Muqeddes Kalam (latin yéziq)
Zebur 62
62-küy •••• Xudani telmürüp kütüsh
Neghmichilerning béshi Yedutun’gha tapshurulghan, Dawut yazghan küy: —
Jénim Xudaghila qarap sükütte kütidu;
Méning nijatliqim uningdindur. 1
Peqet Ula méning qoram téshim we méning nijatliqim,
Méning égiz qorghinimdur;
Men unchilik tewrinip ketmeymen. 2
Siler qachan’ghiche shu ajiz bir insan’gha hujum qilisiler?
Hemminglar qingghiyip qalghan tamni,
Irghanglap qalghan qashani ghulatqandek, uni ghulatmaqchisiler?
Uni shöhret-heywitidin chüshürüwétishtin bashqa, ularning héch mesliheti yoqtur;
Yalghanchiliqlardin xursen ular;
Aghzida bext tiligini bilen,
Ular ichide lenet oquydu.
Sélah.
I jénim, Xudaghila qarap sükütte kütkin;
Chünki méning ümidim Uningdindur.
Peqet U méning qoram téshim hem méning nijatliqim,
Méning égiz qorghinimdur;
Men tewrinip ketmeymen.
Nijatliqim hem shan-shöhritim Xudagha baghliqtur;
Méning küchüm bolghan qoram tash, méning panahgahim Xudadidur.
I xalayiq, Uninggha herdaim tayininglar!
Uning aldida ich-baghringlarni tökünglar;
Xuda bizning panahgahimizdur!
Sélah.
Addiy bendiler peqet bir tiniq,
Ésilzadilermu bir yalghan söz xalas;
Tarazigha sélinsa ularning qilche salmiqi yoq,
Bir tiniqtinmu yéniktur.
Zomigerlikke tayanmanglar;
Bulangchiliqtin xam xiyal qilmanglar,
Bayliqlar awusimu, bulargha könglünglarni qoymanglar;
Xuda bir qétim éytqanki,
Mundaq déginini ikki qétim anglidimki: —
«Küch-qudret Xudagha mensuptur».
Hem i Reb, Sanga özgermes muhebbetmu mensuptur;
Chünki Sen herbir kishige öz emilige yarisha qayturisen. 3
Source notes (3)
- Footnote ◼ «Neghmichilerning béshi Yedutun’gha tapshurulghan, Dawut yazghan küy» — «Yedutun»: Dawut peyghember «medhiye xori»ning yétekchisi dep békitken, Yedutun isimlik bir kishini körsitidu («1Tar.» 16:41ni körüng). Yene birxil terjimisi: «Neghmichilerning béshigha tapshurulup, «Yedutun» (medhiyilesh dégen menide) ahangida oqulsun dep Dawut yazghan küy: —....».
- Footnote ◼ «Men unchilik tewrinip ketmeymen» — yaki bashqa birxil terjimisi «Zor éghirchiliqtimu tewrenmeymen».
- Cross-reference ◘ Ayup 34:11; Pend. 24:12; Yer. 32:19; Ez. 7:27; 33:20; Mat. 16:27; Rim. 2:6; 2Kor. 5:10; Ef. 6:8; Kol. 3:25; 1Pét. 1:17; Weh. 22:12
Muqeddes Kalam (latin yéziq). Copyright © 2010 Mukeddes Kalam - Uyghur Bible Translation Committee. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.