Irimiya 47

Adanshi e ikaka a aci aza a Filistiya

1Apa adanshi e ikaka i na A̱sulazuva a dammai Irimiya vumava̱sula̱ adama aza a Filistiya, kafu Firi'awuna riya̱a̱ lyuci va Gaza nu uvon.

2Apa ili i na A̱sulazuva a dammai,

<<Ka̱lyuwa̱, cine mini ma̱a̱ 'yosun

diga o upasu wu ugana,

a̱ ta̱wusa̱ tsa̱ mini mo ucira,

na o soɗu wi iɗa'a ni ili i na i ri pe a̱tsuma̱ a̱ yi,

na o soɗu wi ilyuci ni ili i na i ri pe suru.

Ama a̱ lyuci'i a ta yuwan yisali

yi izami yi ikambishi,

nda̱na̱ta̱ mi iɗa'a suru o to oruwo,

3diga a mawwa mo udasuwu wi ido,

ni ilama yi ikeke yi ido yi n'yuwatan,

ni ilama ya̱ a̱ga̱nda̱mu e ikeke i le,

nan dada a̱ tsura̱ esu a na a vadala

adama a̱ ka̱lyuwa̱ muwun nle shi,

adama a na ekere e le a̱ ɗa̱mba̱i.

4Adama a na urana u ta̱wa̱ ta̱,

a na A̱sulazuva o kototo aza a Filistiya suru,

waru u ta'asa akapi a na a la'ai,

na a kamba aza a Taya na̱ Sidon.

A̱sulazuva a yuwan ta̱ zuzu

na wo kototo aza a Filistiya,

akapi a na a buwai

e ikyun i mala ma Karita.

5Ama a Gaza a ta puna aci le

a̱tsuma̱ a̱tsumola̱ngu.

Lyuci va Ashikelon ta̱ rungwa̱ kpen.

A̱ɗu akapi a na i ri nden agalaci,

hali a̱ tyo mantsa ma̱ ne ɗa

yaa lyawa a kyu'usan lipu ɗu?>>

6<<I ta̱ shon adansa,

<ayya, matsun me pe'eni ma̱ A̱sulazuva,

hali a̱ tyo mantsa ma̱ ne ɗa vee ivuwan?

Na va̱a̱ ka̱mba̱ a̱tsuma̱ e ibici ya̱ wu,

vi ivuwan vu rungwa̱ kpen!>

7Amma a̱vu Irimiya usu u damma,

<cine wee e ivuwan,

a na wo o'woi A̱sulazuva a ɗa a zuwa niyi,

na u zuwa niyi u riya̱a̱ Ashikelon,

na̱ nda̱na̱ta̱ nna n ri e ikyun i mala.> >>