Muqeddes Kalam (latin yéziq)
Zebur 101
101-küy •••• Adil padishah bolushqa bel baghlash
Dawut yazghan küy: —
Men özgermes muhebbet hem adalet toghruluq naxsha éytimen,
Séni, i Perwerdigar, naxshilar bilen küyleymen.
Men mukemmel yolda éhtiyat bilen ish körimen;
Sen qachanmu yénimgha kélisen!?
Öz öy-ordamda sap köngül bilen yürimen.
Héch pasiq nersini köz aldimgha keltürmeymen,
Yoldin chetnigenlerning qilmishlirigha nepretlinimen;
Bundaqlar manga héch yépishmas esla.
Egri köngül méningdin yiraq kétidu,
Héch rezillikni tonughum yoqtur.
Kimki öz yéqinining keynidin töhmet qilghan bolsa,
Men uni yoqitimen;
Neziri üstün, dili tekebbur ademni men sighdurmaymen;
Közlirim zémindiki möminlerdidur,
Ular ordamda men bilen bille tursun!
Kim mukemmel yolda mangsa, u méning xizmitimde bolidu.
Aldamchiliq yürgüzgenlerning öy-ordamda orni bolmaydu,
Yalghan sözligenler köz aldimda turmaydu.
Perwerdigarning shehiridin yamanliq qilghuchilarni üzüp tashlash üchün,
Her seherde zémindiki barliq rezil ademlerni yoqitimen. 1
Source notes (1)
- Footnote ◼ «Her seherde zémindiki barliq rezil ademlerni yoqitimen» — démek, Dawut her etigende xelqning dewalirini sorap sot achatti. Bu ish mukemmel bolmighan bolsimu, kelgüside Dawutning ewladi Qutquzghuchi-Mesihning bundaq ishni mukemmel qilidighanliqigha ishinimiz. Dawutning shundaq adil soraq qilishi Mesihning kelgüsidiki soraq qilishigha bésharet bolidu.
Muqeddes Kalam (latin yéziq). Copyright © 2010 Mukeddes Kalam - Uyghur Bible Translation Committee. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.