মর্কুস 11:24

ইশুহিং য়রুশালেমতা স্বাগত জোওয়া

(মথি ২১:১-১১; লুক ১৯:২৮-৪০; য়হুন্না ১২:১২-১৯)

1আবিহা ন্যাতাসো হাদাংনুওয়া য়রুশালেম নুব্যাকো জেইতুন য়্যাগ্যইকো বেথফাগে আসা বেথানিয়া তাওয়া লোইতা দেকায়ে। আসা ইশুহা নিহসো য়োংতোংবিহিং এপা জাংমসা নিংপুয়ে, 2“আকু আবেইকো লোইতা হোতু। লোইতা দেকানতানি হাত্রংরে মাবাইয়াংওয়া ইপু গাদাকো চেংবেহিং তাইমসা এওয়া দোসুরোওয়া। আকুহিং ল্যাপামসা ইতা পারা। 3লেরা দিংঙাবিমি নাবিহিং ‘ইহা হাং জোদাংমগা?’ তামসা উইনাহা প্রভুহিং ঘ্যইরো আকুহা সেন্নেপা লাসোংপিকোহে তামসা জাং।” 4আবিহা হোয়ে আসা ন্যাতাকো আরিতা সাকো লাপুংকো নাগাইতা গধাকো চেংবেহিং তাইদিংওয়া দোসুয়ে। আকুহিং সিদাংনুওয়া 5আউতা জাদিংওয়া দিংঙাবিহা আবিহিংয়া উইয়ে, “আকু গধাকো চেংবেহিংয়া হাংপা ল্যাদাংমগা?” 6ইশুকো জাংমবেপারাং য়োংতোংবিহা এপারাং জাংয়ে, আসা আউতা নিওয়া দিংঙাবিহা আকু গধাকো চেংবেহিং পুরাচাকো পিচায়ে। 7য়োংতোংবিহা আকু গধাকো চেংবেহিংয়া ইশুকোতা পারামসা আকো তোইতা তাইবিকো আংদুংবি ন্যায়ে আসা ইশুহা গধাকো তোইতা গায়ে। 8দিংঙাবিহা তাইবিকো আংদুংবি লুমসা ন্যাতাতা ন্যায়ে, আসা লেরাহা আকু লুংনিংকো আরিতা নিওয়া সেনেবি নোইয়ামসা ইশুকো হোদাংওয়া ন্যাতাতা ন্যারেহে। 9ইশুকো নাগাই নুনুই হুইসোইওয়া দিংঙাবিহা এপা জাংসুমসা ঙাসুয়ে,

“সেংজাকো মিং টেবো জিংকো।”1

“প্রভুকো মিংতা ওয়াংওয়াবিহা গারানি!”2

10“য়োংকো আপা দাউদ জাইপুকো রাজ্যহা দেপাদাংতেহে। আকো রাজ্যহা টেবো জিংকো!”

“তাংসাকো তোইতা লোডিংবাতা য়ুংওয়া সেংজাকো মিং টেবো জিংকো!”

11ইশুহা য়রুশালেমতা হোমসা য়হুদিবিকো দেমসাতা হোয়ে। আকুহা হুরামসা দেমসাহিং ন্যইয়ে। আদো সানি হুইপুদাংতেমকো সোতা ইশুহা বার্চো য়োংতোংবিহিংপা বেথানিয়া লোইতা হোপুয়ে।

মেসেওয়া মুইরাকো সিংতেং

(মথি ২১:১৮-১৯)

12সাইয়ু নোইতা বেথানিয়া তাওয়া লোইসো লেপানুওয়া ইশুহা আমা পাংপুমি নিমি। 13বার্গাংসোরাং ইশুহা বুবুউওয়া লাপানিওয়া মুইরাসেকো সিংতেং তিংয়ে, আসা সিংতেংতা মুইরাসে সে-মেসেমে তামসা কাকো হোয়ে। আবেইতা হোমসা কানুওয়া সিংতেংতাহা লাপা মেংচে তিংয়ে, হাংপাতানাহা মুইরাসেহা সেকো সময় মাজিংয়াংমি। 14আকো সোতা ইশুহা আকু সিংতেংহিং জাংয়ে, “ইসো য়ুতাহা হাংসুরে নাকো সেওয়ারাং চামগ্যইকো।” ই নুওয়াং ইশুকো য়োংতোংবিহা হিংয়ে।

ইশু দেমসাতা হোওয়া

(মথি ২১:১২-১৭; লুক ১৯:৪৫-৪৮; য়হুন্না ২:১৩-২২)

15ইশুহা য়োংতোংবিহিংপা ন্যাসারাং য়রুশালেমতা দেকায়ে আসা আকুহা য়হুদিবিকো দেমসাতা হোয়ে, আসা আউতা পিইচাওয়া আসা চোইচাওয়া তাংসাহিং ঘিইপুয়ে, ন্যাস্যা সোমবিকো টেবিলবি আসা পোরোই পিইচাওয়াবিকো গাওয়াবি দিরাইপাপে। 16আকুহা দেমসাকো লাঙাংকো ন্যাতাসোহা চোইচা-পিইচাওয়াবিকোহা হাংসুহিংনে হাইরে পুচাকো মিচাতো। 17আসা নোইতা ইশুহা দিংঙাবিহিংয়া ই নুওয়াং জাংয়ে, “তাংজিকো হিগাতা এপা লাওয়া মোতোংগা? ‘কুং সাহা তাংসা জ্যাকো পাচাইওয়া সা জিংরোওয়া।’3 আদো নাবিহা ইহিংয়া ‘কুইমবিকো হাইক্রি ম্যইওয়া হোরোংবা’4 বেপা জোপুয়ে।”

