মর্কুস 10

মেহিং পেইপুওয়াকো নুওয়াংবি

(মথি ১৯:১-১২; লুক ১৬:১৮)

1আকো নোইতা ইশু আকু লোইহিং হুইতেমসা য়হুদিয়া জায়গাতা হোয়ে আসা য়র্দন জোরাকো নুব্যাতা হ্যায়ে। ন্যাসারাং উইসে দিংঙাবিহা আকোতা লেমসা জমা জিংয়ে, আসা আতাংকো ঝিপাচাংমেপারাং ইশুহা দিংঙাবিহিং ঝিপায়ে। 2আত্রংহা ফরিসিবিহা ইশুকোতা ওয়াংমসা পরিক্ছা জোমসা উইয়ে, “পোজা দিংঙাহা আপনিকো মেহিং পেইকো তুকোগা না মোতুকোগা?” 3ইশুহা আবিহিংয়া জাংয়ে, “মোসাহা নাবিহিংয়া হাং জাংগা?” 4ফরিসিবিহা জাংয়ে, “আকুহা পেইওয়া চিঠি ইচো লামসা মেহিং পেইপুদো ক্যাচিংরোওয়া তামসা জাংমি নিনা।” 5ইশুহা আবিহিং জাংয়ে, “নাবিকো তুংসিং লুংটুই ত্যাবাপা নিমকো সোতারাং মোসাহা ই আজ্ঞা লামগা।” 6আদো সেংজাহা বাসিমতি দিংনুসোরাং মেমেসো পোজাহিং দিংমগা।1 7আকো সোতারাং দিংঙাহা আয়ুসো আপাহিং হুইতেমসা মেহিংপা য়ুংমগা। 8আসা আবি নিহসোহা জুপাতা ইচো জিংরোওয়া। আকো সোতা আবিহা নিহসো মোকো, আদো জুপাতাহা ইচোগা। 9আকো সোতা সেংজাকো দিংওয়া ইচো জুপাহিংয়া দিংঙাহা মাপেইসপাকো। 10আসা আবি সাতা লাকা পুনতেনুকো নোইতাহা য়োংতোংবিহা ই নুওয়াংকো তোইতা ইশুহিং উইয়ে, 11আত্রংহা ইশুহা আবিহিং জাংয়ে, “হাংসু আপনিকো মেহিং হুইতেমসা দোসরা মেমেহিং বিয়ৌ জো, আকুহা আপনিকো মেকো তোইতা মোসোংপা জোমসা নুংনাংসুওয়াগা। 12মেরে ওয়াহিং হুইতেমসা দোসরাহিং বিয়ৌ জোনাহা আকুরে নুংনাংসুওয়াগা।”

ইশুসো চেংবি

(মথি ১৯:১৩-১৫; লুক ১৮:১৫-১৭)

13দিংঙাবিহা চেংবিকো তোইতা খুই ওইপিকো তামসা ইশুকো আবিতা পারায়ে, আদো য়োংতোংবিহা দিংঙাবিহিং য়েংয়ে। 14ইশুহা য়োংতোংবিকো য়েংওয়া তিংমসা আবিহিং জাংয়ে, “চেংবিহিং কুংতা ওয়াংকো পিচা, আবিহিং মোয়োই, হাংপাতানাহা সেংজাকো রাজ্যহা ইবি বেওয়াকোরাংগা। 15কা নাবিহিংয়া আজিপ্পারাং জাংরোওয়া, আপেচওয়া চেংবি বেপা জিংমক্যইনাহা হাংসুরে সেংজাকো রাজ্যতা হোমকোইরোওয়া।” 16আসা ইশুহা আকু চেংবিহিং নুইতা কোংয়ে। আসা আবিকো পোরোতা খুই ওইমসা আশিষ পিচায়ে।

ইচো পুপুউ দিংঙা

(মথি ১৯:১৬-৩০; লুক ১৮:১৮-৩০)

17আকো নোইতা ইশু ন্যাসারাং ন্যাতাসো হাদাংনুওয়া আত্রংহা ইচো দিংঙাহা ঠুইপামসা ইশুকোতা লেহে, আসা আকু দিংঙাহা চুনুইমসা জাংয়ে, “ও উটকেওয়া, নাতিহা ইচো এনতাওয়া দিংঙাগা। কাহিং জাং, হাত্রংরে মিসিওয়া সাদি মুংচাকো সোতাহা কা হাং জোনেকোগা?” 18ইশুহা আকুহিং জাংয়ে, “কাহিং এনতাওয়া দিংঙা তামসা হাংপাসা জাংমগা? সেংজা ল্যামসা হাংসুরে এনতাওয়া মোতো। 19নাতিহা সেংজাকো জাংওয়া নুওয়াংবিহা গেমগা, দিংঙাহিং ম্যাস্যাকো, মোনুংনাংসুকো, মুকুইকো, মাল্যইপাকো, হাংসুহিংনে অ্যাজাপা মায়্যইকো, আয়ুসো আপাকো নুওয়াং হিংকো।” 20আকু দিংঙাহা ইশুহিং জাংয়ে, “উটকেওয়া, কা আপেচুনুসোরাং ই তাংসা জোমসা ওয়াংমি নিনা।” 21ইশুহা আকুহিং জেজেংপা জোমসা ন্যইয়ে, আসা জাংয়ে, “নাতিহা নেহা ইচো কাম জোকো মেংচে নিও। হোমসা নাতিহা নাকো তাংসা মোংটো-কেটো পিইচাতু আসা জোরোংবিহিং আকু ন্যাস্যাবি চোওপি, আসা নাতিহা লোডিংবাকো পুংজি মুংচারোওয়া। আসা কুং নুনুই হুই।”

