Toto
লুক 22
ইশুহিং স্যাকো কেংওয়া
(মথি ২৬:১-৫,১৪-১৬; মর্কুস ১৪:১-২,১০-১১; য়হুন্না ১১:৪৫-৫৩)
বুইপাওয়া মেং মালুওয়া কোব্রেং চাওয়া মানক্যা দেয়োংদাংতেওয়া নিমি। ইহিংয়া নিস্তার মানক্যা তামগা। মাটা পাউবি আসা তাংজিকো উটকেওয়াবিহা ইশুহিং স্যাকো কেংদিংমি, আদো দিংঙাবিসো চুসুংমকো সোতা আবিহা ইশুহিংয়া চেকেপা স্যাকো কেংদিংমি। আত্রংরাং বার্চো য়োংতোংবিতাহা য়হুদা ইস্করিয়োত তাওয়া দিংঙাকো তুংসিংতা শয়তান হোপুয়ে। আসা আকুহা মাটা পাউবি আসা দেমসাকো সিপাইবিকোতা হোমসা কা ইশুহিং হেপা প্যইপাকোমে তামসা আবিহিংপা হুইসুয়ে। ই হিংমসা আবিহা য়াংতাসুয়ে, আসা আকুহিং ন্যাস্যা পিচারো তামসা জাংয়ে। য়হুদারে য়াংতাচপুয়ে, আসা দিংঙাবি সিদা মোচ্যইপা ইশুহিং চেকেপা প্যইপাকো মৌকা মোয়ে।
নোইস্যাতা চাওয়া আংওয়া
(মথি ২৬:১৭-৩০; মর্কুস ১৪:১২-২৬; য়হুন্না ১৩:২১-৩০)
আসা বুইপাওয়া মেং মালাসিওয়া কোব্রেং চাওয়া মানক্যাকো নাগাইকো দিনতা নিস্তার মানক্যাতাহা সেংজাকো নাগাইতাহা লুকাহিং স্যানেওয়া লিংপাং নিমি। ইশুহা পত্রসহিং আসা য়হুন্নাহিং “হোমসা য়োংকো সোতা নিস্তার মানক্যাকো চাওয়া আংওয়া তৈয়ার জোয়াতু” তামসা নিংপুয়ে।
আবিহা আকুহিংয়া উইয়ে, “কাবিহা হাংতা চাওয়া তৈয়ার জোকোগা?”
ইশুহা জাংয়ে, “কাং, নাবিহা শহরতা চোইয়ানতানি গাংরুতা তি পুপামসা ইচো দিংঙাহিং হোদাংওয়া দোসুরোওয়া, আসা আকো নুনুই নুনুই হোতু। আসা হানি সাতা আকু হো, আকু সাকো গিরিওয়াহিং ‘কা আপনিকো য়োংতোংবিহিংপা গামসা নিস্তার মানক্যা চাওয়া সিরি হাংতা নিংগা?’ তামসা উটকেওয়াহা উইদিংনা তামসা জাং। আকুহা নাবিহিংয়া তোইতা নিও তামসা এনতাপা চোপাপুনতেওয়া টেবো সিরি তিংপারোওয়া। আউতারাং নাবিহা তৈয়ার জো।”
আবিহা হোয়ে, আসা তাংসা নুওয়াং ইশুকো জাংমি ত্যাবাপারাং দোসুয়ে, আসা আবিহা নিস্তার মানক্যা চাকো আউতারাং তৈয়ার জোয়ে।
হাত্রং চাকো সময় দেয়োং, আত্রংহা ইশুহা তাইকো বার্চো জেংওয়া পোইংবিহিংপা চাকো গায়ে। আকুহা আবিহিংয়া জাংয়ে, “কুংতা দুঃখ ওয়াংনুরোমা নাগাই কাহা নাবিহিংপা নিস্তার মানক্যাকো চাওয়া আংওয়া চাকো সিওপারাং ইচ্ছা নিনা। কা নেহা নাবিহিং জাংরোওয়া, সেংজাকো রাজ্যতা ই চাওয়া আংওয়া হাংপা চামমে আকু পুরা মিজিংনু চোইপা, কা ন্যাসারাং ই চাওয়া আংওয়াবিহা মাচারোওয়া।”
