Ica 81

Ishipa ya̱a̱ a̱buki

Udammu a̱ tyo a̱ ma̱dobiya. O una̱ wa <<Giti.>> Ica ya Asaf.

1Canaa yi A̱sula̱ ishipa i ma̱za̱nga̱

za na a̱yi ɗa ucira u tsu,

sala yi lon a̱ tyo uba̱ta̱ wa̱ A̱sula̱ a Yakubu!

2'Ya̱sa̱in ishipa i lapa muganga,

i yuwan tsuwe'e tsu uyo'o na̱ kumburu ni igaraya.

3Yi ivula̱ avana o Woto u Sa'avu,

na amantsa ma na woto u kotoi,

o urana wa̱ A̱buki a̱ tsu.1

4A̱yi nda wila̱ u ɗa e ekere aza a Isra'ila,

udammu u ɗa wa̱ A̱sula̱ a Yakubu.

5U ca ta̱ udammu u nda

adama o ugundo wa̱ Isuhu,

a mantsa ma na wu uta̱i

u riya̱a̱ yi iɗa ya Masar.

Mu uwwa ta̱ uɗyo u ro

u na n revei shi, a dansa,

6<<N tawa ta̱ itana yu ume i na i ri a̱ nlyungu nɗu,

waru n tawa ta̱ a̱tsuma̱lima̱ diga e ekere a̱ ɗu.

7Mantsa ma na i ri a̱tsuma̱lima̱

i ɗe mu ta̱ a̱vu n wawa ɗu.

A̱vu n usu ɗu diga uba̱ta̱ u na n ri a̱tsuma̱ o upepu.

N lyungwa̱ ɗu ta̱ ɗe a̱ mini ma Meriba.2 Wivuwun

8Uwwai, a̱ɗu ama a̱ va̱, n to rono ɗu atsuvu,

a she a damma i ta zuwaa mu atsuvu, a̱ɗu Isra'ila!

9She i da̱na̱ na̱ ma̱sula̱ mo omocin a̱tsuma̱ a̱ ɗu wan,3

waru she i ka̱ɗa̱towa̱ ma̱sula̱ mo ro wan.

10A̱mu ɗa A̱sulazuva A̱sula̱ a̱ ɗu,

za na uta̱a̱ nɗu e iɗa ya Masar.

I kpa̱tu'wa̱ una̱ u ɗu,

a̱mu waru n ta lyuwato ɗu.

11<<Amma ama a̱ va̱ a zuwaa mu atsuvu shi,

Isra'ila ca aciya̱yi ya̱'a̱ va̱ shi.

12Ɗaɗa n lyawa nle a lyuwa elime na aciyogbamu e le,

a yuwan ili i na a cigai.

13A damma ama a̱ va̱ a ta zuwaa mu atsuvu!

Na a damma aza a Isra'ila a̱ shi ta̱ o toni re va̱!

14N shi ta̱ a̱a̱ riya̱a̱ n'yuwatan nle,

a̱vu n lyuwa aci e le babu usa̱n!

15Aza a na a 'yuwain A̱sulazuva a̱ ta̱ ka̱ɗa̱to elime a̱yi adama o wovon,

waru oforo e le a̱ ta̱ da̱na̱ lo hali hali.

16Amma a ta lyuwato ɗu no oroci a yitabo a na a la'ai ulobonu,

ni ishiki diga aatali a na a̱ cuwa̱ton ɗu.>>