22ই য়্যইদি হিংমসা আকু দিংঙাকো য়ুওয়াইহা নাব্বিপা জিংপুয়ে, আসা নাব্বিপা জোমসা হোপুয়ে, হাংপাতানাহা আকোতা উইসে পুংজিবি নিমি।

23ইশুহা হুরাপা ন্যইমসা আকো য়োংতোংবিহিং জাংয়ে, “পুপুউ দিংঙাহিংয়া সেংজাকো রাজ্যকো নাপোতা হোকোহা হোমরাইপা নিও।” 24ইশুকো জাংওয়া হিংমসা য়োংতোংবিহা আআংপেপেচপুয়ে। ইশুহা ন্যাসারাং জাংয়ে, “চেংবাই! সেংজাকো রাজ্যতা হোকোহা সিওপারাং হোমরাইপা নিও। 25ল্যাকো হোংবোইসো ত্যাইরম্যা হোকোহা জাংতোংপা মোতো। আকু বেপারাং পুপুউবিরে সেংজাকো রাজ্যতা হোমক্যই।” 26ই হিংমসা য়োংতোংবিহা ন্যাসারাং আআংপেপেচপুমসা উইয়ে, “এপা বেনাহা হাংসু সেংজাকো লোইতা হোকো চুকোগাসা?” 27ইশুহা আবিহিং ন্যইমসা জাংয়ে, “ইহা দিংঙাকোসোহা মোতুওয়া কামগা, আদো সেংজাসোহা তুরোওয়া, হাংপাতানাহা সেংজাসোহা তাংসা কাম তুমগা”। 28আসা পত্রসহা জাংয়ে, “কাং, কাবিহা তাংসা হুইতেমসা নাকো নুনুই হুইপায়ে।”

29ইশুহা আবিহিং জাংয়ে, “কা আজিপ্পারাং নাবিহিং জাংরোওয়া, কুং সোতা আসা এনতাওয়া দেরেংকো সোতা আপনিকো সা, ডুওয়া এ, আনা-হুম্রি, আয়ু-আপা, আপনিকো চেংচুং, আসা মোংটো-কেটো হুইতেনেনাহা 30ইরোমা একশো গুনা সিওপা মুংচারোওয়া। দোসরাকোসো মেংতাওয়া হিংনেওয়া আসা কোইচ্যানেওয়াহিংপা দাদাপাহা নেরাং আয়ু-আপা চেংওয়া-চেমে, ডুওয়া-এ, আনা-য়েমে, আসা সা, মোংটো-কেটো মুংচারোওয়া। আসা দেপাওয়া সময়তাহা হাত্রংরে মিসিওয়া সাদি মুংচারোওয়া। 31আদো নেকো নাগাই নিওয়াবিহা নুনুই জিংপুরোওয়া আসা নেকো নুনুই নিওয়াবিহা নাগাই জিংপুরোওয়া।”

ইশু সুংকোই চোইপা তাইকো সিরকো ল্যাওয়া

(মথি ২০:১৭-১৯; লুক ১৮:৩১-৩৪)

32ইশুসো আকো য়োংতোংবিহা য়রুশালেমতা হোদাংয়ে। ইশুহা য়োংতোংবিকো নাগাই নাগাই তেইদিংমি। ইশু ন্যাতাসো হোদাংনুওয়া য়োংতোংবিহা আআংপেপেচপুওয়া নিমি আসা দোসরা নুনুই তেইদিংওয়া দিংঙাবিহা চুসুংপুওয়া নিমি। ন্যাসারাং ইশুহা বার্চো য়োংতোংবিহিং ইদ্যাতা মোউমসা ইশুহা আপনি হাং কোইচ্যানেকোমে ল্যায়ে। 33ইশুহা আবিহিং জাংয়ে, “হিং, য়াংবিহা য়রুশালেম হোদাংয়ে, আউতা দেকানুওয়া দিংঙাকো চেংওয়াহিংয়া মাটা পাউবিকোতা আসা তাংজিকো উটকেওয়াবিকোতা স্যইপুরোওয়া। আবিহা আকুহিংয়া স্যানেরোওয়া তামসা দোসরা জ্যাকো দিংঙাবিকোতা স্যইপুরোওয়া। 34আবিহা আকুহিংয়া ন্যইচেইপা জোরোওয়া, তোতি তোতোরোওয়া, সাট্যাসো পোওরোওয়া আসা স্যাপুরোওয়া। আদো সাসুংয়ুংকো নোইতাহা আকুহা সিওয়াসো ন্যাসারাং ঙারোরোওয়া।”