আকো নোইতা ইশুহা কচৌরা চুংয়ে, আসা সেংজাহিং গারানি তামসা জাংয়ে, “ই য়ুউমসা তাংসা পোসুমসা আং। কা নাবিহিংয়া জাংরোওয়া, হিনিসো সেংজাকো রাজ্য মেদেরেনু চোইপা কা ন্যাসারাং ই আংগুরকো সাইতি মাআংরোওয়া।”
আকো নোইতা ইশুহা কোব্রেং চুংয়ে, আসা সেংজাহিং গারানি তামসা কোব্রেং চোচোনোনোপা ছিমসা য়োংতোংবিহিং পিচামসা জাংয়ে, “নাবিহিং পিচাওয়া ইহা কুং জুপাগা। ইসো য়ুতাহা কাহিং নোমসা এপারাং চাচাংকো জো।”
এপা জোমসারাং চাপুনতেনুকো নোইতাহা আকুহা আকু কচৌরা চুংমসা য়োংতোংবিহিং পিচামসা জাংয়ে, “ই কচৌরাহা সেংজাকো নাপোইতেওয়া চুবে করারহিং প্রমান জোওয়া কুং য়ুতিগা। ই য়ুতিহা নাবিকো সোতা কা ক্যাপামি নিও। আদো কাং, কাহিং প্যইপাওয়া দিংঙাহা কাহিংপারাং চাকো গাদিংয়ো। সেংজাহা নাগাইসোরাং জাংপুনতেমি ত্যাবাপারাং দিংঙাকো চেংওয়াহা সিনেরোওয়া, আদো টেবো কোইচ্যাওয়া ওয়াংরোওয়া, আকু দিংঙাকোতাহা, হাংসু আকুহিং প্যইপামে।” ই নুওয়াং হিংমসা য়োংতোংবিহা এপা জিংওয়া কামবিহা হাংসু জোদাংমে তামসা তাইবিলারাই উইসুয়ে।
টেবো জিংকো কেংওয়া য়োংতোবি
(মথি ২০:২৫-২৮, ১৯:২৮; মর্কুস ১০:৪২-৪৫)
আকো নোইতাহা য়োংতোংবিহা হাংসু টেবোমে তামসা ন্যাক্যানুকুপা য়্যইসুদাংয়ে। ইশুহা আবিহিংয়া জাংয়ে, “বাসিমতিকো জাইপুবি আসা মাটা দিংঙাবিহা দিংঙাবিকো তোইতা খুইমগা, আসা আবিকো ব্যারোগা তামসা জাংমগা আদো নাবিহা এপা জিংমতুরোওয়া। নাবিকোতাহা হাংসু টেবোনি, আকুহা হাংসুরোমা আত্যইচিংপা জিংনেরোওয়া, আসা হাংসু গিরি জিংকো কেং, আবিহা ডেইয়া ত্যাবাপা জিংনেরোওয়া। চাকো গাওয়া গিরি আসা চাওয়া হোপিওয়া ডেইয়াতাহা হাংসু টেবোগা? গিরি মোকোতা? আদো কাং, কা নাবিকো প্যাকোতা চাওয়া হোপিওয়া ডেইয়া ত্যাবাপা জিংমি নিও।
“কুং তাংসা কোইচ্যাওয়াকো সময়তাহা নাবিহা কাহিংপা নিপিয়ো। কুং আপা কাহিংয়া আজ্ঞা জোকো অধিকার পিচামি নিও। আসা কারে আকু আজ্ঞা নাবিহিং পিচারোওয়া। কুং লোইতাহা নাবিহা কাহিংপারাং গামসারাং চাওয়া আংওয়া চারোওয়া আসা গাদিংতা গামসা ইস্রাইলবিকো বার্চো চিমাকো দিংঙাবিহিং ন্যায় জোরোওয়া।”
