnning jǝng ⱨarwilirini ⱨǝm ⱪoxunlirini dengizƣa taxliwǝtti;

Uning aliy lǝxkǝr baxliⱪliri Ⱪizil Dengizda ƣǝrⱪ ⱪilindi.

Qongⱪur sular ularni kɵmüwǝtti,

Ular huddi taxtǝk dengiz tegigǝ qɵküp kǝtti. 6

Sening ong ⱪolung, ǝy Pǝrwǝrdigar,

Ⱪudriti bilǝn xan-xǝrǝp tapti;

Sening ong ⱪolung, ǝy Pǝrwǝrdigar,

Düxmǝnni kukum-talⱪan ⱪiliwǝtti. 7

Ɵz uluƣluⱪungning ⱨǝywisi bilǝn Ɵzünggǝ ⱪarxi qiⱪⱪanlarni nabut ⱪilding,

Sǝn otluⱪ ƣǝzipingni ǝwǝtting,

U samanni kɵydürgǝn ottǝk ularni yutuwǝtti.

Dimiƣingning nǝpisi bilǝn sular dɵng bolup ɵrlidi,

Juxⱪunliƣan dolⱪunlar dɵng kǝbi tik turdi,

Dengizning otturisidiki qongⱪur sular ⱪaturup ⱪoyuldi. 8 9

Düxmǝn dedi: «Mǝn ularni ⱪoƣlaymǝn, yetiximǝn, olja elip ülǝxtürimǝn,

Ulardin dǝrdimni qiⱪirimǝn,

Ⱪiliqimni suƣurup, ɵz ⱪolum bilǝn ularni nabut ⱪilimǝn».

Lekin Sǝn nǝpising bilǝn püwliding,

Dengiz ularni kɵmüwǝtti;

Ular juxⱪunluⱪ sularda ⱪoƣuxundǝk qɵküp kǝtti. 10

Ilaⱨlarning arisida, ǝy Pǝrwǝrdigar,

Kim Sening tǝngdixing bolsun?

Pak-muⱪǝddǝslik iqidǝ Ɵz ⱨǝywitingni kɵrsitidiƣan,

Ⱨǝmd-mǝdⱨiyilǝr arisida dǝⱨxǝtlik turidiƣan,

Mɵjizǝ-karamǝt yaritidiƣan,

Sǝndǝk kim bolsun?

Sǝn ong ⱪolungni uzitixing bilǝn,

Yǝr-zemin ularni yutuwǝtti.

Lekin Ɵzünggǝ ⱨǝmjǝmǝt ⱪilip ⱪutⱪuzƣan ⱪowmni rǝⱨimdilliⱪing bilǝn baxlap qiⱪting;

Sǝn ularni Ɵz muⱪǝddǝs makaningƣa ⱪudriting bilǝn ⱨidayǝt ⱪilip yetǝkliding. 11

Yat hǝlⱪlǝr buni anglap, titrixip kǝtti;

Filistiyǝdǝ turuwatⱪanlarni tolƣaⱪtǝk azab tutti.

Andin Edomning ǝmirliri dǝkkǝ-dükkigǝ qüxti;

Moabning palwanlirini bolsa, rasa titrǝk basti;

Ⱪanaan zeminidikilǝrning yüriki su bolup aⱪti; 12

Ⱪorⱪunq wǝ dǝⱨxǝt ularni basti;

Bilikingning ⱨǝywiti bilǝn ular huddi taxtǝk midirliyalmay ⱪaldi;

Hǝlⱪing ɵtüp kǝtküqǝ, i Pǝrwǝrdigar,

Ɵzüng rǝnǝ tɵlǝp ⱨɵr ⱪilƣan hǝlⱪing ɵtüp bolƣuqǝ. 13 14

Ularni baxlap kirip,

Ɵz mirasing bolƣan taƣda kɵqǝttǝk tikisǝn,

Ɵz makaning ⱪilƣan jayƣa, i Pǝrwǝrdigar,

Ɵz ⱪolliring tǝyyarliƣan muⱪǝddǝs jayƣa, i Rǝb, ularni elip barisǝn. 15

Pǝrwǝrdigar ǝbǝdil’ǝbǝdgiqǝ padixaⱨ bolup ⱨɵküm süridu!

