Muqeddes Kalam (latin yéziq)
Zebur 58
58-küy •••• Zalim hökümranlarni Xuda jazalighay!
Neghmichilerning béshigha tapshurulup, «Halak qilmighaysen» dégen ahangda oqulsun dep, Dawut yazghan «Mixtam» küyi: —
I qudret igiliri, siler heqiqeten adaletni sözlewatamsiler?
I insan baliliri, adil höküm chiqiramsiler? 1
Yaq, siler könglünglerde yamanliq teyyarlaysiler;
Yer yüzide öz qolunglar bilen qilidighan zorawanliqni ölchewatisiler.
Reziller anisining qorsiqidila ézip kétidu;
Ular tughulupla yoldin adiship, yalghan sözleydu.
Ularning zehiri yilanning zehiridur;
Ular öz quliqini pütük qilghan gas kobra yilandek, 2
Meyli yilanchilar shunche chirayliq séhirlisimu,
U ney awazigha qet’iy qulaq salmaydu. 3
I Xuda, ularning aghzidiki chishlirini sunduruwetkeysen!
Mushu yash shirlarning tongkay chishlirini chéqiwetkeysen, i Perwerdigar!
Ular éqip ketken sulardek ötüp ketkey;
Ular oqlarni chenlep atqanda,
Oqliri uchsiz bolup ketkey!
Qulule yol mangghanda izi yoqilip ketkendek,
Ular yoqap ketsun;
Ayalning chüshüp ketken hamilisidek,
Ular kün körmisun!
Qazan yantaqlarning issiqini sezgüche,
(Meyli ular yumran péti, yaki ot tutashqan bolsun)
U ularni tozutuwétidu. 4
Heqqaniy adem Xudaning intiqamini körgende xushal bolidu;
Öz izlirini rezillerning qénida yuyidu.
Shunga ademler: «Derweqe, heqqaniylar üchün in’am bardur;
Derweqe yer yüzide höküm yürgüzgüchi bir Xuda bardur» — deydu.
Source notes (4)
- Footnote ◼ «Siler heqiqeten adaletni sözlewatamsiler?» — bashqa birxil terjimisi: «Adalet zuwansiz bolup qaldimu? Némishqa sözlimeysiler?». Buninggha oxshap kétidighan bashqa birnechche terjimiler bar. Belkim sürgün bolghan Dawutning közde tutqini (esli özini hörmetleydighan) ordidiki emeldarlarning uning dewasini Saul padishah aldida sözlimigini.
- Cross-reference ◘ Zeb. 140:3
- Footnote ◼ «Meyli yilanchilar shunche chirayliq séhirlisimu» — «yilanchi»: chélip yilanlarni oynitidighan kishi.
- Footnote ◼ «Qazan yantaqlarning issiqini sezgüche, (meyli ular yumran péti, yaki ot tutashqan bolsun) u ularni tozutuwétidu» — toluq ayetning birnechche xil terjimiliri bar; ularning hemmisining omumiy menisi bu terjimige oxshap kétidu.
Muqeddes Kalam (latin yéziq). Copyright © 2010 Mukeddes Kalam - Uyghur Bible Translation Committee. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.