ইশুহা পত্রসহিং কোইপাওয়া
(মথি ২৬:৩১-৩৫; মর্কুস ১৪:২৭-৩১; য়হুন্না ১৩:৩৬-৩৮)
আকো নোইতা ইশুহা জাংয়ে, “সিমোন, ও সিমোন, হিং, গেহুংসো ভিতোহিং নোপামি ত্যাবাপা নোকো দেংওয়াহিংয়া নোপাকো অধিকার শয়তানহা সেংজাকোতা য়ামি নিও। আদো নাকো দেংওয়াহা মায়োংকো তামসা কা নোকো সোতা পাচাইমি নিও। ন্যাসারাং কুংতা লায়োংপুনতেনুওয়া আপনিকো আপু এবিহিংনে দেংওয়া সাডিংপা জোপা।”
পত্রসহা জাংয়ে, “প্রভু, কা নাতিহিংপা জেলতা হোনেদো আসা সিনেদো তৈয়ার নিও।”
আদো ইশুহা জাংয়ে, “পত্রস, কা নাতিহিংয়া আজিপ্পারাং জাংরোওয়া, নাতিহা কাহিং সুংকোই চোইপা নাইকোরে মানাইমি তামসা মাজাংনু চোইপা জুকুং হাপকুংহা কেকারাং মোওরোওয়া।”
পরিকচ্ছাতা তৈয়ারি য়ুংকো ঝিপাওয়া
আসা ইশুহা আবিহিং জাংয়ে, “হাত্রং কা নাবিহিংয়া সিপি, কোরোং আসা ন্যাস্যা মিচাপা এনতাওয়া দেরেং হিংপাকো নিংপু, আত্রং নাবিহিংয়া হাইক্রি মেতেং মারাংপা জিংগা?”
আবিহা জাংয়ে, “মাজিংনা”
ইশুহা জাংয়ে, “নেহা ন্যাস্যা নিমবিহা ন্যাস্যা পুউচোইকো, সিপি নিমবিহা সিপি পুউচোইকো, পাটাং মোতামবিহা আপনিকো গুইচাওয়া পেরো পিইচামসা ইচো পাটাং চোইচাকো। হাংপাতানাহা কা নাবিহিংয়া জাংরোওয়া, তাংজিকো হিগাতা আকুহা মেংতাওয়া দিংঙাবিহিংপা চেংচপুমি নিও, তামসা লাওয়া নুওয়াংবিহা কুং তোইতা তাংসা জিংনেরোওয়া। আজিপ্পারাং, কুং তোইতা লাওয়া নুওয়াংবিহা তাংসা জিংমসা ওয়াংদিংয়ো।” য়োংতোংবিহা জাংয়ে, “কাং প্রভু, ইতা নিহসো পাটাং নিও।”
ইশুহা আবিহিংয়া জাংয়ে, “এপা বেনাহা তেংরোওয়া।”
জেইতুন য়্যাগ্যইতা ইশুকো পাচাইওয়া
(মথি ২৬:৩৬-৪৬; মর্কুস ১৪:৩২-৪২)
আতাংকো ত্যাবাপা ইশুহা শহরহিং হুতেমসা জেইতুন য়্যাগ্যইতা হোয়ে, আসা য়োংতোংবিরে আকুহিংপারাং হোয়ে। আকু য়্যাগ্যইতা দেকামসা আকুহা য়োংতোংবিহিং জাংয়ে, “পরিকছাতা হোমঘ্যইকো তামসা নাবিহা পাচাইমসা য়ুং।” আকো নোইতা ইশুহা আসোই তানাং হোমসা চুইনুইমসা পাচাইয়ে। “ও আপা, নাকো ইচ্ছা নিনাহা কুংতা দেপাওয়া ই কোইচ্যাইওয়া কুংসো ওয়েংপাপি, আদো কুং ইচ্ছাসো মোকো নাকো ইচ্ছাসো তাংসা জিংকো।” [আসা লোডিংবাসো ইচো পোইং লেমসা আকুহিংয়া সহায়কো চুওয়া সে পিচায়ে। আকো তুংসিংহা আরাংপারাংপা জিংপুনতেমি নিমি আসা আকুহা পাচাইওয়া পাচাইওয়া জোদিংমি। আকো চেপাহা য়ুতি ত্যাবাপা মোংটোতা হুইদিংমি।] ইশু পাচাইওয়াসো লোমসা য়োংতোংবি নিওয়াতা দেরেনুওয়া য়োংতোবিহা আপনিকো নোচেংতা য়াপুমসা জিংদিংওয়া তিংয়ে।