Qünki Pirǝwnning atliri,

Jǝng ⱨarwiliri atliⱪliri bilǝn billǝ dengizƣa kirip boldi;

Pǝrwǝrdigar dengizning sulirini ularning üstigǝ yandurdi,

Lekin Israillar bolsa dengizning otturisidin ⱪuruⱪ yǝrdin mengip ɵtüp kǝtti». 16

Andin Ⱨarunning ⱨǝdisi pǝyƣǝmbǝr Mǝryǝm ⱪoliƣa dapni aldi, barliⱪ ⱪiz-ayallarmu ⱪoliƣa dap elip, ussul oynixip uningƣa ǝgǝxti. 17

Mǝryǝm ularƣa jawabǝn mundaⱪ küyni oⱪudi: —

«Pǝrwǝrdigarni mǝdⱨiyilǝp küy eytinglar,

Qünki U zor uluƣluⱪini kɵrsǝtti;

U at wǝ mingüqini dengizƣa taxliwǝtti!». 18

Huda hǝlⱪni sinaydu — Maraⱨtiki aqqiⱪ su

Andin Musa Israillarni Ⱪizil Dengizdin baxlap, Xur qɵligǝ elip bardi. Ular uda üq kün qɵldǝ yürüp, su tapalmidi. Andin ular Maraⱨⱪa yetip kǝldi; lekin u yǝrning süyi aqqiⱪ bolup, süyini iqkili bolmaytti; xunga u jayning nami «Maraⱨ» dǝp ⱪoyulƣan. 19 20 U waⱪitta halayiⱪ: — Biz nemǝ iqimiz? — dǝp Musadin aƣrinip ƣotuldaxⱪili turdi.

U Pǝrwǝrdigarƣa pǝryad kɵtürdi; Pǝrwǝrdigar uningƣa bir dǝrǝhni kɵrsǝtti; u dǝrǝh yaƣiqini elip, suƣa taxliwidi, su tatliⱪ suƣa aylandi. U yǝrdǝ Pǝrwǝrdigar ularƣa ⱨɵküm-bǝlgilimǝ bekitip, ularni sinap, mundaⱪ dedi: — «Əgǝr silǝr kɵngül ⱪoyup Hudayinglar Pǝrwǝrdigarning sɵzini anglap, Uning nǝziridǝ durus bolƣanni ⱪilip, ǝmrlirigǝ ⱪulaⱪ selip, barliⱪ ⱨɵkümlirini tutsanglar, undaⱪta, Mǝn misirliⱪlarning üstigǝ salƣan kesǝllǝrdin ⱨeqbirini üstünggǝ salmaymǝn; qünki Mǝnki silǝrgǝ xipaliⱪ bǝrgüqi Pǝrwǝrdigardurmǝn». 21

Andin ular Elimƣa yetip kǝldi. Xu yǝrdǝ on ikki bulaⱪ bilǝn yǝtmix horma dǝrihi bar idi; ular xu yǝrdǝ sularning boyida qedir tikti.

Source notes (21)

