মর্কুস 3

ইশু খুই সেংপুওয়া দিংঙাহিং সাংপাওয়া

(মথি ১২:১-১৪; লুক ৬:৬-১১)

1ইশুহা ন্যাসারাং জোংসুওয়া সাতা হোয়ে। আউতা ইচো খুই সেংপুওয়া দিংঙা নিমি। 2সানুকো দিনতাহা ইশুহা আকু খুই সেংপুওয়া দিংঙাহিং সাংপানাহা দোষ তিংপাকো সোতা দিংঙাবিহা আউতা জাসুমসা মৌকা কাংসুদিংমি। 3ইশুহা খুই সেংপুওয়া দিংঙাহিং “লোপামসা ইতা লেই” তামসা মোউয়ে। 4ইশুহা আবিহিং জাংয়ে, “লিংপাং অনুসারহা সানুকো দিনতা এনতাপা জোকোসো মেংতাপা জোকো, হানি এনতাওয়াগা? সাদিহিং বাচাইকোগা? না দাংপাকোগা?” আদো আকু দিংঙাবিহা চেকেপা য়ুংয়ে। 5ইশুহা সেদ্রাংপুমসা আউতা নিওয়া দিংঙাবিহিং ন্যইয়ে। আসা আবিকো মোকোইওয়া তুংসিং তিংমসা লোচোপেংগেংপা জিংপুয়ে। ইশুহা আকু দিংঙাহিং জাংয়ে, “নাকো খুই লা।” আকু দিংঙাহা খুই লায়ে, আসা আকো খুইহা আত্রংতা সাংচপুয়ে। 6আকো নোইতা ফরিসিবিহা বাইরেতা নোমসা হেরোদ জাইপুকো দিংঙাবিহিংপা ইশুহিং হেপা স্যানেকোমে তামসা হুইশুয়ে।

ইশুকো নুনুই উইসে দিংঙাবি হুইওয়া

(মথি ১২:১৫-১৬; লুক ৬:১৭-১৯)

7ইশুহা য়োংতোংবিহিংপা গালীল দাব্রিকো আরিতা হোয়ে আসা উইসে দিংঙাবিহা আকুহিংপা হুইপুয়ে। 8য়হুদিয়াসো, য়রুশালেম, ইতুউমিয়াসো, য়র্দন নুব্যাসো, তুরোস আসা সিদোন শহরকো হুরাপা উইসে দিংঙাবিহা য়ায়া-য়ুয়ুপা ইশুকো টেরবো টেরবো কাম জোনা তাওয়া হিংমসা আকোতা লেহে। 9আসা আকুহা আপনিকো য়োংতোংবিহিং জাংয়ে, ইচো নোওয়াই মোপিকো তামসা, মোকোনাহা আবিহা কাহিং এচা-বেচাপা জোরোওয়া। 10ইশুহা উইসে হাইমবিহিং সাংপানা তাওয়া হিংমসা হাইওয়া দিংঙাবিহা আকুহিং সুচা মুংমে তামসা এচা-বেচাপা য়েসুয়ে। 11আসা জেসাং দোইংচপুওয়া দিংঙাবিহা ইশুহিং তিংনুওয়া আকো নাগাইতা চুনুইয়ে আসা চিলিংমসা জাংসুয়ে, “নাতিহা সেংজাকো চেংওয়াগা!” 12আদো “কা হাংসুমে তাওয়া নুওয়াংহা দিংঙাবি সিদা মোচ্যইকো তামসা” ইশুহা আকু জেসাং দ্যইচপুওয়াবিহিংয়া ঙামসা চিংচাইয়ে।

ইশুকো বার্চো য়োংতোংবিহিং জেংওয়া

(মথি ১০:১-৪; লুক ৬:১২-১৬)

13আকো নোইতা ইশুহা ইচো য়্যাগ্যইতা হোয়ে, আসা আপনিকো জেংওয়া য়োংতোংবিহিং মোউয়ে আসা আবিহা ইশুকোতা লেহে। 14-15আসা আকুহা আপনিহিংপা য়ুংকো, আসা দিংঙাবিহিং এনতাওয়া দেরেং হিংপাকো, আসা জেসাং-মাইসাংবিহিং নোপাকো চুওয়া সে পিচাকো বার্চো জেংওয়া য়োংতোংবিহিং জেংয়ে আসা আবিহিংয়া জেংওয়া পোইং তামসা জাংয়ে। 16ইশুকো জেংওয়া বার্চো য়োংতোংবিহা ইবিরাংগা:

