Toto
প্রেরিত 15
য়রুশালেমতা জোংসুওয়া
দিংঙাবিহা য়হুদিয়াকো লুংবিসো লেমসা এন্টিঅখিয়া শহরকো প্রভুকোতা দেংওয়াবিহিং এপা জাংমসা ঝিপায়ে, “মোসাকো পিচাওয়া তাংজিকো লিংপাংবেপা খতনা মোজোপাহা নাবিহা উদ্ধার মুংকো মোচুরোওয়া।” এপাজিংওয়া নুওয়াং ঝিপাদিংওয়া হিংমসা পাউলসো বার্নাবাসহা আবিহিংপা য়্যইসু-জাংসুয়ে। আকো সোতা আউতা য়ুংওয়া এবিহা পাউল, বার্নাবাস আসা এন্টিঅখিয়াতা নিওয়া দোসরা ইচো নিহসোহিং ই নুওয়াংকো তোইতা উইকো জেংওয়া পোইংবি আসা য়রুশালেমতা তাংজিকো মাটাবিকোতা নিংপুকো তামসা হুইসুয়ে। আবিহা য়রুশালেমতা য়ুংওয়া জেংওয়া পোইং আসা মন্ডলিকো দোসরা মাটাবিহিংপা ই নুওয়াংকো তোইতা য়্যইসুকো অনুমতি মুংয়ে। মন্ডলিকো আপু এবি আসা আনা য়েমেবিহা আবিহিং হাইক্রি পিচামসা নিংপুয়ে। আবিহা ফৌনিকে আসা সামরিয়া লুংবিসো জিংমসা হোয়ে। এপারাং হোদাংনুওয়া আবিহা জায়গা জায়গাতা নিওয়া প্রভুহিং দেংওয়া আপু এবিহিং দোসরা জ্যাকো দিংঙাবিরে দেংমি নিও, তাওয়া নুওয়াং হিংপাতেহে, ই নুওয়াং হিংমসা আকু আপু এবিহা তাংসা য়াংতাচপুয়ে।
য়রুশালেম শহরতা দেয়োংনুওয়া আউতা নিওয়া প্রভুহিং দেংওয়া আপু এবি, জেংওয়া পোইং আসা মন্ডলিকো মাটা ওয়ারাংপাবিহা আবিহিং লেইতাহে। আকো নোইতাহা পাউল আসা বার্নাবাসহা আউতা জোংসুওয়া তাংসাহিং সেংজাহা আবিকোসো জোওয়া কামকো বিষয়তা আবিহিং ল্যায়ে। আবিকো নুওয়াং হিংমসা প্রভুহিং দেংওয়া ইচো নিহসো ফরিসিবিহা জামসা এপা জাংয়ে, “দোসরা জ্যাবিসো লেওয়া য়োংতোংবিহা য়হুদিবিকো লিংপাংতা জাংওয়া ত্যাবাপা খতনা জোনেরোওয়া, আসা আবিহিংয়া মোসাকো পিচাওয়া লিংপাংকো খুইওয়াবি তাংসা জোপানেরোওয়া।”
জেংওয়া পোইং আসা মন্ডলিকো মাটা ওয়ারাংপাবিহা ই নুওয়াংকো সোতা জোংসুয়ে। উইসে য়্যইসু-জাংসুপুনতেনুকো নোইতাহা পত্রসহা লোমসা জাংয়ে, “আপু এবাই, নাবিহা গেমি নিও, দোসরা জ্যাকো দিংঙাবিহা প্রভু ইশুকো এনতাওয়া দেরেং হিংমসা দেংমসা মুক্তি মুংচাকো তামসা সেংজাহা কাহিং নাবিকো প্যাকোসো নাগাইসোরাং জেংমি নিমগা। তাংসা দিংঙাবিকো তুংসিং গেওয়া সেংজাহা য়াংবিহিং পিচামি ত্যাবাপা দোসরা জ্যাকো দিংঙাবিহিংনে পবিত্র লাংবে পিচায়ে। এপারাং আকুহা দোসরা জ্যাকো দিংঙাবিহিংনে আপনিকো তামসা তিংপায়ে।
“আকুহা য়হুদি আসা দোসরা জ্যাকো দিংঙাবিকো প্যাকোতা মোয়েংপাতো। দোসরা জ্যাকো দিংঙাবিরে দেংয়ে আসা সেংজাহা আবিকো তুংসিংহিং চোসোপা জোয়ে। য়োংকো আটাবি না য়াংবি ই য়হুদি লিংপাংকো ব্যাহিংয়া হাংসু তোরোইকো চুংগা। আকো সোতা য়োংকো আটাবিকো তোরোইকো মুচুওয়া ব্যাহা দোসরা জ্যাকো দেংওয়াবিহিং পুপোইমসা হাংপা সেংজাহিং পরিকচ্ছা জোকোগা? এপা মোজোসি। আবি ত্যাবাপা য়াংবিরে দেংমসা য়োংকো প্রভু ইশুকো লামতুওয়াসো বাচেমগা।”