য়াকুবসো য়হুন্নাকো পাচাইওয়া

(মথি ২০:২০-২৮)

35আকো নোইতা জোব্দিকো নিহসো চেংওয়া য়াকুবসো য়হুন্না ইশুকোতা লেমসা জাংয়ে, “উটকেওয়া, কাবিকো তুংসিংকো ইচ্ছা তাংসা তেংপাপি তামসা কাবিহা জাংচোংমি।”

36ইশুহা উইয়ে, “জাং, হাং ঘ্যইকোগা?” 37আবিহা জাংয়ে, “নাতি লোডিংবাকো লোইতা হোনুওয়া কাবি নিসিংপুহা নাকো দাংক্রেং আসা কেক্রেং কাটুতা য়ুংচা মুংকো।” 38ইশুহা জাংয়ে, “নাবিহা হাং য়াদিংমে নাবিরাং মেগেয়াংতো। কা হানি কোইচ্যা, আকুহা নাবিহা কোইচ্যাকো চুকোগা? কুং লাংদাংওয়া বাপ্তিস্মা নাবিহা লাংকো চুকোগা?”

39আবিহা জাংয়ে, “কাবিহা ছুরো।”

ইশুহা আবিহিং জাংয়ে, “কুং কোইচ্যাওয়াহা নাবিরে কোইচ্যাকো চুরোওয়া, কুং লাংদাংওয়া বাপ্তিস্মারে নাবিরে লাংকো চুরোওয়া। 40আদো কুং দাংক্রেং আসা কেক্রেং কাটুতা য়ুংকো কা পিচামক্যইরোওয়া। ই পিচাওয়াহা কা মোকো, আদো হাংসু হাংসুকো সোতা জেংমসা এমি নিমমে সেংজারাং আবিহিং পিচারোওয়া।”

41ই নুওয়াং হিংমসা আকু ত্যাচো য়োংতোংবিহা য়হুন্নাসো য়াকুবহিংপা সেদ্রাংপায়ে। 42আসা ইশুহা আবি তাংসাহিং উদ্যাতা মোউমসা জাংয়ে, “নাবিহা গেমগা, বাসিমতিতা য়ুংওয়া মাটা দিংঙাবিহা আপনিকো নোমবেপা দোসরাহিং মেংচে খুইমগা আসা অধিকার জোমগা। 43নাবিকোতাহা এপা জিংওয়া নিমতুরোওয়া। নাবিতাহা হাংসু টেবো জিংকো কেং, আকুহা নাবি তাংসাকো ডেইয়া জিংনেরোওয়া। 44আসা তাংসারোমা টেবো জিংকো কেংওয়াহা তাংসাকো ডেইয়া জিংনেরোওয়া। 45হাংপাতানাহা দিংঙাকো চেংওয়াহা দোসরা ঘুইজ্রুমে তামসা মোকো, আদো দোসরাহিং য়ুজ্রুকো আসা উইসে দিংঙাহিং সাদি পিচাকো তামসা লেমগা।”

মিচো মিতিংওয়া দিংঙা সাংওয়া

(মথি ২০:২৯-৩৪; লুক ১৮:৩৫-৪৩)

46আকো নোইতা ইশুসো আকো য়োংতোংবিহা য়রিহো শহরতা দেরেহে। আকু শহর হুইতেমসা হোপুনুওয়া উইসে দিংঙাবিরে আবিহিংপা লেহে। ন্যাতাকো আরিতা তিমেইকো চেংওয়া বারতিমোই গাদিংমি। 47আকুহা নাসরতকো ইশু লেওয়া সিদা চ্যইমসা চিলিংমসা জাংয়ে, “ও দাউদ জাইপুকো চেংওয়া ইশু, কাহিং লামতুপি!”

48উইসে দিংঙাবিহা আকুহিংয়া চেকেপা য়ুং তামসা য়েংয়ে। আদো আকুহা সিওপা ন্যাসারাং চিলিংমসা জাংয়ে, “ও দাউদ জাইপুকো চেংওয়া ইশু, কাহিং লামতুপি!”

49ইশুহা তেইদিংওয়া কোকোইত্তা জামসা জাংয়ে, “আকুহিং ইতা মোউ” আবিহা আকু মিচো মিতিংওয়াহিং মোউমসা জাংয়ে, “নাতিহা য়াংতা, ইশুহা নাতিহিং মোউদিংয়ো, সেন্নেপা লেই।” 50আকুহা আপনিকো আংদুং বাডোইমসা তাত্রিংপা লোপামসা ইশুকোতা লেহে।

51ইশুহা আকুহিংয়া উইয়ে, “নাকো সোতা কা হাং জোকোগা?”

মিচো মিতিংওয়া দিংঙাহা জাংয়ে, “উটকেওয়া কা তিংকো ছুকো।”

52ইশুহা জাংয়ে, “হ্যাতু, নাতিহা নাকো দেংওয়াসোরাং মিচো তিংচায়ে।” আত্রংতারাং আকো মিচো তিংয়ে আসা আকুহা ইশুকো নুনুই হুইপুয়ে।