সিমোন, (ইশুহা আকো মিংহা পত্রস এপিয়ে,)

17য়াকুবসো য়হুন্না, (আবিহা জোব্দিয়াকো নিহসো চেংওয়া, আবিকো মিং আকুহা “বারনাবাস” এহে, ই জাংওয়াহা গারাংগুরুংকো চেংবি),

18আন্দ্রিয়াস,

ফিলিপ,

বারতোলোমাই,

মথি,

থোমা,

আলপাসকো চেংওয়া য়াকুব,

থেদিয়াস,

সিমোন কানানি,

19য়োহুদা ইস্করিয়োত, হাংসু ইশুহিং প্যইপামে।

ইশু আসা বালজিবুল

(মথি ১২:২২-৩২; লুক ১১:১৪-২৩, ১২:১০)

20আকো নোইতা ইশুহা সাতা হোয়ে। দিংঙাবিহা ন্যাসারাং য়ায়া-য়ুয়ুপা জিংপুয়ে, আসা ইশুসো আকো য়োংতোংবিহা চাকো-আংকোরে মামুংতো। 21হাত্রং আপনিকো সাকো দিংঙাবি ই নুওয়াং হিং, আত্রংহা আবিহা ইশুহিং লাসুরকো হোয়ে, হাংপাতানাহা আকো দিংঙাবিহা ইশুহিংয়া চোইরুং-বুবদাংতেও তামসা জাংচাংমি।

22আসা য়রুশালেমসো লেওয়া তাংজিকো উটকেওয়াবিহা “ইহিংয়া বালজিবুল তাওয়া জেসাং বাইমি নিও, আসা আকু জেসাংবিকো গিরিকো সেসো ইহা জেসাংবিহিং নোপামগা” তামসা জাংসুয়ে। 23আকো সোতা ইশুহা তাংজিকো উটকেওয়াবিহিং মোউমসা ই নুওয়াংহা থ্যাপামসা জাংয়ে, “শয়তানহা শয়তানহিংয়া হেপা ঘিকো চুকোগা?” 24হানি লোইতা পিংচ্যাসুওয়ানি, আকু লোইহা দাংপুরোওয়া। 25এপারাং হানি সাতা পিংচ্যাসু, আকু সারে দাংপুরোওয়া। 26এপারাং শয়তানহা দোসরা ইচো শয়তানকো তোইতা সেদ্রাংপানাহা আকুরে মাতাইরোওয়া আসা তাইবি লারাইরাং দাংপুরোওয়া। 27হাংসুরে সাডুংওয়া দিংঙাকো সাতা হোমসা আকো সাকো হাইরে কুমক্যই, হাত্রং চোইপা আকু দিংঙাহিং পার্দিসো মাজিং, জিংপুনতেনুকো নোইতা মেংচে আকুহা কুকো চুরোওয়া।

28“কা নাবিহিং আজিপ্পারাং জাংরোওয়া, সেংজাহিং মাছিমেপা জোওয়াবি আসা তাংসা পাপবিহা ছমা জিংকো চুরোওয়া, 29আদো পবিত্র লাংবেকো তোইতা মেংতাপা য়্যইওয়াবিহা ছমা মাজিং। তুতেংজু চোইপারাং আকুহা পাপকো দোষি জিংরোওয়া।” 30দিংঙাবিহা ইশুহিং আকো জুপাতা জেসাং নিও তাওয়াকো সোতা ইশুহা ই নুওয়াং জাংমগা।

ইশুকো আয়ুসো এবি

(মথি ১২:৪৬-৫০; লুক ৮:১৯-২১)

31আত্রংরাং ইশুকো আয়ুসো এবি লেহে, আসা বাইরেতা জামসা ইশুহিং মোউয়াকো নিংপুয়ে। 32দিংঙাবিহা আকো হুরাপা গাসুদিংমি, লেরা দিংঙাবিহা আকুহিংয়া জাংয়ে, “কাং, নাকো আয়ুসো এবিহা নাতিহিং বাইরেতা খুইদিংনা।”

33ইশুহা আবিহিংয়া জাংয়ে, “কুং আয়ু আসা কুং এবিহা হাংসুগা?” 34আসা আকুহা হুরাপা গাদিংওয়া দিংঙাবিকোতা ন্যইমসা জাংয়ে, “কাং, কুং আয়ু, আসা কুং এবিহা ইবিরাংগা। 35হাংসু সেংজাকো জাংওয়া নুওয়াংবি হিং, আবিরাং কুং এবি, হুম্রিবি আসা আয়ুবিগা।”