Muqeddes Kalam (latin yéziq)

Misirdin chiqish 15

Musaning Xudagha medhiye oqushi

Shu chaghda Musa bilen Israillar Perwerdigargha medhiye oqup munu küyni éytti: —

«Men Perwerdigarni medhiyilep küy éytay,

Chünki U karamet ulughluqini körsetti;

U at we min’güchini déngizgha tashliwetti. 1 2

Méning küchüm hem méning küyüm Yah Özidur;

U manga nijat boldi;

U méning Tengrimdur, men Uni ulughlaymen;

U méning atamning Xudasidur, men Uni aliy dep medhiyileymen. 3 4

Perwerdigar jengchidur,

Yahweh Uning namidur. 5

Pirewnning jeng harwilirini hem qoshunlirini déngizgha tashliwetti;

Uning aliy leshker bashliqliri Qizil Déngizda gherq qilindi.

Chongqur sular ularni kömüwetti,

Ular xuddi tashtek déngiz tégige chöküp ketti. 6

Séning ong qolung, ey Perwerdigar,

Qudriti bilen shan-sherep tapti;

Séning ong qolung, ey Perwerdigar,

Düshmenni kukum-talqan qiliwetti. 7

Öz ulughluqungning heywisi bilen Özüngge qarshi chiqqanlarni nabut qilding,

Sen otluq ghezipingni ewetting,

U samanni köydürgen ottek ularni yutuwetti.

Dimighingning nepisi bilen sular döng bolup örlidi,

Jushqunlighan dolqunlar döng kebi tik turdi,

Déngizning otturisidiki chongqur sular qaturup qoyuldi. 8 9

Düshmen dédi: «Men ularni qoghlaymen, yétishimen, olja élip üleshtürimen,

Ulardin derdimni chiqirimen,

Qilichimni sughurup, öz qolum bilen ularni nabut qilimen».

Lékin Sen nepising bilen püwliding,

Déngiz ularni kömüwetti;

Ular jushqunluq sularda qoghushundek chöküp ketti. 10

Ilahlarning arisida, ey Perwerdigar,

Kim Séning tengdishing bolsun?

Pak-muqeddeslik ichide Öz heywitingni körsitidighan,

Hemd-medhiyiler arisida dehshetlik turidighan,

Möjize-karamet yaritidighan,

Sendek kim bolsun?

Sen ong qolungni uzitishing bilen,

Yer-zémin ularni yutuwetti.

Lékin Özüngge hemjemet qilip qutquzghan qowmni rehimdilliqing bilen bashlap chiqting;

Sen ularni Öz muqeddes makaninggha qudriting bilen hidayet qilip yétekliding. 11

Yat xelqler buni anglap, titriship ketti;

Filistiyede turuwatqanlarni tolghaqtek azab tutti.

Andin Édomning emirliri dekke-dükkige chüshti;

Moabning palwanlirini bolsa, rasa titrek basti;

Qanaan zéminidikilerning yüriki su bolup aqti; 12

Qorqunch we dehshet ularni basti;

Bilikingning heywiti bilen ular xuddi tashtek midirliyalmay qaldi;

Xelqing ötüp ketküche, i Perwerdigar,

Özüng rene tölep hör qilghan xelqing ötüp bolghuche. 13 14

Ularni bashlap kirip,

Öz mirasing bolghan taghda köchettek tikisen,

Öz makaning qilghan jaygha, i Perwerdigar,

Öz qolliring teyyarlighan muqeddes jaygha, i Reb, ularni élip barisen. 15

Perwerdigar ebedil’ebedgiche padishah bolup höküm süridu!

Chünki Pirewnning atliri,

Jeng harwiliri atliqliri bilen bille déngizgha kirip boldi;

Perwerdigar déngizning sulirini ularning üstige yandurdi,

Lékin Israillar bolsa déngizning otturisidin quruq yerdin méngip ötüp ketti». 16

Andin Harunning hedisi peyghember Meryem qoligha dapni aldi, barliq qiz-ayallarmu qoligha dap élip, ussul oyniship uninggha egeshti. 17

Meryem ulargha jawaben mundaq küyni oqudi: —

«Perwerdigarni medhiyilep küy éytinglar,

Chünki U zor ulughluqini körsetti;

U at we min’güchini déngizgha tashliwetti!». 18

Xuda xelqni sinaydu — Marahtiki achchiq su

Andin Musa Israillarni Qizil Déngizdin bashlap, Shur chölige élip bardi. Ular uda üch kün chölde yürüp, su tapalmidi. Andin ular Marahqa yétip keldi; lékin u yerning süyi achchiq bolup, süyini ichkili bolmaytti; shunga u jayning nami «Marah» dep qoyulghan. 19 20 U waqitta xalayiq: — Biz néme ichimiz? — dep Musadin aghrinip ghotuldashqili turdi.