আকুহা আবিহিংয়া জাংয়ে, “নাবিহা হাংপা জিংসুদিংগা? লো, আসা পরিকছা হোমঘ্যইকো তামসা পাচাইমসা য়ুং।”
ইশুহিং প্যইপুওয়া
(মথি ২৬:৪৭-৫৬; মর্কুস ১৪:৪৩-৫০; য়হুন্না ১৮:৩-১১)
ইশুহা ই নুওয়াং য়্যইদিংওয়া কোকোইত্তা উইসে দিংঙাবিহা আউতা দেরেহে। বার্চো য়োংতোংবিকো প্যাকোতা ইচো য়হুদা তাওয়াহা আবিকো নাগাই নাগাই লেহে, আসা ইশুহিং চুম্মা জোকো আকো আবেইতা হোয়ে।
ইশুহা আকুহিংয়া জাংয়ে, “য়হুদা, নাতিহা দিংঙাকো চেংওয়াহিংয়া চুম্মা জোমসা প্যইপাদাংমগা?”
আত্রংহা আকো আবেই আবেইতা নিওয়া য়োংতোংবিহা ই তিংমসা নেহা হাইক্রি জিংপুকোদোওয়া তাওয়া নোমসা ইশুহিং জাংয়ে, “প্রভু, পাটাংসো ছেপকোগা?” আবিকো প্যাকোতাহা ইচোহা টেবো পাউকো ডেইয়াকো দাংক্রেং কাটুকো নানুং ঠেপুয়ে।
আদো ইশুহা “তুয়ে, লাইপি!” তামসা আকু ডেইয়াকো নানুং সুমসা সাংপাপিয়ে।
ইশুহিং প্যইয়োংকো ওয়াংওয়া মাটা পাউবি, দেমসাকো মাটা সিপাইবি আসা য়হুদি মাটা ওয়ারাংপাবিহিংয়া ইশুহা জাংয়ে, “কা মেংদাংগা? নাবিহা দ্যইসো পাতাং পামসা কাহিং প্যইকো ওয়াংমগা? কা সদাইদিন দেমসাতা নাবিহিংপা নিমগা। আত্রংহা নাবিহা কাহিংয়া হাংপা মোপ্যইমগা? আদো নাবিকো কাম জোওয়া সময়বি দেয়োংতেহে, আসা নাগিওয়াকো সেহা নাবিকো তোইতা কাম জোরোওয়া।”
পত্রস ইশুহিং মানাইমবেপা জোওয়া
(মথি ২৬:৫৭-৭৫; মর্কুস ১৪:৫৩-৭২; য়হুন্না ১৮:১২-২৭)
আকু দিংঙাবিহা ইশুহিং প্যইমসা টেবো পাউকো সাতা পুরায়ে। পত্রসহা বারগাং বার্গাংসো ইশুকো নুনুই নুনুই হুউপুয়ে। দিংঙাবিহা লাংগাংতা মে মেরোপামসা মেয়াংমসা গাদিংমি। পত্রসরে আবিহিংপারাং লেমসা গায়ে। ইচো ডেইয়ামুহা পত্রসহিংয়া ন্যইওয়া ন্যইওয়া জোমসা জাংয়ে, “ই দিংঙারে ইশুহিংপারাং নিমি।”
আদো পত্রসহা মানাইমবেপা জোমসা জাংয়ে, “ও য়োং, কা আকুহিংয়া মানাইমি।”
আম্যই নোইতাহা দোসরা ইচো দিংঙারে আকুহিং তিংমসা জাংয়ে, “নাতিরে আকো ব্যারোরাংসা!”
