Toto
১ কোরোন্থি 5
নুংনাংসুওয়াকো বিরোধতা ন্যায়
নাবিকো প্যাকোতাহা সিওপা নুংনাংসুওয়া নিও তাওয়া হিংদিংয়ো। এপা জিংওয়াবিহা দোসরা সেংজাহিং মানাইমবিকোতারে মাতামগা। নাবিকো প্যাকোতা লেরাহা আপনিকো চিংসোইরি আয়ুহিংনে এচপুনত্যাহ্যা। নাবিকোতাহা লেফেওয়া তাওয়া মাতাংগা? নাবিহা শোক জো আসা এপা জিংওয়া দিংঙাহিংয়া নাবিকো প্যাকোসো নোপাপুই।
কা জুপাতা নাবিহিংপা তানাং নিদো, লাংবেতাহা নাবিহিংপারাং নিও, আসা কা আউতা নিমি ত্যাবাপা এপা জিংওয়া আচকাক্যইওয়া পাপ জোওয়া দিংঙাহিংয়া প্রভু ইশুকো মিংতা ন্যায় জোপুনতেমি নিও। নাবি জমা জিংনুওয়া কারে প্রভু ইশুকো সেহিংপা লাংবেতা নাবিহিংপারাং নিরোওয়া। আকু সময়তাহা পাপি কাম দাংপুকো তামসা আকু দিংঙাহিংয়া শয়তানকো খুইতা1 স্যইপুই, আসা প্রভুকো ন্যায় জোওয়া দিনতাহা হাংসু লাংবেতানি, আবিহা বাচেরোওয়া।
নাবিকো পুংটা জোওয়াহা এনতাওয়া মোকো। নাবিহা মেগেমগা? কি ই পাপহা আস্যস্যই সোরা ত্যাবাপাগা, হানি পিঠোতা লাশিনুওয়া পিঠোহা বুইপুমমে।2 নাবিহা আকু দুষ্ট দিংঙাহিংয়া নোপাপুই, হানি জেবে সোরা ত্যাবাপা নিমমে। আসো মেংচে নাবিহা পুরা সোরা মালাশিপা নাইওয়া পিঠো ত্যাবাপা ছোসোপা জিংরোওয়া। কাং, য়োংকো নিস্তার মানক্যাহা তৈয়ার নিও, হাংপাতানাহা খ্রীষ্ট, হাংসু নিস্তার মানক্যাকো লুকামে, আকুরাং য়োংকো সোতা বলি জিংপুনতেমি নিও।3 আকো সোতা লেই য়াংবিহা ই মানক্যা মানাইকো নাগাইকো মেংতাওয়া জেবে সোরাসো বানাইওয়া কোব্রেং চামসা মানক্যা য়াংবিহা মামানেসি, হানি পাপ আসা দুষ্টতামে, আদো সোরা মালাশিওয়া চোসোওয়া আসা আজিপ্পাকো কোব্রেংসো মানক্যা মানাইসি।
কাহা কুং নাগাইকো চিঠিতাহা নাবিহিংয়া নুংনাংসুওয়াবিহিংপা মেতেইকো তামসা লামি নিমগা। ই জাংওয়াহা, ই বাসিমতিকো নুংনাংসুওয়াবি, মিচাওয়াবি, মেংদাংবি, আসা মুর্তিহিং হুইওয়াবিহিংপা আদ্যইসো মেতেইকো তাওয়া মোকো, মেনাহা নাবিহা বাসিমতিসো বাইরে নোপুমসা হোনেকোগা। আদো নাবিহা এপা জিংওয়া দিংঙাবিহিংপা মেতেইঘ্যই, হাংসু কা খ্রীষ্টান এগা তামসা নুংনাংসুমমে, বাংমমে, মুর্তিহিং হুইমমে, নিন্দা জোমমে, গাইমমে, আসা লুটেমমে এপা জিংওয়া দিংঙাবিহিংপাহা চিত্তা গামসারে মাচাগ্যই তামসা কা লারোওয়া।
বাইরেকো দিংঙাবিহিংয়া ন্যায় জোকোহা কাহিংয়া হাং দরকার নিংগা? আদো নাবিহা মন্ডলিকো নাপোকো দিংঙাবিহিংয়া ন্যায় জোনেকোরাং মোকোতাসা? সেংজারাং বাইরেকো দিংঙাবিহিংয়া ন্যায় জোরোওয়া। তাংজিকো হিগাহা জাংমগা, “দুষ্ট দিংঙাহিংয়া আপনিকো প্যাকোসো নোপাপুই।”4
Source notes (4)
- Footnote শয়তানকো খুইতা স্যইপুই তাওয়াহা আবিকো দলসো নোপাওয়া আসা বাসিমতিকো সেতা পিচাপুওয়াগা।
- Footnote হেপা আস্যস্যই সোরাসোহা পিটোহিং বুইপামমে, এপারাং পাপসোহা তাংসা দেংওয়াবিহিং বিগারেপুমগা।
- Footnote হাত্রং য়হুদিবি নিস্তার মানক্যা মানাই, আত্রংহা আবিহা আপনিকো সাসো তাংসা সোরা বাডোইপুমগা আসা সোরা মালাশিওয়া কোব্রেং চামগা। আবিহা ইপু লুকারে স্যামগা আকুহা আবিকো মিশ্র লোইসো দাসত্বসো উদ্ধার মুংওয়া চিহ্নগা। সোরাহা পাপকো চিহ্নগা আসা খ্রীষ্টহা য়োংকো নিস্তার মানক্যাকো লুকাকো এচেংগা, হাংসু য়াংবিহিং বাচাইকো আসা শুদ্ধ বানাইকো সিমি নিমমে। আকো সোতা য়াংবি আজিপ্পা খ্রীষ্টকো দিংঙা জিংমসা মানাইকো সোতা আপনিকো প্যাকোসো য়োংকো পাপ ওয়েংপানেরোওয়া।
- Cross-reference ব্যবস্থা ১৩:৫, ১৭:৭
Toto. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.