18ই নুওয়াংহা মাটা পাউবি আসা তাংজিকো উটকেওয়াবি হিংয়ে, আসা আবিহা ইশুহিং হেপা স্যানেকোমে তামসা ন্যাতা মোসোইয়ে, হাংপাতানাহা দিংঙাবিহা ইশুকো ঝিপাওয়াতা আআংপেপেচপুওয়া নিমি, আকো সোতা আবিহা আকোসো চুসুংওয়া নিমি।

19আসা সিনি হুইপুনতেনুকো নোইতা ইশুসো আকো য়োংতোংবিহা য়রুশালেম শহরসো নোপুমসা হোপুয়ে।

মুইরাসেকো সিংতেংসো ঝিওয়া

(মথি ২১:২০-২২)

20আকো জুকুং হাপকুং আবিহা আকু ন্যাতাসো লারেমসা লেপানুওয়া য়োংতোংবিহা মুইরাসেকো সিংতেংহিংয়া দেবেসো সেংপুওয়া তিংয়ে। 21পত্রসহা ইশুকো জাংওয়া নুওয়াং সিদা চ্যইমসা ইশুহিং জাংয়ে, “উটকেওয়া, কাং, নাকো সিপুকো উদাইতেওয়া মুইরাসেকো সিংতেংহা সেংপুয়ে।”

22আত্রংহা ইশুহা য়োংতোংবিহিং জাংয়ে, “সেংজাকো তোইতা দেংকো জো। 23কা নাবিহিংয়া আজিপ্পারাং জাংরোওয়া, নাবিহা য়্যাগ্যইহিং জাংকো চুরোওয়া, ‘ইসো ওইচচাপু আসা ঝাহাদিতা বাডোইচপু’ তামসামি জাংনাহা এপারাং জিংরোওয়া। আদো নাবিহা দেংনেরোওয়া এপারাং জিংরো তামসা আসা নাকো তুংসিংতা শংঙ্কা নিমতুরোওয়া। 24আকো সোতা কা নাবিহিং জাংরোওয়া, নাবিহা পাচাইনুওয়া হাই য়া, আকুহা কা মুংচানতেহে তামসা দেংকো জো, আসা নাবিহা য়াওয়া সেই মুংচারোওয়া। 25নাবি হাত্রং পাচাই, আত্রংবেমি দোসরাহিং মেংতাপা নোওয়া নিনাহা আকুহিং ছমা পিচা, আসা নাকো লোডিংবাতা য়ুংওয়া সেংজা আপারে নাবিকো পাপহিং ছমা পিচারোওয়া।” 26[আদো দোসরাহিং ছমা মিচানাহা লোডিংবাতা য়ুংওয়া নাবিকো সেংজা আপারে নাবিকো পাপহিংয়া ছমা মিচারোওয়া।]

ইশুকো অধিকারকো তোইতা উইওয়া

(মথি ২১:২৩-২৭; লুক ২০:১-৮)

27ন্যাসারাং ইশুসো আকো য়োংতোংবিহা য়রুশালেম ওয়াংয়ে। আকুহা দেমসাতা হুরামসা কোইয়ে, তাংজিকো উটকেওয়া আসা মাটা পাউবি, আসা য়হুদি মাটা ওয়ারাংপাবি লেমসা 28ইশুহিং উইয়ে, “নাতিহা হাংসুকো জাংওয়াসো ই কামবি জোমগা? হাংসু নাতিহিং এপা জোকো জাংমগা?”

29ইশুহা জাংয়ে, “কারে নাবিহিং ইচো নুওয়াং উইরোওয়া, কাহিং জাং, আসো মেংচে কারে নাবিহিং জাংরোওয়া, হাংসুকো জাংওয়াসো জোমমে। 30য়হুন্নাহা দিংঙাবিহিং বাপ্তিস্মা পিচামগা। য়হুন্নাহিংয়া হাংসু বাপ্তিস্মা পিচাকো জাংমগা? সেংজা জাংমগা না দিংঙা জাংমগা?”

31ই হিংমসা তাংজিকো উটকেওয়াবিহা তাইবিলারাই জাংসুয়ে, “য়াংবিমি ‘সেংজাহা য়হুন্নাহিং জাংমি’ তামসা জাংনাহা। আত্রংহা ইশুহা জাংকো কেংরোওয়া ‘এপা বেনাহা নাবিহা হাংপা য়হুন্নাকো নুওয়াং মাহিংমগা?’ 32য়াবিমি ‘দিংঙাকোসো’ তামসামি জাংকোরে হেপা জাংকোগা?” এপা জাংকোহা আবিহা দিংঙাবিকোসো চুসুংয়ে, হাংপাতানাহা দিংঙাবিহা য়হুন্নাহিংয়া অগমবক্তাগা তামসা নোমগা। 33আকো সোতা আবিহা ইশুহিং জাংয়ে, “মেগেসা কাবিহা মেগেনা।”

আত্রংহা ইশুহা আবিহিংয়া জাংয়ে, “কুং উইওয়ামি নাবি মাজাংনাহা, কারে নাবিকো উইওয়া মাজাংরো, হাংসুকো জাংওয়াসো কা ই কাম জোমমে।”