Зәбур 27

27-күй •••• Пәрвәрдигарға тайиниш

1Давут язған күй: —

И Пәрвәрдигар, Саңа нида қилимән;

И мениң Қорам Тешим, маңа сүкүт қилмиғайсән;

Чүнки Сән җим-җит турувалсаң,

Мән чоңқур һаңға чүшидиғанларға охшашла болимән. 1

2Саңа пәряд көтәргинимдә,

Сениң муқәддәс каламханаңға қолумни көтәргинимдә,

Мениң илтиҗалиримниң садасини аңлиғайсән! 2

3Мени рәзилләр вә қәбиһлик қилғучилар билән биллә ташливәтмигәйсән;

Улар ағзида йеқинлири билән достанә сөзләшсиму,

Көңлидә өчмәнлик бардур. 3

4Уларниң қилмишлириға қарап,

Ишлириниң яманлиғиға қарап иш тутқайсән;

Қолиниң қилғанлири бойичә өзлиригә яндурғайсән;

Тегишлик җазани өзлиригә қайтурғайсән.

5Чүнки улар нә Пәрвәрдигарниң қилғанлирини,

Нә қоллириниң ишлигәнлирини һеч нәзиригә алмайду,

Пәрвәрдигар уларни ғулитип, қайтидин баш көтәргүзмәйду.

6Пәрвәрдигарға тәшәккүр-мәдһийә қайтурулсун;

Чүнки У мениң илтиҗалиримниң садасини аңлиған.

7Пәрвәрдигар мениң күчүм, мениң қалқинимдур;

Мениң көңлүм униңға ишәнди,

Шуниң билән ярдәм таптим;

Шуңа көңлүм зор шатлиниду,

Өз күйүм билән мән Уни мәдһийиләймән.

8Пәрвәрдигар Өз хәлқиниң күчидур,

Шундақла мәсиһ қилғиниға қутқузғучи қорғандур. 4

9Өз хәлқиңни қутқузғайсән,

Мирасиңни бәрикәтлик қилғайсән;

Уларни падичидәк беқип озуқландурғайсән,

Мәңгүгә уларни көтирип жүргәйсән. 5