Footnote ◼ «U karamǝt uluƣluⱪini kɵrsǝtti» — yaki «U xanliⱪ ƣǝlibǝ ⱪuqti».
Cross-reference ◘ Zǝb. 106:12
Footnote ◼ «Yaⱨ» —Muxu tǝrjimidǝ biz Hudaning «Yaⱨwǝⱨ» yaki «Yǝⱨowaⱨ» degǝn namini «Pǝrwǝrdigar» dǝp tǝrjimǝ ⱪilduⱪ. «Yaⱨ» bolsa «Yaⱨwǝⱨ» degǝn bu ismining ⱪisⱪartilƣan xǝklidur.
Cross-reference ◘ Zǝb. 18:2; Zǝb. 118:14; Yǝx. 12:2
Footnote ◼ «Yaⱨwǝⱨ» —Muxu tǝrjimidǝ biz Hudaning «Yaⱨwǝⱨ» yaki «Yǝⱨowaⱨ» degǝn namini adǝttǝ «Pǝrwǝrdigar» dǝp tǝrjimǝ ⱪilduⱪ. Mǝnisi «Əzǝldin Bolƣuqi». 3:13-14 wǝ izaⱨatni kɵrüng.
Cross-reference ◘ Nǝⱨ. 9:11
Cross-reference ◘ Zǝb. 118:15,16
Footnote ◼ «Dimiƣingning nǝpisi bilǝn» — yaki «ⱪǝⱨringning roⱨi bilǝn».
Cross-reference ◘ Yǝx. 63:12,13; Ⱨab. 3:10
Cross-reference ◘ Zǝb. 74:13; 106:11
Footnote ◼ «ⱨǝmjǝmǝt ⱪilip ⱪutⱪuzƣan» — muxu ibarǝ ibraniy tilida «daal» degǝn bir peil bilǝnla ipadilinidu. Bu peil toƣruluⱪ «Tǝbirlǝr» wǝ «Ayup» 19:25 wǝ izaⱨatinimu kɵrüng. «Ɵz muⱪǝddǝs makaningƣa» — ibraniy tilida «Ɵz muⱪǝddǝslikingning makaniƣa».
Cross-reference ◘ Ⱪan. 2:4
Footnote ◼ «Ɵzüng rǝnǝ tɵlǝp ⱨɵr ⱪilƣan hǝlⱪing» — bu uⱪum yuⱪiriⱪi 13-ayǝttiki «Sǝn ⱨǝmjǝmǝt ⱪilip ⱪutⱪuzƣan... hǝlⱪing» degǝn uⱪumƣa yeⱪindur. «... Ɵzüng rǝnǝ tɵlǝp ⱨɵr ⱪilƣan hǝlⱪing ɵtüp bolƣuqǝ» — bu ayǝt bexarǝt bolup: (1) Ⱪanaandiki hǝlⱪ wǝ Moabtiki aⱨalilǝr Hudaning hǝlⱪining Misirdin qiⱪⱪinini anglap ulardin intayin ⱪorⱪidu («Yǝ.» 2:8-11ni kɵrüng); (2) keyinki künlǝrdǝ Israil Ⱪanaan zeminini igilǝxkǝ Iordan dǝryasidin «ɵtidu». Bu ix bolƣuqǝ ⱨeqⱪandaⱪ baxⱪa ǝl-millǝt ularning yolini tosuwalalmaydu (17-ayǝtni kɵrüng).
Cross-reference ◘ Ⱪan. 2:25; 11:25; Yǝ. 2:9
Cross-reference ◘ 1Pad. 8:13, 39; Yu. 14:2
Footnote ◼ «...ⱪuruⱪ yǝrdin mengip ɵtüp kǝtti» — bǝzi tǝrjimilǝrdǝ Musaning bu xeiri 18-ayǝt bilǝn tohtaydu.
Cross-reference ◘ 1Sam. 18:6
Footnote ◼ «U zor uluƣluⱪini kɵrsǝtti» — yaki «U xanliⱪ ƣǝlibǝ ⱪuqti».
Footnote ◼ «Maraⱨ» — «aqqiⱪ» degǝn mǝnidǝ.
Cross-reference ◘ Qɵl. 33:8
Footnote ◼ «Pǝrwǝrdigarning sɵzini» — ibraniy tilida «Pǝrwǝrdigarning awazini».

Muⱪeddes Kalam (yǝngi yeziⱪ). Copyright © 2010 Mukeddes Kalam - Uyghur Bible Translation Committee. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-10-25.