Ica 24

Ica ya̱ Da̱wuda.

1Uvaɗi za va̱ A̱sulazuva a ɗa,

ni ili i na i ri pe a̱tsuma̱ a̱ yi suru.

Uvaɗi za va̱ yi ɗa,

oɓolo na aza a na a̱ ri pe a̱tsuma̱ a̱ yi suru.1

2Adama a na u suwa yi ta̱ zuva mala2,

waru u shuwa̱ ta̱ ikyun ya̱ yi zuva mini.

3Zane ɗa aa gura kumba

zuva masasan ma̱ A̱sulazuva?3

Zane ɗa aa gura isawan

o Oogodo o Uga'asusan a̱ yi?

4Za na e ekere a̱yi a̱ ri cece,

waru okolo a̱yi a̱ ri cece,

za na zuwai okolo a̱yi,

uba̱ta̱ wa̱ a̱ma̱li shi,

ko u yuwan akucunu e epen shi.4

5Cu'un vuma ndolo ta̱ tsura̱ aba'un

uba̱ta̱ wa̱ A̱sulazuva,

ni iwawi diga uba̱ta̱ wa̱ A̱sula̱

za vi iwawi ya̱ yi.

6Ele ɗa icu'un ya a ama a na a̱ ta̱wusa̱ uba̱ta̱ wa̱ A̱sula̱,

aza a na a̱ ta̱wusa̱ a̱ ma̱ka̱nka̱ ma̱ A̱sula̱ a Yakubu.

7A̱ɗu na̱ntsu, i kpa̱tu'wa̱ washin!

A̱ɗu akuci a̱ na̱ntsu, i kpa̱tu'wa̱!

Adama a na Mogono ma gbain maa uwa!

8Zane ɗa Mogono ma gbai'in?

A̱sulazuva a ɗa

za vu ucira nu ukadu!

A̱sulazuva a na a tsu lyuwa a aci

a̱tsuma̱ o uvon!

9A̱ɗu na̱ntsu kpa̱tu'wa̱ yi washin!

A̱ɗu akuci a̱ na̱ntsu, i kpa̱tu'wa̱!

Adama a na Mogono ma gbain maa uwa!

10Zane ɗa Mogono ma gbai'in?

A̱sulazuva o oɓolo a̱soja a zuva,

a̱yi ɗa Mogono ma gbai'in.