U Perwerdigargha peryad kötürdi; Perwerdigar uninggha bir derexni körsetti; u derex yaghichini élip, sugha tashliwidi, su tatliq sugha aylandi. U yerde Perwerdigar ulargha höküm-belgilime békitip, ularni sinap, mundaq dédi: — «Eger siler köngül qoyup Xudayinglar Perwerdigarning sözini anglap, Uning neziride durus bolghanni qilip, emrlirige qulaq sélip, barliq hökümlirini tutsanglar, undaqta, Men misirliqlarning üstige salghan késellerdin héchbirini üstüngge salmaymen; chünki Menki silerge shipaliq bergüchi Perwerdigardurmen». 21

Andin ular Élimgha yétip keldi. Shu yerde on ikki bulaq bilen yetmish xorma derixi bar idi; ular shu yerde sularning boyida chédir tikti.

Source notes (21)

Footnote ◼ «U karamet ulughluqini körsetti» — yaki «U shanliq ghelibe quchti».
Cross-reference ◘ Zeb. 106:12
Footnote ◼ «Yah» —Mushu terjimide biz Xudaning «Yahweh» yaki «Yehowah» dégen namini «Perwerdigar» dep terjime qilduq. «Yah» bolsa «Yahweh» dégen bu ismining qisqartilghan sheklidur.
Cross-reference ◘ Zeb. 18:2; Zeb. 118:14; Yesh. 12:2
Footnote ◼ «Yahweh» —Mushu terjimide biz Xudaning «Yahweh» yaki «Yehowah» dégen namini adette «Perwerdigar» dep terjime qilduq. Menisi «Ezeldin Bolghuchi». 3:13-14 we izahatni körüng.
Cross-reference ◘ Neh. 9:11
Cross-reference ◘ Zeb. 118:15,16
Footnote ◼ «Dimighingning nepisi bilen» — yaki «qehringning rohi bilen».
Cross-reference ◘ Yesh. 63:12,13; Hab. 3:10
Cross-reference ◘ Zeb. 74:13; 106:11
Footnote ◼ «hemjemet qilip qutquzghan» — mushu ibare ibraniy tilida «daal» dégen bir péil bilenla ipadilinidu. Bu péil toghruluq «Tebirler» we «Ayup» 19:25 we izahatinimu körüng. «Öz muqeddes makaninggha» — ibraniy tilida «Öz muqeddeslikingning makanigha».
Cross-reference ◘ Qan. 2:4
Footnote ◼ «Özüng rene tölep hör qilghan xelqing» — bu uqum yuqiriqi 13-ayettiki «Sen hemjemet qilip qutquzghan... xelqing» dégen uqumgha yéqindur. «... Özüng rene tölep hör qilghan xelqing ötüp bolghuche» — bu ayet bésharet bolup: (1) Qanaandiki xelq we Moabtiki ahaliler Xudaning xelqining Misirdin chiqqinini anglap ulardin intayin qorqidu («Ye.» 2:8-11ni körüng); (2) kéyinki künlerde Israil Qanaan zéminini igileshke Iordan deryasidin «ötidu». Bu ish bolghuche héchqandaq bashqa el-millet ularning yolini tosuwalalmaydu (17-ayetni körüng).
Cross-reference ◘ Qan. 2:25; 11:25; Ye. 2:9
Cross-reference ◘ 1Pad. 8:13, 39; Yuh. 14:2
Footnote ◼ «...quruq yerdin méngip ötüp ketti» — bezi terjimilerde Musaning bu shéiri 18-ayet bilen toxtaydu.
Cross-reference ◘ 1Sam. 18:6
Footnote ◼ «U zor ulughluqini körsetti» — yaki «U shanliq ghelibe quchti».
Footnote ◼ «Marah» — «achchiq» dégen menide.
Cross-reference ◘ Chöl. 33:8
Footnote ◼ «Perwerdigarning sözini» — ibraniy tilida «Perwerdigarning awazini».

Muqeddes Kalam (latin yéziq). Copyright © 2010 Mukeddes Kalam - Uyghur Bible Translation Committee. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-10-25.