Муқеддес Калам (кирил йезиқ)
Зәбур 95
95-күй •••• Аләм Егиси келиду!
Пәрвәрдигарға атап йеңи нахша ейтиңлар!
Пүткүл йәр-зимин, Пәрвәрдигарни күйләңлар! 1
Пәрвәрдигарға нахша ейтиңлар, намиға тәшәккүр-мәдһийә қайтуруңлар,
Ниҗатлиғини һәр күни елан қилиңлар!
Униң шан-шөһритини әлләр арисида,
Униң мөҗизилирини барлиқ қовмлар арисида җакалаңлар!
Чүнки Пәрвәрдигар улуқ, зор мәдһийәләргә лайиқтур!
У барлиқ илаһлардин үстүн, Униңдин қорқуш керәктур; 2
Чүнки хәлиқләрниң барлиқ илаһлири — Бутлар халас,
Бирақ Пәрвәрдигар асман-пәләкни яратқандур. 3
Шану-шәвкәт вә һәйвәт Униң алдида,
Муқәддәс җайида қудрәт вә гөзәллик көрүниду.
Пәрвәрдигарға тәәллуғини бәргәйсиләр, и әл-қәбилиләр,
Пәрвәрдигарға шан-шөһрәт вә қудрәтни бәргәйсиләр! 4
Пәрвәрдигарға Өз намиға лайиқ шан-шөһрәтни бәргәйсиләр;
Соға-салам елип һойлилириға кириңлар!
Пәрвәрдигарға пак-муқәддәсликниң гөзәллигидә сәҗдә қилиңлар;
Пүткүл йәр-зимин, Униң алдида титрәңлар! 5 6
Әлләр арисида елан қилиңлар: —
«Пәрвәрдигар һөкүм сүриду!
Шуңа мана, дуния мәзмут қилинған, у тәврәнмәс әсла.
У адиллиқ билән хәлиқләр үстигә һөкүм чиқириду.
Асманлар шатлансун, йәр-җаһан хуш болсун,
Деңиз-океан вә униңға толған һәммә чуқан селип җуш урсун!
13 Далалар һәм улардики һәммә яйрисун!
У чағда ормандики пүткүл дәрәқләр Пәрвәрдигар алдида яңритип нахша ейтиду;
Чүнки мана, У келиду!
У җаһанни сорақ қилишқа келиду;
У аләмни адиллиқ билән,
Хәлиқләрни Өз һәқиқәт-садақитидә сорақ қилиду. 7
Source notes (7)
- Cross-reference ◘ 1Тар. 16:23-33
- Footnote ◼ «Униңдин қорқуш керәктур» — яки «У дәһшәтлик-қорқунучлуқтур».
- Footnote ◼ «...хәлиқләрниң барлиқ илаһлири — бутлар халас» — «бутлар» ибраний тилида «әрзимәсләр».
- Footnote ◼ «Пәрвәрдигарға шан-шөһрәт вә қудрәтни бәргәйсиләр!» — мошу сөзләр бәлким шуни билдүридуки, Худаға Өзигә лайиқ шан-шәрәп кәлтүрсәк, бу қилғинимиз униңға биз арқилиқ Өз күч-қудритини техиму көрситиш имканийитини яритиду.
- Footnote ◼ «... пак-муқәддәсликниң гөзәллигидә сәҗдә қилиңлар» — яки «... пак-муқәддәс егинләрни кийип сәҗдә қилиңлар».
- Cross-reference ◘ Зәб. 28:2
- Cross-reference ◘ Зәб. 97:7-8; Вәһ. 19:11
Муқеддес Калам (кирил йезиқ). Copyright © 2010 Mukeddes Kalam - Uyghur Bible Translation Committee. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.