زەبۇر 55

55-كۈي •••• ساتقۇنلۇققا ئۇچرىغاننىڭ دەرد-ئەلەملىرىنى تۆكۈش دۇئاسى

1نەغمىچىلەرنىڭ بېشىغا تاپشۇرۇلۇپ، تارلىق سازلار بىلەن ئوقۇلسۇن دەپ، داۋۇت يازغان «ماسقىل»: ــ

ئى خۇدا، دۇئايىمنى ئاڭلىغايسەن؛

تىلىكىمدىن ئۆزۈڭنى قاچۇرمىغايسەن،

2ماڭا قۇلاق سېلىپ، جاۋاب بەرگەيسەن؛

مەن داد-پەرياد ئىچىدە كېزىپ،

ئاھ-زار چېكىپ يۈرىمەن؛

3سەۋەبى دۈشمەننىڭ تەھدىتلىرى، رەزىللەرنىڭ زۇلۇملىرى؛

ئۇلار بېشىمغا ئاۋارىچىلىكلەرنى تۆكىدۇ؛

ئۇلار غەزەپلىنىپ ماڭا ئاداۋەت ساقلايدۇ.

4ئىچىمدە يۈرىكىم تولغىنىپ كەتتى؛

ئۆلۈم ۋەھشەتلىرى ۋۇجۇدۇمنى قاپلىدى.

5قورقۇنچ ۋە تىترەك بېشىمغا چۈشتى،

دەھشەت مېنى چۆمكۈۋالدى.

6مەن: ــ «كەپتەردەك قانىتىم بولسىچۇ كاشكى،

ئۇچۇپ بېرىپ ئارامگاھ تاپار ئىدىم» ــ دېدىم.

7ــ «يىراق جايلارغا قېچىپ،

چۆل-باياۋانلاردا ماكانلىشار ئىدىم؛

سېلاھ.

8بوران-چاپقۇنلاردىن،

قارا قۇيۇندىن قېچىپ، پاناھگاھغا ئالدىرار ئىدىم!».

9ئۇلارنى يۇتۇۋەتكەيسەن، ئى رەب؛

تىللىرىنى بۆلۈۋەتكەيسەن؛

چۈنكى شەھەر ئىچىدە زوراۋانلىق ھەم جېدەلخورلۇقنى كۆردۈم.

10ئۇلار كېچە-كۈندۈز سېپىللەر ئۈستىدە غادىيىپ يۈرمەكتە؛

شەھەر ئىچىنى قاباھەت ۋە شۇملۇق قاپلىدى.

11قەبىھ ئارزۇ-ھەۋەسلەر ئۇنىڭ ئىچىدە تۇرىدۇ،

ساختىلىق ۋە ھىيلە-مىكىرلىك كوچىلاردىن كەتمەيدۇ.

12ئەگەر دۈشمەن مېنى مەسخىرە قىلغان بولسا، ئۇنىڭغا سەۋر قىلاتتىم؛

بىراق مېنى كەمسىتىپ، ئۆزىنى ماختىغان ئادەم ماڭا ئۆچمەنلەردىن ئەمەس ئىدى؛

ئەگەر شۇنداق بولغان بولسا، ئۇنىڭدىن ئۆزۈمنى قاچۇراتتىم؛

13لېكىن بۇنى قىلغان سەن ئىكەنلىكىڭنى ــ مېنىڭ بۇرادىرىم، سىردىشىم، ئەزىز دوستۇم بولۇپ چىقىشىڭنى ئويلىماپتىمەن!

14خالايىققا قېتىلىپ، خۇدانىڭ ئۆيىگە ئىككىمىز بىللە ماڭغانىدۇق،

ئۆزئارا شېرىن پاراڭلاردا بولغانىدۇق؛ 1

15مۇشۇنداق ساتقۇنلارنى ئۆلۈم تۇيۇقسىز چۆچىتىۋەتسۇن!

ئۇلار تەھتىساراغا تىرىك چۈشكەي!

چۈنكى ئۇلارنىڭ ماكانلىرىدا، ئۇلارنىڭ ئارىسىدا رەزىللىك تۇرماقتا.

16لېكىن مەن بولسام، خۇداغا نىدا قىلىمەن؛

پەرۋەردىگار مېنى قۇتقۇزىدۇ.

17ئەتىگىنى، ئاخشىمى ۋە چۈشتە،

دەردىمنى تۆكۈپ پەرياد كۆتۈرىمەن؛

ئۇ جەزمەن سادايىمغا قۇلاق سالىدۇ.

18ئۇ ماڭا قارشى قىلىنغان جەڭدىن مېنى ئامان قىلىدۇ؛

گەرچە كۆپ ئادەملەر مېنى قورشاۋغا ئالغان بولسىمۇ.

19تەڭرى ــ ئەزەلدىن تەختتە ئولتۇرۇپ كەلگۈچى!

ئۇ نالەمنى ئاڭلاپ ئۇلارنى بىر تەرەپ قىلىدۇ؛

(سېلاھ)

چۈنكى ئۇلاردا ھېچ ئۆزگىرىشلەر بولمىدى؛

ئۇلار خۇدادىن ھېچ قورقمايدۇ.

20ھېلىقى بۇرادىرىم ئۆزى بىلەن دوست بولغانلارغا مۇشت كۆتۈردى؛

ئۆز ئەھدىسىنى بۇزۇپ تاشلىدى.

21ئاغزى سېرىق مايدىنمۇ يۇمشاق،

بىراق كۆڭلى جەڭدۇر ئۇنىڭ؛

ئۇنىڭ سۆزلىرى ياغدىنمۇ سىلىق،

ئەمەلىيەتتە سۇغۇرۇپ ئالغان قىلىچلاردۇر.

22يۈكۈڭنى پەرۋەردىگارغا تاشلاپ قوي،

ئۇ سېنى يۆلەيدۇ؛

ئۇ ھەققانىيلارنى ھەرگىز تەۋرەتمەيدۇ. 2

23بىراق، سەن خۇدا ئاشۇ رەزىللەرنى ھالاكەت ھاڭىغا چۈشۈرىسەن؛

قانخورلار ۋە ھىيلىگەرلەر ئۆمرىنىڭ يېرىمىنىمۇ كۆرمەيدۇ؛

بىراق مەن بولسام، ساڭا تايىنىمەن.