Muqeddes Kalam (latin yéziq)
Zebur 99
99-küy •••• Muqeddes Xudagha medhiye
Perwerdigar höküm süridu!
Xelqler titrisun!
U kérublar otturisida olturidu;
Yer-jahan zilzilige kelsun!
Perwerdigar Zionda büyüktur,
U barliq xelqler üstide turidighan aliydur.
Ular ulugh we sürlük namingni medhiyileydu;
U pak-muqeddestur!
Padishahning qudriti adaletke béghishlan’ghandur;
Özüng durusluqni mehkem ornatqansen;
Sen Yaqup arisida adalet we heqqaniyet yürgüzgen.
Perwerdigar Xudayimizni ulughlanglar!
Textiperi aldida égilip sejde qilinglar —
U muqeddestur!
Uning kahinliri arisida Musa we Harun bar idi,
Namini chaqirghanlar ichide Samuilmu hazir idi;
Ular Perwerdigargha iltija qilip, chaqirdi,
U ulargha jawab berdi.
Xuda bulut tüwrükide ulargha sözlidi;
Ular U tapshurghan agah-guwahliqlargha hem nizam-belgilimige emel qilishatti.
I Perwerdigar Xudayimiz, Sen ulargha jawab berding;
Yaman qilmishlirigha yarisha jaza bergen bolsangmu,
Sen ularni kechürgüchi Ilah iding.
Perwerdigar Xudayimizni ulughlanglar!
Uning muqeddes téghida égilip sejde qilinglar!
Chünki Perwerdigar Xudayimiz muqeddestur!
Muqeddes Kalam (latin yéziq). Copyright © 2010 Mukeddes Kalam - Uyghur Bible Translation Committee. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.