আত্রংহা তাংসা চিচোপুয়ে। পাউল আসা বার্নাবাসহা দোসরা জ্যাকো দিংঙাবিকো প্যাকোতা সেংজাহা আবিহিংপা জিংমসা জোওয়া আআংপেপেচপুওয়া কামবিকো তোইতা ল্যানুওয়া তাংসা এনতাপা হিংয়ে।
আবিহা য়্যইমসা ত্যইনতেনুকো নোইতা য়াকুবহা লোমসা জাংয়ে, “আপু এবাই, কুং নুওয়াং হিংপি! সেংজা আপনিরাং লামতুমসা দোসরা জ্যাকো দিংঙাবিকো তুংসিংতা কাম জোমসা আবিহিং আপনিকো দিংঙা বানাইয়ে। ইহা সিমোন পত্রসরাং নাবিহিং নেগাতিগারাং জাংয়ো। অগমবক্তাবিকো হিগাতারে এপারাং লামি নিও,
‘আকো নোইতা কা লারেমসা লেরোওয়া আসা দাউদকো হাপুনতেওয়া লোইহিং ন্যাসারাং লোপারোওয়া,
আসা হাপুনতেওয়াহিংয়া ন্যাসারাং চোপারোওয়া, আসা কা আকুহিংয়া ন্যাসারাং সাডুংপা জাপারোওয়া।
কা কুংরাংগা তামসা বানাইকো মোউওয়া দোসরা জ্যাকো দিংঙাবিহা কুংতা ওয়াংরোওয়া।’
তামসা প্রভুসেংজাহা জাংমগা, হাংসু উইসে দিন নাগাইরাং জাংতেমি নিমে।”1
য়াকুবহা ন্যাসারাং এপা জাংয়ে, “এপা জিংনুওয়া সেংজাকোতা ওয়াংওয়া দোসরা জ্যাকো দিংঙাবিহিংয়া য়াংবিহা মোকোইচ্যাপাসি তাওয়া কুং নোচেং নিও, আদো নেহা য়াংবিহা আবিহিং ইচো চিঠি লাসি, আসা আউতাহা আবিহিংয়া ই নুওয়াংবি জাংমপিরো: ‘মুর্তিহিং পিচাওয়া চাওয়াবি মাচা, নুংনাংসুওয়াসো বার্গাং য়ুং, আসা নেটোং এমসা স্যাওয়া সেংচেংকো বিয়া মাচা আসা য়ুতিবিরে মাআং।’ হাংপাতানাহা মোসাকো পিচাওয়া লিংপাংহা নাগাইসোরাং সানুকো দিনবিতা হাত্রংদো জোংসুওয়া সাবিতারে পড়াইমসা হিংপামকো সোতা আকো ঝিপাওয়া তাংসা শহরবিতারে দিংঙাবিহা গেনতেয়ো।”
দোসরা য়হুদি জ্যাকো দিংঙাবিহিং লাওয়া চিঠি
আকো নোইতা জেংওয়া পোইং আসা মাটা ওয়ারাংপাবিহা প্রভুকোতা দেংওয়া তাংসা মন্ডলিবিহা য়ুংসুমসা নিহসো দিংঙাহিং জেংয়ে। আবিহা আকু নিহসোহিংয়া পাউল আসা বার্নাবাসহিংপা চিত্তা পুরামসা এন্টিঅখিয়া শহরতা ই দেরেং হিংপাকো এনতারোওয়া তামসা নিংপুকো নোসুয়ে। আকু জেংওয়া নিহসো দিংঙাবিহা বার্সাবাস তাওয়া য়হুদা আসা সিলাস নিমি। প্রভুকোতা দেংওয়া তাংসা আপু, এবিতাহা আকু নিহসোহা মাটা নিমি। আকু ডিচোকো খুইতাহা এপাজিংওয়া চিঠি পিচামসা নিংপুয়ে,
“এন্টিঅখিয়া, সিরিয়া আসা কিলিকিয়াতা য়ুংওয়া প্রভুহিং দেংওয়া দোসরা জ্যাকো চেংওয়া চেমেবিহিং নাবিকো আপু এ, জেংওয়া পোইংবি আসা মন্ডলিকো মাটা ওয়ারাংপাবিসো গারানি।
কাবিকো প্যাকোসো হোওয়া লেরা-লেরা দিংঙাবিহা তুইপেং ঝিপামসা নাবিহিং কোইচ্যাপায়ে তাওয়া নুওয়াং কাবিহা হিংমি নিও। আদো কাবিহা আকু দিংঙাবিহিংয়া নিংপুওয়া মোকো। এপা জিংপুনুওয়া কাবিহা জোংসুয়ে, আসা ইচো তুংসিং জিংমসা কাবিকো নোওয়াহা নাবিকোতা দেপাকো কাবিকো প্যাকোসোরাং ইচো নিহসো আপু এবিহিং জেংমসা কাবিকো এনতাওয়া এ পাউল আসা বার্নাবাসহিংপা নিংপুকো নোয়ে। পাউল আসা বার্নাবাসহা প্রভু ইশু খ্রীষ্টকো কামকো সোতা আপনিকো সাদিপারাং য়াংপাপুদাংমি নিমগা। আকো সোতা কাবিহা য়হুদা আসা সিলাসহিং নিংপুমি নিও। কাবিকো লাওয়া নুওয়াং আবি আপনিবিরাং নাবিহিংয়া আপনিকো নামুসো ল্যারোওয়া। নেহা জোনেওয়া হানি ঘ্যইওয়া নুওয়াং নিমে, আকুহিং এমসা নাবিহিংয়া মোসাকো পিচাওয়া লিংপাংকো দোসরা ব্যাবি মোপুকোরাং পবিত্র লাংবে আসা কাবিহা এনতাওয়া নোয়ে। নেহা ঘ্যইওয়া নুওয়াংহা ইরাংগা:
মুর্তিহিং পিচাওয়া হাইরে মাচা,
হাইকোরে য়ুতি মাআং
নেটোং এমসা স্যাওয়া সেংচেংকো বিয়া মাচা
আসা নুংনাংসুওয়াসো তানাং য়ুং।
ই জাংওয়া নুওয়াংবিমি জোনাহা নাবিহিংয়া চোসোপা জিংরোওয়া। নাবি তাংসাহিং এনতাপা জিংকো। কুং জাংকো নুওয়াংহা এসেরাংগা।”
আকো নোইতা আকু দিচো আপু এবিহা আকু চিঠি পুমসা এন্টিঅখিয়া শহরতা হোয়ে। আউতা আবিহা খ্রীষ্ট মন্ডলিকো তাংসা দিংঙাবিহিং মোউমসা আকু চিঠি পিচায়ে। আকু সাডিংপাওয়া চিঠি পড়ামইমসা হিংপানুওয়া আবিহা তাংসা গাগ্রুপে। য়হুদাসো সিলাস আবিরে সেংজাকো কাটুসো য়্যইওয়া অগমবক্তা নিমি। আবিহা প্রভুহিং দেংওয়াবিহিং উইসে নুওয়াংবি ঝিপামসা আবিকো দেংওয়াহিংয়া তোরোইপিয়ে। সাইয়ু নিহয়ু আউতা য়ুংপুনতেনুকো নোইতাহা আউতা নিওয়া সেংজাহিং দেংওয়াবিহা আবিহিংয়া য়রুশালেমকো মন্ডলিতারাং তিমেপা আশিষ পিচামসা নিংপুয়ে। [আদো সিলাসহা আউতারাং য়ুংতেদাংপা তিংমসা আউতারাং য়ুংপুয়ে।]2
আদো পাউলসো বার্নাবাসহা সাইয়ু নিহয়ু এন্টিঅখিয়াতারাং য়ুংয়ে, আসা দোসরা উইসে দিংঙাবিহিংপা চাংসুমসা প্রভুকো নুওয়াংবি হিংপায়ে।
পাউল আসা বার্নাবাস ওয়েংসপুওয়া
সাইয়ু নিহয়ুকো নোইতা পাউলহা বার্নাসহিং জাংয়ে, “নেহা য়াংবিহা সেংজাকো নুওয়াংবি ঝিপাপুনতেওয়া তাংসা শহরবিতা ন্যাসারাং হোরো। প্রভুহিং দেংওয়াবিহিং হেপা নিমে তামসা কোইকো।” বার্নাবাসহা মর্কুস তাওয়া য়হুন্নাহিংয়া চিত্তা পুরাকো কেংয়ে। আদো পাউলহা আদ্যইসোরাং পুরাকো মাকেংতো, হাংপাতানাহা মার্কুসহা তাংসা কাম মোজোপা আবিহিংয়া পামফিলিয়াকো আবেইতা হুইতেমসা লারেওয়া নিমি। আকু নুওয়াংতা পাউল আসা বার্নাবাসহা স্যাসুনেহে আসা আবিহা ওয়েংসপুয়ে। বার্নাবাসহা মার্কুসহিং পুরামসা ঝাহাদিকো ন্যাতা জিংমসা সাইপ্রস বোইদাতা হোয়ে।
পাউলহা আপনিহিং য়ুজ্রুকো সিলাসহিং জেংয়ে। আকো নোইতা প্রভুহিং দেংওয়াবিহা পাউলসো সিলাসহিংয়া হাত্রংদো সেংজাকো লামতুওয়া নাবিহিং য়ুজ্রুকো তামসা সেংজাকো খুইতা স্যইপুয়ে, আসা আবিহা হোপুয়ে। সিরিয়া আসা কিলিকিয়া লোইসো জিংপুমসা হোদাংনুওয়া আবিহা আকো খ্রীষ্ট মন্ডলিবিহিং দেংওয়াতা সাডুংপা জোপুমসা হোয়ে।
Source notes (2)
- Cross-reference আমোস ৯:১১-১২
- Footnote ই য়ইদিহা চুবে লিংপাংতা নিওয়া কোমে মোকোমে তামসা নোমসা লাওয়া য়্যইদি গা।
Toto. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.