পত্রসহা জাংয়ে, “ও ব্যারো, কাহা মোকোমি।”
এক ঘন্টাকো নোইতাহা ন্যাসারাং ইচো দিংঙারে পত্রসহিং জাংয়ে, “ই দিংঙারে আজিপ্পারাং ইশুহিংপারাং নিমগা, হাংপাতানাহা ইরে গালীলিরাংগা।”
আদো পত্রসহা জাংয়ে, “ও ব্যারো, নাতিহা হাং জাংদিংমে কা মোকোইতো!” পত্রস এপা জাংওয়া কোকোইত্তা কেকা ওপুয়ে। আত্রংরাং প্রভু ইশুহা পত্রসহিংয়া নোই ল্যামসা ন্যইয়ে, আসা “জুকুং হাপকুং কেকা ওনুরোমা নাগাই নাতিহা কাহিং সুংকোই চোইপা মানাইরোওয়া” তামসা ইশুকো জাংওয়া নুওয়াংহা পত্রসহা নোয়ে। আসা আকুহা বাইরেতা হ্যামসা আপনিকো জোওয়া কাম নোমসা মিতি জাজাপা কাইয়ে।
ইশু জোংসুওয়াকো আবেইতা
(মথি ২৬:৫৯-৬৮; মর্কুস ১৪:৫৫-৬৫; য়হুন্না ১৮:১৯-২৪)
ইশুহিং প্যইপুমসা পুরাওয়া দিংঙাবিহা আকুহিং য়েংপামসা ডুয়ে। আসা আকো মিচো তুংমসা পোমসা উইয়ে, “নেহা সেংজাকো তুংসিংকো নুওয়াং জাংকে, নাতিহিংয়া হাংসু পোংগা?” এপারাং আবিহা আকুহিংয়া লেফেপামসা তু-মোতুওয়া নুওয়াং জাংসুমসা সিয়োপা য়েংসুয়ে।
হাপকুং জেংপুনতানি য়হুদি ওয়ারাংপাবি, মাটা পাউবি আসা তাংজিকো উটকেওয়াবিহা আউতা দেরেহে, আবিহা ইশুহিংয়া য়হুদিবিকো লাচি জাংওয়াতা পুরামসা জাংয়ে, “নাতিহা মুক্তি পিচাওয়া জাইপু খ্রীষ্ট বেনাহা কাবিহিং জাংপুই।”
ইশুহা আবিহিং জাংয়ে, “কা জাংদো নাবিহা মেদেংরোওয়া। কা হাইক্রি উইদো নাবিহা হাইরে জাংমক্যইরোওয়া। আদো ইসো য়ুতাহা কা দিংঙাকো চেংওয়াহা সেংজাকো সেকো দাংক্রেং কাটু গাদিংতা গারোওয়া।”
আবিহা তাংসা জাংয়ে, “এপা বেনাহা নাতিহা সেংজাকো চেংওয়াগা?”
আকুহা জাংয়ে, “নাবিকো জাংমি ত্যাবাপারাং কা আকুরাংগা।”
আকো নুওয়াং হিংমসা আবিহা জাংয়ে, “নেহা ইরোমা সিওপা প্রমানহা হাংপা ঘ্যইকোগা? হাংপাতানাহা য়াংবিহা ইকো নামুসোরাং হিংয়ো।”
Toto. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.