Zebur 138

138-küy •••• Shepqetke rehmetler

1Dawut yazghan küy: —

Pütün qelbim bilen Sanga teshekkür éytimen;

Barliq ilahlar aldida Séni küyleymen. 1

2Pak-muqeddeslikingning ibadetxanisigha qarap bash urimen,

Özgermes muhebbiting hem heqiqet-sadaqiting üchün namingni tebrikleymen;

Chünki Sen pütün nam-shöhritingdinmu bekrek, wedengde turidighiningni ulugh qilghansen. 2

3Sanga nida qilghan künide, manga jawab bergensen;

Jénimgha küch kirgüzüp, méni righbetlendürgensen.

4Aghzingdiki sözlerni anglighanda, i Perwerdigar,

Jahandiki barliq shahlar Séni medhiyileydu;

5Ular Perwerdigarning yollirida yürüp naxsha éytidu,

Chünki ulughdur Perwerdigarning shan-sheripi.

6Chünki Perwerdigar aliydur;

Biraq U hali boshlargha nezer salidu;

Tekebbularni bolsa U yiraqtin tonup yétidu. 3

7Zulmet-musheqqetler arisida mangghan bolsammu,

Sen méni janlandurisen;

Düshmenlirimning ghezipini tosushqa qolungni uzartisen,

Ong qolung méni qutquzidu.

8Perwerdigar manga tewe ishlarni pütküzidu;

Méhir-muhebbiting, i Perwerdigar, menggülüktur;

Öz qolliring yasighanni tashlap ketmigeysen!