Ica 3

Avasa o usana adama e izami yi ikambishi

Ica ya̱ Da̱wuda a mantsa ma na u sumaayi ulobo wa̱ yi Absalom.

1A̱sulazuva,

n'yuwatan n va̱ a̱ ta̱ a̱bunda̱!

Aza a na a yuwusan tsushu'un na̱ mu fo a̱ ta̱ a̱bunda̱.

2Na̱ a̱bunda̱ a ta yuwusan adanshi a aciya̱va̱ adansa,

<<A̱sula̱ a wawa yi shi!>>

3Amma a̱vu A̱sulazuva,

a̱vu ɗa mapari ma̱ va̱ uba̱ta̱ suru.

A̱vu ɗa va̱ 'ya̱susa̱n mu,

waru va casu mu tsugbain.

4Uba̱ta̱ wa̱ A̱sulazuva a ɗa

n tsu zami ikambishi,

waru u tsu usu mu ta̱

diga a Masasan ma Akiza a̱ yi.1

5N tsu von ta̱ n lantsa,

reve n 'yon gbaga,

adama a na A̱sulazuva a ɗa mapari ma̱ va̱.

6Maa uwwusa wovon wa ama ukpakukupa kupa shi

aza a na a yuwusan tsushu'un na̱ mu uba̱ta̱ suru.2

7'Yon, A̱sulazuva!

Vu wawa mu, A̱sula̱ a̱ va̱!

Vu lyuwa aci a n'yuwatan n va̱ suru,

waru vu kototo a̱za̱ e iwuya suru!

8Iwawi i tsu ta̱wa̱ ta̱ diga uba̱ta̱ wa̱ A̱sulazuva.3

Lyawa u zuwaa aa ama a̱yi aba'un.