Chiyubunuzyo 15

Baangelo Bala Zyuumyo Zyamamanino

1Eelyo ndakabona chitondezyo chimbi kujulu, chipati alimwi chigambya, baangelo balimusanu ababili bajisi zyuumyo zilimusanu azibili, zyakumamanino, nkaambo alinzizyo bukali bwaLeza bwajinka.

2Alimwi ndakabona chakaliboniya mbuli lwizi luli mbuli ibbwe libalangala livwelene amulilo, abaabo bakalikuzunda chinyama achikozyano chacho amweelwe wazina lyacho, bakaliimvwi atala alwizi luli mbuli ibbwe libalangala atuntimbwa twaLeza mumaboko aabo. 3Alimwi balayimba lwiimbo lwaMozesi, mulanda waLeza, alwiimbo lwaMwana wambelele, kabati,

“O Mwami Leza Singuzu Zyoonse,

milimo yako mipati alimwi ilagambya!

O Mwami wazyiindi,

Nzila zyako nzyalusinizyo, zililuleme!

4O Mwami, ngwani utakuyoowi, akulemeka zina lyako?

Nkaambo nduwe awulikke usalala.

Manyika woonse ayooza

kuzookukomba,

nkaambo milimu yako iluleme yakayubununwa.”

5Musule kwacheechi ndakalanga, mpawo ndakabona ŋanda lyaLeza kujulu, ndidyuumba lyabukamboni kalikwezeme, 6mpawo muŋanda eeyo mwakazwa baangelo balimusanu ababili bakalijisi zyuumyo zilimusanu azibili, kabasamide midabba ituba ingengema, alimwi atwaango twabo kabasamide kadabba kamwingwankwa kangolide. 7Alimwi chimwi chazinyama zine zipona chakapa baangelo balimusanu ababili indido zyangolida zilimusanu azibili zizwide bukali bwaLeza upona kwalyoonse alyoonse, 8Mpawo ŋanda yaLeza yakazula busi buzwa kubulemu bwaLeza akunguzu zyakwe, mpawo taakwe wakakonzya kunjila muŋanda yaLeza mane eezyo zyuumo zilimusanu azibili zyabaangelo balimusanu ababili zyakazuzikizigwa.