Muqeddes Kalam (latin yéziq)
Zebur 12
12-küy •••• Rezil dunyadin saqlash
Neghmichilerning béshigha tapshurulup, shéminit bilen oqulsun dep, Dawut yazghan küy: —
Qutquzghaysen, Perwerdigar, chünki ixlasmen adem tügep ketti;
Ademler arisidin sadiq möminler ghayip boldi. 1 2
Herbirsi öz yéqinlirigha yalghan éytidu;
Xushametchi lewlerde, aliköngüllük bilen sözlishidu.
Perwerdigar barliq xushametchi lewlerni,
Hakawurlarche sözleydighan tilni késiwetkey!
Ular: «Tilimiz bilen ghelibe qilimiz;
Lewlirimiz bolsa özimizningkidur;
Kim bizge Reb bolalisun?» — deydu.
«Ézilgüchi ajizlarni basqan zulum wejidin,
Miskinlerning ahuzarliri wejidin,
Hazirla ornumdin turay» — deydu Perwerdigar,
«Men ulargha, ular zariqip kütken azadliqni yetküzimen». 3
Perwerdigarning sözliri bolsa sap sözlerdur;
Ular yette qétim saplashturulghan,
Sapal qazanda tawlan’ghan kümüshtektur. 4
Sen Perwerdigar, ularni saqlaysen;
Sen möminlerni mushu dewrdin menggüge qoghdaysen; 5
Chünki rezil ademler heryanda ghadiyip yürüshidu,
Peskeshlik insan baliliri arisida aliyjanabliq dep maxtalmaqta!
Source notes (5)
- Footnote ◼ «shéminit bilen oqulsun dep...» — «shéminit» belkim, «sekkiz tarliq saz» yaki «sekkiz notiliq küy» dégen menide.
- Cross-reference ◘ Yesh. 57:1
- Footnote ◼ «Men ulargha, ular zariqip kütken azadliqni yetküzimen» — bashqa birxil terjimisi: «Ularni «tüfi!» dep mazaq qilghuchilardin azad qilimen»
- Cross-reference ◘ 2Sam. 22:31; Zeb. 18:30; 19:8; 119:140; Pend. 30:5
- Footnote ◼ «Sen Perwerdigar, ularni saqlaysen» — «ular» 5-ayette tilgha élin’ghan «ézilgenler» we «miskinler»ni körsitidu.
Muqeddes Kalam (latin yéziq). Copyright © 2010 Mukeddes Kalam - Uyghur Bible Translation Committee. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.